Dua a Tulbek iti Manayon a Panagasawa

1, 2. (a) Kasanot’ kapaut a nairanta nga agtipon ti agassawa? (b) Kasano a posible daytoy?

IDI pinagtipon ti Dios ti umuna a lalaki ken babai kas agassawa, awan ti pangripiripan a temporario laeng ti panagtiponda. Naikeddeng nga agdenna da Adan ken Eva bayat ti panagbiagda. (Genesis 2:24) Ti pagalagadan ti Dios iti nadayaw a panagasawa isu ti panagtipon ti maysa a lalaki ken maysa a babai. Ti laeng nakaro a seksual nga imoralidad iti biang ti asawa wenno ti agassawa ti Nainkasuratan a pakaibatayan ti diborsio ken pannakiasawa manen.​—Mateo 5:32.

² Posible kadi a makapagdenna a siraragsak ti dua a tao iti di nakedngan a napaut a tiempo? Wen, ket ipakita ti Biblia dagiti dua a napateg unay a banag, wenno tulbek, a makatulong a mamagbalin iti daytoy a posible. No agpada nga aramaten ti asawa a lalaki ken ti asawa a babai dagitoy, maluktanda ti ruangan iti kinaragsak ken adu a bendision. Ania dagitoy a tulbek?

3. Ania dagiti tallo a kita ti ayat a rebbeng a sukayen ti agassawa?

³ Ayat ti umuna a tulbek. Makapainteres, adda nadumaduma a kita ti ayat a nadakamat iti Biblia. Umuna, nabara ken personal a panangipateg, ti kita ti ayat iti nagbaetan dagiti nasinged nga aggayyem. (Juan 11:3) Maikadua, ayat iti nagbabaetan dagiti kameng ti pamilia. (Roma 12:10) Maikatlo, romantiko nga ayat iti di kasekso. (Proverbio 5:15-20) Siempre, rebbeng a sukayen ti agassawa amin dagitoy. Ngem adda maikapat a kita ti ayat, a napatpateg nga amang ngem kadagiti dadduma.

4. Ania ti maikapat a kita ti ayat?

⁴ Iti orihinal a pagsasao ti Kristiano a Griego a Kasuratan, a·gaʹpe ti sao a naaramat para iti daytoy maikapat a kita ti ayat. Naaramat dayta a sao iti 1 Juan 4:8, a sadiay naikuna kadatayo: “Ti Dios ket ayat.” Kinapudnona, “agayattayo, agsipud ta immuna nga inayatnatayo [ti Dios].” (1 Juan 4:19) Sukayen ti maysa a Kristiano ti kasta nga ayat umuna ken ni Jehova a Dios sa iti pada a tao. (Marcos 12:29-31) Naaramat met ti sao nga a·gaʹpe iti Efeso 5:2, a kunana: “Itultuloyyo ti magna iti ayat, no kasano a ti Kristo inayatnakayo met ken inyawatna ti bagina a maipaay kadakayo.” Kinuna ni Jesus a daytoy a kita ti ayat ti pakailasinan dagiti pudno a pasurotna: “Babaen iti daytoy maammuanto ti isuamin a dakayo dagiti adalak, no addaankayo iti ayat [a·gaʹpe] iti maysa ken maysa.” (Juan 13:35) Imutektekanyo met ti pannakaaramat ti a·gaʹpe iti 1 Corinto 13:13: “Mataginayon ti pammati, namnama, ayat, dagitoy a tallo; ngem ti kadakkelan kadagitoy isu ti ayat [a·gaʹpe].”

5, 6. (a) Apay a natantan-ok ti ayat ngem ti pammati ken namnama? (b) Ania dagiti sumagmamano a rason no apay a taginayonen ti ayat ti panagasawa?

