Ania a Kita ti Ayat ti Mangyeg iti Pudpudno a Kinaragsak?

 1. Apay a naidumduma ti panawen a pagbibiagantayo?

AGBIBIAGTAYO iti naidumduma a panawen iti pakasaritaan ti tao. Kas impakpakauna ti Biblia, ur-urnongen ni Jehova ti ‘maysa a dakkel a bunggoy manipud iti amin a nasion, tribu, ili, ken pagsasao.’ Dagidiay naurnong ket “maysa a mannakabalin a nasion” a buklen ti nasurok a walo a milion a naragsak a tattao a ‘mangipapaay iti Dios iti sagrado a panagserbi iti aldaw ken rabii.’ (Apoc. 7:9, 15; Isa. 60:22) Ita pay laeng a makita ti kasta kaadu a tattao a mangay-ayat iti Dios ken iti padada a tao.

 2. Ania a di umiso a kita ti ayat ti pakabigbigan dagiti tattao a saan nga agserserbi iti Dios? (Kitaen ti ladawan iti rugi ti artikulo.)

² Nupay kasta, impakpakauna met ti naipaltiing a Kasuratan nga iti panawentayo, ti di umiso a kita ti ayat a mailasin babaen ti agimbubukodan a kababalin ket ipakita dagiti tattao a saan nga agserserbi iti Dios. Insurat ni apostol Pablo: ‘Kadagiti maudi nga aldaw dagiti tattao managayatdanto iti bagbagida, managayat iti kuarta, managayat iti ragragsak imbes a managayat iti Dios.’ (2 Tim. 3:1-4) Naiduma dayta nga ayat iti Nakristianuan nga ayat. Saan a maited dagiti agimbubukodan a kalat ti kinaragsak a birbiroken dagiti tattao. Kinapudnona, pagbalbalinenna ti lubong a managimbubukodan ken “narigat a pakilangenan.”

 3. Ania ti pagsasaritaantayo iti daytoy nga artikulo, ken apay?

³ Ammo ni Pablo a napeggad kadagiti Kristiano dayta a nasaknap a managimbubukodan nga ayat, isu nga impakdaarna nga ‘umadayotayo’ kadagiti mangipakpakita iti di umiso a kita ti ayat. (2 Tim. 3:5) Ngem ditay naan-anay a maliklikan dagita a tattao. Kasano ngarud a maliklikantayo dagiti nailubongan a kababalin a gagangay iti aglawlawtayo ken maikagumaantayo a maparagsak ni Jehova, ti Dios ti ayat? Kitaentayo ti nagdumaan ti nadiosan nga ayat ken ti ayat a nadakamat iti 2 Timoteo 3:2-4. Makatulong dayta tapno masukimat ken mapasayaattayo ti ayat a masapul nga ipakitatayo, ti kita ti ayat a mangyeg iti pudpudno a pannakapnek ken kinaragsak.

 4. Apay a saan a dakes ti balanse a panagayat iti bagi?

⁴ “Dagiti tattao managayatdanto iti bagbagida,” insurat ti napaltiingan nga apostol. Dakes kadi nga ayatentayo ti bagitayo? Saan. Normal dayta, ken kasapulan pay ketdi ti balanse a panagayat iti bagi. Dinisenionatayo ni Jehova a kasta. Kinuna ni Jesus: “Masapul nga ayatem ti padam a tao a kas iti bagim.” (Mar. 12:31) No saantayo nga ay-ayaten ti bagitayo, ditay maayat ti padatayo a tao. Mabasatayo met iti Kasuratan: “Dagiti lallaki ayatenda dagiti assawada a kas kadagiti bukodda a bagi. Ti agayat iti asawana a babai ay-ayatenna ti bagina, ta awan pay a pulos ti tao a nanggura iti bukodna a lasag; no di ket taraonan ken ipatpategna dayta.” (Efe. 5:28, 29) Nagsayaat ngarud ti balanse a panagayat iti bagi.

 5. Kasanoyo nga iladawan dagiti tattao a nalabes ti panagayatda iti bagbagida?

⁵ Saan a normal ken saan a balanse nga ayat ti panagayat iti bagi a nadakamat iti 2 Timoteo 3:2. Managimbubukodan ken di umiso dayta nga ayat. Dagidiay sobra ti panagayatda iti bagida, nalabes ti panangpampanunotda iti bagida. (Basaen Roma 12:3.) Ti bagida ti kangrunaan a pampanunotenda. Dida unay maseknan iti sabsabali. No adda di nasayaat a mapasamak, pabasolenda ti dadduma ket ipuerada ti bagida iti responsabilidad. Sigun iti maysa a komentario iti Biblia, nayarigda iti animal a maawagan iti ‘hedgehog nga agkukot a kasla bola, ket isu laeng ti mabenepisiaran iti naimeng ken nalamuyot a dutdotna bayat a dagiti natitirad a siit iti bagina ti isarangna iti dadduma.’ Saan a pudpudno a naragsak dagiti kasta a managimbubukodan a tattao.

