Ibalintuag ti Tunggal Panagrasrason a Maikontra iti Pannakaammo iti Dios!

 1. Ania a pakdaar ti insurat ni apostol Pablo kadagiti Kristiano a dinutokan ti nasantuan nga espiritu?

“ISARDENGYON,” impakdaar ni Pablo. Isardeng ti ania? “Isardengyon ti agpaimpluensia iti daytoy a sistema ti bambanag.” (Roma 12:2) Insurat ni Pablo dagita a sasao kadagiti Kristiano idi umuna a siglo. Apay a kasta ti kadagsen ti pakdaarna kadagiti lallaki ken babbai a dedikado iti Dios ken dinutokan ti nasantuan nga espiritu?​—Roma 1:7.

2-3. Ania ti ar-aramiden ni Satanas tapno maitallikudnatayo ken Jehova, ngem kasano a maikkattayo iti panunottayo dagiti “natibker ti pannakapaderna a bambanag”?

² Nadanagan ni Pablo ta adda dagiti Kristiano a naimpluensiaan kadagiti makadangran a panagrasrason ken pilosopia nga itantandudo ti lubong ni Satanas. (Efe. 4:17-19) Mabalin met a mapasamak ti kasta kadatayo. Gapu ta desperado ni Satanas, ti dios daytoy a sistema ti bambanag, agus-usar iti agduduma a taktika tapno maitallikudnatayo ken Jehova. Maysa kadagita ti pananggundawayna iti aniaman a managimbubukodan nga ambisiontayo wenno ti tendensiatayo nga agbalin a sikat. Mabalinna pay ketdi nga usaren ti kapadasan, kultura, wenno edukasiontayo tapno agpanunottayo a kas kenkuana.

³ Posible kadi a maikkattayo iti panunottayo dagiti “natibker ti pannakapaderna a bambanag”? (2 Cor. 10:4) Kitaentayo ti sungbat ni Pablo: “Ibalbalintuagmi dagiti panagrasrason ken tunggal natan-ok a banag a maikontra iti pannakaammo iti Dios, ken konkontrolenmi ti tunggal panunot a kas balud tapno agtulnog iti Kristo.” (2 Cor. 10:5) Wen, babaen ti tulong ni Jehova, makontroltayo ti aniaman a di nasayaat a panagpampanunottayo. No kasano a maikkat ti agas dagiti epekto ti sabidong, tulongannatayo met ti Sao ti Dios a mangikkat iti makasabidong nga impluensia ti lubong ni Satanas.

 4. Ania a panagbalbaliw ti inaramid ti adu kadatayo idi naammuantayo ti kinapudno?

⁴ Panunotem dagiti binalbaliwam idi naammuam ti kinapudno manipud iti Sao ti Dios ket nagdesisionka nga agserbi ken Jehova. Adu kadatayo ti masapul a mangisardeng kadagiti dakes nga aramid. (1 Cor. 6:9-11) Imbag laengen ta tinulongannatayo ni Jehova a mangisardeng kadagita nga aramid!

 5. Ania ti dua a banag nga aramidentayo sigun iti Roma 12:2?

⁵ Ngem ditay koma pulos agbalin a kampante. Uray no insardengtayon ti agaramid iti nadagsen a basol sakbay a nagbautisartayo, masapul latta nga ikagumaantayo a liklikan ti aniaman a sulisog a mangaramid manen kadagita. Kasanotayo a maaramid dayta? Kuna ni Pablo: “Isardengyon ti agpaimpluensia iti daytoy a sistema ti bambanag, no di ket pabaruenyo ti kinataoyo babaen ti panangbalbaliwyo iti panunotyo.” (Roma 12:2) Adda ngarud dua a banag nga aramidentayo. Umuna, masapul nga ‘isardengtayo ti agpaimpluensia,’ wenno agpasukog iti daytoy a lubong. Maikadua, masapul a ‘mapabarotayo’ babaen ti panangbalbaliwtayo iti panunottayo.