⁵ Aniat’ mamagbalin iti daytoy a·gaʹpe nga ayat a natantan-ok ngem ti pammati ken namnama? Naibatay dayta kadagiti prinsipio​—umiso a prinsipio​—a masarakan iti Sao ti Dios. (Salmo 119:105) Dayta ti di agimbubukod a pannakaseknan a mangaramid kadagiti sabsabali iti umiso ken naimbag iti imatang ti Dios, maikari man wenno saan. Matulongan ti kasta nga ayat ti agassawa a mangipangag iti balakad ti Biblia: “Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pangidarumanna iti sabali. Kas iti sibubulos a panangpakawan ni Jehova kadakayo, kasta met ti aramidenyo.” (Colosas 3:13) Addaan ken sukayen dagiti agin-innayat nga agassawa ti “nasged nga ayat [a·gaʹpe] iti maysa ken maysa, agsipud ta ti ayat abbonganna ti nakaad-adu a basbasol.” (1 Pedro 4:8) Imutektekanyo ta ti ayat abbonganna dagiti biddut. Saanna nga ikkaten ida, ta awan ti imperpekto a tao a di agbiddut.​—Salmo 130:3, 4; Santiago 3:2.

⁶ No sukayen dagiti agassawa ti kasta nga ayat iti Dios ken iti maysa ken maysa, mataginayon ken naragsak ti panagdennada, ta ti “ayat saan a pulos aggibus.” (1 Corinto 13:8) Ti ayat “ti naan-anay a singgalut ti panagkaykaysa.” (Colosas 3:14) No naestaduankayon, kasano a masukayyo nga agassawa daytoy a kita ti ayat? Basaenyo a dua ti Sao ti Dios, ken pagsaritaanyo dayta. Adalenyo ti ulidan ni Jesus iti ayat ket ikagumaanyo a tuladen, nga agpanunot ken agtignay a kas kenkuana. Mainayon pay, tumabunokayo kadagiti Nakristianuan a gimong, a pakaisuruan ti Sao ti Dios. Ken ikararagyo ti tulong ti Dios tapno mapatanoryo daytoy natan-ok a kita ti ayat, a bunga ti nasantuan nga espiritu ti Dios.​—Proverbio 3:5, 6; Juan 17:3; Galacia 5:22; Hebreo 10:24, 25.

7. Ania ti panagraem, ket siasino ti rebbeng a mangipakita iti panagraem iti panagasawa?

⁷ No pudno nga agpimpinnateg dagiti agassawa, adda met panagraemda iti maysa ken maysa, ket ti panagraem ti maikadua a tulbek iti naragsak a panagasawa. Nadepinar ti panagraem kas “panangikabilangan kadagiti sabsabali, panangpadayaw kadakuada.” Balakadan ti Sao ti Dios dagiti amin a Kristiano, a pakairamanan dagiti assawa a lallaki ken babbai: “Iti panangipakita ti pammadayaw iti maysa ken maysa mangidaulokayo.” (Roma 12:10) Insurat ni apostol Pedro: “Dakayo nga assawa a lallaki, agtultuloykayo a makipagtaeng [kadagiti assawayo] iti umasping a pamay-an maitunos iti pannakaammo, nga itudinganyo ida iti dayaw a kas iti maysa a narasrasi a basehas, ti nababaían.” (1 Pedro 3:7) Nabalakadan ti asawa a babai nga “addaan koma iti nauneg a panagraem iti asawana.” (Efeso 5:33) No kayatyo a padayawan ti maysa a tao, naimbagkayo iti dayta a tao, raemenyo ti dignidad ken ti kapanunotanna, ken madadaankayo a mangtungpal iti aniaman a nainkalintegan a dawatenna kadakayo.

8-10. Ania dagiti sumagmamano a pamay-an a ti panagraem mamagbalin iti panagasawa a natalged ken naragsak?

