Nagpamoldeak ken Jehova

Nagadu ti nakitak idiay, ngem ti malaglagipko unay ket dagiti kakabsat. Nagadu ti agtutubo. Nakagaggagetda nga agtrabtrabaho, uray no kasla isu la nga isu ken saan a kanayon a makitkita ti ar-aramidenda. Nakaragragsakda latta ken kontentoda. Talaga a nakasursuroak iti ulidanda no kasano ti sipapakumbaba nga agserbi iti Dios.

Adu a tawen a tinultulongannak ni Jehova nga agbalin a nasaysayaat nga adipenna. Ngem iyestoriak man pay no kasanok a naammuan ti kinapudno idi Budistaak.

BINIRBIROKKO TI PUDNO A DIOS IDI UBINGAK

Nayanakak iti Chicago, Illinois, U.S.A. Siak ti inauna kadakami nga uppat nga agkakabsat. Manipud Japan, immakar dagiti nagannakko iti Chicago. Pampanunotenda ngamin a sumayaat ti biagda no umakarda iti United States. Kayatda met a makapagadalkami nga annakda kadagiti kasayaatan nga unibersidad tapno napintasto ti biagmi.

Napeklan a Budista dagiti nagannakko. Idiay balay da Nanang, adda templo dagiti Budista. Monghe ni tatangna ken ti dua nga adingna a lallaki. Isu nga idi ubingak, nagdakkel ti impluensia ti Budismo iti pamiliami. No ngarud aggapuak iti eskuelaanmi, ti umuna nga aramidek ket agpuorak iti insienso sa agiyatangak iti makan ken danum iti rebulto dagiti Budista. No met Domingo, mapankami iti templo dagiti Budista. Agor-orasionkami idiay iti kasla met lang iti rebulto nga adda idiay balay, ngem dakdakkel lang ken nakalupkopan iti balitok.

Idi agpitoakon, malagipko a mingmingmingak idi ti rebulto idiay balaymi. Kunkunak iti bagik, ‘Ania ngata ti mapasamak kaniak no matayak?’ Naisuro kaniak a mapanak kano iti lubong dagiti espiritu. Nakalidlidayak idi ta napanunotko a matayakto gayam ken agbiagakto laengen kas espiritu. Saankonton a maenjoy ti biagko kas tao. Isu a panagriknak idi ket awanen ti namnamak.

Idi agkinseakon, nakitak nga awan met ti maitultulong dagiti ritual dagiti Budista nga ar-aramidenmi. Nariknak nga adda kurang iti biagko. (Mat. 5:3) Ngem ammok nga adda ti sibibiag ken mannakabalin-amin a Dios. Kayatko a maam-ammo isuna. Pampanunotek idi a baka masungbatan ti Biblia dagiti saludsodko. Isu a gimmatangak iti nausaren a Biblia a King James Version. Ammoyo no sadino ti nakagatangak? Iti pay mismo piesta dagiti Budista.

Idi disisieteak, bayat nga ipaspasiarko ti asok, adda lalaki nga immasideg kaniak. Ni Wilson Bashou. Dinamagna, “Ammom no ania ti ikarkari ti Dios a mapasamak iti masanguanan?” Gapu iti dayta a saludsodna, nagbayagkami a nagsarsarita maipapan iti Biblia. Binasana ti Apocalipsis 17:1 sa dinamagna, “Ammom no ania ti tuktukoyen ti ‘adu a danum’ a pagtugtugawan ti balangkantis?” Imbagak a diak ammo isu nga imbasana ti bersikulo 15. Ti gayam tuktukoyenna ket dagiti tattao. Nagustuak ti ar-aramiden dagiti Saksi ni Jehova ta bay-anda a ti Biblia ti mangilawlawag a mismo iti ibagbagana. Idi nalpaskami a nagsarita, inikkannak iti libro a Ti Kinapudno a Mangiturong iti Biag nga Awan Inggana. Dayta a bassit nga asul a libro ti nangbalbaliw iti biagko.

