Panagopera a Di Mausar ti Dara—Mabigbigbig Dagiti Pagimbaganna
IDI 1996 impablaak ti Royal College of Surgeons iti Inglatera ti maysa a bokleta a naawagan Code of Practice for the Surgical Management of Jehovah’s Witnesses. Iti dayta a bokleta kuna dagiti siruhano: “Gapu kadagiti peggad ti panangyalison iti dara, matarigagayan ti panangamiris kadagiti maisukat a pamay-an no kasapulan.”
Impadamag met ti AHA NEWS, nga impablaak ti American Hospital Association, no apay a mabigbigbigen dagiti pagimbagan ti panagopera a di agusar iti dara. “Ti nangrugi a kas relihioso a pammati ad-adda a magustuanen a medikal a pamuspusan ken adelantado a teknolohia,” kinuna ti linawas a periodiko. “Ti panangagas ken panagopera a di agusar iti dara, a no maminsan ket maigapu iti pannursuro dagiti Saksi ni Jehova, lablab-awannan dagiti kasapulan ti naespirituan a kagimongan kadagiti kuarto a pagoperaan iti intero a nasion.”
Ti gapu nga itantandudo dagiti adu a doktor ti panagopera a di agusar iti dara ti maysa a tema a naiparang iti suplemento ti magasin a Time iti edisionna idi otonio ti 1997. “Ti panagamak iti AIDS ket maysa laeng a rason,” kinuna ti artikulo. Impadamag ti artikulo a nangnangruna ti trabaho a maar-aramid idiay Englewood Hospital’s New Jersey Institute for the Advancement of Bloodless Medicine and Surgery, idiay Englewood, New Jersey.
Kinuna ti Time: “Ti institusion ti mangidaulo kadagiti nasurok a 50 [nga ospital] idiay E.U. a mangar-aramiden iti panagopera a di agusar iti dara. Babaen ti di panagusar a pulos iti naidonar a dara, mangipaayda iti pamay-an ti panagopera a kadawyan a makasapul iti panangyalison, agraman dagiti pamuspusan a mangpabassit a naimbag, wenno dandani awan pay ketdi ti mapukaw a dara.”
Epektibo ken Natalged
Ti pangrugian ti artikulo iti Time insalaysayna ti kapadasan ni Henry Jackson, a nagpadara iti nakaro iti uneg a nagsayasayan ti 90 porsiento iti darana ken nangpababa iti hemoglobin-na iti mamagpeggad-biag a 1.7 gramo iti maysa a decilitro. Naipan ni Jackson idiay Englewood Hospital a naggapu iti sabali nga ospital idiay New Jersey, a madi a mangagas kenkuana no di agpayalison iti dara.
Idiay ospital ti Englewood, iti sidong ti panangaywan ni Dr. Aryeh Shander, naikkan ni Jackson iti “nasamay a pormula a suplemento nga iron ken bitamina, agraman ti ‘nasamay a kaadu’ ti agas a mangpaadu iti dara, ti sintetiko nga erythropoietin, a manggutugot iti pata ti tulang a mangpataud kadagiti nalabaga a selula ti dara. Kamaudiananna, nayalisonan kadagiti pluido a mangtignay iti nakapuyen a sirkulasion ti darana.”
Impadamag ti Time nga iti sumagmamano nga aldaw kalpasanna, “immawag ti immuna nga ospital tapno damagenna no natayen ni Jackson. Buyogen ti prangka a pannakapnek, imbaga ni Shander kadakuada, ‘Saan laeng a sibibiag, no di ket naimbagen ken nakasaganan a rummuar, ket mabiiten a matamingnanto ti gagangay a trabahona.’”
Iti maysa nga interbiu iti telebision idi Nobiembre 28, 1997, inlawlawag ni Dr. Edwin Deitch, direktor iti panangagas para iti programa a di agusar iti dara idiay University Hospital, Newark, New Jersey, no kasano a napataud ti panagsirarak iti panagopera a di agusar iti dara: “Dagiti Saksi ni Jehova . . . nangaramidda iti adu a panangikagumaan a mangsapul kadagiti tattao a mangopera kadakuada a di agusar iti dara. Dadduma kadagiti resulta dagidiay a panagadal natakuatanda a nasaysayaat pay ti nagbanaganna ngem ti ninamnamada, [no idilig] kadagiti tattao a nayalisonan iti dara.”
Kinuna pay ni Dr. Deitch: “Ti dara pakapuyenna ti kinaepektibo ti sistema a panglapped iti sakit ket pataudenna dagiti parikut iti impeksion kalpasan ti pannakaopera; pakaruenna ti peggad kadagiti addaan iti agsublisubli a kanser, isu a ti dara, nupay nasayaat iti dadduma a kasasaad, addaan kadagiti dakes nga epekto.” Maipapan iti panagopera a di agusar iti dara, kinuna ni Dr. Deitch: “Nabatad a pasayaatenna ti pagbanagan ti pasiente ket basbassit dagiti komplikasion, ken nalaklaka [dayta]. Ngarud, dayta ti pudno a nangabak kadagiti amin a kasasaad.”