 6. Ania ti masursurotayo iti imbaga ni Jesus iti Mateo 12:43-45?

⁶ Ti panangpabaro a tuktukoyen ni Pablo ket saan laeng a panangbalbaliw iti langa. Ramanenna ti amin nga aspeto ti kinataotayo. (Kitaen ti kahon a “Napabaro Wenno Agpampammarang?”) Masapul a balbaliwantayo ti panunottayo​—dagiti kababalin, rikrikna, ken tarigagaytayo. Isaludsodtayo ngarud iti bagitayo, ‘Dagiti kadi panagbalbaliw nga ar-aramidek tapno agbalinak a Kristiano ket pammarang laeng, wenno talaga nga agbalbalinak a Kristiano iti puso ken panunotko?’ Dakkel ti nagdumaan dagita. Dinakamat ni Jesus ti masapul nga aramidentayo iti Mateo 12:43-45. (Basaen.) Daytoy ti napateg a masursurotayo iti imbagana: Saan nga umanay nga ikkatentayo dagiti dakes a pampanunottayo; masapul a suktantayo dagita iti panagpampanunot nga anamongan ti Dios.

 7. Kasanotayo a mabalbaliwan ti makin-uneg a kinataotayo?

⁷ Posible kadi a mabalbaliwantayo ti makin-uneg a kinataotayo? Kuna ti Sao ti Dios: “Masapul nga itultuloyyo a pabaruen ti puersa a mangiturturong iti panunotyo, ken isuotyo ti baro a personalidad a pinarsua ti Dios maitunos iti pagayatanna ken iti agpayso a kinalinteg ken kinapudno.” (Efe. 4:23, 24) Wen, posible a mabaliwantayo ti makin-uneg a kinataotayo, ngem saan a nalaka dayta. Saantay laeng a basta labanan dagiti dakes a tarigagay ken isardeng dagiti dakes nga aramid. Masapul a balbaliwantayo ti ‘puersa a mangiturturong iti panunottayo.’ Karaman iti dayta ti panangbalbaliwtayo kadagiti tarigagay, tendensia, ken motibotayo. Agkasapulan daytoy iti agtultuloy a panagregget.

8-9. Kasano nga ipakita ti kapadasan ti maysa a brother a masapul a balbaliwantayo ti makin-uneg a kinataotayo?

⁸ Alaentayo a pagarigan ti maysa a brother a dati a naranggas. Mammartek ken kanayon nga agbirbirok iti gulo, ngem nagbalbaliw ket nakualipikar nga agpabautisar. Nagsayaat a panangsaksi daytoy iti lugarda. Ngem iti maysa a rabii di nagbayag kalpasan ti bautismona, dina ninamnama a masubok. Adda nabartek a napan iti balayna a nangkarit kenkuana nga aglabanda. Nakontrolna ti bagina idi damo. Ngem idi linais ti lalaki ti nagan ni Jehova, saanen a nakapagteppel ti kabsattayo. Rimmuar sa binugbogna ti lalaki. Apay a kasta ti inaramidna? Uray no makontrolnan ti riknana a makilaban gapu iti panagadalna iti Biblia, saanna pay a nabalbaliwan ti puersa a mangiturturong iti panunotna. Iti sabali a pannao, dina pay a nabalbaliwan ti makin-uneg a kinataona.

⁹ Ngem saan a simmuko ti brother a mangbalbaliw iti kababalinna. (Prov. 24:16) Iti tulong dagiti panglakayen, nagtultuloy a rimmang-ay. Idi agangay, nakualipikar kas panglakayen. Maysa a rabii, iti mismo a ruar ti Kingdom Hall, naulit ti situasion a nakaipasanguanna sumagmamano a tawenen ti napalabas. Adda nabartek a lalaki a gistay nangdanog iti maysa a panglakayen. Ania ti inaramid ti kabsattayo? Kalmado ken sipapakumbaba a nakisarita. Pinagkalmana ti permi ti bartekna a lalaki, sa tinulonganna nga agawid. Apay a kasta ti inaramidna iti daytoy a gundaway? Binalbaliwanen ti brother ti puersa a mangiturturong iti panunotna. Pudpudnon a nagbalbaliw, ken nagbalinen a mannakikappia ken napakumbaba. Ket naidaydayaw ni Jehova iti dayta!

