Kapitulo 16

Dagiti Gimong—Para iti Panagdaydayaw, Instruksion, ken Pammaregta

DAGITI gimong ti kongregasion napategda a paset ti aktibidad dagiti Saksi ni Jehova. Uray no dagiti sirkumstansia parnuayendat’ kinarikut, ikagumaananda a tabunuan a regular dagiti gimong, kas maitunos iti patigmaan ti Biblia: “Agpipinnanunottayo a maipaay iti pannakagutugottayo iti ayat ken kadagiti naimbag nga aramid, a ditay baybay-an dagiti panaggigimongtayo, kas iti kadawyan dagiti dadduma, no di ket agpipinnaregtatayo, ket nangnangruna gapu ta makitayo nga umas-asideg ti aldaw.” (Heb. 10:24, 25) No mabalbalin, kada kongregasion mamitlo koma nga aggigimong iti linawas, nga agdagup iti 4 nga oras ken 45 a minutos. Nupay kasta, ti kasasaad dagiti gimong, ken ti kasansanda, nagbaliwbaliw sigun iti kasapulan kadagita a tiempo.

Idi immuna a siglo, ti pannakaiparangarang dagiti namilagruan a sagut ti espiritu isudat’ nasken a paset dagiti Nakristianuan a gimong. Apay? Ngamin babaen kadagitoy a sagut pinaneknekan ti Dios a dinan kasapulan ti relihiuso a sistema dagiti Judio ta ti espirituna immapayen iti kaporporma a kongregasion Kristiano. (Ara. 2:1-21; Heb. 2:2-4) Nayebkas dagiti kararag no aggigimong dagiti immuna a Kristiano, kinantada dagiti pangdayaw iti Dios, ket naigunamgunam ti panagipadto (kayatna a sawen, panangipalgak iti nadibinuan a pagayatan ken panggep) ken panangiburay iti instruksion a nangpabileg kadagidiay nakangngeg. Nagbiag dagidi Kristiano iti tiempo a naangay dagiti nakaskasdaaw a panagbalbaliw a nainaig iti panggep ti Dios. Masapul a matarusanda idi dagitoy ket ammuenda no kasanoda a tumunos. Nupay kasta, ti wagas a panangtaming dagiti dadduma kadagiti bambanag no madamat’ gimong ket saan a balanse, ket kas ipakitat’ Biblia, masapulda ti balakad tapno makapalaing unay ti pannakaiyusuat dagita.—1 Cor. 14:1-40.

Dagiti kadi paset a naangay kadagiti gimong dagidi nagkauna a Kristiano nagminarda met ngata idi naggigimong dagiti Estudiante ti Biblia idi 1870’s ken kalpasanna?

Panangpennek iti Naespirituan a Kasapulan Dagiti Nagkauna nga Estudiante ti Biblia

Ni Charles Taze Russell ken ti bassit a grupo dagiti kakaduana iti uneg ken lawlaw ti Allegheny, Pennsylvania, nangpormada iti klase para iti panagadal ti Biblia idi 1870. Kas imbanag ti panaggigimongda, nagin-inut a rimmang-ay ti ayatda iti Dios ken iti Saona ket immadut’ naammuanda nga isursuro ti Biblia. Awan namilagruan a panagsao kadagiti sabali a lenguahe kadagidi a gimong. Apay nga awan? Dagita a namilagruan a sagsagut naturposdan ti gandatda idi immuna a siglo, ket kas impadtot’ Biblia, nagpasodan. “Ti sumaganad nga addang ti irarang-ay,” inlawlawag ni Kabsat Russell, “isut’ pannakaiparangarang dagiti bunga ti Espiritu, kas imbatad ni San Pablo.” (1 Cor. 13:4-10) Mainayon pay, kas met la idi immuna a siglo, adda naganetget a trabaho a panagebanghelio, ket gapu itoy masapuldat’ pammaregta. (Heb. 10:24, 25) Di nagbayag, regular a maminduadan nga aggigimong iti kada lawas.

Nabigbig ni Kabsat Russell a nesesita ti panagtitimpuyog dagiti adipen ni Jehova, sadinoman ti nakaiwarasanda iti intero a globo. Gapuna, idi 1879, di nagbayag kalpasan a nangrugi a maipablaak ti Watch Tower, naawis dagiti managbasa a kiddawenda a sarungkaran koma ida ni Kabsat Russell wenno maysa kadagiti kakaduana. Naipiho a sibabatad nga “Awan mabayadan wenno kuarta a maur-or.” Idi naawatdan ti sumagmamano a kiddaw, inrugi ni Kabsat Russell ti makabulan a biahe a dimmanon inggat’ Lynn, Massachusetts, a naangay ti gimong nga agpaut iti uppat inggat’ innem nga oras iti tunggal aldaw kada lugar a nagbisitaanna. Ti tema a naitampok isut’ “Bambanag a Nainaig iti Pagarian ti Dios.”

Idi rugrugi ti 1881, indagadag ni Kabsat Russell kadagidi managbasa ti Watch Tower nga awanan pay ti regular a gimong iti lugarda: “Mangipasdekkayo ti gimong dita mismo a balayyo a kaduayo ti pamiliayo, wenno uray dagiti sumagmamano nga interesado. Agtitimpuyogkayo nga agbasa, agadal, mangbendito ken agdaydayaw, ket no sadinot’ yan ti dua wenno tallo nga agtitipon gaput’ Naganna, ti Apo addanto iti tengngayo—ti maestroyo. Kastat’ kasasaad ti dadduma kadagiti gimong ti iglesia idi aldaw dagiti Apostol. (Kitaenyo ti Filemon, 2).”

Ti programa dagiti gimong nagin-inut a simmayaat. Adda dagiti singasing a naited, ngem makakaammo ti kada lokal a grupo no aniat’ kasayaatan para iti sirkumstansiada. No dadduma adda mangidiskurso iti maysa a tema, ngem dakdakkel ti pannakaigunamgunam dagiti gimong a pakiramanan dagiti isuamin. Dadduma a klase dagiti Estudiante ti Biblia idi damo dida unay inusar dagiti publikasion ti Sosiedad kadagiti gimongda, ngem dagiti agdaldaliasat a manangaywan, dagiti pilgrim, isudat’ timmulong tapno ipateg dagiti kakabsat dagita a literatura.

Idi naipablaak ti sumagmamano a tomo ti Millennial Dawn, dagitoyen ti inrugida a pangibasaran iti adalenda. Idi 1895 dagita nga agad-adal a grupo naawagandat’ Dawn Circles for Bible Study.a Dadduma a taga Norway idi agangay tinukoyda dagita kas “gimong ti panagbasa ken panagtutungtong,” nga innayonda: “Naibasa dagiti suplemento ti liblibro ni Kabsat Russell, ket dagidiay adda komento wenno saludsodda, intayagda dagiti imada.” Inrekomenda ni Kabsat Russell a kadagita a panagadal usaren koma dagiti kakabsat dagiti nadumaduma a patarus ti Kasuratan, dagiti marginal a reperensia ti Biblia, ken konkordansia ti Biblia. Dagiti gimong masansan a buklen laeng ti sumagmamano kada grupo, a maangay iti pribada a pagtaengan, iti rabii a kumbiniente kadakuada. Dagitoy a gimong isudat’ pakpakauna dagiti agdama a Panagadal ti Libro ti Kongregasion.

