Agbalinka a Natured ken Agtignayka

1, 2. (a) Ania a napateg a responsabilidad ti naited ken Solomon? (b) Apay a naseknan ni David ken Solomon?

NAIBILIN ken Solomon nga idauluanna ti kapatgan pay laeng a panagibangon​—ti pannakaibangon ti templo iti Jerusalem. Nakapimpintasto ti patakder nga uray la agdinamagto ti dayag ken kinapintasna iti amin a daga. Kangrunaanna, ti templo ti agbalin a “balay ni Jehova a pudno a Dios.” Imbilin ni Jehova a ni Solomon ti mangidaulo iti proyekto.​—1 Cron. 22:1, 5, 9-11.

² Agtalek ni Ari David iti tulong ni Jehova, ngem agtutubo ken bassit pay ti kapadasan ni Solomon. Addaan ngata iti tured a mangibangon iti templo? Lapped ngata ti kinaubing ken kinaawan kapadasanna? Tapno agballigi ni Solomon, masapul a natured ken agtignay.

 3. Ania ti nasursuro ni Solomon ken amana maipapan iti kinatured?

³ Mabalin a natulad ni Solomon ti kinatured ni amana. Idi agtutubo pay ni David, kinabilna dagiti atap nga animal nga agal-ala iti karnero ni amana. (1 Sam. 17:34, 35) Impakitana pay a talaga a natured isuna idi linabananna ti mannakigubat a higante. Wen, babaen ti tulong ti Dios ken ti maysa a bato, inabak ni David ni Goliat.​—1 Sam. 17:45, 49, 50.

 4. Apay a kasapulan nga agbalin a natured ni Solomon?

⁴ Maikari a talaga ni David a mangpatured ken mangparegta ken Solomon a mangbangon iti templo. (Basaen ti 1 Cronicas 28:20.) No nakapsut ti pakinakem ni Solomon, abaken ti buteng. Nakarkaro pay no saan nga agtignay.

 5. Apay a kasapulantayo ti tured?

⁵ Kas ken Solomon, kasapulantayo ti tulong ni Jehova tapno naturedtayo a mangileppas iti trabaho. Makatulong no utobentayo dagiti pagtuladan iti kinatured idi un-unana. Panunotentayo met no kasano a maipakitatayo a naturedtayo tapno malpastayo ti trabahotayo.

 6. Ania ti magustuam iti kinatured ni Jose?

⁶ Pagsasaritaantayo ti kinatured ni Jose idi ginargari ti asawa ni Potifar nga agaramid seksual nga immoralidad. Ammona a dakes ti mapasamak no agkedked iti asawa ti amona. Ngem imbes nga agpasulisog, pinapigsana ti pakinakemna ken nagtignay.​—Gen. 39:10, 12.

 7. Iladawanyo ti kinatured ni Rahab. (Kitaen ti ladawan iti rugi ti artikulo.)

⁷ Ni Rahab ti maysa pay a pagtuladan iti kinatured. Idi napan dagiti espia nga Israelita iti balayna iti Jerico, mabalin koma a nagbuteng ken pinapanawna ida. Ngem gapu ta agtalek ken Jehova, situtured nga inlemmengna ti dua a lallaki ken tinulonganna ida a makapanaw a sitatalged. (Jos. 2:4, 5, 9, 12-16) Ammo ni Rahab a ni Jehova ti pudno a Dios, ken patienna nga ited ti Dios ti dagada kadagiti Israelita. Saanna nga impalubos a ti panagbuteng iti dadduma, agraman iti ari ti Jerico ken dagiti soldadona, ti manglapped kenkuana nga agtignay. Imbes ketdi, nagtignay iti pamay-an a nagtungpal iti pannakaisalakanna ken ti pamiliana.​—Jos. 6:22, 23.

 8. Ania ti epektona kadagiti apostol ti kinatured ni Jesus?

⁸ Nagsayaat a pagwadan ti kinatured dagiti matalek nga apostol ni Jesus. Nakitada ti kinatured nga impakita ni Jesus. (Mat. 8:28-32; Juan 2:13-17; 18:3-5) Nakatulong ti impakita ni Jesus a pagtuladan tapno agbalinda a natured. Intultuloy dagiti apostol nga isuro ti maipapan iti nagan ni Jesus uray idi binusor ida dagiti Saduceo.​—Ara. 5:17, 18, 27-29.

