Adda Nagan ti Dios

ANIA ti umuna a damagem no makiam-ammoka iti maysa a tao?— Wen, damagem ti naganna. Adda nagantayo amin. Ti Dios inikkanna ti immuna a tao ditoy daga iti naganna. Pinanagananna iti Adan. Eva ti nagan ti asawa ni Adan.

Ngem saan laeng a dagiti tattao ti adda naganna. Mangpanunotka iti sabsabali pay nga adda met naganna. No ikkandaka iti munieka wenno taraken, panaganam dayta, di ngamin?— Wen, nakapatpateg ti maaddaan iti nagan.

Kitaem dagiti nakaad-adu a bituen iti rabii. Panagkunam, adda ngata nagan dagita?— Wen, adda nagan nga inted ti Dios iti tunggal bituen iti tangatang. Kuna ti Biblia: “Bilangenna ti dagup dagiti bituen; isuda amin awaganna babaen kadagiti naganda.”​—Salmo 147:4.

Siasino ti ammom a kapapatgan a persona iti intero nga uniberso?— Wen, ti Dios. Panagkunam, adda ngata naganna?— Kinuna ni Jesus nga adda. Iti naminsan, inkararag ni Jesus iti Dios: ‘Impakaammok ti naganmo kadagiti pasurotko.’ (Juan 17:26) Ammom kadi ti nagan ti Dios?— Ti Dios a mismo ti mangibaga kadatayo. Kunana: “Siak ni Jehova. Dayta ti naganko.” No kasta, JEHOVA ti nagan ti Dios.​—Isaias 42:8.

Ania ti mariknam no saan a malipatan dagiti sabsabali ti naganmo?— Maragsakanka, di ngamin?— Ni Jehova kayatna met a maam-ammo dagiti tattao ti naganna. Gapuna, usarentayo koma ti nagan ni Jehova no pagsasaritaantayo ti Dios. Ti Naindaklan a Mannursuro inusarna ti nagan ti Dios a Jehova idi kasarsaritana dagiti tattao. Iti naminsan, kinuna ni Jesus: “Masapul nga ayatem ni Jehova a Diosmo buyogen ti intero a pusom.”​—Marcos 12:30.

Ammo ni Jesus a nakapatpateg ti nagan ni “Jehova.” Dayta ti makagapu nga insurona kadagiti adalanna nga usarenda ti nagan ti Dios. Insurona pay ketdi nga usarenda ti nagan ti Dios no agkararagda. Ammo ni Jesus a kayat ti Dios a maammuan dagiti amin a tattao ti naganna a Jehova.

Idi un-unana, impakita ti Dios ti kinapateg ti naganna ken ni Moises, a maysa nga Israelita. Agnanaed idi dagiti Israelita iti pagilian a naawagan iti Egipto. Egipcio ti awag kadagiti umili iti dayta a pagilian. Inadipenda dagiti Israelita ken pinarparigatda ida. Idi dimmakkelen ni Moises, pinadasna a tulongan ti maysa kadagiti kailianna. Daytoy ti namagpungtot ken Faraon, ti ari ti Egipto. Kayatna a papatayen ni Moises! Dayta ti gapuna a naglibas ni Moises idiay Egipto.

Napan ni Moises iti sabali a pagilian, idiay Midian. Sadiay a nagasawa ni Moises ken nangrugi nga agpamilia. Agpaspastor met idi kadagiti karnero. Maysa nga aldaw, bayat nga ay-aywanan ni Moises dagiti karnerona iti asideg ti maysa a bantay, adda nakitana a nakaskasdaaw a banag. Adda bassit a kayo nga umap-apuy, ngem saan a maur-uram! Immasideg ni Moises tapno makitana a naimbag.

Ammom kadi ti napasamak?— Nakangngeg ni Moises iti timek a naggapu iti dayta nga umap-apuy a kayo. Kuna ti timek, “Moises! Moises!” Siasino ti nagsao?— Ti Dios! Adu ti ipaaramid idi ti Dios ken Moises. Kinuna ti Dios: ‘Umayka ket ibaonka ken Faraon, ti ari ti Egipto, ket iruarmo ti ilik nga annak ti Israel manipud Egipto.’ Inkari ti Dios a tulonganna ni Moises a mangaramid iti daytoy.