⁸ Dagidiay agtarigagay iti naragsak a panagasawa raemenda ti assawada babaen ti ‘panangkita, saan nga iti personal a panaginteres kadagiti laeng bukod[da] a bambanag, no di ket kasta met ti personal a panaginteres kadagiti bambanag ti [assawada].’ (Filipos 2:4) Saan la a ti pagimbaganda ti panunotenda​—ta panagimbubukod dayta. Imbes ketdi, panunotenda met ti pagsayaatan ti assawada. Kinapudnona, dayta ti ipangpangrunada.

⁹ Ti panagraem tulonganna dagiti agassawa a mangbigbig iti panagduma ti kapanunotan. Saan a nainkalintegan a namnamaen nga agkapanunotan ti dua a tao iti amin a banag. Ti napateg iti asawa a lalaki mabalin a saan a kastat’ kapategna iti asawa a babai, ket ti kayat ti asawa a babai mabalin a saan a kayat ti asawa a lalaki. Ngem rebbeng a raemen ti tunggal maysa dagiti kapanunotan ken kayat ti sabali, no la ket saan a lumbes dagitoy iti pagbeddengan dagiti linteg ken prinsipio ni Jehova. (1 Pedro 2:16; idiligyo ti Filemon 14.) Maysa pay, rebbeng a raemen ti tunggal maysa ti dignidad ti sabali babaen ti di panangpabain wenno panangrabrabak kenkuana, iti publiko man wenno iti pribado.

¹⁰ Wen, dua a napapateg a tulbek iti naballigi a panagasawa ti panagayat iti Dios ken iti maysa ken maysa ken ti panagrinnaem. Kasano a mayaplikar dagitoy iti dadduma kadagiti napatpateg a benneg ti biag ti agassawa?

11. Sigun iti Kasuratan, siasino ti ulo iti agassawa?

¹¹ Kunaen ti Biblia kadatayo a naparsua ti lalaki nga addaan kadagiti galad a mamagballiginto kenkuana a kas ulo ti pamilia. Gapu ta kasta, sungsungbatan ti lalaki ken Jehova ti naespirituan ken pisikal a pagimbagan ti asawana ken dagiti annakna. Masapul a natimbeng dagiti desisionna a mangyanninaw iti pagayatan ni Jehova ken agbalin a nasayaat nga ulidan iti nadiosan a kababalin. “Dagiti babbai agpasakopda koma kadagiti assawada a kas iti Apo, agsipud ta ti lalaki isu ti ulo ti asawana a kas met ti Kristo isu ti ulo ti kongregasion.” (Efeso 5:22, 23) Nupay kasta, kunaen ti Biblia nga adda met ulo ti asawa a lalaki a pagpasakupanna. Insurat ni apostol Pablo: “Kayatko a maammuanyo a ti ulo ti tunggal lalaki isu ni Kristo; ket ti ulo ti babai isu ti lalaki; ket ti ulo ni Kristo isu ti Dios.” (1 Corinto 11:3) Sursuruen ti masirib nga asawa a lalaki nga aramaten ti kinaulona babaen ti panangtulad iti mismo nga ulona, ni Kristo Jesus.

12. Ania a nasayaat nga ulidan ti intuyang ni Jesus agpadpada iti panagpasakup ken iti panangaramat iti kinaulo?

¹² Adda met ulo ni Jesus, ni Jehova, ket siuumiso nga agpasakup Kenkuana. Kinuna ni Jesus: “Sapulek, saan a ti bukodko a pagayatan, no di ket ti pagayatan daydiay nangibaon kaniak.” (Juan 5:30) Anian a nagsayaat nga ulidan! Ni Jesus “ti inauna kadagiti amin a parsua.” (Colosas 1:15) Isu ti nagbalin a Mesias. Isu ti Ulo ti kongregasion dagiti napulotan a Kristiano ken ti napili nga Ari iti Pagarian ti Dios, a nangatngato ngem dagiti amin nga anghel. (Filipos 2:9-11; Hebreo 1:4) Iti baet ti kasta a nangato a saad ken natan-ok nga akem, saan a nakuspag, nainget unay, wenno manangipapilit ni tao a Jesus. Saan a diktador, a kanayon a palagipanna dagiti adalanna a masapul nga agtulnogda kenkuana. Naayat ken manangngaasi ni Jesus, nangruna kadagidiay mairurrurumen. Kinunana: “Umaykayo kaniak, dakayo amin a mabambannogan ken nadagsenan, ket pagin-awaenkayto. Ibaklayyo ti sangolko ket agsursurokayo kaniak, ta naalumamay ti kaririknak ken napakumbaba ti pusok, ket makasarakkayto ti bang-ar a maipaay kadagiti kararuayo. Ta ti sangolko naasi ken ti awitko nalag-an.” (Mateo 11:28-30) Makaay-ayo ti makilangen kenkuana.

