“Saantayo a Sumuko”!

 1. Ania ti masapul nga aramiden dagiti Kristiano tapno malpasda ti lumba ti biag?

AGTARTARAY dagiti Kristiano iti lumba ti biag. Karugrugi man wenno adun a tawen nga agtartaraytayo, masapul nga itultuloytayo ti agtaray agingga iti finish line. Ti balakad ni apostol Pablo kadagiti Kristiano idiay Filipos paregtaennatayo a mangileppas iti lumba. Dadduma a miembro ti kongregasion ti Filipos ket nabayagen nga agserserbi ken Jehova idi naawatda ti surat ni Pablo. Nasayaat idin ti panagtarayda, ngem impalagip ni Pablo a masapul nga itultuloyda ti agibtur bayat nga agtartarayda. Kayatna a tuladenda ti ulidanna a ‘mangar-aramid iti amin a kabaelanna tapno magun-odna ti gunggona.’​—Fil. 3:14.

 2. Apay a naintiempuan ti balakad ni Pablo kadagiti taga-Filipos?

² Naintiempuan ti balakad ni Pablo kadagiti taga-Filipos. Maidaddadanesen dayta a kongregasion sipud pannakabuangayna. Nangrugi dayta idi agarup 50 C.E. idi nakadanon da Pablo ken Silas idiay Filipos gapu iti awis ti Dios nga, “Umayka ditoy Macedonia.” (Ara. 16:9) Naam-ammoda sadiay ti babai nga agnagan Lidia, a “dumdumngeg . . . ket linuktan ni Jehova ti pusona” tapno awatenna ti naimbag a damag. (Ara. 16:14) Nabautisaran idi agangay agraman ti sangakabbalayanna. Ngem dagus a nangpataud ti Diablo iti problema. Dagiti lallaki iti siudad impanda da Pablo ken Silas kadagiti mahistrado ket pinabasolda ida a mangpatpataud iti riribuk. Kas resultana, napangpang-or ken naibalud da Pablo ken Silas, ket idi agangay, napapanawda iti siudad. (Ara. 16:16-40) Simmukoda kadi? Saan a pulos! Dagiti ngay kakabsat iti kabubuangay a kongregasion? Makaparagsak ta nagibturda met! Sigurado a napabilegda unay iti nasayaat nga ulidan da Pablo ken Silas.

 3. Ania ti nabigbig ni Pablo, ken ania dagiti saludsod nga usigentayo?

³ Determinado ni Pablo a saan a sumuko. (2 Cor. 4:16) Ngem ammona a tapno maileppasna ti lumba, masapul nga agtalinaed a nakapokus iti gunggona. Ania ti masursurotayo iti ulidan ni Pablo? Ania nga ulidan dagiti matalek a kakabsat iti panawentayo ti mangipakita a kabaelantayo ti agibtur aniaman ti problematayo? Ken kasano a ti namnamatayo iti masanguanan pabilgenna ti determinasiontayo a saan a sumuko?

 4. Kasano a nagtalinaed nga aktibo ni Pablo aniaman ti situasionna?

⁴ Panunotentayo ti ikagkagumaan nga aramiden ni Pablo idi nagsurat kadagiti taga-Filipos. Nakabalud idi iti maysa a balay idiay Roma. Limitado ti wayawayana a mangasaba. Ngem nagtalinaed nga okupado ket kinasabaanna dagiti bimmisita kenkuana ken sinuratanna dagiti adayo a kongregasion. Kasta met ita, adu a Kristiano a saanen a makapanaw iti pagtaenganda ti mangipakpakaammo iti naimbag a damag iti amin a gundaway kadagiti bumisita kadakuada. Mangipatpatulodda met iti makapabileg a surat kadagiti tattao a saantayo a makasarsarita a personal.

 5. Sigun iti sasao ni Pablo iti Filipos 3:12-14, ania ti nakatulong kenkuana nga agpokus iti gunggona?

⁵ Saan nga impalubos ni Pablo a masinga kadagiti nagapuananna wenno kadagiti napalabas a nagkamalianna. Kinapudnona, imbagana a ti ‘pananglipatna iti bambanag iti likudanna’ ket napateg iti ‘pananggun-odna iti bambanag iti sanguananna’—ti panangileppasna a sibaballigi iti lumba. (Basaen ti Filipos 3:12-14.) Ania ti dadduma a mabalin koma a nakasinga ken Pablo? Umuna, adu ti nagapuananna iti Judaismo. Ngem imbilangna dagita kas “adu a basura.” (Fil. 3:3-8) Maikadua, uray no mabalin a makonkonsiensia gapu iti panangidadanesna idi kadagiti Kristiano, saanna nga impalubos a dayta ti mangpasardeng kenkuana nga agserbi. Ken maikatlo, saanna nga inrason nga umanayen ti nagapuananna para ken Jehova. Nabunga latta ti ministerio ni Pablo uray no naibalud, napangpang-or, naubor, ken narba ti barko a naglugananna, ken uray nabisinan ken kurang ti pagbadona. (2 Cor. 11:23-27) Ngem aniaman ti naaramidan ken sinagaba ni Pablo, ammona a masapul nga agtultuloy nga agserbi ken Jehova. Kasta met koma ti aramidentayo.

