Paset 1

Pudno Aya a Maseknan ti Dios Kadatayo?

 1, 2. Ania a saludsod ti imtuoden dagiti tao maipapan iti Dios, ken apay?

ITI dadduma a tiempo iti biagyo, mabalin nga imtuodenyo: ‘No adda Dios a pudno a maseknan kadatayo, apay a palubosanna ti kasta unay a panagsagaba?’ Datay amin napadasantayon ti nagsagaba wenno adda am-ammotayo a nagsagaban.

² Kinapudnona, iti isuamin a historia dagiti tao nagsagabadan iti rigat ken ladingit gapu iti gubat, kinaranggas, krimen, panangirurumen, kinapanglaw, sakit, ken ipapatay dagiti inay-ayat. Iti maika-20 a siglotayo laeng, pinapatayen dagiti gubat ti nasurok a 100 milion a tattao. Ginasut a milion pay ti nasugsugatan wenno napukawan ti pagtaengan ken sansanikua. Napasamak ti nakaad-adu a nakaam-amak a banag iti tiempotayo, a nagbanag iti kasta unay a ladingit, adu a lulua, ken marikna dagiti umariwekwek a tao nga awan namnamada.

 3, 4. Kasano’t panagrikna dagiti adu maipapan ti panangipalubos ti Dios iti panagsagaba?

³ Daddumat’ makarurod ket kunaenda a no adda Dios, isut’ pudno a di maseknan kadatayo. Wenno mabalin pay ketdi a kunaenda nga awan Dios. Kas pangarigan, nagimtuod ti maysa a lalaki a nagsagaba iti panangidadanes dagiti katribona isu a nakatayan dagiti gagayyem ken pamiliana idi Gubat Sangalubongan I: “Sadinot’ yan ti Dios idi isut’ kasapulami?” Sabali pay, a nakalasat iti panangpapatay dagiti Nazi kadagiti minilion idi Gubat Sangalubongan II, ket maladingitan unay iti panagsagaba a nakitana ta kinunana: “No madilpatam koma ti pusok, mabalin a sabidongannaka.”

⁴ Gapuna, di maawatan dagiti adu a tao no apay a ti maysa a naimbag a Dios palubosanna a mapasamak dagiti dakes a bambanag. Pagduaduaanda no pudno a maseknan ti Dios kadatayo wenno no pudno nga adda Dios. Ket adu kadakuada ti agkuna a kankanayonto a paset ti panagbiag ti tao ti panagsagaba.

[Ladawan iti panid 2, 3]

Asidegen aya ti baro a lubong nga awan panagsagaba?