13, 14. Kasano nga aramaten ti naayat nga asawa a lalaki ti kinaulona, kas panangtulad ken Jesus?

¹³ Nasayaat no usigen ti asawa a lalaki nga agtarigagay iti naragsak a panagbiag ti pamilia dagiti nasayaat a galad ni Jesus. Saan a naulpit ken diktador ti naimbag nga asawa a lalaki, a di umiso nga aramatenna ti kinaulona a kas pang-or a pangkabil iti asawana. Imbes ketdi, ayaten ken padayawanna. No ‘napakumbaba ti panagpuspuso’ ni Jesus, ad-adda nga adda rason ti asawa a lalaki nga agbalin a kasta agsipud ta agbiddut, saan a kas ken Jesus. No agbiddut, kayatna a maawatan koma ni baketna. Gapuna, aklonen ti napakumbaba nga asawa a lalaki dagiti biddutna, nupay mabalin a narigat nga ibaga ti sasao a, “Dispensarennak; hustoka.” Nalaklaka a raemen ti asawa a babai ti kinaulo ti naemma ken napakumbaba nga asawa a lalaki ngem iti nakuspag ken nasubeg. Iti sabali a bangir, agpadispensar met ti managraem nga asawa a babai no isu ti agbiddut.

¹⁴ Pinarsua ti Dios ti babai nga addaan kadagiti nasayaat a galad a makatulong iti naragsak a panagasawa. Bigbigen daytoy ti masirib nga asawa a lalaki ket dina lapdan ni baketna. Adu a babbai ti nalaklaka a maasian ken mannakipagrikna, dagiti galad a kasapulan iti panangaywan iti pamilia ken panangtaripato iti natauan a relasion. Kadawyanna, nalaing ti babai a mamagbalin iti pagtaengan a makaay-ayo a pagnaedan. Adut’ nagsayaat a galad ken saguday ti “natalunggadingan nga asawa a babai” a nailadawan iti Proverbio kapitulo 31, ket nagunggonaan a naan-anay ti pamiliana iti daytoy. Apay? Agsipud ta ti puso ti asawana “sitatalek” kenkuana.​—Proverbio 31:10, 11.

15. Kasano a maipakita ti lalaki iti asawana ti ayat ken panagraem a kas iti impakita ni Kristo?

¹⁵ Iti dadduma a kultura, nalabes ti pannakaipaganetget ti autoridad ti asawa a lalaki, nga uray ti panagimtuod kenkuana maibilang a kinaawan panagraem. Mabalin a tratuenna ti asawana a kasla adipen. Agbanag ti kasta a di umiso a panangaramat iti kinaulo iti nakapuy a relasion saan laeng nga iti asawana no di pay ket iti Dios. (Idiligyo ti 1 Juan 4:20, 21.) Iti sabali a bangir, saan a mangidadaulo ti dadduma nga assawa a lallaki, a bay-anda dagiti assawada a mangdominar iti sangakabbalayan. Ti asawa a lalaki a siuumiso nga agpaspasakup ken Kristo dina irurumen ti asawana wenno ikkatan iti dignidad. Imbes ketdi, tuladenna ti managsakripisio nga ayat ni Jesus ken aramidenna ti kas imbalakad ni Pablo: “Assawa a lallaki, itultuloyyo nga ayaten dagiti assawayo, no kasano a ni Kristo inayatna met ti kongregasion ken inyawatna ti bagina a maipaay iti dayta.” (Efeso 5:25) Gapu iti kasta unay a panagayat ni Kristo Jesus kadagiti pasurotna, natay gapu kadakuada. Pagreggetan ti naimbag nga asawa a lalaki a tuladen dayta di agimbubukod a kababalin, a kitaenna ti pagimbagan ti asawana, imbes nga ipilitna ti kayatna kenkuana. No agpasakup ken Kristo ti asawa a lalaki ken ipakitana ti ayat ken panagraem a kas ken Kristo, matignay ti asawana nga agpasakup kenkuana.​—Efeso 5:28, 29, 33.