 6. Ania dagiti ibunga ti panagayat iti Dios?

⁶ Kuna dagiti eskolar ti Biblia a ti panagayat iti bagi ti kangrunaan kadagiti negatibo a kababalin a dinakamat ni apostol Pablo a nasaknap iti maudi nga al-aldaw ta agtaud iti dayta ti dadduma a kababalin. Ngem dakkel ti nakaidumaan ti bunga a patauden dagiti tattao a mangay-ayat iti Dios. Innaig ti Biblia ti nadiosan nga ayat iti rag-o, talna, kinaanus, kinamanangngaasi, kinaimbag, pammati, kinaalumamay, ken panagteppel. (Gal. 5:22, 23) Insurat ti salmista: “Naragsak ti ili a ti Diosna isu ni Jehova!” (Sal. 144:15) Naragsak a Dios ni Jehova, ket iparparangarang dayta dagiti adipenna. Maragsakanda met nga agsakripisio para iti pagimbagan ti sabsabali, saan a kas kadagidiay managayat iti bagbagida ken kadagidiay ti laeng kayatda ket umawat.—Ara. 20:35.

 7. Ania dagiti saludsod a makatulong kadatayo a mangsukimat iti ayattayo iti Dios?

⁷ Kasanotayo a maammuan no mas ay-ayatentayon ti bagitayo ngem iti Dios? Usigentayo ti balakad iti Filipos 2:3, 4: “Awan ti aniaman nga aramidenyo gapu iti rinnupir wenno gapu iti panangipasindayaw iti bagi, no di ket buyogen ti kinapakumbaba iti isip nga ibilangyo a ti dadduma nangatngatoda ngem dakayo, nga itultuloyyo a kitaen, saan a ti personal a panaginteres iti laeng bukodyo a bambanag, no di ket kasta met ti personal a panaginteres iti bambanag ti sabsabali.” Isaludsodtayo iti bagitayo: ‘Iyap-aplikarko kadi dayta a balakad? Talaga kadi nga ikagkagumaak nga aramiden ti pagayatan ti Dios? Ikagkagumaak kadi a tulongan ti dadduma, iti kongregasion ken iti ministerio?’ Saan a kanayon a nalaka nga ipaay ti panawen ken pigsatayo. Kasapulan nga agregget ken agsakripisiotayo. Adda kadi pay mas mangparagsak kadatayo ngem iti pannakaammotayo a maparparagsaktayo ti Kangatuan iti uniberso?

 8. Ania ti inaramid ti dadduma gapu iti panagayatda iti Dios?

⁸ Gapu iti panagayat iti Dios, tinallikudan ti dadduma dagiti oportunidad a mangpabaknang koma kadakuada tapno ad-adda a makapagserbida ken Jehova. Ni Ericka a taga-United States ket maysa a doktor. Imbes a gaw-atenna ti nangato a posision iti medisina, pinilina ti nagpayunir ken nagboluntarioda ken lakayna iti sumagmamano a pagilian. Iti pananglagipna iti napalabas, kunana: “Dagiti adu a kapadasanmi iti panagboluntario iti teritoria a sabali ti pagsasaona, ken dagiti nagbalin a gagayyemmi, ti pudno a nangpabaknang iti biagmi. Us-usarek latta ti kinadoktorko, ngem marikriknak ti pudno a kinaragsak ken pannakapnek ta ad-adu ti tiempo ken pigsa nga us-usarek a tumulong kadagiti tattao nga umimbag iti naespirituan ken tumulong iti kongregasion.”

 9. Apay a saan a mangyeg iti ragsak ti panagayat iti kuarta?

⁹ Insurat ni Pablo a dagiti tattao ‘managayatdanto iti kuarta.’ Tawtawenen ti napalabas, adda payunir idiay Ireland a nakisarita iti maysa a lalaki maipapan iti Dios. Innala ti lalaki ti pitakana sa nangiruar iti sumagmamano a kuarta. Inngatona dagita sa sipapannakkel nga imbagana, “Daytoy ti diosko!” Nupay saanda nga aminen, nakaad-adu ti mangay-ayat iti kuarta ken kadagiti banag a magatangna. Ngem ipakdaar ti Biblia: “Ti managayat laeng iti pirak saanto a mapnek iti pirak, uray ti asinoman a managayat iti kinabaknang saanto a mapnek iti sapul.” (Ecl. 5:10) Awan pannakapnek dagita a tattao, ken ikagumaanda ti maaddaan iti ad-adu pay a kuarta, isu nga agresulta dayta iti “adu nga ut-ot.”—1 Tim. 6:9, 10.

