Abbungot iti Kalam-ekna

MINATMATANYO kadin, nagsiddaawan, ti agtintinnag a niebe? No kasta, awan duadua nga umanamongkayo a daytoy ti maysa kadagiti kapintasan ken katalnaan a buya—nangnangruna no natalgedkayo ken naimeng iti uneg ti balay ken di aggangganat nga agbiahe. Bayat a pumuskol ti puraw nga abbungot, kasla mangisaknap dayta iti kasta unay a kinatalna ken kinaulimek iti amin a disso. Maep-ep uray pay ti awan aridengganna a siudad bayat nga agtinnag dagiti minilion a nalamuyot a flake.

Saan kadi ngarud a nakaskasdaaw, no kasano a mabalin a makaperdi ti kasla nalamuyot a banag a kas ti agtinnag a niebe? Dagiti okupado unay a siudad a kas iti New York—a masansan a mailadawan kas “ti siudad a pulos di maturog”—mabalin nga agtungpal iti nakababain a di panaggaraw no mabunton ti niebe iti kalalainganna a kangato.

Isu met la nga inimtuod ti Dios ken ni matalek a tao a Job: “Simrekka aya kadagiti pagidulinak ti niebe, wenno nakitam dagiti pagidulinan ti uraro, nga insangratko a maibusor iti panawen ti riribuk, maibusor iti aldaw ti bakal ken gubat?” (Job 38:22, 23) Iti panangtengngel ti Namarsuana, ni Jehova a Dios, pudno nga agbalin ti niebe a nakaam-amak nga armas.

Nupay kasta, masansan nga agserbi ti niebe a mangitalimeng iti biag imbes a mangdadael. Kas pagarigan, kunaen ti Biblia a ti Dios “mangted iti niebe a kas la napudaw a delana.” (Salmo 147:16) Kasano a kasla delana ti niebe? Us-usaren ti Biblia agpadpada ti niebe ken delana a mangiladawan iti kinapudaw ken kinadalus. (Isaias 1:18) Ngem adda pay sabali a nagpateg a pangyarigan. Agpadpada nga agserbi ti niebe ken delana a kas insulator. Kunaen ti The World Book Encyclopedia: “Ti delana . . . italimengna agpadpada ti lamiis ken pudot.” Ket maipapan iti niebe, kuna ti World Book nga “agserbi [met] kas nagsayaat nga insulator. Tumulong ti niebe a mangsalaknib kadagiti mula ken maturog nga ayup a mangpalabas iti nalamiis nga angin ti kalam-ekna.”

Gapuna iti sumaganad a tiempo a panangbuyayo iti panagtinnag ti niebe manipud iti langit, nalabit tarigagayanyonto a panunoten ti nakaskasdaaw a pannakabalin ti Dios. Wenno mabalin a pilienyo a panunoten ti nalamuyot a salaknib nga ipaayna bayat nga aplaganna iti puraw nga abbungot ti pinarsuana, a kas met laeng ti pamay-an ti panangules ti naayat nga ama wenno ina iti anakna no paturogenna.