Nabigbig ni Kabsat Russell a di umdas ti panangadal laeng kadagiti doktrina. Masapul pay a mayebkas ti debosionda tapno ti puso dagiti tao matignay gaput’ panangapresiarda iti ayat ti Dios ken iti tarigagay a mangdayaw ken agserbi kenkuana. Naidagadag a dagiti klase iyurnosda ti espesial a gimong para itoy a panggep iti maminsan kada lawas. Naawagan dagitoy no dadduma iti “Cottage Meetings” gapu ta naangayda kadagiti pribada a pagtaengan. Ti programa ramanenna dagiti kararag, himno a pagdayaw, ken testimonia a salaysayen dagidiay timmabuno.b Dagitoy a testimonia no dadduma ket makaparegta a kapkapadasan; ramanenna pay met dagiti suot, rigat, ken parikut a sinarangetda kadagiti kallabes nga aldaw. Kadagiti dadduma a lugar saan a naragpat dagitoy ti gandatda gapu ta ad-adda met a ti bagbagida ti impaganetgetda. Nailanad iti The Watch Tower dagiti naayat a singasing a pangparang-ay.

Kas pananglagip kadagita a gimong, kinuna ni Edith Brenisen, asawa ti maysa kadagiti nagkauna a pilgrim sadi Estados Unidos: “Rabii dayta a panangmennamenna iti naayat a panangtaripato ni Jehova ken nasinged a pannakitimpuyog kadagiti kakabsat. Bayat nga immimdengkami kadagiti kapadasanda ad-adda met a naam-ammomi ida. Ti panangpaliiwmit’ kinamatalekda, panangparmekdat’ parikutda, masansan a tinulongannakami a mangrisut kadagiti bukodmi a problema.” Nupay kasta, di nagbayag, nakitada a dagiti gimong a nadisenio a mangtulong iti tunggal maysa a nakiraman iti trabaho ket ad-adda a makagunggona.

Ti wagas a pannakaangay dagiti gimong ti Domingo ti nagproblemaan dagiti kakabsat kadagiti dadduma a lugar. Addada klase a nangsalaysay iti Biblia a bersikulo por bersikulo. Ngem masansan a ti panagsisimparat ti opinion di pulos makapabileg. Tapno maator dayta, adda kakabsat iti kongregasion sadi Los Angeles, California, a nangbukel kadagiti balabala para iti topiko a panagadal iti Biblia, nga addaan kadagiti saludsod ken reperensia nga usigen dagiti isuamin sakbay a makigimongda. Idi 1902 nangiruar ti Sosiedad iti Biblia a naglaon iti “Berean Bible Study Helps,” agraman indise ti topiko.c Tapno mapasimple dayta, nangrugi idi Marso 1, 1905, a Watch Tower, naipablaak dagiti balabala a pagsasaritaan ti kongregasion, agraman dagiti saludsod ken reperensia ti Biblia ken dagiti publikasion ti Sosiedad a masirarak. Nagtultuloy dagitoy agingga idi 1914, nga isut’ pannakaipablaaken dagiti saludsod a maadal kadagiti tomo ti Studies in the Scriptures a pakaibasaran dagiti “Berean Studies”.

Amin dagiti klase agpapareho ti literatura nga adalenda, ngem ti bilang ti panaggigimongda kada lawas adda maminsan inggat’ mamimpat wenno ad-adu pay, sigun iti lokal nga urnos. Idiay Colombo, Ceylon (Sri Lanka itan), nanipud 1914, mamimpitoda ketdi nga aggigimong iti linawas.

Naparegta dagiti Estudiante ti Biblia a sursuruenda ti agsirarak, tapno “paneknekanda amin a bambanag,” nga iyebkasda dagiti kapanunotan kadagiti bukodda a sao. (1 Tes. 5:21, KJ) Pinaregta ni Kabsat Russell ti naan-anay ken nalabon a pannakasalaysay ti artikulo a maadal. Impakdaarna met: “Diyo liplipatan a ti Biblia isut’ Estandartetayo ket nupay dagiti katulongan iti panagadal ket inted ti Dios, dagitoy ket ‘katulongan’ laeng ken dida sandian ti Biblia.”

Panglaglagip iti Ipapatay ti Apo

Nangrugi idi agarup 1876, inyurnos dagiti Estudiante ti Biblia ti tinawen a pananglaglagip iti ipapatay ti Apo.d Idi damo, ti grupo sadi Pittsburgh, Pennsylvania, ken iti aglawlaw nagtataripnongda iti balay ti maysa a gayyem. Idi 1883, adda agarup sangagasuten a timmabuno sadiay, gapuna nangabangda iti nalawa a kuarto. Tapno malaonna ti adu a timmabuno sadi Pittsburgh idi 1905, inabangan dagiti kakabsat ti nalawa a Carnegie Hall.

Nabigbig dagiti Estudiante ti Biblia a daytoy ket tinawen a rambak, saan ket a maaramid iti kada lawas. Ti petsa a panangrambakda maitupag iti Nisan 14 ti kalendario a Judio, ti tiempo ti ipapatay ni Jesus. Iti unos dagiti tawen, napalanas ti pannakakarkulo dayta a petsa.e Ngem ti prinsipal a pakaseknanda isut’ kayulogan a mismo dayta a pasken.

Nupay dagiti Estudiante ti Biblia kadagiti adu a lugar nagtataripnongda a nagdudumat’ dagupda itoy a pananglaglagip, amin a makabael a tumabuno sadi Pittsburgh ket naawatda. Nanipud 1886 inggat’ 1893, dagiti managbasat’ Watch Tower ad-adda a naawisda sadi Pittsburgh, no kabaelanda, ket talaga nga immayda, a naggaput’ nadumaduma a paset ti Estados Unidos ken Canada. Saanda laeng a nabaelan ti nakitimpuyog a nangrambak iti Panglaglagip no di ket timmulong pay kadakuada a nangpalagda ti naespirituan a panagkaykaysada. Nupay kasta, idi immadut’ dagup dagiti klase, agpada sadi Estados Unidos ken dadduma a paset ti lubong, saanen a praktikal a maymaysa a disso ti pagtataripnonganda, ket nabigbigda nga ad-adut’ magapuananda no dagiti kapammatianda ket agtataripnongda iti lugar nga asideg kadagiti pagtaenganda.

Kas inlawlawag ti Watch Tower, adu idi dagiti agkunkuna a mamatida iti subbot, ket awan kadagitoy ti impuerada no iti tinawen a pananglaglagip. Ngem dayta nga okasion naisangayan ti kayuloganna kadagidiay talaga a kameng ti “bassit nga ipastoran” ni Kristo. Isuda dagitoy ti makiraman iti nailangitan a Pagarian. Idi karabiian ti ipapatay ni Jesus, idi inyusuatna ti Panglaglagip, kadagita nga indibidual ti nangidiayaan ni Kristo ti kasta a namnama a kinunana: “Itultuloyyo nga aramiden daytoy a panglaglagip kaniak.”—Luc. 12:32; 22:19, 20, 28-30.