 6. Ania ti dadduma iti ‘bambanag iti likudan’ a masapul a lipatentayo?

⁶ Kasanotayo a matulad ni Pablo iti ‘pananglipat iti bambanag iti likudan’? Mabalin a lablabanan ti dadduma kadatayo ti pannakakonsiensia gapu iti basol a naaramidtayo iti napalabas. No kasta, apay a saanmo a pagbalinen a proyekto iti personal a panagadalmo ti daton a subbot ni Kristo? No adalen, utoben, ken ikararagtayo dayta a makapabileg a topiko, mabalin a mabang-arantayo iti di kasapulan a pannakakonsiensia. Ken mabalin pay ketdi a maisardengtayo a padagsenan ti bagitayo kadagiti basoltayo a napakawanen ni Jehova. Usigentayo ti sabali pay a masursurotayo ken Pablo. Mabalin a pinanawan ti dadduma ti trabaho a dakkel ti sueldona tapno mayun-unada ti interes ti Pagarian. No kasta, mabalin kadi a lipatentayo ti bambanag iti likudan babaen ti saanen a panangpanunot iti material a bambanag a posible koma a nagun-odtayo? (Num. 11:4-6; Ecl. 7:10) Nalabit karaman iti ‘bambanag iti likudan’ dagiti nagapuanantayo wenno dagiti naibturantayo a pakasuotan iti napalabas. Siempre, no panunotentayo ti panangbendision ken panangtulong kadatayo ni Jehova iti napalabas, sumingedtayo iti Amatayo. Ngem ditay pulos kayat a panunoten nga umdasen ti naaramidantayo para kenkuana.—1 Cor. 15:58.

 7. Sigun iti 1 Corinto 9:24-27, ania ti kasapulan tapno mangabaktayo iti lumba ti biag? Mangted iti ilustrasion.

⁷ Nalawag ken Pablo ti imbaga ni Jesus a masapul nga ‘ikagumaantayo’ nga aramiden ti amin a kabaelantayo. (Luc. 13:23, 24) Ammo ni Pablo a kas ken Kristo, masapul nga itultuloyna nga ikagumaan ti agserbi iti intero a panagbiagna. Isu nga inkomparana ti biag dagiti Kristiano iti maysa a lumba. (Basaen ti 1 Corinto 9:24-27.) Ti maysa a tumataray ket nakapokus iti finish line ken saan nga agkarataliaw. Kas pagarigan, no ti lumba ket iti siudad, mabalin a malabsanna dagiti paglakuan ken dadduma pay a mangagaw iti atensionna. Mapanunotmo kadi ti maysa a tumataray nga agsardeng tapno kitaenna dagiti nakadispley iti paglakuan? Saanna nga aramiden dayta no kayatna ti mangabak! Iti lumba ti biag, masapul met a liklikantayo dagiti pakasingaan. No nakapokustayo iti gunggonatayo, a sireregta nga agserbitayo ken Jehova kas ken Pablo, mangabaktayto!

 8. Ania ti tallo a banag nga usigentayo?

⁸ Usigentayo ti tallo a banag a mabalin a mangpabannayat kadatayo. Dagitoy ket ti namnama a naitantan, kumapkapuy a salun-at, ken di agpatpatingga a pakasuotan. Adda masursurotayo iti dadduma a nakapagibtur kadagitoy a situasion.—Fil. 3:17.

 9. Ania ti mabalin a mariknatayo no maitantan dagiti namnamaentayo?

⁹ Namnama a naitantan. Normal laeng a namnamaentayo dagiti nasayaat a bambanag nga inkari ni Jehova. Kinapudnona, idi inyebkas ni propeta Habakuk ti tarigagayna a pagpatinggaen koman ni Jehova ti dakes a situasion idiay Juda, imbaga kenkuana ni Jehova a ‘namnamaenna a matungpal’ dayta. (Hab. 2:3) Ngem no kasla maitantan ti pannakatungpal dagiti namnamaentayo, baka bumaaw ti regtatayo, wenno maupaytayo pay ketdi. (Prov. 13:12) Napasamak daytoy iti rugi ti maika-20 a siglo. Ninamnama ti adu a napulotan a Kristiano nga awatendan ti nailangitan a gunggonada idi 1914. Idi saan a napasamak dayta, ania ti inaramid dagiti matalek a Kristiano iti naitantan a ninamnamada?