16. Ania dagiti galad a rebbeng nga ipakita ti asawa a babai iti pannakilangenna iti asawana?

¹⁶ Di nagbayag kalpasan ti pannakaparsua ni Adan, “kinuna ni Jehova a Dios: ‘Saan a nasayaat nga agmaymaysa ti tao. Iyaramidak iti katulonganna, kas komplementona.’” (Genesis 2:18) Pinarsua ti Dios ni Eva kas “komplemento,” saan a kas kasalisal. Ti panagasawa saan a kas iti barko nga addaan dua a kapitan nga agsinsinnalisal. Rebbeng a naayat ti panangaramat ti asawa a lalaki iti kinaulona, ket rebbeng nga ipakita ti asawa a babai ti ayat, panagraem, ken madadaan nga agpasakup.

17, 18. Ania dagiti sumagmamano a pamay-an nga agbalin ti asawa a babai a pudpudno a katulongan ni lakayna?

¹⁷ Nupay kasta, saan a basta agpasakup laeng ti naimbag nga asawa a babai. Ikagumaanna ti agbalin a pudpudno a katulongan, a suportaranna dagiti desision ti asawana. Siempre, nalaklaka dayta kenkuana no umanamong kadagiti desision ni lakayna. Ngem uray no di umanamong, makatulong ti aktibo a panangsuportarna a mamagballigi iti desision ni lakayna.

¹⁸ Matulongan ti asawa a babai ni lakayna iti dadduma pay a wagas nga agbalin a nasayaat nga ulo. Mabalinna nga iyebkas ti panangapresiar iti panangikagumaanna a mangidaulo, imbes a babalawenna wenno ipariknana a di mapnek ken lakayna. Iti positibo a pannakilangenna iti asawana, rebbeng a laglagipenna a ti “naulimek ken naalumamay nga espiritu . . . addaan dakkel a pateg iti imatang ti Dios,” saan laeng nga iti imatang ti asawana. (1 Pedro 3:3, 4; Colosas 3:12) No ngay saan a manamati ti asawa a lalaki? Manamati man wenno saan, iparegta ti Kasuratan kadagiti assawa a babbai “nga ayatenda dagiti assawada, nga ayatenda dagiti annakda, a nasimbengda koma iti panunot, nadalusda, managtrabahoda iti pagtaengan, naimbagda, ipaspasakopda ti bagbagida kadagiti bukodda nga assawa, tapno ti sao ti Dios saan koma a mapagbassawangan.” (Tito 2:4, 5) No tumaud dagiti banag a pakainaigan ti konsiensia, mabalin a raemen ti di manamati nga asawa a lalaki ti takder ni baketna no maidatag dayta a buyogen ti “naalumamay a karirikna ken nauneg a panagraem.” Adda dagiti di manamati nga assawa a lallaki a ‘nagun-od nga awan ti sao babaen iti kababalin dagiti assawada a babbai, agsipud ta nasaksianda ti nadalus a kababalinda agraman ti nauneg a panagraem.’​—1 Pedro 3:1, 2, 15; 1 Corinto 7:13-16.