Nangnangruna nanipud idi 1930’s, nangrugin a nagparang dagiti agngayangay a kameng ti “dakkel nga umariwekwek,” wenno “dakkel a bunggoy” dagiti sabsabali a karnero. (Apoc. 7:9, 10, KJ; Juan 10:16) Naawagan dagitoy a Jonadab idi a tiempo. Iti damo unay, sigun iti ruar a Pebrero 15, 1938 (iti Ingles), Ti Pagwanawanan espesipiko nga inawisna ida a tumabuno iti Panglaglagip, a kinunana: “Kalpasan ti alas seis t.m. ti Abril 15 kada kompania dagiti napulotan agtataripnongda koma ket rambakanda ti Panglaglagip, a dagiti kakaduada a Jonadab tumabunoda met.” Timmabuno dagitoy, saan a tapno makiraman, no di ket agpaliiw. Nangrugi nga immadut’ bilangda idi maangay ti Panglaglagip iti ipapatay ni Kristo. Idi 1938 adda dagup dagiti timmabuno a 73,420, idinto ta dagiti nakiraman iti emblema a tinapay ken arak nagdagupdat’ 39,225. Kadagiti simmaganad a tawen, dagidiay timmabuno kas agpaliiw inramanna met ti dakkel a bilang dagiti interesado ken dadduma pay a di pay nagbalin nga aktibo a Saksi ni Jehova. Gapuna, idi 1992, idi a ti kangatuan a bilang dagiti rimmaman iti ministerio idiay tay-ak isut’ 4,472,787, ti timmabuno iti Panglaglagip isut’ 11,431,171, ket ti dagup laeng dagiti nakiraman iti emblema isut’ 8,683. Kadagiti dadduma a daga ti timmabuno maminlima wenno mamin-innem a daras iti kaadu dagiti aktibo a Saksi.

Gaput’ napalalo a panangipategda iti kayulogan ti ipapatay ni Kristo, rambakan dagiti Saksi ni Jehova ti Panglaglagip uray no addada kadagiti nakarikrikut a sirkumstansia. Idi 1970’s, gapu iti “curfew” idi madamat’ gubat sadi Rhodesia (Zimbabwe itan) ket imposible a rummuar dagiti kakabsat iti rabii, kadagiti dadduma a disso nagtataripnongda iti balay ti maysa a Saksi ni Jehova no iti aldaw sadanto rambakan ti Panglaglagip iti rabii. Siempre, didan makaawid kalpasan ti gimong, gapuna naturogda aminen sadiay. Dagiti natda pay nga oras inusarda a nangkansion kadagiti kanta ti Pagarian sada insalaysay dagiti kapadasan, a nangpakired pay nga ad-adda kadakuada.

Kadagiti kampo konsentrasion idi Gubat Sangalubongan II, rinambakandat’ Panglaglagip, nupay nagbanag komat’ nakaro a pannakadusada iti dayta nga inaramidda no natakkuatan ida ti guardia. Idi naiputputong iti pagbaludan idiay Komunista a China nanipud 1958 inggat’ 1963 gapu iti Nakristianuan a pammatina, rinambakan ni Harold King ti Panglaglagip iti kasayaatan a kabaelanna sigun iti sirkumstansia. Kinunana kalpasanna: “Idiay tawa ti pagbaludan intagtagiurayko ti kabus manipud rugi ti primavera. Siaannad a kinarkulok ti petsa ti rambak.” Isut’ nangiremedio kadagiti emblema, a nagaramid iti sangkabassit nga arak manipud pasas sa ti bagas, nga awan lebadurana, pinagbalinna a tinapay. Kinunana pay: “Nagkanta ken nagkararagak sa impalawagko ti gagangay a diskurso iti dayta nga okasion, a kas maar-aramid iti amin a kongregasion ti ilin Jehova. Iti kasta nariknak a kada tawen nakikaykaysaak kadagiti kakabsatko iti intero a lubong iti daytoy nakapatpateg unay nga okasion.”

Lugar a Mayataday Dagiti Agtutubo

Kadagidi tawen nga immun-una, dagiti publikasion ken gimong dagiti Estudiante ti Biblia saanda a nairanta kadagiti agtutubo. Mabalinda a tabunuan dagiti gimong, ket dadduma ti timmabuno ken immimdeng a sigagagar. Ngem awan naisangsangayan a pamuspusan tapno makipasetda koma iti mapaspasamak. Apay nga awan?

Ti pannakatarus dagiti kakabsat idi a panawen ket ababa unayen ti tiempo a nabati sakbay a makikaykaysa ken Kristo amin a miembro ti nobiana idiay nailangitan a dayag. Inlawlawag ti Watch Tower idi 1883: “Datayo a masansanay para iti nailangitan nga awis ditay mabalin a sumiasi iti naisangayan a trabaho iti daytoy a periodo—ti trabaho a pannakaisagana ‘ti Nobia, ti asawa ti Kordero.’ Masapul a ti Nobia isagananat’ bagina; ket iti daytoy agdama a momento, bayat a maiyadornon dagiti maudi a paset ti arkosna kas panagsagana iti kasar, amin a serbisio dagiti miembro kasapulan iti daytoy kapapatgan amin, nga agdama a trabaho.”

Naidagadag unay kadagiti nagannak nga ibaklayda ti rebbengen nga inted ti Dios kadakuada a mangipaay ti naespirituan nga instruksion kadagiti annakda. Saan a naidagadag dagiti nailasin a “Sunday school” para kadagiti agtutubo. Nabatad a ti panangusar ti Kakristianuan kadagiti Sunday school nagbunga ti pakadangran. Dagiti nagannak a nangibaon kadagiti annakda kadagita nga eskuelaan kadarato nga ipapanda a daytoy nga urnos isut’ nanglibre kadakuada tapno saandan nga itden ti relihiuso nga instruksion kadagiti annakda. Dagiti met ubbing, no iti biangda, gapu ta saanen a dagiti dadakkelda ti kangrunaan a nangted ti instruksion kadakuada maipapan iti Dios, didan natignay a mangdayaw kadagiti dadakkelda ken agtulnog kadakuada a kas rebbengenda koma.

Nupay kasta, nanipud 1892 inggat’ 1927, nangilasin ti Watch Tower iti espasio para iti komento ti teksto a nailanad iti “International Sunday School Lessons,” a popular idi kadagiti adu nga iglesia a Protestante. Dagitoy a teksto iti las-ud ti adu a tawen ket pinili ni F. N. Peloubet, klero a Congregational, ken dagiti katulonganna. Sinalaysay ti Watch Tower dagitoy a teksto sigun iti progresibo a pannakatarus dagiti Estudiante ti Biblia iti Kasuratan, a di natibnokan kadagiti kredo ti Kakristianuan. Ninamnamada nga iti kastoy a pamay-an maiyintroduser koma ti Watch Tower kadagiti dadduma nga iglesia, tapno ti kinapudno maidatag kadakuada, ket dagiti dadduma a miembro ti iglesia inda koma akseptaren dayta. Siempre, nakabatbatad ti giddiatna, isut’ namagpungtot kadagiti klero a Protestante.