 9. Kasano a makatulong ti 2 Timoteo 1:7 tapno maammuantayo ti kangrunaan a pagtataudan iti tured?

⁹ Ti kinatured da Jose, Rahab, Jesus, ken dagiti apostol ti nangtignay kadakuada nga agaramid iti naimbag. Naturedda, saan a gapu ta agtalekda unay iti bagida no di ket gapu ta nagpannurayda ken Jehova. Maipasangotayo met kadagiti situasion nga agkasapulan iti tured. Imbes nga agpannuraytayo iti bagitayo, agpannuraytayo ketdi ken Jehova. (Basaen ti 2 Timoteo 1:7.) Kitaentayo ti dua nga aspeto ti biag nga agkasapulantayo iti tured: iti pamilia ken iti kongregasion.

10. Apay a kasapulan dagiti agtutubo a Kristiano ti tured?

¹⁰ Mabalin a maipasango dagiti agtutubo a Kristiano iti adu a situasion a masapul nga agbalinda a natured nga agserbi ken Jehova. Makasursuroda ken Solomon ken matuladda ti turedna nga agaramid iti umiso a desision tapno mairingpasna ti templo. Nupay mabalin ken masapul nga agpaiwanwan dagiti agtutubo a Kristiano kadagiti nagannakda, adda dagiti napateg a desision a masapul nga aramidenda. (Prov. 27:11) Agkasapulanda iti tured no agdesisionda maipapan iti pakikadkaduaanda, nasayaat a pagpalpaliwaan, kinadalus iti moral, ken panagpabautisar. Ngamin, busbusoren dagitoy nga agtutubo ti pagayatan ni Satanas, daydiay mangrurrurod iti Dios.

11, 12. (a) Kasano nga impakita ni Moises ti kinatured? (b) Kasano a matulad dagiti agtutubo ni Moises?

¹¹ Ti maysa a nagpateg a desisionan dagiti agtutubo ket maipapan kadagiti planoda. Iti dadduma a pagilian, mapilit dagiti agtutubo a manggaw-at kadagiti ambision a mangiparegta iti nangato nga edukasion ken trabaho a nangato ti sueldona. Iti dadduma a lugar, mabalin nga ipamaysa dagiti agtutubo a tulongan ti pamiliada gapu iti rigat ti panagbiag. No maipaspasangoka iti aniaman kadagita, panunotem ti kapadasan ni Moises. Ti balasang ni Faraon ti nangpadakkel kenkuana isu a mabalin koma nga inambisionna ti agbalin a nalatak ken nabaknang. Sigurado a napadasanna ti napilit gapu kadagiti mannursuro, mamalbalakadna, ken iti pamilia nga Egipcio ti dimmakkelanna. Imbes nga agpaimpluensia ni Moises, situtured a sinurotna ti pudno a panagdaydayaw. Idi pinanawan ni Moises ti kinabaknang ti Egipto, nagtalek ken Jehova. (Heb. 11:24-26) Gapuna, binendisionan ni Jehova ni Moises, ken sigurado nga adunto pay a bendision ti awatenna.

¹² Bendisionan met ni Jehova dagiti agtutubo a natured a mangikeddeng kadagiti naespirituan a kalat ken mangyun-una iti Pagarian. Tulonganna ida iti kasapulan ti pamiliada. Idi umuna a siglo, dagiti naespirituan a kalat ti impamaysa ti agtutubo a ni Timoteo, ket kabaelam met dayta.a​—Basaen ti Filipos 2:19-22.

13. Kasano a nakatulong ti tured tapno magaw-at ti maysa nga agtutubo dagiti planona?

¹³ Maysa a sister a taga-Alabama, U.S.A. ti masapul nga agbalin a natured tapno makaaramid kadagiti naespirituan a kalat. Insuratna: “Managbabainak idi. Manmanoak a makisarita iti kakabsat iti Kingdom Hall, aglalon no agtuktokak iti ridaw dagiti diak am-ammo.” Gapu iti tulong dagiti dadakkelna ken ti dadduma iti kongregasion, nagaw-at daytoy nga agtutubo ti planona nga agpayunir. Kunana: “Iparparegta ti lubong ni Satanas a nasayaat nga ambision ti nangato nga edukasion, kinalatak, kuarta, ken panagpabaknang. Masansan a saan a maragpat dagitoy ken mangted laeng iti stress ken pannakapaay. Ngem ti panagserbi ken Jehova ti nangted kaniak iti kasta unay a ragsak ken pannakapnek.”