10. Ania ti kuna ti Biblia maipapan iti panagbalin a nabaknang ken napanglaw?

¹⁰ Siempre, kasapulantayo amin ti kuarta. Makaited met dayta iti proteksion. (Ecl. 7:12) Ngem naragsaktayo ngata no ti laeng umdas a kasapulantayo ti adda kadatayo? Wen! (Basaen ti Eclesiastes 5:12.) Insurat ni Agur nga anak ni Jaque: “Saannak nga ikkan iti kinakurapay wenno uray kinabaknang. Bay-annak a mangalun-on iti taraon a naibilin nga agpaay kaniak.” Matarusantayo no apay a dina kayat ti agbalin a nakapangpanglaw. Inlawlawagna a dina kayat ti masulisog nga agtakaw ta pakaibabainan ti Dios ti panagtakaw. Ngem apay a saanna nga inkararag ti bumaknang? Insuratna: “Tapno saanak a mapnek ket pudno nga ilibakka ket kunaek: ‘Siasino ni Jehova?’” (Prov. 30:8, 9) Nalabit adda dagidiay mapanunotmo a mas agtalek iti kinabaknangda ngem iti Dios.

11. Ania ti imbalakad ni Jesus maipapan iti kuarta?

¹¹ Dagiti managayat iti kuarta saanda a maparagsak ti Dios. Kinuna ni Jesus: “Awan ti makabalin nga agpaadipen iti dua nga appo; ta mabalin a guraenna ti maysa ket ayatenna ti sabali, wenno agtalinaed iti maysa ket umsienna ti sabali. Saanyo a mabalin ti agpaadipen iti Dios ken iti Kinabaknang.” Inrugina dayta babaen ti panangibagana: “Isardengyo ti agurnong maipaay iti bagbagiyo kadagiti gameng iti daga, sadiay nga ibusen ti sanga ken lati, ken sadiay a serken ken takawen dagiti mannanakaw. Imbes ketdi, agurnongkayo maipaay iti bagbagiyo kadagiti gameng idiay langit, sadiay a saan nga ibusen ti sanga wenno uray lati, ken sadiay a saan a serreken ken takawen dagiti mannanakaw.”—Mat. 6:19, 20, 24.

12. Apay a nalaklaka ti agserbi iti Dios no simple ti panagbiag? Mangted iti pagarigan.

¹² Adu ti nakapaneknek a naragragsakda ken ad-adu ti panawenda nga agserbi ken Jehova ta simple ti panagbiagda. Ni Jack, a taga-United States, inlakona ti dakkel a balayna ken ti negosiona tapno makapagpayunirda nga agassawa. Kunana: “Narigat a panawan ti napintas a balay ken sanikuami iti lugarmi. Ngem adu a tawen a masansan nga agawidak idi a dismayado gapu kadagiti problema iti pagtrabahuan. Ni met baketko, a maysa a payunir, ket kanayon a nakaragragsak. Masansan nga ibagana, ‘Ti boss-ko ti kasayaatan a boss!’ Ita ta payunirakon, agtrabtrabahokamin nga agpadpada para ken Jehova.”

13. Kasano a maammuantayo ti pudpudno a panangmatmattayo iti kuarta?

¹³ Tapno maammuantayo no ania a talaga ti panangmatmattayo iti kuarta, nasayaat no kitaentayo ti agpaypayso a sungbattayo kadagitoy a saludsod: ‘Talaga kadi a patiek ken agbibiagak maitunos iti ibagbaga ti Biblia maipapan iti kuarta? Ipangpangrunak kadi ti panagsapul iti kuarta? Napatpateg kadi kaniak dagiti material a banag ngem iti relasionko ken Jehova ken kadagiti tattao? Talaga kadi nga agtalekak nga ipaay ni Jehova dagiti kasapulak?’ Masiguradotayo a saanna a pulos paayen dagiti mangnamnama kenkuana.—Mat. 6:33.

14. Ania ti balanse a panangmatmat iti ragragsak?

¹⁴ Kas naipadto, adu ita ti “managayat iti ragragsak.” No kasano a saan a dakes ti balanse a panangmatmat iti bagi ken iti kuarta, kasta met ti balanse a panangmatmat iti ragragsak. Saan a kayat ni Jehova nga imutantayo ti bagitayo wenno ditay pulos makiraman kadagiti nasayaat nga aktibidad a makaparagsak. Iparegta ti Biblia kadagidiay matalek: “Mapanka, kanem ti taraonmo buyogen ti panagrag-o ket inumem ti arakmo buyogen ti naimbag a puso.”—Ecl. 9:7.