Dimteng ti tawen 1918, ket dagiti natda, wenno nabati kadagiti napulotan, kaskasdi nga addada pay laeng ditoy daga. Dakkel met ti immaduanen ti dagup dagiti ubbing a makigimgimong. Masansan a palubosanda latta nga agay-ayam dagiti ubbing bayat nga agad-adal dagiti dadakkelda. Kaskasdi, dagiti ubbing, masapulda met a “biruken ti kinalinteg, biruken ti kinaemma,” tapno “‘maitalimengdanto iti aldaw ti pungtot ti APO.” (Sof. 2:3, KJ) Gapuna, idi 1918 indagadag ti Sosiedad nga iyurnos dagiti kongregasion ti klase dagiti agtutubo para kadagiti ubbing nga agtawen ti 8 inggat’ 15. Kadagiti dadduma a lugar adda pay dagiti klase a primaria para kadagidiay ubbing unay a di mabalin iti klase dagiti agtutubo. Maigiddato met, naigunamgunam manen ti rebbengen dagiti nagannak kadagiti annakda.

Nagturong daytoy kadagiti dadduma nga irarang-ay. Ti The Golden Age, idi 1920, naglaon ti artikulo a napauluan “Panagadal ti Biblia dagiti Agtutubo,” nga addaan kadagiti saludsod a buyogen dagiti Teksto a pakasarakan dagiti sungbat. Iti dayta met la a tawen, naipablaak ti The Golden Age ABC; bokleta nga aduan ladawan nga usaren dagiti nagannak a mangisuro kadagiti pamunganayan a kinapudno ti Biblia ken dagiti Nakristianuan a kalidad kadagiti annakda. Adda libro a napauluan The Way to Paradise, nga insurat ni W. E. Van Amburgh, a simmaruno idi 1924. Naiyataday daytoy kadagiti “intermedia nga estudiante ti Biblia.” Medio nabayag a naus-usar daytoy kadagiti gimong dagiti agtutubo. Sa, idiay America, adda bukod nga urnos dagiti “Junior a Saksi” para iti panagserbi idiay tay-ak. Idiay Switzerland adda grupo dagiti agtutubo a nangporma iti asosasion a naawagan “Agtutubo ni Jehova,” para kadagidiay agedad ti 13 inggat’ 25. Adda opisina ti bukodda a sekretario sadi Berne, ket ti espesial a magasin a, Jehovah’s Youth, naisagana ken nayimprenta kadagiti makinat’ Sosiedad sadiay. Dagitoy nga agtutubo addaandat’ bukod a gimong ken nagipabuyada pay kadagiti drama ti Biblia, kas ti impabuyada idiay Volkshaus sadi Zurich a binuya ti 1,500 a tao.

Ti maang-angay idin, nupay kasta, isut’ itatanor ti maysa nga organisasion iti uneg ti organisasion dagiti adipen ni Jehova. Saan a makatulong daytoy iti panagkaykaysa, isu a naisardeng idi 1936. Idi Abril 1938, idi bimmisita ni J. F. Rutherford sadi Australia, natakkuatan ti presidente ti Sosiedad nga adda klase para kadagiti ubbing a naangay malaksid iti kumbension para kadagiti natataengan. Dinagdagusna nga inyurnos ti pannakaiserrek amin nga ubbing idiay kangrunaan a kumbension, nga isut’ nagimbaganda unay.

Iti dayta met la a tawen, rinepaso Ti Pagwanawanan ti intero a kaso dagiti nailasin a klase para kadagiti agtutubo iti kongregasion. Impaganetget manen dayta nga artikulo a dagiti nagannak responsabilidadda nga isuro dagiti bukodda nga annak. (Efe. 6:4; idiligyo ti Deuteronomio 4:9, 10; Jeremias 35:6-10.) Impakitana pay a ti Biblia awan itedna nga ehemplo ti panangisina kadagiti agtutubo babaen kadagiti klase a para ubbing. Imbes ketdi, masapul a presenteda a kadua dagiti nagannakda tapno imdenganda ti Sao ti Dios. (Deut. 31:12, 13; Jos. 8:34, 35) No masapul ti kanayonan a panangilawlawag iti adalen, ipaay dagiti nagannak dayta idiay balayda. Mainayon pay, inlawlawag dagiti artikulo a dagiti urnos para kadagita a nailasin a klase sigurado a sumiasida iti pannakaikasaba ti naimbag a damag iti binalaybalay. Kasano a kasta? Ngamin dagidiay mangisuro didan napan nangasaba ta isaganada dagita a klase ken ikonduktada ida. Isu a naisardeng amin a nailasin a klase para kadagiti agtutubo.

Agingga ita, naiyugalin kadagiti Saksi ni Jehova a kaduada ti intero a pamiliada a tumabuno kadagiti gimong ti kongregasion. Dagiti nagannak tulonganda dagiti annakda nga agsagana tapno makipasetda kadagiti maikanatad a wagas. Sa, nagpipintas a publikasion dagiti naipaay kadagiti nagannak tapno maitedda kadagiti agtutubo ti instruksion idiay pagtaenganda. Naibilang kadagitoy isu dagiti libro a Children, idi 1941; Panagimdeng iti Naindaklan a Mannursuro, idi 1971 (iti Ingles); Ti Kinaagtutuboyo—Pananggun-od ti Kasayaatan iti Dayta, idi 1976; Ti Librok dagiti Estoria ti Biblia, idi 1978; ken Dagiti Saludsod nga Iyimtuod dagiti Agtutubo—Dagiti Sungbat nga Epektibo, idi 1989.

Makabalan Amin kas Aktibo nga Ebanghelisador

Nanipud pay kadagidi damo a ruar ti Watch Tower, naynay a napalagipan dagiti managbasa iti pribilehio ken responsabilidad dagiti amin a pudno a Kristiano a mangiwaragawag iti naimbag a damag ti panggep ti Dios. Dagiti gimong ti kongregasion timmulongda a nangisagana iti puso ken isipda para itoy nga aktibidad babaen iti panangpabilegna iti ayat ken Jehova ken iti pannakaammoda iti panggepna. Nangnangruna pay, kalpasan daydi kumbension idiay Cedar Point, Ohio, idi 1922, naipaganetget unay ti magapgapuanan idiay tay-ak ti serbisio ken iti iraraman a sieepektibo iti dayta.

Ti Bulletin,f polieto a naglaon ti impormasion a direktamente a nainaig iti serbisio idiay tay-ak, naglaon ti ababa a testimonia, a naawagan idi ti canvass, a masapul nga ikabesa ken usarenda no mangasabada. Kaaduanna idi 1923, no primero ti bulan, kas panggutugot iti nagkaykaysa a pamuspusan a mangipablaak iti Pagarian, ti kagudua ti Gimong ti Kararag, Panagdayaw ken Testimonia iti rabii ti Mierkoles ti nairanta para kadagiti pagsurotan idiay tay-ak.

