1926​—100 a Tawenen ti Napalabas

Bayat ti 1926, inusar ni Jehova ni Kristo, ti ulo ti kongregasion, tapno maawatan dagiti Kristiano a ti trabaho a panangasaba ti masapul a kapatgan iti biagda. Isu a nangipaay “ti matalek ken masirib nga adipen” kadagiti baro a publikasion para kadagiti agserserbi iti Dios, nangaramidda kadagiti panagbalbaliw kadagiti gimong, ken linawlawaganda ti pannakaawatda idi maipapan kadagiti responsabilidad ti maysa a Kristiano. (Mat. 24:45) Sinigurado met ni Kristo nga adda dagiti building ken equipment a kasapulanda tapno maitungpalda ti trabaho a panangasaba.

BARO A PUBLIKASION KEN PANAGBALBALIW KADAGITI GIMONG

Iti Abril, impakaammo ti The Golden Age (maaw-awagan itan iti Agriingkayo!) ti pannakairuar ti baro a libro a napauluan Deliverance. Daytoy a libro ti mangsukat iti Studies in the Scriptures a kangrunaan a maus-usar idi iti ministerio. Tapno adda umdas a libro nga usarenda, gimmatang dagiti kakabsat iti Bethel iti baro a pagimprentaan a kayana ti agimprenta iti 22 a libro iti kada minuto. Impaima dayta dagiti Estudiante ti Biblia iti amin a tattao a makasaritada.

Adu a tawen a ti ad-adalen dagiti Estudiante ti Biblia kadagiti gimongda ket dagiti tomo ti Studies in the Scriptures. Ngem nangrugi iti Mayo, ti ad-adalendan ket dagiti artikulo ti The Watch Tower. Ania dagiti nagsayaat a resulta dayta a panagbalbaliw?

Insurat ti maysa a kongregasion ken Brother Rutherford: “Kayat nga idanon ti bassit nga ecclesia [kongregasion] ti Bunker Hill, Illinois ti pakomustada.” Imbagada pay: “Kadagiti gimongmi iti Domingo, ad-adalenmi dagiti [artikulo] a pinili ti Sosiedad a maadal para kadagita a petsa. Agyamyamankami la unay ta dagus a maammuanmi dagiti baro a lawag.”

Nakatulong kadagiti Estudiante ti Biblia dagiti “baro a lawag,” wenno dagiti nalawlawagan a pannakaawat, tapno maipamaysada ti trabaho a panangasaba. Kas pagarigan, inlawlawag ti artikulo a “Pakasarsaritaan Wenno Tulag​—Ania Kadagitoy?” a saan a ti panangpasayaat iti personalidad ken ti panagbalin a nadayaw ken nasingpet iti dadduma ti kapatgan nga aramiden ti maysa a pudno a Kristiano. Imbaga pay dayta nga artikulo nga imbilin ni Jehova kadagiti Kristiano nga agbalinda a saksina. Ket gapu ta ay-ayatenda ni Jehova, masapul nga agtulnog ti amin a Kristiano iti dayta a bilin ken magagaranda koma a mangasaba.

Inlawlawag met ti sabali pay nga artikulo a napauluan “Panagsakripisio ken Panagserbi” a maipakita dagiti pudno a Kristiano ti ayatda ken Jehova no simamatalek nga agserbida kenkuana. Pinaregta met dayta nga artikulo ti amin nga Estudiante ti Biblia nga agbalinda nga aktibo, napasnek, ken naregta a mangasaba ken “agbalinda a saksi para iti Apo ken ipakaammoda ti mensahena iti amin a nasion ken amin a tattao ditoy daga.”—Isa. 43:​10, 12; Mat. 24:14.

Dagus a nakita dagiti kongregasion ti nagsayaat nga epekto dagita a panagbalbaliw. Kalpasan ti sumagmamano a lawas, impablaak ti The Watch Tower a Hulio 15, 1926 daytoy a surat: “Talaga a natignay ken naparegtakami unay kadagiti nabiit pay nga artikulo a ‘Pakasarsaritaan Wenno Tulag​—Ania Kadagitoy?’ ken ti ‘Panagsakripisio ken Panagserbi.’ Saanmi laengen a basta basaen dagiti artikulo ti The Watch Tower. Masapul nga adalenmin dagita.” Iti ngudo dayta a surat, imbagana nga “immadu ti mayat nga agkomento kadagiti gimong, ken nagsayaat ti resultana dayta iti ecclesia-mi.”