15. Ania a kita ti ragragsak ti tuktukoyen ti 2 Timoteo 3:4?

¹⁵ Ti tuktukoyen ti 2 Timoteo 3:4 ket dagidiay managayat iti ragragsak a saan a mangikabkabilangan iti Dios. Siputanyo ta saan nga ibaga dayta a bersikulo nga ad-adda nga ay-ayaten dagita a tattao ti ragragsak ngem iti Dios, a kasla adda met bassit panagayatda iti Dios. Ibagana ketdi nga, ‘imbes nga iti Dios.’ Insurat ti maysa nga eskolar: “Saan a pulos a kaipapanan daytoy [a bersikulo] nga adda met panagayatda iti Dios. Ti kayatna a sawen ket awan a pulos panagayatda iti Dios.” Serioso dayta a pakdaar kadagidiay nalabes ti panagayatda iti ragragsak! Ti sasao a “managayat iti ragragsak” iladawanna dagidiay ‘nayaw-awan kadagiti ragragsak daytoy a biag.’—Luc. 8:14.

16, 17. Ania a pagwadan ti impakita ni Jesus maipapan iti panagragragsak?

¹⁶ Nangipakita ni Jesus iti balanse a panangmatmat iti ragragsak. Immatender iti “maysa a padaya ti kasar” ken iti maysa a “dakkel a padaya.” (Juan 2:1-10; Luc. 5:29) Iti kasar, simimilagro nga inaramidna nga arak ti danum, gapu ta dandani idin maibus ti arak. Iti sabali met nga okasion, kinondenarna ti saan a balanse a panangmatmat dagiti tattao a nangbabalaw kenkuana mainaig iti pannangan ken panaginum.—Luc. 7:33-36.

¹⁷ Ngem saan a ti ragragsak ti kapatgan ken Jesus. Impangpangrunana ni Jehova ken nagsakripisio para iti sabsabali. Tapno adu ti maikkan iti gundaway nga agbiag, situtulok nga inibturanna ti nasaem nga ipapatay iti maysa a poste. Kinuna ni Jesus kadagidiay mangtulad kenkuana: “Naragsakkayo inton umsiendakayo dagiti tattao ken idadanesdakayo ken siuulbod a sawenda ti tunggal kita ti nadangkes a banag a maibusor kadakayo maigapu kaniak. Agrag-o ken aglagtokayo gapu iti rag-o, yantangay dakkel ti gunggonayo iti langlangit; ta iti kasta a pamay-an indadanesda dagiti mammadto nga immun-una ngem dakayo.”—Mat. 5:11, 12.

18. Ania ti makatulong tapno maammuantayo no kasano kapateg ti ragragsak kadatayo?

¹⁸ Ania ti makatulong tapno masukimattayo no kasano kapateg ti ragragsak kadatayo? Nasayaat no isaludsodtayo iti bagitayo: ‘Napatpateg kadi kaniak ti panaglinglingay ngem iti pannakigimong ken panangasaba? Nakasaganaak kadi a mangisakripisio kadagiti pagay-ayatko gapu ta kayatko ti agserbi iti Dios? No agpiliak kadagiti paglinglingayan, ikabkabilangak kadi ti kayat ni Jehova?’ No talaga nga ay-ayatentayo ni Jehova, saan la a dagiti kagurana ti liklikantayo no di ket uray dagiti ipagaruptayo a kagurana.—Basaen ti Mateo 22:37, 38.

19. Asino dagiti saan a pulos agbalin a pudpudno a naragsak?

¹⁹ Agarup 6,000 a tawenen nga agrigrigat ti tao, ket dandanin agpatingga ti lubong ni Satanas. Nakaad-adu ita ti nalabes ti panagayatda iti bagida, iti kuarta, ken iti ragragsak. Ti laeng pagimbaganda ti pampanunotenda ken dagiti kayatda ti ipangpangrunada. Saan a pulos nga agbalin a pudno a naragsak dagita a tattao. Maisupadi iti dayta, insurat ti salmista: “Naragsak daydiay a ti Dios ni Jacob ti katulonganna, a ti namnamana adda ken Jehova a Diosna.”—Sal. 146:5.

20. Kasano a nangyeg kenka iti ragsak ti panagayatmo iti Dios?

²⁰ Umun-uneg ti panagayat dagiti adipen ti Dios kenkuana, ken umad-aduda iti kada tawen. Pammaneknek dayta nga agturturayen ti Pagarian ti Dios ken dandaninan ipaay ditoy daga dagiti di mailadawan a bendision. Maaddaantayo iti pudpudno ken manayon a ragsak no ar-aramidentayo ti pagayatan ti Dios ken no ammotayo a maparparagsaktayo Daydiay Kangatuan. Agnanayonto met a naragsak dagidiay mangay-ayat ken Jehova! Iti sumaruno nga artikulo, adalentayo ti dadduma pay a kababalin a resulta ti agimbubukodan nga ayat ken kitaentayo ti nakaidumaan dagita kadagiti kababalin dagiti adipen ni Jehova.