14. Ania dagiti situasion a masapul a natured dagiti nagannak?

¹⁴ Kasapulan met dagiti Kristiano a nagannak ti tured. Kas pagarigan, mabalin a kiddawen ti amom nga ag-overtime-ka iti rabii ken iti ngudo ti lawas​—ti tiempom para iti panagdaydayaw ti pamilia, panangasaba, ken pannakigimong. Kasapulam ti tured nga agkedked kadagita tapno makaipakitaka iti nasayaat a pagtuladan iti annakmo. Wenno mabalin nga adda dagiti nagannak iti kongregasionyo a mangipalpalubos nga aramiden ti annakda ti bambanag a saanmo a kayat nga aramiden ti anakmo. Mabalin a damagen dagita a nagannak no apay a saan nga aramiden dagita ti anakmo. Naannad ken naturedka ngata a mangilawlawag iti desisionmo?

15. Kasano a makatulong kadagiti nagannak ti Salmo 37:25 ken Hebreo 13:5?

¹⁵ Maipakitatayo ti tured no tulongantayo dagiti annaktayo nga agaramid ken manggaw-at kadagiti naespirituan a plano. Kas pagarigan, mabalin a di kayat ti dadduma a nagannak a paregtaen ti annakda nga agpayunir, agserbi iti lugar nga agkasapulan, agserbi iti Bethel, wenno agboluntario iti konstruksion. Mabalin a madanagan dagiti nagannak a saanto idan a maaywanan dagiti annakda inton nataengandan. Ngem ipakita dagiti masirib a nagannak ti tured ken agtalekda kadagiti kari ni Jehova. (Basaen ti Salmo 37:25; Hebreo 13:5.) Maipakitam pay a naturedka ken agpampannurayka ken Jehova no tulongam dagiti annakmo a mangtulad kenka.​—1 Sam. 1:27, 28; 2 Tim. 3:14, 15.

16. Kasano a tinulongan ti dadduma a nagannak a maaddaan iti naespirituan a kalat ti annakda, ket ania dagiti nasayaat nga epekto dayta?

¹⁶ Tinulongan ti maysa nga agassawa idiay United States ti annakda a mangikeddeng iti naespirituan a kalat. Kinuna ti asawa a lalaki: “Agkarkaradap pay la idi ti annakmi, ibagbagamin kadakuada a naragsak ti agpayunir ken agserbi iti kongregasion. Dayta itan ti kalatda. Gapu ta addaan dagiti annakmi iti naespirituan a kalat ken ragragpatenda dagita, malabananda ti panangpilit ti lubong ni Satanas ken makapagpokusda ken Jehova.” Insurat met ti maysa a kabsat nga addaan iti dua nga annak: “Adu a nagannak ti mangisaksakripisio iti pigsa ken sanikuada tapno laeng magaw-at ti annakda ti ambisionda iti isports, panagrelaks, ken edukasion. Napatpateg nga agsakripisiotayo a mangusar iti pigsa ken sanikuatayo a tumulong iti annaktayo a manggaw-at iti kalatda a makatulong tapno kanayon a maragsakan kadakuada ni Jehova. Nakaragragsakak no makitkitak a magawgaw-at dagiti annakko dagiti naespirituan a kalatda ken no supsuportarak ida.” Masiguradom a bendisionan ni Jehova dagiti nagannak a tumulong iti annakda a mangikeddeng ken mangragpat kadagiti naespirituan a kalat.

