Salsaludsod Dagiti Agbasbasa

Kaano nga iproklama dagiti nasion ti “talna ken talged”?

Kas nailawlawag iti “Salsaludsod Dagiti Agbasbasa” iti Pagwanawanan a Nobiembre 2025, asidegen nga ikabil ni Jehova iti puso ti “10 a sara” (amin a gobierno) “ti panunotna.” Kayatna a sawen, iteddanto ti pannakabalin ken autoridadda iti “nalabaga a narungsot nga animal”—ti United Nations. Maawagan met daytoy nga animal iti “estatua ti narungsot nga animal.” (Apoc. 13:​14, 15; 17:​3, 16, 17) Kalpasanna, ti “10 a sara” ken ti napigpigsanton ti pannakabalinna a narungsot nga animal ikkatendanto ti ulbod a relihion iti intero a lubong. Kaano nga iproklama dagiti nasion ti “talna ken talged”?a Sakbay kadi ti pannakadadael ti ulbod a relihion wenno kalpasan dayta?—1 Tes. 5:3.

Ti direkta a sungbat ket saantayo a masigurado no kaano nga iproklamada ti “talna ken talged.” No ngamin ammotayon ti amin a detalye, baka saantayo no kuan nga agtalinaed nga alerto ken managbantay. Ngem maulit-ulit nga imbalakad ni Jesus kadagiti pasurotna: “Itultuloyyo ti agbantay.” (Mat. 24:42; 25:13; 26:41) Usigentayo itan ti impaipadto ni Jehova ken apostol Pablo a mabasa iti suratna kadagiti taga-Tesalonica.

Insurat ni Pablo: “Inton ibagbagada: ‘Talna ken talged!’ pagammuan ta dumtengto ti kellaat a pannakadadaelda.” (1 Tes. 5:​2, 3) Kastoy ti masansan idi a panangilawlawag dagiti publikasiontayo maipapan kadagita nga imbaga ni Pablo: Maiproklamanto ti “talna ken talged”sakbay la unay ti panangrugi ti dakkel a rigat, a mangrugi inton madadael ti Babilonia a Dakkel—ti sangalubongan nga imperio ti ulbod a relihion. Nadeskribir dayta a pannakaiproklama kas maudi a pagilasinan a mangrugin ti dakkel a rigat.

Ngem kalpasan ti naannad a panagadal, agparang nga adda pay sabali a posible a pannakailawlawag dayta. Mabalin a maiproklamanto ti “talna ken talged”kalpasan a madadael ti ulbod a relihion. Apay? Usigentayo dagiti sumaganad a saludsod.

Ania ti papel ti ulbod a relihion kadagiti gubat dagiti nasion? Ibaga ti Biblia: “Nasarakan kenkuana [“ti agdindinamag a balangkantis,” ti Babilonia a Dakkel] ti dara. . . ti amin a napapatay ditoy daga.” (Apoc. 17:​1, 5; 18:24) Iti intero a pakasaritaan ti tao, supsuportaran ti agdindinamag a balangkantis dagiti gubat dagiti nasion. Masansan met nga isungsungsongna ti terorismo. No kasta, isu ti makagapu kadagiti gubat ken kinaranggas, saan nga iti talna ken talged. Tumaud ngarud daytoy a saludsod: Iproklamanto kadi dagiti nasion ti “talna ken talged” kalpasan laeng a nadadaeldan ti Babilonia a Dakkel? Posible dayta. Ngem saantayo a masigurado.

Ania ti sumaruno a mapasamak kalpasan a maiproklama ti “talna ken talged”? Imbaga ni Pablo: “Pagammuan ta dumtengto ti kellaat a pannakadadaelda.” (1 Tes. 5:3) No iproklamanton dagiti nasion ti “talna ken talged” sakbay a madadael ti ulbod a relihion, lumabas pay ngarud ti sumagmamano a tiempo sakbay ti mismo a pannakadadaelda. Ngem gapu ta imbaga ni Pablo a “pagammuan” ken “kellaat” ti pannakadadaelda, posible nga iproklama dagiti nasion ti “talna ken talged” kalpasan a nadadaeldan ti ulbod a relihion.

Anianto ti reaksion ti ili ni Jehova? Imbaga ni Pablo: “Awankayo iti sipnget, kakabsat, isu a dikayto makigtot iti dayta nga aldaw a kas iti pannakabigla dagiti mannanakaw no aglawagen.” (1 Tes. 5:4) Panunotenyo daytoy: No maiproklamanto ti “talna ken talged” kalpasan a nadadaelen ti ulbod a relihion, ammonto ngaruden ti ili ni Jehova a nakaas-asidegen ti pannakadadael dagiti nasion. Ngem no para kadagiti nasion a mangipagarup a natalnan ken natalgeden ti kasasaad, saandanto nga ekspektaren a madadaelda, ta biglanto nga umay dayta a kas iti mannanakaw.

Ania ngarud ti ekspektarentayo? Iti asidegen a masanguanan, ti “10 a sara” ken ti napigpigsanton ti pannakabalinna a narungsot nga animal dadaelendanto ti ulbod a relihion. Daytanto ti pangrugian ti dakkel a rigat. Ammotayo met nga addanto tiempo nga iproklama dagiti nasion ti “talna ken talged.” Kaano a mapasamak dayta? Napagsasaritaantayo ti dua a posibilidad. Umuna: Iproklamadanto dayta sakbay a madadael ti ulbod a relihion. Maikadua: Iproklamadanto dayta kalpasan a madadael ti ulbod a relihion. Padaanantayo no anianto ti mapasamak. Masansan a naan-anay laeng a maawatantayo dagiti padto ti Biblia bayat a matungtungpal dagita wenno kalpasan a natungpaldan.—Idilig ti Juan 12:16.

Bayat nga ur-urayentayo dayta, ti kapatgan ket saan a no kaano nga iproklama dagiti nasion ti “talna ken talged,” no di ket ti panagtalinaedtayo a matalek iti Dios. Masapul nga “agtalinaedtayo a siririing ken sipupuot” tapno nakasaganatayo a naimbag, kasanonto man ti panagsasaruno dagiti pasamak.—1 Tes. 5:6.