19. Kasanon no kiddawen ti asawa a lalaki ken ni baketna nga aglabsing iti linteg ti Dios?

¹⁹ No ngay pagaramiden ti asawa a lalaki ni baketna iti banag nga iparit ti Dios? No mapasamak dayta, masapul a laglagipen ti asawa a babai a ti Dios ti kangrunaan nga Agturay kenkuana. Tuladenna ti inaramid dagiti apostol idi binilin ida dagiti agtuturay a manglabsing iti linteg ti Dios. Kuna ti Aramid 5:29: “Kinuna da Pedro ken dagiti dadduma kadagiti apostol: ‘Masapul nga agtulnogkami iti Dios kas agturay imbes a kadagiti tattao.’”

20. Iti ania a napateg a benneg a nasken ti ayat ken panagraem?

²⁰ Nasken ti ayat ken panagraem iti sabali pay a benneg ti panagasawa​—komunikasion. Makisarita ti naayat nga asawa a lalaki ken baketna maipapan kadagiti aramid, problema, ken kapanunotanna maipanggep iti nadumaduma a banag. Kasapulan daytoy ti asawa a babai. Ipakpakita ti asawa a lalaki ti ayat ken panagraemna iti asawana no iwayaanna ti makisarita kenkuana ken pudpudno a dumngeg iti ibagana. (Santiago 1:19) Irekreklamo dagiti dadduma nga assawa a babbai a nagbassit ti panawen dagiti assawada a makisarita kadakuada. Nakalkaldaang dayta. Pudno, kadagitoy a tiempo nga adu ti pakakumikoman, mabalin nga adu nga oras nga agtrabaho dagiti assawa a lallaki iti ruar ti pagtaengan, ket gapu iti kasasaad ti panagbiag mabalin nga agtrabaho met dagiti assawa a babbai. Ngem kasapulan a mangilasin ti agassawa iti panawen a maipaay iti tunggal maysa. Ta no saan, mabalin a saandanton a kasapulan ti tunggal maysa. Mabalin a mangituggod kadagiti nakaro a parikut no mapilitanda a sumapul iti mannakipagrikna a katakunaynay a saanda nga asawa.

21. Kasano a makatulong ti umno a panagsao a mamagtalinaed iti panagasawa a naragsak?

²¹ Napateg ti wagas ti panagsao dagiti agassawa. “Dagiti makaay-ayo a sasao . . . nasam-itda iti kararua ken salun-at kadagiti tulang.” (Proverbio 16:24) Manamati man ti asawa wenno saan, agaplikar ti pammagbaga ti Biblia: “Ti panagsaoyo kankanayon koma a mabuyogan iti kinaparabur, natemplaan iti asin,” kayatna a sawen, makaay-ayo. (Colosas 4:6) No makabannog ti aldaw ti maysa, dakkel ti imbag a maaramidan ti naasi ken mannakipagrikna a sasao ti asawa. “Ti sao a maitutop ti pannakaisaona kasla mansanas a balitok a nabungon iti iniket a pirak.” (Proverbio 25:11) Nakapatpateg ti tono ti boses ken ti sasao a maaramat. Kas pagarigan, no makaluksaw nga agmandar, mabalin a kuna ti maysa iti sabali: “Irikepmo dayta ruangan!” Ngem anian nga ad-adda a “natemplaan iti asin” ti panangibaga iti “Pangngaasim man ta irikepmo ’ta ridaw?” iti naalumamay, mannakaawat a timek.

22. Aniada a kababalin ti kasapulan ti agassawa tapno mamentenar ti nasayaat a komunikasion?

²² Sumayaat ti komunikasion no adda sasao a naalumamay ti pannakaibalikasna, naamo a langa ken tigtignay, kinaanus, pannakaawat, ken kinadungngo. No ikagumaanda a taginayonen ti nasayaat a komunikasion, agpada a nawaya ti agassawa a mangibaga iti kasapulanda, ket makapaglinniwa ken makapagtinnulongda kadagiti kanito ti pannakapaay wenno pakarigatan. “Agsaokayo iti makaliwliwa kadagiti malmaldaangan a kararua,” idagadag ti Sao ti Dios. (1 Tesalonica 5:14) Adda dagiti kanito a maupay ti asawa a lalaki ken kanito a maupay ti asawa a babai. Mabalinda ti ‘agsao iti makaliwliwa,’ agpinnabileg.​—Roma 15:2.