Kalpasan ti 10 nga aldaw, nakigimongakon. Diak pulos malipatan dayta. Nakabarbara ti panangabrasada kaniak. Nakasingsingpet ken nakaay-ayatda. Manipud idin, kanayonakon a makigimong. Idi kuan, nangrugikamin nga agadal iti Biblia ken Wilson. Kaykayatko dagiti maad-adalko. Adda pay ngarud dagiti panagadalmi nga uray la umabutkami iti walo nga oras. Nadanagan dagiti nagannakko. Saanda a kayat nga agadalak iti Biblia. Ngem idi umad-adu ti maad-adalko, lallaloak met a nakombinsir a daytoy ti kinapudno. Isu a nagpabautisarak idi 1983.

NAGSARDENGAK NGA AGKOLEHIO TAPNO MAKAPAGPAYUNIRAK

Idi nabautisaranak, agad-adalak pay laeng iti sikat nga unibersidad. Mangal-alaak idi iti kinadoktor. Nakaad-adu ti insakripisio dagiti nagannakko tapno laeng makapagkolehioak, isu a kayatko koma nga ileppas ti kursok. Ngem kayatko met idin nga ited ken Jehova ti kasayaatak ken agpayunir.

Pinangtaannak ni Tatang, “No agsardengka, pumanawkan ditoy balay!” Nakalidlidayak idi ken diak ammo ti aramidek. Ay-ayatek dagiti nagannakko ken diak kayat a madismayada. Isu a masansan idi a marabiyanak iti kampusmi tapno agkararag. Ibagbagak, “Apo Jehova, pangngaasim, tulongannak nga agdesision.” Idi nagdesisionakon nga agsardeng nga ageskuela, pinapanawnak ni Tatang iti balaymi. Isu a tinawagak ni Wilson. Imbagak ti napasamak. Imbagana a makipagyanak pay laeng kenkuana. Nagluganak iti bus a napan iti apartmentna. Maysa laeng a bag ti nagyanan ti amin a gamitko. Idi nakatugawak iti bus, malagipko a nakakalkalman ti riknak. Ammok a husto ti desisionko.

Kaslaak la billit a nakaruar iti kulongan! Nawayaak met laengen nga agserbi ken Jehova. Isu nga idi 1984, nagpayunirakon.

Bayat ti panagpaypayunirko, minoldenak ni Jehova nga agbalin a nasaysayaat a tao. Sinuruannak nga agporsegi. Naminsan, nakaad-adu koma ti rasonko a saan a mapan mangasaba. Awan man la ngamin ti makaduak a rummuar iti malem ngem napanak latta. Agdua nga oras idin a mangaskasabaak. Napanunotko a daytoyen ti maudi nga apartment a papanak. Nabambannogakon ken maymaysak sa makatudtuduen. Isu a napanunotko, ‘Mapanak pay ngata wenno agawidakon?’ Napanak. Idi umul-uliak iti third floor, adda nasabatko nga agtutubo a Pilipino. Naibagak idi, ‘Ay, sigurado a saan nga interesado daytoy.’ Ngem nagkamaliak. Nagadalkami iti Biblia ket nagbalin a kabsattayo idi agangay.

DAGITI NASURSUROK ITI BROOKLYN BETHEL

Kalpasan ti dua a tawen a panagyanko iti apartment ni Wilson, naawisak nga agserbi iti Brooklyn Bethel idi 1985. Kas iti naibagak iti rugrugi, nai-assign-ak iti Bindery. Naminsan, bayat nga agtrabtrabahoak iti pagimprentaan kadagiti akkub ti libro, nagkamaliak. Isu a ginasut nga akkub ti libro ti nadadael. Imbaga dagiti kakabsat nga ireportko ti napasamak iti overseer-ko. Inlawlawagko no apay a napasamak daydiay. Ngem adda ti nagpateg a diak naibaga. Nakakalkalma nga impalagip ti overseer-ko, “Ken, awan dakesna no ag-sorry-ka.” Ditak a nasursuro a nakapatpateg nga aminek dagiti kamalik ken ibagak ti “Sorry.”