Uray idi 1926, dagiti binulan a gimong a pakasalaysayan ti serbisio iti tay-ak naawagandat’ Gimong dagiti Trabahador. Dagidiay aktual a rimmaman iti kasta a serbisio masansan nga isudat’ timmabuno. Kadagitoy a gimong, mapagsasaritaan dagiti metodo a nausar iti panangasaba kadagiti sabali, sa naiyurnos dagiti plano para iti masanguanan nga aktibidad. Idi 1928 idagdagadagen ti Sosiedad a maaddaan koma dagiti kongregasion ti kasta a gimong kada lawas. Kalpasan ti uppat pay a tawen, sinuktanen dagiti kongregasion ti Gimong ti Testimonia (wenno, Deklarasion) iti dayta aw-awagantayon a Gimong a maipaay iti Panagserbi, ket ti Sosiedad pinaregtana dagiti isuamin a tumabuno. Iti nasurok nga 60 a tawen, daytoy linawas a gimong isut’ naangay kadagiti kongregasion. Babaen kadagiti diskurso, salaysay a pakairamanan dagiti timmabuno, demostrasion, ken pannakitungtong, naited dagiti piho a tulong a nainaig kadagiti amin a benneg ti Nakristianuan a ministerio.

Daytoy a kita ti gimong sigurado a saan a namunganay iti maika-20 siglo. Ni Jesus a mismo nangted kadagiti detaliado nga instruksion kadagiti disipulona sakbay nga imbaonna ida a mangasaba. (Mat. 10:5–11:1; Luc. 10:1-16) Kalpasanna, pinabilegda ti maysa ken maysa idi naguummongda a mangisalaysay kadagiti kapadasanda iti ministerio.—Ara. 4:21-31; 15:3.

No maipapan iti pannakasanay iti palawag publiko, idi un-unana saan a naangay daytoy kadagiti regular a gimong ti kongregasion. Ngem uray pay idi 1916, naisingasingen a dagidiay mangipato a kabaelanda ti agpalawag iti publiko mabalin a mangangayda iti klase a bukbukodda, a nalabit adda presente a panglakayen kas moderator tapno umimdeng ken mangbalakad tapno rumang-ay ti linaon ken wagas ti panagpalawagda. Dagitoy a panaguurnong, a tinabunuan laeng dagiti lallaki iti kongregasion, naawagan idi agangay kas Eskuelaan dagiti Propeta. Kas pananglagipna kadagiti pasamak kadagidi nga aldaw, kuna ni Grant Suiter: “Ti makapabileg a kritisismo a naawatko iti eskuelaan awan balena no idilig iti personal nga imbalakad ni tatangko kaniak kalpasan ti maysa kadagiti sesion a tinabunuanna tapno denggenna ti palawagko.” Tapno matulongan dagidiay agngayangay nga agprogreso, adda kakabsat a bukoddat’ nagurnong ken nagimprenta iti libro a naglaon kadagiti instruksion iti panagbitla, agraman dagiti balabala para iti nadumaduma a diskurso. Idi agangay, nupay kasta, naisardeng dagitoy nga Eskuelaan dagiti Propeta. Tapno masandian idi ti agdama a kasapulan, naisentrot’ naan-anay nga atension iti panangkabal iti kada miembro ti kongregasion a makiraman a naan-anay iti panagebanghelio iti binalaybalay.

Posible ngata a kabalan ti kada miembro daytoy dumakdakkel nga internasional nga organisasion tapno saanda laeng a kabaelan ti ababa a panangasaba ken panangitukon iti literatura ti Biblia no di ket epektiboda pay nga agpalawag ken mangisuro iti Sao ti Dios? Isu dayta ti kalat ti espesial nga eskuelaan a naipasdek iti kada kongregasion dagiti Saksi ni Jehova, a nangrugi idi 1943. Madaman a maar-aramid dayta idi idiay sangalubongan a hedkuarter dagiti Saksi ni Jehova nanipud Pebrero 1942. Kada lawas, adda naited nga instruksion, sa nagpalawag dagiti estudiante ket nabalakadanda. Idi damo, lallaki laeng ti nagpalawag iti eskuelaan, nupay naparegta a tumabuno ti intero a kongregasion, isaganada dagiti leksion, ken makipasetda kadagiti panagrepaso. Idi 1959 nagundawayan metten dagiti babbai ti agpasalista, tapno masanayda a mangsalaysay kadagiti tema ti Biblia nga adda naited a bumalay a kasarsaritada.

No maipapan iti epekto daytoy nga eskuelaan, inreport ti sanga ti Watch Tower Society sadi Sud Africa: “Daytoy nagsayaat nga urnos nagballigi iti apagbiit a timmulong kadagiti adu a kakabsat a nangipapan a dida pulos kabaelan ti agpalawag iti publiko ket nagbalinda nga epektibo unay idiay plataporma ken ad-adda pay nga epektibo idiay tay-ak. Iti intero a paset ti Sud Africa tinagiragsak dagiti kakabsat daytoy kabbaro a probision ni Jehova ket sirereggetda a nangidur-as iti dayta. Inaramidda daytoy nupay napalalot’ tubenda no iti pagsasao ken kinakurang ti edukasion dagiti dadduma.”

Ti Eskuelaan ti Teokratiko a Panagministro agtultuloy a nasken a paset ti gimong dagiti kongregasion dagiti Saksi ni Jehova. Gistay amin a makabael agpasalistada. Makiraman dagiti agtutubo wenno lallakay, kabbaro a Saksi ken dagidiay aduanen ti kapadasan. Awan sardayna a programa ti edukasion daytoy.

Naawis ti Publiko nga Agbuya ken Dumngeg

Dagiti Saksi ni Jehova saanda a pulos a kameng ti mailimlimed a sosiedad. Dagiti sursuroda a naibasar iti Biblia naan-anay a nailawlawag kadagiti publikasionda a maiwaras kadagiti isuamin. Sa, ikagumaanda unay nga imbitaran ti publiko a tumabuno kadagiti gimong tapno buyaen ken denggenda a mismo dagiti maang-angay.

Ni Jesu-Kristo inikkanna idi ti personal nga instruksion dagiti disipulona, ngem isu nagbitla met iti publiko—iti igid ti baybay, iti kabambantayan, kadagiti sinagoga, idiay arubayan ti templo sadi Jerusalem—idiay mabalin a denggen dagiti umariwekwek. (Mat. 5:1, 2; 13:1-9; Juan 18:20) Kas panangtuladda itoy, idi pay la 1870’s, inyurnosen dagiti Estudiante ti Biblia dagiti gimong tapno dagiti gagayyem ken kaarruba ken dadduma pay nga interesado mabalinda nga imdengan ti diskurso maipapan iti panggep ti Dios iti sangatauan.

Naikagumaan unay a maangay dagitoy a diskurso kadagiti lugar a kumbiniente iti publiko. Naawagan idi daytoy iti ekstension a trabaho ti klase. Idi 1911, dagiti kongregasion nga addaan kadagiti nalaing a pumapalawag naparegtada a mangiyurnos kadagitoy a mapan kadagiti kabangibang nga ili ken purok tapno agpalawagda iti publiko. No mabalbalin, iyurnosda ti serye dagiti innem a diskurso. Inton malpasen ti maikanem, damagen ti nagdiskurso no mano kadagiti dumdumngeg ti aginteres a mangadal iti Biblia tapno agtataripnongda a regular. Nasurok a 3,000 a kakasta a diskurso ti naangay idi immuna a tawen.