10. Ania ti inaramid ti maysa a pagassawaan idi naitantan ti ninamnamada?

¹⁰ Usigentayo daytoy a pagarigan. Ni Brother Royal Spatz ket nabautisaran idi 1908 iti edad a 20. Kombinsido a dandaninan awaten ti gunggonana. Kinapudnona, idi kiniddawna iti nobiana a ni Pearl nga agkasardan idi 1911, imbagana: “Ammomon no ania ti mapasamak inton 1914. Isu a no agkasartanto met laeng, agkasarta itan!” Simmardeng kadi dagitoy a Kristiano nga agassawa iti lumba ti biag idi saanda a naawat ti nailangitan a gunggonada idi 1914? Saan, ta ti kangrunaan a nagpokusanda ket ti simamatalek a panangaramid iti pagayatan ti Dios, saan a ti pananggun-odda iti gunggona. Determinadoda nga agibtur bayat nga agtartarayda iti lumba ti biag. Nagtalinaed nga aktibo ken matalek da Royal ken Pearl agingga a naturposda ti naindagaan a biagda kalpasan ti adu a dekada. Sigurado a kayatmo unayen a makita a masantipikar ti nagan ni Jehova ken maalangon ti kinasoberanona ken matungpal ti amin a karina. Masiguradom a mapasamak dagitoy iti tiempo nga inkeddeng ni Jehova. Bayat nga ur-urayentayo dayta, agtultuloytayo koma nga agserbi iti Diostayo, a ditay ipalubos a maupaytayo wenno bumaaw ti regtatayo gapu ta di pay napasamak ti namnamaentayo.

11-12. Apay a makapagserbitayo latta a simamatalek ken Jehova uray nakapuyen ti salun-attayo? Mangted iti pagarigan.

¹¹ Kumapkapuy a salun-at. Saan a kas iti literal a tumataray, saan a masapul a napigsa ti bagim tapno maitultuloymo ti bumileg iti naespirituan. Kinapudnona, adu a nakapuyen ti salun-atna ti determinado pay laeng a mangipaay ken Jehova iti kasayaatan. (2 Cor. 4:16) Kas pagarigan, agtawenen iti 88 ni Brother Arthur Secordb ken nakapuyen ti salun-atna kalpasan ti 55 a tawen a panagserbina iti Bethel. Maysa nga aldaw, immasideg iti katrena ti maysa a nars a mangas-asikaso kenkuana. Kinitana ken siaasi nga imbagana: “Brother Secord, adun ti naaramidanyo para ken Jehova.” Ngem saan a nakapokus ni Arthur kadagiti naaramidanna iti napalabas. Kinitana ti nars, immisem, sa insungbatna: “Wen, agpayso dayta. Ngem saan a dagiti naaramidantayo iti napalabas ti napateg, no di ket dagiti ar-aramidentayo manipud ita.”

¹² Nalabit adun a tawen nga agserserbika ken Jehova ket mariknam a saanmon a kaya ti dati a maar-aramidam ta nakapuyen ti salun-atmo. No kasta ti situasionmo, dika maupay. Masiguradom nga ipatpateg ni Jehova ti matalek a panagserbim iti napalabas. (Heb. 6:10) Ken laglagipem a ti amin-kararua a debosion ket saan a marukod iti kaadu ti maar-aramidantayo para ken Jehova. Imbes ketdi, maipakitatayo ti kauneg ti debosiontayo no agtalinaedtayo a positibo ken aramidentayo ti amin a kabaelantayo. (Col. 3:23) Maawatan ni Jehova dagiti limitasiontayo ken saanna a kidkiddawen ti nalablabes ngem iti maitedtayo.—Mar. 12:43, 44.

