Dagus a Solbarenyo ti Problema!

Panunotem daytoy: No adda natukkol a tulangmo, masapul nga agpadoktorka tapno maisimpa dayta. Ngamin, no saan a dagus a maisimpa dayta, agtultuloy a mariknam ti ut-ot. Nakarkaro pay, baka saanen nga umimbag ket permanenten a tukkol ti tulangmo.

Kas iti natukkol a tulang, masapul nga agtignayka a dagus tapno masimpa ti nadadael a relasionyo iti maysa a kabsat. Ngamin, no saanmo nga aramiden dayta, baka agtultuloy laeng a masaktan ti riknam. Baka kumaro a kumaro ti sakit ti nakemmo wenno guram ket awanton ti namnama a maisubli ti panaggayyemyo. Imbaga ni Jesus: “Alistuam ti makiareglo.” (Mat. 5:25) Isu nga ania ti aramidem? Asitgam ti gayyemmo. Nasingpetka a makisarita kenkuana ken ibagam ti talaga a marikriknam. Ngem apay a mabalin a narigat nga aramiden dayta? Kitaem ti dua a rason.

Umuna, baka kayatmo a baybay-an lattan ti napasamak ta saanmon a kayat a pagsaritaan ti problema.b Kasta ti napasamak kada Euodia ken Sintique. Agparang a saanda idi a kayat a pagsaritaan ti dida nagkinnaawatan, isu a nagtultuloy ti problema. Uray la nadamag dayta ni apostol Pablo. Nakaad-adayo idi ti ayanna ta adda idiay Roma. Pinaregtana ida nga aramidenda ti amin tapno agkappiada. (Fil. 4:2) No agpakumbabada a dua, agsaritada a naimbag, ken agpinnakawanda, posible a maisublida ti panaggayyemda.

Maikadua, baka pampanunotem a ti kabsat ti nagkamali, isu nga isuna ti masapul nga umasideg kenka, ken ibagana nga isuna ti makimbasol. Ngem laglagipem koma daytoy: Ti panggepmo ket tapno maisubli ti panaggayyemyo, saan ketdi a tapno agtinnudokayo no asino ti makimbasol. Panunotem manen ti doktor a mangisimpa iti natukkol a tulang. Saan isuna nga agpokus iti amin a detalye no kasano a natukkol ti tulang. Agpokus ketdi no kasanona a mapaimbag dayta. Kasta met laeng ti aramidem no kasaritam ti gayyemmo. Saanka nga agpokus no asino ti makimbasol iti problema. Imbes ketdi, lagipem ti dati a kinadekketyo ket agpokuska no kasanom a maisubli dayta.

Isu a no adda ti diyo nagkinnaawatan iti maysa a kabsat, mabalin kadi a kasaritam ita nga aldaw ken ikagumaanyo nga isubli ti panaggayyemyo? “Diyo ipalubos a lumnek ti init nga agung-ungetkay pay laeng.” (Efe. 4:26) No dagus a solbarenyo ti problema, ‘agkappiakayo’ ken tumultulongka tapno ‘mataginayon ti panagkaykaysa.’—Efe. 4:​1-3.