Nangrugi idi 1914, naipabuya metten ti “Photo-Drama of Creation” iti publiko. Awan bayad a siningir dagiti kakabsat. Nanipud idin, nagusardan kadagiti pelikula ken slide show. Nangrugi idi 1920’s, ti naynay a panangusar ti Watch Tower Society iti radio nangngegan dagiti tattao dagiti diskurso iti Biblia iti mismo a pagtaenganda. Sa, idi 1930’s, dagiti diskurso ni J. F. Rutherford isudat’ naiplaka sada impangngeg kadagiti rinibo a naurnong iti publiko.

Idi dimtengen ti 1945, adun ti bumibitla iti publiko a nasanay iti Eskuelaan ti Teokratiko a Panagministro. Idi Enero dayta a tawen, naiyusuat ti nagsayaat-pannakaiplanona a kampania dagiti miting publiko. Nangipaay ti Sosiedad kadagiti balabala para iti serye dagiti walo a naintiempuan a diskurso. Nausar dagiti handbill, ket no dadduma dagiti plakard, a pangipablaak. Malaksid pay ti pannakaangay dagitoy iti regular a paggigimongan dagiti kongregasion, inkagumaan dagiti kakabsat nga iyurnos dagitoy a miting publiko kadagiti teritoria nga awan pay kongregasionda. Amin a miembro ti kongregasion nakiramanda—a mangipablaak kadagiti gimong, babaen iti itatabunoda, agraman panangawatda kadagiti kabbaro ken panangsungbat kadagiti saludsodda. Idi damo a tawen daytoy espesial nga aktibidad, 18,646 a miting publiko ti naangay idiay Estados Unidos, nga addaan dagup a timmabuno a 917,352. Iti simmuno a tawen immadu ti dagup dagiti miting publiko aginggat’ 28,703 idiay America. Ket sadi Canada, a 2,552 kadagita a miting ti naiyurnos idi 1945, naangay ti 4,645 iti simmaruno a tawen.

Kadagiti kaaduan a kongregasion dagiti Saksi ni Jehova, dagiti Miting Publiko isuda itan ti regular a paset ti linawas a gimong. Maangay dagitoy kas diskurso ket tunggal maysa maawis a mangusig kadagiti kangrunaan a teksto bayat a maibasa ken maisalaysay dagitoy. Dagitoy a gimong ket nabaknang a gubuayan ti naespirituan nga instruksion para iti kongregasion ken kadagiti kabbaro.

Dagidiay damoda ti tumabuno kadagiti gimong dagiti Saksi ni Jehova masansan a masdaawda. Adda prominente a politiko sadi Zimbabwe a napan idiay Kingdom Hall tapno ammuenna no aniat’ mapaspasamak sadiay. Nauyong daytoy a lalaki, ket inrantana ti napan a di nagibarbas ken kusokuso ti buokna. Ti impagarupna pagtalawen dagiti Saksi. Imbes ketdi, impakitadat’ napudno a panaginteresda kenkuana ken pinaregtada a maaddaan panagadal iti Biblia idiay pagtaenganna. Ita nagbalinen a napakumbaba ken natalna a Kristiano a Saksi.

Adda minilion dagidiay a kalpasan ti itatabunoda kadagiti gimong dagiti Saksi ni Jehova, natignayda a nagkuna: “Ti Dios talaga nga adda iti nagtengngaanyo.”—1 Cor. 14:25.

Maikanatad a Lugar a Paggigimongan

Idi kaaldawan dagiti apostol ni Jesu-Kristo, masansan a naggigimong dagiti Kristiano kadagiti pribada a pagtaengan. Kadagiti dadduma a lugar nagbitlada kadagiti sinagoga ti Judio. Sadi Efeso nagdiskurso ni apostol Pablo idiay auditorium ti eskuelaan iti dua a tawen. (Ara. 19:8-10; 1 Cor. 16:19; Filem. 1, 2) Umarngi met, idi arinunos ti maika-19 siglo, naggigimong dagiti Estudiante ti Biblia kadagiti pribada a pagtaengan, no dadduma nagdiskursoda kadagiti kapilia, ken inusarda dagiti maabangan a kuarto. Kadagiti dadduma a kaso, ginatangda idi agangay dagiti patakder nga inus-usar a dati dagiti dadduma a relihion sa isut’ regular a nagtataripnongandan. Kastat’ kasasaad daydi Brooklyn Tabernacle ken ti London Tabernacle.

Ngem dida idi kasapulan wenno tarigagayan dagiti nalabor a patakder a paggigimongan. Adda sumagmamano a kongregasion a nanggatang kadagiti patakder a maikanatad sada rinetubar; dagiti dadduma nangbangonda kadagiti kabbaro a hall. Kalpasan ti 1935 nagin-inut a nausar ti nagan a Kingdom Hall kas pangawag iti lugar a paggigimongan ti kongregasion. Masansan a napintas ti itsurada ngem saan a naranga. Nagdudumat’ arkitekturada sigun iti lugar nga ayanda, ngem praktikal ti panggep a nakairantaanda.

Nagkaykaysa a Programa ti Instruksion

Idi arinunos ti maika-19 a siglo ken rugrugi ti maika-20 a siglo, ti naespirituan nga irarang-ay ken aktibidad nagduduma sigun iti kada kongregasion. Adda dagiti pamunganayan a sursuro a nagpapadaanda nga isut’ nakaigiddiatandat’ Kakristianuan. Kaskasdi, idinto ta dadduma a kakabsat inapresiarda ti pamuspusan ni Jehova a mangpakan iti ilina, addada met dagidiay nalaka unay a simmurot kadagiti opinion dagiti indibidual a manangipapilit kadagiti personal a panangmatmatda.

Sakbay ti ipapatayna inkararag ni Jesus a dagiti pasurotna “agmaymaysada” koma—maitimpuyogda iti Dios ken ni Kristo ken iti maysa ken maysa. (Juan 17:20, 21) Saan idi a napilpilit a panagkaykaysa daytoy. Agresulta dayta iti sangsangkatunos a programa ti edukasion a nangtignay kadagiti mannakaawat a puso. Kas naipadto idi ugma: “Isuamin dagiti annakmo tattaodanto nga insuro ni Jehova, ket ti talna dagiti annakmo nawadwadto.” (Isa. 54:13) Tapno naan-anayda a sagrapen dayta a talna, kasapulan a magungonaan amin iti progresibo nga instruksion nga ipapaay ni Jehova baeten iti makitkita a kalasugan ti komunikasionna.

Iti adu a tawen inusar dagiti Estudiante ti Biblia dagiti nagduduma a tomo ti Studies in the Scriptures, agraman ti Biblia, a pagibasaran ti pagsasaritaanda. Ti linaonda, talaga nga isut’ naespirituan a “taraon iti maitutop a tiempo.” (Mat. 24:45) Nupay kasta, ti agpatpatuloy a pannakausig dagiti Kasuratan kas indirihir ti espiritu ti Dios imbatadna nga adu pay ti adalen ket adu a naespirituan a pannakadalus ti kasapulan dagiti adipen ni Jehova. (Mal. 3:1-3; Isa. 6:1-8) Mainayon pay, kalpasan a naipasdek ti Pagarian idi 1914, adu a padto ti alisto a matungtungpal nga agsasagadsad, ket amin dagitoy nagturongda iti naganetget a trabaho a pakiramanan amin a pudno a Kristiano. Daytoy naintiempuan a Nainkasuratan nga impormasion regular idi a naipapaay kadagiti pinanid ti The Watch Tower.