13. Kasano a ti kapadasan da Anatoly ken Lidiya mapabilegnatayo nga agtultuloy nga agserbi uray adu ti pakasuotantayo?

¹³ Di agpatpatingga a pakasuotan. Inibturan ti dadduma nga adipen ni Jehova ti adu a tawen a pannakasuot ken pannakaidadanes. Alaentayo a pagarigan ni Anatoly Melnikc a 12 laeng ti tawenna idi naaresto ni tatangna, naibalud, sa naipan idiay Siberia a nasurok a 7,000 a kilometro (4,000 milia) ti kaadayona manipud Moldova nga ayan ti pamiliana. Makatawen kalpasanna, naipan met idiay Siberia ni Anatoly, ni nanangna, ken da lolo ken lolana. Idi agangay, nakaatenderdan kadagiti gimong iti sabali a purok, ngem masapul a magnada iti kaniebian iti nasurok a 30 a kilometro (20 milia) ken anduranda ti nakalamlamiis a temperatura. Idi agangay, naibalud ni Brother Melnik iti tallo a tawen, ket nayadayo ken baketna a Lidiya ken iti balasitangda a maysa ti tawenna. Uray adu a tawen a nasusuotda, intultuloy ni Anatoly ken ti pamiliana ti agserbi a simamatalek ken Jehova. Agtawen itan ni Anatoly iti 82 ken agserserbi kas miembro ti Komite ti Sangay iti Central Asia. Kas kada Anatoly ken Lidiya, aramidentayo ti amin a kabaelantayo nga agserbi ken Jehova, ket itultuloytayo ti agibtur a kas iti inaramidtayo iti napalabas.—Gal. 6:9.

14. Ania ti nabigbig ni Pablo a masapul nga aramidenna tapno magun-odna ti gunggonana?

¹⁴ Kombinsido ni Pablo a maileppasna ti lumba ken magun-odna ti gunggonana. Kas napulotan a Kristiano, namnamaenna a magun-odna ti “gunggona a panangayab ti Dios [kenkuana] idiay langit.” Ngem tapno maawatna dayta, nabigbigna a masapul nga itultuloyna nga ‘aramiden ti amin a kabaelanna.’ (Fil. 3:14) Nangusar ni Pablo iti makapainteres nga ilustrasion tapno matulonganna dagiti taga-Filipos nga agtultuloy nga agpokus iti gunggonada.

15. Kasano nga inusar ni Pablo ti ilustrasion a panagbalin nga umili ti Roma tapno mapabileg dagiti taga-Filipos nga agtultuloy a ‘mangaramid iti amin a kabaelanda’?

¹⁵ Impalagip ni Pablo kadagiti taga-Filipos nga umilida idiay langit. (Fil. 3:20) Apay a masapul a laglagipenda dayta? Idi a tiempo, kayat dagiti tattao ti agbalin nga umili ti Roma ta adu ti benepisio dayta.d Ngem dagiti napulotan a Kristiano ket umili ti nasaysayaat a gobierno, a mangipaay iti ad-adu a benepisio. Adayo a nasaysayaat dayta ngem iti panagbalin nga umili ti Roma! Gapu iti dayta, pinabileg ni Pablo dagiti taga-Filipos nga ‘agtignayda a kas kadagiti umili iti pamay-an a maikari iti naimbag a damag maipapan iti Kristo.’ (Fil. 1:27, ftn.) Nasayaat nga ulidan dagiti napulotan a Kristiano ita a mangar-aramid iti amin a kabaelanda a manggun-od iti gunggonada a biag nga agnanayon idiay langit.

16. Aniaman ti namnamatayo, ania ti masapul nga itultuloytayo nga aramiden sigun iti Filipos 4:6, 7?

¹⁶ Ti man namnamatayo ket biag nga agnanayon idiay langit wenno iti paraiso ditoy daga, masapul nga itultuloytayo nga aramiden ti amin a kabaelantayo a manggun-od iti dayta. Aniaman ti situasiontayo, ditay koma kitaen ti bambanag iti likudan wenno ipalubos nga adda aniaman a manglapped iti panagrang-aytayo. (Fil. 3:16) Mabalin a kasla naitantan dagiti namnamaentayo, wenno kumapkapuyen ti salun-attayo. Nalabit adun a tawen nga agib-ibturtayo iti pakasuotan wenno pannakaidadanes. Aniaman ti situasionmo, ‘dika madanagan iti aniaman.’ Imbes ketdi, ipakaammom koma iti Dios ti amin a kiddaw ken panagpakaasim, ket ipaaynanto ti talna a nasaysayaat ngem iti mapanunotmo.—Basaen ti Filipos 4:6, 7.

17. Ania ti usigentayo iti sumaruno nga artikulo?

¹⁷ Kas iti tumataray a mas determinado nga agtaray no asidegen iti finish line, agtalinaedtayo koma a nakapokus iti kalattayo a mangileppas iti lumba ti biag. Agingga a kayatayo ken ipalubos ti kasasaadtayo, ikagumaantayo koma ti sigagagar nga agtultuloy a manggun-od iti nagsayaat a gunggona iti masanguanan. Ania ti aramidentayo tapno maitultuloytayo a tarayen ti lumba ken makapagibturtayo? Makatulong ti sumaruno nga artikulo tapno maaddaantayo iti umiso a prioridad ken ‘masiguradotayo ti napatpateg a bambanag.’—Fil. 1:9, 10.