NAIPAGANETGET KADAGITI KOMBENSION TI PANANGASABA

Iti agtapos ti Mayo, adu nga Estudiante ti Biblia ti nakikombension idiay London, England. Iti dayta a tiempo, nagserra ti amin a kompania nga agim-imprenta idiay Britain gapu ta agprotprotesta dagiti tattao. Isu a tapno adda maited kadagiti makikombension, nag-over-time dagiti kakabsat iti Brooklyn Bethel a mangyimprenta iti 117,000 a kopia ti bokleta a napauluan The Standard for the People.

Iti Sabado, Mayo 29, nausaren dagiti kakabsat dagidiay a bokleta. Iti dayta nga aldaw, naiparegta iti nayimprenta a programa ti kombension: “Amin nga Estudiante ti Biblia nga adda ditoy ket maawis a mangikasaba iti maipapan iti Ari ken iti Pagarian. Sapaenyo ti mapan iti Alexandra Palace ket ibaganto dagiti kakabsat iti Service Department ti aramidenyo.”

Iti dayta met la nga aldaw, nasurok a 100,000 amin a literatura ti naiwaras. Inreport ti The Watch Tower a Hulio 15, 1926: “Nakaragragsak dagiti kakabsat. Nariknada nga inaramidda ti amin a kabaelanda nga agtulnog iti bilin ni Jehova: ‘Dakayo dagiti saksik ket siak ti Dios.’”

Kabigatanna, nagpalawag ni Brother Rutherford iti Royal Albert Hall maipapan iti mapasamak kadagiti gobierno ditoy lubong. Sumagmamano pay la a minuto kalpasan a naluktan dagiti ruangan ti auditoriom, napunnon dayta iti 13,000 a tattao. Ket gapu ta napnon ti auditoriom, dimngeg a naimbag ti dadduma iti ruar babaen kadagiti trompa.

Iti palawag ni Brother Rutherford, inlawlawagna a kumapkapuy dagiti gobierno ditoy lubong gapu ta linaksidda ni Jehova ken ti Pagarianna. Kinondenar met ni Brother Rutherford ti League of Nations ken impakpakaunana a maawanto dayta.

PANANGASABA IDIAY INDIA

Bayat nga adda idiay London ni Brother Rutherford para iti kombension, naam-ammona ni Edwin Skinner a taga-Sheffield, England. Maysa isuna a colporteur (maaw-awagan itan iti payunir). Kalpasan ti kombension, nagsubli ni Brother Skinner iti asaynmentna. Di nagbayag, nakaawat iti awis ken Brother Rutherford nga agkitada idiay London.

“Nariknak a kayatnak nga ibaon iti sabali a pagilian,” malagip ni Brother Skinner. “Kabigatanna, napanak idiay London. . . . Desididoak idi a no ibagana nga agserbiak iti sabali a pagilian, ibagak a nakasaganaak a mapan.” Ket husto ti pampanunoten ni Brother Skinner. Dinamag kenkuana ni Brother Rutherford: “Kayatmo ti mapan idiay India?” Insungbat ni Brother Skinner: “Kaano ti kayatmo nga ipapanko?”

Tallo laeng a lawas kalpasanna, iti Hulio, kadua ni Edwin ni George Wright a situtulok met nga agserbi iti sabali a pagilian a naglugan iti barko a napan idiay India. Nagserbi idiay ni Brother Skinner kas branch servant. Inasikasona ti trabaho iti Afghanistan, Burma (Myanmar), Ceylon (Sri Lanka), India, ken Persia (Iran). Nagtalinaed idiay India ni Brother Skinner iti 64 a tawen agingga a nagpatinggan ti biagna ditoy daga idi 1990.

IDAULUAN DAGITI AGDALDALIASAT A MANANGAYWAN TI TRABAHO A PANANGASABA

Manipud idi agarup 1894, mangipatpatuloden ti organisasion kadagiti pilgrim, wenno agdaldaliasat a pannakabagi, a mangbisita kadagiti grupo dagiti Estudiante ti Biblia. Idi Hulio 1926, adda panagbalbaliw iti ar-aramidenda. Manipud maysa nga aldaw, nagbalinen a dua nga aldaw ti panagbisitada. Masapul met a 100 nga oras ti abutenda iti kada bulan iti ministerio.