Gapu ta saan nga amin a kameng ti kongregasion ti mabembenepisiaran kadagitoy nga artikulo, dadduma kadagiti agdaldaliasat a pannakabagi ti Sosiedad inrekomendarda idiay hedkuarter a ti The Watch Tower adalen koma ti intero a kongregasion kadagiti regular a linawas a gimongda. Nayawat dayta a rekomendasion kadagiti kongregasion, isu a dagiti “Berean Questions” a mausar a pangadal kadagiti prinsipal nga artikulo ti Watch Tower nagbalinda a regular a paset ti magasin, nangrugi iti ruar ti Mayo 15, 1922. Kaaduan a kongregasion naaddaandat’ kasta a panagadal maminsan wenno ad-adu pay ti linawas, ngem nagduduma ti kawadwad ti naadalda iti magasin. Kadagiti dadduma a lugar, gapu ta adu unay ti masao ti konduktor, uray la a dua nga oras wenno at-atiddog pay ti panagadal.

Idi 1930’s, nupay kasta, ti teokratiko nga organisasion sinuktannan dagiti demokratiko a wagas. Daytoy ti nangimpluensia unay ti panangmatmatdat’ panagadal iti Pagwanawanan.g Ad-adun ti panangasikasoda iti pannakatarus iti adalen nga impaay ti Sosiedad. Dagidi manggungundaway kadagiti gimong tapno iyebkasda laeng dagiti personal nga opinionda ken nagkedkedda a mangibaklay iti ministerio idiay tay-ak nagin-inutda a pimmanaw. Buyogen ti naanus a tulong nasursuro dagiti kakabsat nga iringpas ti adalda iti maysa nga oras. Kas resultana, ad-adut’ makapagkomento; ad-adda a narayray ti panagadal. Ti espiritu ti pudpudno a panagkaykaysa nagraira met kadagiti kongregasion, naibasar iti natunos a programa ti naespirituan a panagpakan a dita ti Sao ti Dios isut’ estandarte ti kinapudno.

Idi 1938, maipabpablaaken Ti Pagwanawanan iti agarup 20 a pagsasao. Ingles idit’ umuna a pagparanganda. Adu a bulan, wenno tawen pay ketdi, sadanto mabasa kadagiti sabali a pagsasao, gaput’ tiempo a mabusbos a panagipatarus ken panagimprenta. Ngem, idi nagbaliwen ti metodo a panagimprenta, idi 1980’s, nagbabansagen a naipablaak Ti Pagwanawanan kadagiti adu a pagsasao. Idi 1992, dagiti kongregasion a makatarus iti uray ania kadagiti 66 a pagsasao naggigiddandan nga inadal ti isu met laeng nga artikulo. Iti kasta kaaduanen kadagiti Saksi ni Jehova iti intero a lubong parepareho a naespirituan a taraon ti kankanendat’ linawas. Iti intero a Norte ken Sud America, kaaduan a paset ti Europa, kadagiti adu a daga ti Oriente, kadagiti adu a lugar sadi Africa, ken iti dakkel a dagup dagiti isla ti intero a globo, tagtagiragsaken ti ili ni Jehova ti agbabansag nga urnos ti naespirituan a pannangan. Sangsangkamaysa a, “naan-anay nga agtitimpuyog[da] iti maymaysa nga isip ken iti maymaysa a panunot.”—1 Cor. 1:10.

Ti dagup ti tumabtabuno kadagiti gimong ti kongregasion ipasimudaagna nga ipappapuso dagiti Saksi ni Jehova dagiti gimongda. Idiay Italia, nga agarup 172,000 dagiti aktibo a Saksi idi 1989, adda linawas a tumabtabuno kadagiti gimong idiay Kingdom Hall a 220,458. No idilig, kinuna ti periodiko Katoliko a 80 porsiento kadagiti Italiano ti agkuna a Katolikoda ngem agarup 30 porsiento laeng ti makimismisa a medio regular. No iti porsiento, kasta met lat’ kasasaad ti Brazil. Idiay Denmark, idi 1989, inako ti National Church a 89.7 porsiento ti populasion ket miembrona, ngem 2 porsiento laeng ti makigimgimong iti maminsan iti makalawas! Kadagiti Saksi ni Jehova idiay Denmark, ti linawas a tumabuno idi a tawen ket dimmanon iti 94.7 porsiento. Idiay Alemania, sigun iti surbey ti Allensbach Opinion Research Institute idi 1989 adda 5 porsiento a Lutheran ken 25 porsiento a Katoliko iti Federal Republic ti regular a makimismisa. Nupay kasta, kadagiti Kingdom Hall dagiti Saksi ni Jehova, ti linawas a tumabtabuno linab-awanna ti bilang dagiti Saksi.

Dagiti makigimong kadarato nga ipamuspusanda a sireregget ti tumabuno. Idi 1980’s, adda 70 ti tawenna a baket sadi Kenya a naynay a pagnaenna ti 10 kilometro santo bumallasiw iti karayan tapno makigimong a linawas. Tapno matabunuanna ti gimong iti mismo a pagsasaona, adda Koreano a Saksi sadi Estados Unidos a naynay nga agbiahe ti tallo oras tunggal mapan, nga aglugan iti bus, sa tren, ken bilog, santo pay la magmagna. Idiay Suriname, adda pamilia a bassit lat’ pamastrekanda ngem pagpasaheda iti bus ti agmalmalem a sueldoda tapno makatabunoda iti kada lawas. Idiay Argentina, adda pamilia a kanayon nga agbiahe iti 50 kilometro ken apagkapat ti sueldoda ti busbosenda tapno tabunuanda ti panagadal iti Biblia. No maigaput’ sakit ket din makatabuno dagiti dadduma iti gimong, masansan nga iyurnos a maikonektarda iti telepono wenno denggenda ti programa a nairekord iti tape.

Ipappapuso dagiti Saksi ni Jehova ti balakad ti Biblia a dida baybay-an ti panagtataripnong para iti naespirituan a pannakapabileg. (Heb. 10:24, 25) Ket saanda laeng a presente kadagiti gimong ti lokal a kongregasionda. Ti itatabuno kadagiti kumbension isu pay ti tampok ti tinawen a programa dagiti paskenda.

