Sursuruem ti Agbuteng iti Dios kas ken Abdias

Ni Abdias ti agay-aywan idi iti sangakabbalayan ti dakes nga ari a ni Ahab. Impalubos dayta nga ari nga agdaydayaw dagiti Israelita ken Baal. Ngem naiduma unay ni Abdias ta ‘manipud pay idi ubing,’ nasursurona ti umiso a panagbuteng ken Jehova. (1 Ar. 18:​1-13) Isu nga idi imbilin ni Reyna Jezebel a mapapatay ti amin a propeta ni Jehova, ammo ni Abdias a masapul nga agbalin a natured ken adda aramidenna tapno saan a matuloy dayta a nagdakes a plano. Ania ngarud ti inaramid ni Abdias? Agpayso a narigat ti mangilemmeng iti uray maysa la a propeta. Ngem inlemmengna ti 100 a propeta ken inikkanna ida iti tinapay ken danum bayat ti tiempo ti nakaro a bisin! Panunotem laengen no kasano karigat nga aramiden dayta a saan a madmadlaw ti ginasut nga ulbod a propeta nga agserserbi iti ari ken reyna.—1 Ar. 18:19.

Ania ti masursurotayo iti daytoy lalaki a managbuteng iti Dios? Agpayso a mabuteng ni Abdias ken Ahab. Ngem dakdakkel nga amang ti panagbutengna iti Dios. Gapu iti dayta, situtured nga inrisgona ti biagna tapno maprotektaran dagiti kakabsatna. Masapul met a sursuruentayo ti umiso a panagbuteng ken Jehova aglalo no aggigiantayo iti lugar a maiparit ti panagdaydayawtayo. Ti kasta a panagbuteng ti mangpabileg kadatayo a tumulong kadagiti kakabsat a maipaspasango kadagiti narigat a situasion.