Nagsurat ni Brother George Draper a maysa a manangaywan iti sirkito iti The Watch Tower. Kunana: “Ti maysa a parabantay nga aso ket manamnama nga agtaul tapno pakdaaranna ti makimbalay; ngem no nakaidda dagiti kakabsat . . . , matmaturogda ken arigna saanda a makataul. [Isa. 56:10]” Nabigbig ni Brother Draper a masapul a nakasagana dagiti mangidadaulo a kakabsat a mangpakdaar kadagiti tattao iti ministerio. Ket ania ti makatulong kadakuada? Innayonna: ‘Masapul nga adalen dagiti Pilgrim ken ti amin a kakabsat a lallaki ti The Watch Tower.’ Idi 1938, nagpatinggan ti biag ni Brother Draper ditoy daga.

KOMBENSION ITI NEW YORK CITY

Ti maudi a dakkel a kombension iti daytoy a tawen ket naangay idi Oktubre 14-18, 1926 iti New York City. Immanamong dagiti kompania ti diario nga ipablaakda ti awis para iti palawag ni Brother Rutherford a napauluan “Asidegen ti Kadakkelan a Gubat Ditoy Daga.” Ngem idi dandanin mangrugi ti kombension, saan metten a kayat ti dadduma a dadakkel a kompania ti diario nga ipablaak ti awis para iti kombension.

Nagdesision dagiti kakabsat nga ipakaammoda iti publiko ti inaramid dagiti kompania ti diario. Iti Biernes, Oktubre 15, inruar ni Brother R. J. Martin ti baro a tract a napauluan Against the People. Naaramid dayta a tract tapno ipakaammoda ti saan a nasayaat nga inaramid dagiti diario ken iyawisda ti palawag ni Brother Rutherford. “Rinugiantayon ti agimprenta kadagiti bukodtayo a pagimprentaan,” imbaga ni Brother Martin. “Ket saan nga agsardeng dagiti kakabsat iti Bethel nga agtrabaho iti aldaw ken rabii agingga a makayimprentatayo iti 1,250,000 a kopia daytoy a tract. Kiddawenmi kadagiti kakabsat iti daytoy a kombension nga iwarasda dagitoy kadagiti tattao.” Idi nagpatingga ti sesion, dagus nga inwaras dagiti kakabsat ti tract. Ket iti dayta laeng a rabii, 300,000 a kopia ti naiwarasda.

Iti Sabado ken Domingo, ad-adu pay a tract ti naiwarasda agingga nga immabut iti nasurok a 1,000,000 amin! Nakaiwaras met dagitoy a naregta a kakabsat iti 3,783 a kopia ti Deliverance ken 35,140 a dadduma pay a bokleta.

Idi Oktubre 17, iti alas tres ti malem ti Domingo, dandani 12,000 ti nakangngeg iti palawag ni Brother Rutherford. Kalpasan dayta, adu nga interesado ti mayat a mangammo iti ad-adu pay. Isu a nasurok a 9,000 a libro ti naipaima, ti kaaduan pay laeng a naiwaras iti maysa a kombension.

BARO A PAGIMPRENTAAN ITI 117 ADAMS STREET

Gapu ta umad-adu ti mayat a mangbasa kadagiti literaturatayo, nakita dagiti mangidadaulo a kakabsat iti Brooklyn a kasapulan ti nalawlawa a pasilidad a pagimprentaan. Iti adu a tawen, ab-abanganda ti maysa a pasdek iti 18 Concord Street. Ngem naileten daytoy a pasdek para iti dakdakkel a panagkasapulan. Isu a gimmatang dagiti kakabsat iti lote iti Adams Street nga asideg laeng iti dati a pagimprentaan. Nangipatakderda iti dakkel a building a walo ti kadsaaranna. Dandani doble ti kalawa ti lotena iti dati a pagimprentaan.

Masarakan dayta a building iti 117 Adams Street a mausarto pay laeng iti 1927. Makatulongto dayta kadagiti kakabsat tapno maisaganada iti dakdakkelto pay a panagrang-ay. Ngamin, mangrugi iti 1927, immadu nga immadu ti mayat a makitimpuyog kadagiti Estudiante ti Biblia ken nagtultuloy ti pannakadalus ti organisasion tapno maikari ti ili ti Dios a mangawat iti nagan a Dagiti Saksi ni Jehova.