Nakasursuroak met kadagiti matalek ken natataengan a Bethelite no kasano a mas mapagserbiak dagiti kakabsat. Malagipko a pangngaldaw idi. Agkakatugawkami kada Brother Milton Henschel a miembro ti Bagi a Manarawidwid. Nakaad-adu idi ti tao iti dining room isu a matartaranta dagiti waiter. Dakami met nga agtutubo a brother ket agrekreklamon iti tugawmi ta nakabumbuntogda. Idi kuan, bigla a timmakder ni Brother Henschel. Timmulong kadagiti waiter nga agiwaras iti danum, tinapay, ken butter. Diak pulos malipatan dayta. Nakapakpakumbaba. Naipalagip kaniak no kasano ti panagserbi ni Jesus kadagiti apostolna.—Juan 13:​3-5.

“MASAPUL A SURSURUEM TI AG-JAPANESE!”

Idi 1987, nagpasiarak iti Japan. Nakaregregta ken nakapakpakumbaba dagiti kakabsat idiay. Kayatko ida a tulongan a mangasaba. Ngem ti problema, saanko a nasursuro ti ag-Japanese. Idi nakasubliakon, adda sister a naam-ammok. Ni Michiko Oda. Inyestoriak ti panagpasiarko idiay Japan. Idi kuan, kinitanak sa imbagana, “Masapul a sursuruem ti ag-Japanese!” Isu a nagsursuroak. Diak ekspektaren a ti imbagana ti mangbalbaliw iti biagko.

Kalpasan ti sumagmamano a bulan, immakarak iti Japanese a kongregasion iti New York. Idi nagsursuroak iti Japanese, adu ti naglukat nga oportunidad tapno mas makapagserbiak ken Jehova. Idi 1989, dayta ti damo a pannakikombensionko iti Japanese iti Los Angeles, California. Adda nakitak a napintas a sister a karaman iti drama. Ni Miwako Onami a maysa a payunir.

Idi 1992, nagkasarkami ken Miwako. Kalpasanna, naawiskami nga agassawa nga agserbi iti Brooklyn Bethel. Nakaas-asikaso ni baketko. Kanayon a pampanunotenna ti pagimbagan ti dadduma ken nakasagana a tumulong. Talaga a nakasursuroak kenkuana no kasanok a mapasayaat pay ti panangtratok iti dadduma. Isu ti kanayon a mangparparagsak ken mangparparegta kaniak. Talaga a maibagak a regalo isuna ni Jehova kaniak!

PANAGSERBI ITI SANGAY ITI JAPAN KEN ITI FIELD

Nagsakit iti nakaro dagiti nagannak ni Miwako nga aggigian idi iti Japan. Ngem nakaay-ayat ti organisasion ta pinalubosandakami nga umakar iti sangay iti Japan tapno as-asidegkami laeng a mangaywan kadakuada. Isu nga idi 1999, immakarkami idiay.

Nakabarbara ti panangawat kadakami ti pamilia ti Bethel iti Japan, isu a nalakakami a nakapag-adjust. Nagadu ti nasursurok a nagsasayaat a kualidad dagiti Japanese a kakabsat, kas iti panagbalin a naparabur ken managpadagus. No met iti trabaho, nakagaggagetda ken nakapokusda. Nagmayat met ti panagtrabahoda uray no aduda. Ngamin, para kadagiti Japanese, nasaysayaat nga agkakaduada ken agkaykaysada nga agtrabaho imbes nga agsisinada a mangipalpas iti trabaho. Naparegtaak iti dayta nga agbalin a napakumbaba no makipagtrabtrabahoak iti dadduma ken agbalinak a naragsak iti uray bassit a maitultulongko tapno matungpal ti panggep ni Jehova.