10. Ania ti karaman iti panangbalbaliw iti makin-uneg a kinataotayo?

¹⁰ Saan a nalaka nga aramiden daytoy a panagbalbaliw; saan nga automatiko. Mabalin nga ‘ikagumaantayo’ nga aramiden dayta iti adu a tawen. (2 Ped. 1:5) Saan a mapasamak dayta gapu laeng ta nabayagtayon iti kinapudno. Masapul nga aramidentayo ti amin a kabaelantayo a mangbalbaliw iti makin-uneg a kinataotayo. Adda dagiti makatulong kadatayo nga agbalbaliw. Usigentayo ti sumagmamano kadagitoy.

11. Kasano a matulongannatayo ti kararag a mangbalbaliw iti puersa a mangiturturong iti panunottayo?

¹¹ Ti panagkararag ti umuna a napateg nga aramidentayo. Masapul a kiddawentayo ti inkararag ti salmista: “O Dios, mangparsuaka kaniak iti nadalus a puso, ken ikkannak iti baro nga espiritu a natibker.” (Sal. 51:10) Bigbigentayo a masapul a balbaliwantayo ti puersa a mangiturturong iti panunottayo ken dawatentayo ti tulong ni Jehova. Kasanotayo a masigurado a tulongannatayo ni Jehova nga agbalbaliw? Maparegtatayo iti kari ni Jehova kadagiti natangken ti ulona nga Israelita idi tiempo ni Ezekiel: “Ikkakto ida iti nagkaykaysa a puso, ket mangikabilakto iti baro nga espiritu iti unegda . . . ket ikkak ida iti puso a lasag, [kayatna a sawen, puso a nalaka nga agpaiwanwan iti Dios].” (Ezek. 11:19; ftn.) Kayat ni Jehova a tulongan nga agbalbaliw dagidiay nga Israelita, ket kayatnatayo met laeng a tulongan ita.

12-13. (a) Sigun iti Salmo 119:59, ania ti masapul nga utobentayo? (b) Ania dagiti saludsod a masapul a pagpanunotam?

¹² Ti panagutob ti maikadua a napateg nga aramidentayo. Bayat a basbasaentayo ti Sao ti Dios iti inaldaw, masapul nga iwayaantayo nga utoben, wenno panunoten a naimbag, no ania ti pampanunot ken rikrikna a balbaliwantayo. (Basaen ti Salmo 119:59; Heb. 4:12; Sant. 1:25) Ammuentayo no adda tendensiatayo a maatrakar kadagiti pilosopia ti tao. Akseptarentayo dagiti pagkapuyantayo ket pagreggetantayo a labanan dagita.

¹³ Kas pagarigan, panunotem dagitoy a saludsod: ‘Adda kadi aniaman nga apal wenno imon iti pusok?’ (1 Ped. 2:1) ‘Makariknaak kadi iti kinapannakkel gapu iti nalikudak, edukasionko, wenno kinabaknangko?’ (Prov. 16:5) ‘Nababa kadi ti panagkitkitak kadagiti tattao nga awanan iti bambanag nga adda kaniak wenno kadagiti sabali ti pulida?’ (Sant. 2:2-4) ‘Maat-atrakarak kadi iti ituktukon ti lubong ni Satanas?’ (1 Juan 2:15-17) ‘Magusgustuak kadi ti immoral ken naranggas a paglinglingayan?’ (Sal. 97:10; 101:3; Amos 5:15) Ti sungbatmo kadagitoy a saludsod mabalin nga ipakitada dagiti masapul a balbaliwam. No mabalbaliwantayo dagiti arig “natibker ti pannakapaderna” a panagrasrason iti pusotayo, maparagsaktayo ti nailangitan nga Amatayo.​—Sal. 19:14.