17. Ania dagiti situasion iti kongregasion a kasapulan ti tured?

¹⁷ Kasapulan met ti tured iti kongregasion. Kas pagarigan, kasapulan dagiti panglakayen ti tured no asikasuenda dagiti hudisial a bambanag wenno dagiti serioso a situasion maipapan iti salun-at a mamagpeggad iti biag. Bumisbisita met iti pagbaludan ti dadduma a panglakayen tapno ipaayda ti naespirituan a kasapulan dagiti balud. Dagiti ngay awanan asawa a kakabsat a babbai? Adu itan ti gundawayda a mangpalawa iti ministerioda babaen ti panagpayunir, panagboluntario iti lugar nga agkasapulan wenno iti Local Design/Construction, ken panagaplay iti School for Kingdom Evangelizers. Adda pay ketdi dagiti nakapagadal iti Gilead School.

18. Kasano a maipakita dagiti nataenganen a kakabsat a babbai ti tured?

¹⁸ Bendision iti kongregasion dagiti nataengan a kakabsat a babbai. Ay-ayatentayo la unay ida! Mabalin a saandan a maaramid ti dati nga ar-aramidenda iti panagserbida iti Dios, ngem maipakitada latta ti tured ken adda maaramidanda. (Basaen ti Tito 2:3-5.) Kas pagarigan, kasapulan ti nataengan a sister ti tured no makiddaw a kasaritana ti ub-ubing a kabsat maipapan iti naemma a panagbadbado. Saanna nga ungtan, ngem mabalin a maparegtana ti kabsat a mangpanunot iti epekto ti panagbadbadona iti dadduma. (1 Tim. 2:9, 10) Mabalin a nasayaat ti resulta dayta nga ebkas ti ayat.

19. (a) Kasano a tumured dagiti bautisado a lallaki? (b) Kasano a makatulong ti Filipos 2:13 ken 4:13 tapno tumured dagiti kakabsat a lallaki?

¹⁹ Masapul met nga agbalin a natured ken agtignay dagiti bautisado a kakabsat a lallaki. Bendision iti kongregasion dagiti napigsa ti pakinakemna a lallaki a nakasagana nga umawat iti kanayonan a responsabilidad. (1 Tim. 3:1) Ngem mabalin nga adda dagiti agalikaka a rumagpat. Mabalin nga adda basol a naaramid ti maysa a kabsat a lalaki iti naglabas isu a mariknana a saan a maikari nga agbalin a ministerial nga adipen wenno panglakayen. Mabalin met a marikna ti maysa a kabsat a lalaki a saanna a kabaelan nga ibaklay ti maysa a responsabilidad. No kasta ti marikriknam, matulongannaka ni Jehova a tumured. (Basaen ti Filipos 2:13; 4:13.) Laglagipem a narikna met idi ni Moises nga isu ket saan a maikari iti maysa nga annongen. (Ex. 3:11) Ngem tinulongan ni Jehova, ket idi agangay, timmured ni Moises a mangaramid iti trabahona. Tumured met ti maysa a bautisado a lalaki no ikararagna ti tulong ni Jehova ken inaldaw a basaenna ti Biblia. Makatulong met ti panangutobna kadagiti pagtuladan iti kinatured iti Biblia. Mabalin a sipapakumbaba nga ibagana kadagiti panglakayen a kayatna ti masanay ken agpausar iti aniaman a panagkasapulan. Paregtaendakayo amin a bautisado a lallaki nga agbalin a natured ken ikagumaanyo ti tumulong iti kongregasion!

20, 21. (a) Ania ti impasigurado ni David ken Solomon? (b) Ania ti masiguradotayo?

²⁰ Impalagip ni Ari David ken Solomon nga isu ket tulongan ni Jehova agingga a malpas ti templo. (1 Cron. 28:20) Naimula dayta iti puso ken panunot ni Solomon ket dina impalubos a manglapped kenkuana ti kinaagtutubo ken ti kinaawan kapadasanna. Nagbalin a natured, nagtignay, ket nalpasna ti nakapimpintas a templo iti pito ket kagudua a tawen babaen ti tulong ni Jehova.

²¹ No kasano a tinulongan ni Apo Jehova ni Solomon, matulongannatayo met a tumured ken mangileppas iti trabahotayo para iti pamiliatayo ken iti kongregasion. (Isa. 41:10, 13) No naturedtayo a mangidaydayaw ken Jehova, bendisionannatayo ita ken iti masanguanan. Agbalinka ngarud a natured ken agtignayka!