Apresiarem ti Agduduma a Personalidad Dagiti Kakabsat
IMADYINEM nga addaka iti taripnong sakbay ti panangasaba. Ita, pinagpartner ti mangidadaulo ti dua a brother. Diay maysa a brother ket naregta a mangasaba. Diay maysa met ket nadungngo a pastor. Kalpasan ti kararag, dagus a kinita daydiay naregta a brother diay relona. Sa idi kuan, addan idiay ridaw a mapanen mangasaba. Idinto ta daydiay nadungngo a brother ket nagtugaw pay laeng nga umuna, sa nakisarita iti maysa a baketen a sister.
Ania ngata ti sumaruno a mapasamak? Nakadepende dayta iti panangmatmat dagitoy a brother iti maysa ken maysa. Panunoten kadi daydiay naregta a brother a saysayangen laeng ti partnerna ti oras a para koma iti panangasaba? Iti sabali a bangir, panunoten kadi met daydiay nadungngo a brother nga awan man laeng ti personal nga interes ti partnerna para iti dadduma? No kasta ti panunotenda, baka maperdi laeng ti aldawda, imbes a naragsakda koma nga agkadua iti ministerio.
Agdudumatayo amin iti personalidad ken uray iti kayat. Imbaga ni Jessica a nasurok a 20 a tawenen a bautisado: “Baka nasanaytayon a mangpanunot ken mangaramid iti bambanag sigun iti nakairuamantayo. Isu a baka saantayon a madmadlaw a para kadatayo, daydiay laengen ammotayo ti husto.”
Kasanotayo ngarud a mapalawa ti panagpampanunottayo ken mas maipakita nga ap-apresiarentayo ti agduduma a personalidad dagiti kakabsattayo? Makatulong no panunotentayo ti panangmatmat ni Jehova iti panagdudumaduma dagiti parsuana.
KAYAT NI JEHOVA TI PANAGDUDUMADUMA DAGITI PARSUANA
Ammotayo a talaga a kayat ni Jehova nga agtutunostayo. Kayatna a ‘naan-anay koma nga agkaykaysatayo iti panunot ken opinion.’ (1 Cor. 1:10) Kayatna a surotentayo amin ti dinutokanna a “maymaysa a pastor” ken agbiagtayo maitunos iti pannursuro ti maymaysa a libro, ti Saona, ti Biblia.—Juan 10:16.
Ngem siempre, kayat met ni Jehova ti panagdudumaduma. Makitatayo dayta kadagiti pinarsuana. Kas pagarigan, adda dagiti animal nga agtaray. Ngem ti dadduma ket agkarayam, agtayab, wenno aglangoy. No maipapan met kadagiti mula, adda dagiti dumakkel a dumakkel agingga nga agbalin a natibker. Ngem adda met dagidiay saan a talaga a dumakkel ken narukop. Ngem para ken Jehova, nakapimpintas ken “nakasaysayaat” dagita.—Gen. 1:30, 31.
Maragragsakan met ni Jehova a makakita iti panagdudumaduma dagiti adipenna. Kitaentayo ti maysa kadagiti impadto ni Isaias. Dinakamat ti propeta ti agduduma nga animal a natalna nga agkakadua. (Isa. 11:6) Ket ita, matungtungpal dayta a padto iti ili ni Jehova ta adda talna iti nagbabaetanda. Ngem dayta kadi a talna ket gapu ta agpapadada iti panagpampanunot ken aramid? Saan. Kas kadagiti animal iti padto, agduduma met dagiti adipen ni Jehova. Agduduma ti naggapuanda, personalidadda, ken uray ti ugalida. Kas pagarigan, adda dagidiay natured a naglakada laeng a maibaga ti pampanunoten wenno marikriknada. Ngem adda met dagidiay agtaltalna laeng wenno mababain. Ngem adda latta ti talna iti nagbabaetanda. Ngamin, agpapada nga adda kadakuada ti nagpateg a banag, ti “pannakaammo maipapan ken Jehova.”—Isa. 11:9.
Maragragsakan ni Jehova iti panagdudumaduma dagiti adipenna, ken saannatayo a pilpiliten a masapul nga agpapadatayo iti amin a banag. Isu a ditay koma ipalubos a ti panagdudumadumatayo ti mamagsisina kadatayo. Imbes ketdi, ibilangtayo dagita kas regalo ni Jehova kadatayo a mangipakita nga isu ket nasirib, nakalalaing a Namarsua, ken naparabur a Dios.
KASANOTAYO A MAS MAIPAKITA NGA AP-APRESIARENTAYO TI PANAGDUDUMATAYO?
Baka naglakatayo laeng a maibaga nga ap-apresiarentayo ti panagdudumatayo nga agkakabsat. Ngem no masursuronka iti maysa a kabsat, baka marigatankan a mangapresiar iti naiduma a panagpampanunot ken panagtigtignayna. No kasta ti marikriknam, ania ti makatulong?
Laglagipem a kayat nga aramiden dagiti kakabsat ti umiso. (1 Cor. 13:4, 7) Para ken Jehova, nakapatpategda a gameng. Isu nga inawisna ida a sangailien iti toldana. (Sal. 15:1, 2) No laglagipentayo nga ikarkarigatan dagiti kakabsat nga aramiden ti amin tapno agtalinaedda a gayyem ti Dios, nalaklakatayo ida nga anusan uray no agduduma ti personalidadtayo ken tratuen ida a sidudungngo.—Efe. 4:32; Col. 3:13.
Palawaem ti panagpampanunotmo. Normal laeng a kayattayo nga aramiden dagiti bambanag iti nakasanayantayo. Ngem saanna a kayat a sawen a dayta laengen ti husto. Ngamin, agduduma ti dimmakkelantayo a lugar ken pamilia. Isu nga agdudumatayo iti panagsao, prinsipio, ken uray iti paboritotayo a makan. Isu a no masuronka iti maysa a naiduma ti pamay-anna a mangaramid iti bambanag, isaludsodmo iti bagim: ‘Ania ngata no siak isuna? No siak ti dimmakkel iti lugarda, iti pamiliada, wenno iti tiempoda?’
Agpokuska kadagiti nasayaat a kualidad ti dadduma. Panunotem manen ti eksena a nadakamat iti rugrugi. Ania ngata no nagpokus dagiti brother iti nasayaat a kualidad ti maysa ken maysa? Kas pagarigan, diay naregta a brother imbilangna a kinaimbag ti inaramid ti partnerna, imbes a saysayangenna laeng ti oras. Diay met nadungngo a brother imbilangna a naregta ti partnerna, imbes a saan a makaan-anus. Isu a no agpokusda iti nasayaat a kualidad ti tunggal maysa, imbes a padasenda a balbaliwan ti kababalin ti maysa ken maysa, maliklikanda ti agkamali. Ket no aramidenda dayta, saanda a masuron iti maysa ken maysa ken naragsakda nga agkadua.—Roma 12:10.
Sapay koma ta ikagumaantayo amin nga ipakita nga ap-apresiarentayo ti panagduduma dagiti kakabsat. (Fil. 2:2-4) No aramidentayo dayta, maaddaantayo iti talna ti panunot. (Sal. 119:165) Mas sumingedtayo kadakuada. Ken kapatgan iti amin, agbalintayo a nadekdekket ken Jehova, Daydiay namagkaykaysa kadatayo ‘amin nga agkakabsat.’—1 Ped. 2:17.