14. Apay a napateg a pilientayo ti nasayaat a kakadua?

¹⁴ Ti panangpili iti nasayaat a kakadua ti maikatlo a napateg nga aramidentayo. Madmadlawtayo man wenno saan, dakkel ti impluensia kadatayo dagiti kakaduatayo. (Prov. 13:20) Iti pagtrabahuan man wenno eskuelaan, gagangay a napalawlawantayo kadagiti tattao a saan a makatulong kadatayo nga agpanunot iti makaay-ayo iti Dios. Ngem mabirokantayo ti kasayaatan a kita ti kakadua kadagiti Nakristianuan a gimongtayo. Sadiay a magutugot, wenno maparegtatayo, a mangipakita iti “ayat ken nasayaat nga ar-aramid.”—Heb. 10:24, 25, ftn.

15-16. Kasano nga ikagkagumaan ni Satanas a baliwan ti panagpampanunottayo?

¹⁵ Ngem laglagipem a determinado ni Satanas a mangbalbaliw iti panunottayo. Us-usarenna ti amin a kita ti kapanunotan a mangdadael iti nasayaat nga impluensia ti Sao ti Dios iti panagpampanunottayo.

¹⁶ Isalsaludsod pay laeng ni Satanas ti insaludsodna ken Eva idiay hardin ti Eden: “Agpayso kadi nga imbaga ti Dios a . . . ?” (Gen. 3:1) Iti lubong a konkontrolen ni Satanas, gagangay a makangngegtayo kadagiti nasikap a saludsod, kas iti: ‘Agpayso kadi a saan nga anamongan ti Dios ti panagkasar ti agkasekso? Agpayso kadi a saan a kayat ti Dios a selebraram ti Krismas ken birthday? Agpayso kadi nga ekspektaren ti Dios a dika agpayalison iti dara? Agpayso kadi nga ekspektaren ti naayat a Dios a liklikam ti nailaksid a patpatgem?’

17. Ania ti aramidentayo no adda mangisaludsod kadagiti nasikap a saludsod maipapan kadagiti patpatientayo, ket ania ti mabalin a resultana sigun iti Colosas 2:6, 7?

¹⁷ Masapul a kombinsidotayo kadagiti patpatientayo. No ditay masungbatan dagita a nasikap a saludsod, baka mangrugi a pagduaduaantayo dagiti patpatientayo. Inton agangay, dagita a panagduadua ti posible a mangtiritir iti panunottayo ken mangdadael iti pammatitayo. Ania ngarud ti masapul nga aramidentayo? Ibaga ti Sao ti Dios a balbaliwantayo ti panunottayo tapno mapaneknekantayo iti bagitayo ti “nasayaat, makaay-ayo, ken perpekto a pagayatan ti Dios.” (Roma 12:2) Babaen ti regular a panagadal, mapaneknekantayo nga umiso dagiti nasursurotayo iti Biblia, ket naan-anay a makombinsirtayo nga umiso dagiti pagalagadan ni Jehova. Iti kasta, kas iti kayo a natibker ti pannakairamutna, agbalin a ‘natibker ti pammatitayo.’​—Basaen ti Colosas 2:6, 7.

18. Ania ti tumulong kadatayo a manglaban kadagiti makasabidong nga epekto ti lubong ni Satanas?

¹⁸ Awanen ti sabali a mangpatibker iti pammatim no saan a sika a mismo. Isu nga itultuloymo a pabaruen ti puersa a mangiturturong iti panunotmo. Itultuloymo ti agkararag; ipakaasim ti tulong ti espiritu ni Jehova. Agutobka a naimbag; itultuloymo a sukimaten ti pampanunot ken motibom. Birokem dagiti nasayaat a kakadua; piliem dagiti makatulong kenka a mangpabaro iti panunotmo. No aramidem dagita, malabanam dagiti makasabidong nga epekto ti lubong ni Satanas ken agballigika a mangibalintuag kadagiti “panagrasrason ken tunggal natan-ok a banag a maikontra iti pannakaammo iti Dios.”​—2 Cor. 10:5.