23, 24. Kasano a makatulong ti ayat ken panagraem no adda di pagkinnaawatan? Mangtedkayo iti pagarigan.

²³ Saan nga ibilang ti agassawa a mangipakpakita iti ayat ken panagraem a karit ti tunggal di pagkinnaawatan. Ikagumaanda a liklikan ti ‘agpinnungtot a sipapait.’ (Colosas 3:19) Rebbeng nga agpada a laglagipenda a “ti naalumamay a sungbat pagbaw-ingenna ti pungtot.” (Proverbio 15:1) Diyo koma tagibassiten wenno kondenaren ti asawayo no iyebkasna ti naimpusuan a riknana. Imbes ketdi, ibilangyo ti kakasta nga ebkas kas gundaway a mangtukod iti kapanunotan ti sabali. Pagbuliganyo a risuten dagiti diyo pagkinnaawatan ket ikagumaanyo nga agkatunosankay iti pangngeddeng.

²⁴ Lagipenyo daydi gundaway a nangisingasing ni Sara ken ni lakayna nga Abraham iti solusion ti maysa a parikut ngem maikaniwas iti pagayatan ni Abraham. Kaskasdi, kinuna ti Dios ken Abraham: “Ipangagmo ti timekna.” (Genesis 21:9-12) Impangag ni Abraham, ket naparaburan. Kasta met, no adda isingasing ti asawa a babai a naiduma iti pampanunoten ni lakayna, dumngeg koma latta ti asawa a lalaki. Saan koma a ti asawa a babai laeng ti agsasao no di ket denggenna met koma ti ibaga ni lakayna. (Proverbio 25:24) Saan a naayat ken kinaawan panagraem no ipilit a kanayon ti asawa a lalaki wenno ti asawa a babai ti kayatna.

25. Kasano a mangnayon iti ragsak ti nasayaat a komunikasion iti kasingedan a benneg iti biag ti agassawa?

²⁵ Napateg met ti nasayaat a komunikasion iti seksual a relasion ti agassawa. Mabalin a dadaelen ti panagimbubukod ken kinaawan panagteppel daytoy kasingedan a relasion ti agassawa. Nasken ti nawaya a komunikasion, agraman kinaanus. No di agimbubukod a kitaen ti tunggal maysa ti pagimbagan ti sabali, manmano nga agbalin a nakaro a parikut ti sekso. Iti daytoy, kas iti dadduma a banag, “tunggal maysa itultuloyna koma a sapulen, saan a ti bukodna a pagsayaatan, no di ket ti pagsayaatan ti sabali a tao.”​—1 Corinto 7:3-5; 10:24.

26. Nupay adda dagiti nasayaat ken dakes a pagteng iti biag ti tunggal agassawa, kasano a ti panangipangag iti Sao ti Dios tulonganna ti agassawa nga agbalin a naragsak?

²⁶ Anian a nagsayaat a pammagbaga ti ipaay ti Sao ti Dios! Pudno, adda dagiti nasayaat ken dakes a pagteng iti biag ti tunggal agassawa. Ngem no paidalan ti agassawa iti panunot ni Jehova, kas naipalgak iti Biblia, ken ibatayda ti relasionda iti naprinsipiuan nga ayat ken panagraem, makapagtalekda a mataginayon ken naragsak ti panagasawada. Iti kasta maipakitada ti panagraem saan laeng nga iti maysa ken maysa no di pay ket iti Namunganay iti panagasawa, ni Jehova a Dios.