No Kasanoka a Mas Makasursuro Kadagiti Video-tayo

Magusgustuantayo dagiti video iti jw.org ta adu ti nagpapateg a masursurotayo kadagita tapno sumingedtayo ken Jehova. Adu ti mangbuybuya kadagitoy a video bayat ti panagdaydayaw ti pamiliada wenno bayat ti personal a panagadalda. Kasanoka pay a mas makasursuro kadagitoy a video? Dagitoy ti dadduma a tip.

I-pause-mo ti video ken agutobka. Saanmo koma a panunoten a masapul nga ileppasmo a buyaen ti intero a video. Isardengmo biit ti video no kasapulan tapno mautobmo dagiti napapateg a punto wenno teksto. Isaludsodmo iti bagim, ‘Kasanok a mayaplikar daytoy iti biagko, wenno kasanok ngata a mausar daytoy a mangtulong iti dadduma?’ No adda kaduam nga agbuybuya, mabalinyo a pagsaritaan dagita a saludsod.

Ag-take note-ka. Isuratmo dagiti banag a kayatmo a laglagipen, kas koma dagiti kangrunaan a teksto, punto, wenno no kasanom nga iyaplikar dagiti nasursurom. Makatulong dayta tapno nalaklakamto a sublian dagiti nasursurom iti video.

Buyaem manen. Nasayaat no saan laeng a maminsan a buyaem ti maysa a video. Ngamin, no buyaem manen dayta, baka adda baro a masursurom a saanmo a nakita idi damo wenno maipalagip kenka ti maysa a detalye a nalipatamon.