Ngem gapu iti panagduduma iti kultura, adda latta dagiti tiempo a saanko a maawatan no apay a sabali ti panangaramid dagiti Japanese a kakabsat iti bambanag. Isu a masapul a sursuruek idi ti aganus ken agteppel. Idi agangay, nabalbaliwak met lang ti panagpampanunotko. Nakitak a bendisionan ni Jehova ti aniaman a desision no la ket ta agtulnogtayo kadagiti instruksion nga ipapaay ti organisasionna. Ngamin, ni Jehova ti mangbembendision iti trabahotayo.

Ipadpadak ti pannakasanayko iti Bethel iti pannakamolde ni propeta Moises. Kas pastor, tinulongan ni Jehova ni Moises nga agbalin a napakumbaba iti 40 a tawen. Agpadakami nga adda met bassit nagadalanna. Isu a no dadduma, diak malapdan ti agpannakkel ken agtalek iti bagik. Ngem sinuruannak ti Bethel nga agbalin a napakumbaba ken agtalek ken Jehova. Inan-anusan ni Jehova a minolde ni Moises. Ket kasta met ti ar-aramiden kaniak ni Jehova iti adun a tawen.

Dandani 24 a tawen nga inay-aywananmi dagiti nagannak ni Miwako agingga a natayda. Adu a tawag, makapadanag a situasion, ken panagsublisubli iti ospital ti napadasanmi. Kimmapuy a kimmapuy ti salun-at ti katugangak a babai a ni Masako nga uray la marigatan idin a magna. Isu a saan a nalaka para kenkuana ti makigimong ken mapan mangasaba. Iti maudi a lawlawasna, masapul idin nga ag-wheelchair. Agpayso a kimmapuy ti salun-atna, ngem saan a pulos kimmapuy ti ayatna ken Jehova. Nakaragragsak ti rupana no makapangasaba. Nagbalin nga inspirasionko ni katugangak. Aniaman ti situasionna, nakaregregta, kontento, ken nakaragragsak latta.

Idi 2024, adda dakkel a panagbalbaliw iti biagmi. Kalpasan ti nasurok a 30 a tawen a panagserbimi iti Bethel, naibaonkami nga agserbi kas special pioneer. Addakami ita iti isla ti Okinawa. Kaskasabaanmi dagiti pamilia nga adda iti asideg ti kampo dagiti soldado. Nakatulong unay kadakami ti pannakasanaymi iti Bethel tapno nalakakami a makapag-adjust iti baro nga asaynmentmi. Itultuloymi met a suroten ti nasayaat nga eskediulmi. Ken ikagkagumaanmi nga usaren ti tiempomi iti ministerio. Nakaay-ayat ni Jehova ta binendisionannakami kadagiti iyad-adalanmi iti Biblia nga ibilbilangmin a kapamiliami. Ad-adda a makitkitami ita a nakapatpateg nga ayaten dagiti tattao. Inaldaw nga agyamyamankami ken ni baketko a Miwako ken Apo Jehova gapu iti daytoy a nakasaysayaat nga asaynmentmi.

DETERMINADOAK NGA AD-ADDA PAY NGA AGPAMOLDE KEN JEHOVA

Saandak metten a busbusoren dagiti kapamiliak. Ngem saanda pay nga agdaydayaw ken Jehova. Uray no kasta, inkari ni Jesus a dagidiay mangpanaw kadagiti kapamiliada tapno agbalin nga adalanna ket maminsangagasutto pay nga ad-adu ti agbalin a naespirituan a pamiliada. (Mar. 10:​29, 30) Kasta a mismo ti napadasak. No lagipek ti amin a pamilia iti intero a lubong a mangay-ayat ken mangibilbilang kaniak kas kapamiliada, diak pulos mabilang ida.

Adda pay laeng kaniak agingga ita ti libro a Kinapudno nga inted ni Wilson. Kada makitak dayta a libro, maipalpalagip kaniak ti ayat ni Jehova ta impalubosna a masarakak isuna. (1 Cron. 28:9) Determinadoak nga agtultuloy nga agpamolde kenkuana ken mangtulong iti dadduma a mangammo iti kinapudno a mangiturong iti biag nga agnanayon.