[Dagiti Footnote]

[Blurb iti panid 237]

Dagiti gimong a makasapul ti personal a pannakipaset

[Blurb iti panid 238]

Saan a basta mental a pilosopia no di ket ebkas a mangtignay iti puso

[Blurb iti panid 246]

Intero a pamilia ti naawis nga agkakaduada a makigimong

[Blurb iti panid 252]

Panamagkaykaysa iti programa ti naespirituan a panagpakan

[Blurb iti panid 253]

Ipappapuso dagiti Saksi dagiti gimongda

[Kahon/Dagiti Ladawan iti panid 239]

Dagiti Nagkauna a Kongregasion

Idi 1916, addan agarup 1,200 a grupo dagiti Estudiante ti Biblia iti intero a lubong

Durban, Sud Africa, 1915 (makinngato a kannawan); British Guiana (Guyana), 1915 (makintengnga a kannawan); Trondheim, Norway, 1915 (makimbaba a kannawan); Hamilton, Ont., Canada, 1912 (makimbaba); Ceylon (Sri Lanka), 1915 (makimbaba a kattigid); India, 1915 (makinngato a kattigid)

[Kahon/Dagiti Ladawan iti panid 240, 241]

Panangdayaw ken Jehova iti Kanta

No kasano a dagiti kadaanan nga Israelita ken ni Jesus a mismo nagusardat’ kanta iti panagdaydayawda, kasta met dagiti Saksi ni Jehova iti moderno a tiempo. (Neh. 12:46; Mar. 14:26) Bayat nga iyebkasda ti panagdayaw ken Jehova ken panangapresiar kadagiti aramidna, ti kasta a panagkanta timmulong a nangigunamgunam kadagiti kinapudno ti Biblia nga agpadpada iti isip ken iti puso.

Adu a koleksion dagiti kanta ti inus-usaren dagiti Saksi ni Jehova iti las-ud dagiti tawen. Napabaro dagiti sao a linaonda kas maitunos iti progresibo a pannakatarusda iti Sao ti Dios.

1879: “Songs of the Bride”

(144 a himno nga iyeb-ebkasda dagiti tarigagay ken namnama ti nobia ni Kristo)

1890: “Poems and Hymns of Millennial Dawn”

(151 a daniw ken 333 a himno, a naipablaak nga awanan musikada. Kaaduan kadagita ket pinutar dagiti nalatak a mannurat)

1896: Ti “Watch Tower” ti Pebrero 1 nairanta iti “Zion’s Glad Songs of the Morning”

(Sasao iti 11 a kanta, agraman musika; dagiti liriko

nga insurat dagiti Estudiante ti Biblia)

1900: “Zion’s Glad Songs”

(82 a kanta, adu kadakuadat’ insurat ti maymaysa nga Estudiantet’ Biblia; tapno suplementuanna ti immun-una a koleksion)

1905: “Hymns of the Millennial Dawn”

(Dagiti 333 a kanta a naipablaak idi 1890, ngem addaanen musika)

1925: “Kingdom Hymns”

(80 a kanta, nga addaan musika, a nangnangruna para ubbing)

1928: “Songs of Praise to Jehovah”

(337 a kanta, a naglaok dagiti kabbaro nga insurat dagiti Estudiante ti Biblia ken dagiti nadadaan a himno. Sigun kadagiti lirikoda, naisangsangayan ti panangipamuspusanda a sumina kadagiti sentimiento ti ulbod a relihion ken manipud panagrukbab iti parsua)

1944: “Kingdom Service Song Book”

(62 a kanta. Naibagay kadagiti kasapulan ti panagserbit’ Pagarian kadagidi a tiempo. Saanen a nainaganan dagiti nangputar wenno kompositor)

1950: “Songs to Jehovah’s Praise”

(91 a kanta. Daytoy a pagkantaan ad-adut’ napabaro a temana ken inwaksinan ti kadaanan a pagsasao. Naipatarus iti 18 a pagsasao)

1966: “Singing and Accompanying Yourselves With Music in Your Hearts”

(119 a kanta a sinaklawnat’ kada benneg ti Nakristianuan a panagbiag ken panagdaydayaw. Dagiti musika a pagaammoda a namunganay kadagiti nailubongan wenno ulbod a relihiuso a gubuayan naikkatdan. Nairekord dagiti tokar ti orkestra ti intero a libro ket nasaknap ti pannakausarda a kas mangkompaniar kadagiti gimong ti kongregasion. Nairekord pay dagiti boses a nagkansion. Nangrugi idi 1980, napartuat dagiti nairekord nga orkestra a “Kingdom Melodies” tapno tagiragsaken dagiti indibidual sadiay balayda dagiti musika a makapabileg)

1984: “Sing Praises to Jehovah”

(225 a kanta ti Pagarian, a ti sasao ken tokarda pinutar nga interamente dagiti dedikado nga adipen ni Jehova manipud isuamin a paset toy daga. Napartuat dagiti plaka ken cassette a mangkompaniar ti panagkanta)

Kadagidi nagkauna a Cottage Meeting, inraman dagiti Estudiante ti Biblia dagiti kantat’ pagdayaw. Di nagbayag, ti panagkanta nagbalinen a paset dagiti kumbensionda. Adda dagidi nangkansion ti maysa a kanta sakbay ti pammigat, a nainaig iti panagdaydayawda iti agsapa, a kas naangay idiay Bible House iti adu a tawen. Nupay ti panagkanta kadagiti lokal a kongregasion ket naikkaten idi agarup 1938, naisubli manen daytoy idi 1944 ket nagtultuloyen a napateg a paset dagiti gimong ti kongregasion ken kadagiti programa ti kumbension dagiti Saksi ni Jehova.

[Ladawan]

Ikonkondukta ni Karl Klein ti orkestra ti kumbension idi 1947

[Graph iti panid 242]

(Para iti aktual a pannakaurnosna, kitaem ti publikasion)

Panglaglagip iti Ipapatay ni Kristo

Aktibo a Saksi

Timmabuno

11,000,000

10,000,000

9,000,000

8,000,000

7,000,000

6,000,000

5,000,000

4,000,000

3,000,000

2,000,000

1,000,000

1935 1945 1955 1965 1975 1985 1992

[Ladawan iti panid 243]

Nupay naiputputong iti pagbaludan sadi China, intultuloy latta ni Harold King a sinelebraran ti Panglaglagip

[Ladawan iti panid 244]

Klase iti Biblia dagiti agtutubo sadi Alemania, idi rugrugi ti 1930’s

[Dagiti Ladawan iti panid 244]

Idiay Switzerland, idi ngalay ti 1930’s, impablaak dagiti agtutubo a Saksi daytoy a magasin (iti baba) ket impabuyada dagiti drama ti Biblia (kas makita iti baba a makintengnga) kadagiti adu a nagbuya

[Dagiti Ladawan iti panid 247]

“Bulletin” (1919-35), “Director” (1935-36), “Informant” (1936-56), ket itan “Ti Ministeriotayo iti Pagarian” iti 100 a pagsasao—impaayda amin ti regular nga instruksion para iti nagkaykaysa a ministerio iti tay-ak kadagiti Saksi ni Jehova

[Ladawan iti panid 248]

Dagiti demostrasion kadagiti Gimong maipaay iti Panagserbi tumulong kadagiti Saksi a mangparang-ay ti personal a ministerioda iti tay-ak (Sweden)

[Ladawan iti panid 249]

Agtutubo a Saksi sadi Kenya makagun-od ti kapadasan babaen iti panangpalawagna ken tatangna iti Eskuelaan ti Teokratiko a Panagministro

[Ladawan iti panid 250]

Idi 1992, ti libro para iti panagadal iti Biblia kadagiti kongregasion dagiti Saksi ni Jehova nagbabansag a naipablaak iti 66 a pagsasao, ket adu pay ti mainaynayon