Ania ti Ibaga ti Biblia Maipapan iti Panagibales?
Sungbat ti Biblia
Uray no marikna ti maysa nga adda kalinteganna nga agibales, maikontra dayta iti pammagbaga ti Biblia: “Dimo ibaga: ‘Aramidek kenkuana ti inaramidna kaniak; ibaleskonto kenkuana ti inaramidna.’” (Proverbio 24:29) Adu a tattao ti natulongan ti pammagbaga ti Biblia tapno malabananda ti riknada nga agibales.
Iti daytoy nga artikulo
Ania ti pagdaksan ti panagibales?
No masaktannaka ti maysa, natural laeng a makaungetka ken kayatmo a madusa dayta a tao. Ngem ti panagibales ket maikontra iti ibaga ti Biblia. Apay?
No agibales ti tao, saan a maragsakan ti Dios. Iti Biblia, imbaga ni Jehovaa a Dios: “Kukuak ti pammales; siakto ti agibales.” (Roma 12:19) Iparparegta ti Biblia a no nasaktannaka ti maysa, pagsaritaan ken urnosenyo dagiti bambanag imbes nga agibaleska. (Roma 12:18) Ngem ania ti aramidem no awanen ti solusion tapno maurnos ti problema wenno inaramidmon ti amin a pamay-an a makikappia? Ibaga ti Biblia nga agtalektayo ken Jehova nga ilintegnanto dagiti bambanag.—Salmo 42:10, 11.
Mangipaay kadi ti Dios iti dusa?
Ita, ipalpalubos ti Dios nga ipataw ti autoridad ti tao ti dusa kadagiti nakabasol. (Roma 13:1-4) Ipakatnanto ti hustisia kadagiti nagaramid iti dakes ket agnanayonton nga awanen ti rigat.—Isaias 11:4.
Kasanok a malabanan ti rikna a kayatko ti agibales?
Agpanunotka nga umuna. (Proverbio 17:27) Masansan a pagbabawyan ti makapungtot a tao ti inaramidna. Ngem dagiti agpanunot nga umuna sakbay a mangaramid iti maysa a banag ket mas makaaramid iti nasaysayaat a desision.—Proverbio 29:11.
Ammuem no apay a kasta ti inaramid ti maysa. (Proverbio 18:13) No nasaktanka, nasaysayaat no panunotem daytoy, ‘Adda kadi dagiti detalye a diak ammo no apay nga inaramidna dayta? Mais-stress kadi? Wenno saanna nga inggagara ti inaramidna?’ No dadduma, kasla inggagara ti maysa ti inaramidna, ngem ti agpayso nagkamali laeng.
Di umiso a kapanunotan maipapan iti panagibales
Di umiso: Ipalubos ti Biblia ti panagibales ta ibagana, “mata iti mata.”—Levitico 24:20.
Umiso: Ti linteg ti nagkauna nga Israel a “mata iti mata” dina isuro ti panagibales. Tumulong daytoy a linteg kadagiti ukom a mangipakat iti maitutop a dusa kadagiti nakabasol.b—Deuteronomio 19:15-21.
Di umiso: Gapu ta saan nga iparparegta ti Biblia nga ibalesantayo ti bagitayo, saantayo ngarud a maidepensa ti bagitayo no adda mangdangran kadatayo.
Umiso: No adda mangdangran iti maysa, adda kalinteganna a mangidepensa iti bagina wenno agpatulong iti autoridad. Ngem ibagbaga met ti Biblia a saantayo koma a makilaban no posible.—Proverbio 17:14.
a Jehova ti nagan ti Dios sigun iti Biblia.
b Detalyado a nailawlawag daytoy a linteg iti artikulo nga “Ania ti Kaipapanan ti ‘Maysa a Mata Para iti Maysa a Mata?’”