Gapuna, kas kinuna ti Time, “umad-adu a pasiente ti mangkidkiddaw iti nataltalged ken ad-adda nga epektibo a panangagas ngem ti panangyalison.” Impadamag pay ti magasin: “Sigun iti dadduma a pattapatta, 25% kadagiti panangyalison iti E.U. ket di kasapulan. Addada met mangipasimudaag a dagiti pasiente saanda a maanduran ti dati a maipagarup a kaadu ti hemoglobin a kasapulan ken adda naisigud a reserba ti dara nangnangruna kadagiti agtutubo. . . . Makombinsir [ni Shander] a ti panangikedked iti dara mabalin ken kaykayat a pilien ti kaaduan a pasiente.”
Nupay ti pannakaala ti sakit babaen iti panangyalison iti dara ti kangrunaan a peggad, adda pay dadduma. “Ti naideposito a dara, kalpasan a naipalamiis ken naidulin, naikkaten ti kabaelanna a kas iti presko a dara a mangyallatiw iti oksihena,” inlawlawag ni Dr. Shander. “Mangrugrugi pay laeng a maawatanmi no ania ti mapaspasamak no mangyalisonkami.”
“Ti Pagibasaran”
“Kamaudiananna,” kinuna ti Time, “adda met ti magasto: iti agarup $500 para iti tunggal panangyalison, agraman dagiti mainayon pay a panangaywan, ti pakagupgopan ti bayadan ket adda iti baet ti $1 bilion ken $2 bilion iti tinawen, ad-adu nga amang a pakagutugotan a mangamiris kadagiti maisukat a pamay-an.” Ti nakangingngina a magasto iti panangyalison iti dara ti kasla kangrunaan a rason no apay a nagbalinen a nalatak ti panagopera a di agusar iti dara.
Kinuna ni Sharon Vernon, direktor iti Center for Bloodless Medicine and Surgery idiay St. Vincent Charity Hospital, Cleveland, Ohio, maipapan iti panangagas kadagiti pasiente a di agusar iti dara: “Umad-adu agsipud ta mabigbigbig dagiti doktor a ti panangagas a di agusar iti dara ti pagibasaran iti agek-ekonomia nga aglawlaw. Ti kapadasanmi ket uray dagiti kompania ti seguro a saan a nainaig kadakami, ibaonda dagiti tattao kadakami, gapu ta makaekonomiada.”
Nabatad ngarud a ti panagopera a di agusar iti dara napartak ti pannakabigbigna iti medikal a komunidad, ken maigapu iti adu a rason.
[Kahon iti panid 11]
DAGITI NABIIT PAY A DESISION TI KORTE
Nakapatpateg ti dua a desision ti korte a naipaulog idiay estado ti Illinois, E.U.A., idi Nobiembre ken Disiembre 1997. Iti umuna, ni Mary Jones, maysa kadagiti Saksi ni Jehova, nagunggonaan iti $150,000 kas daños gapu ta nayalisonan idi 1993 iti dua a yunit a dara nupay nabatad ti panagkedkedna iti kastoy a kita ti panangagas. Daytoy ti kadakkelan pay laeng a gatad a naawat ti maysa a Saksi gapu iti emosional a pannakadangran a sinagabana kas resulta ti di matarigagayan a panangyalison iti dara.
Ti maikadua a kaso ramanenna ti masikog idi a Saksi a ni Darlene Brown, a napilit a nayalisonan gapu iti 34-lawas a sikogna. Idi Disiembre 31, 1997, inlawlawag ti Korte a Pagapelaran iti Illinois ti desisionna babaen ti panagkunana a “ti panangyalison iti dara ket mangraut a pamay-an ti panangagas a mangsinga iti prinsipio ti adulto a makabael nga agrason.”
Sinumario ti Korte a Pagapelaran ti desisionna babaen ti panagkunana nga “iti sidong ti linteg daytoy nga Estado, . . . ditay maipapilit ti linteg iti masikog a babai tapno umabuloy iti mangraut a pamay-an ti panangagas.”
Idi Pebrero 9, 1998, binaliktad ti Nangato a Korte ti Tokyo ti desision ti nababbaba a korte, a nagdesision a ti maysa a doktor adda kalinteganna a mangyalison iti dara ken ni Misae Takeda bayat ti pannakaoperana idi 1992. Inwaragawag ti Nangato a Korte a “masapul a maraem ti kalintegan ti pasiente nga agpili iti pannakaagas. Maiparit iti linteg ti mangyalison iti dara.” Nagunggonaan ni Misae Takeda iti daños a 550,000 yen ($4,200).