Ngem kinuna ti Dios ken ni Moises: ‘Kas pagarigan dumtengakon iti annak ti Israel ket ibagak nga imbaonnak ti Dios. Ania ngay no isaludsodda kaniak, “Ania ti naganna?” Ania ti kunaek?’ Imbaga ti Dios ken Moises a kastoy ti kunaenna kadagiti annak ti Israel: ‘Ni Jehova imbaonnak kadakayo, ket kinunana kaniak a Jehova ti naganna iti agnanayon.’ (Exodo 3:1-15) Daytoy ti mangipakita a taginayonen ti Dios ti naganna a Jehova. Dinanto pulos baliwan dayta. Kayat ti Dios a mayam-ammo a Jehova ti naganna iti agnanayon.

Idi nagsubli ni Moises idiay Egipto, impagarup dagiti Egipcio a ni Jehova ket maysa laeng a nanumo a dios dagiti Israelita. Dida ammo idi nga isu ti Dios ti intero a daga. Gapuna, kinuna ni Jehova iti ari ti Egipto: ‘Ipakaammok ti naganko iti intero a daga.’ (Exodo 9:16) Talaga nga impakaammo ni Jehova ti naganna. Ammom kadi no kasanona nga inaramid dayta?—

Dinutokanna ni Moises a mangidaulo iti nasion ti Israel a rummuar iti Egipto. Idi nakadanondan iti Nalabaga a Baybay, pinagbisngay ni Jehova dayta ken nangaramid iti namaga a dalan iti tengnga ti baybay. Limmasat a sitatalged dagiti Israelita iti namaga a daga. Ngem idi lumaslasaten ni Faraon ken amin a buyotna, nagsubli ti nabisngay a danum ket linapunosna dagiti Egipcio agingga a natayda amin.

Di nagbayag nadamag dagiti tattao iti intero a daga ti inaramid ni Jehova idiay Nalabaga a Baybay. Kasanotayo nga ammo a nadamagda dayta?— Nasurok nga 40 a tawen kalpasan dayta, nakadanon dagiti Israelita idiay Canaan, ti daga nga inkari ni Jehova nga itedna kadakuada. Sadiay nga imbaga ti maysa a babai nga agnagan Rahab kadagiti dua a lallaki nga Israelita: “Nangngegmi no kasano a pinagmaga ni Jehova ti dandanum ti Nalabaga a Baybay manipud sanguananyo idi rimmuarkayo manipud Egipto.”​—Josue 2:10.

Itatta adu ti tattao a kapadpada dagidiay nga Egipcio. Dida patien a ni Jehova ti Dios ti intero a daga. Isu a kayat ni Jehova a dagiti mismo a tattaona ti mangyam-ammo kenkuana kadagiti sabsabali. Kasta ti inaramid ni Jesus. Idi dandanin agpatingga ti biagna ditoy daga, inkararagna ken Jehova: “Impakaammok kadakuada ti naganmo.”​—Juan 17:26.

Kayatmo kadi a tuladen ni Jesus? No kasta ibagam kadagiti sabsabali a Jehova ti nagan ti Dios. Makitamto nga adu ti tattao a di makaammo iti dayta. Nalabit mabalinmo nga ipakita kadakuada ti teksto ti Biblia iti Salmo 83:18. Alaenta ti Biblia ket birokenta dayta a teksto. Kunana: “Tapno maammuan koma dagiti tattao a sika, nga agnagan Jehova, sika laeng ti Kangatuan iti intero a daga.”

Ania ti maadaltayo iti daytoy a binasata?— Wen, maadaltayo a ti nagan ni Jehova ti kapapatgan a nagan. Dayta ti nagan ti Mannakabalin-amin a Dios, ti Ama ni Jesus ken Daydiay nangaramid iti amin a banag. Ken laglagipem a kinuna ni Jesus a masapul nga ayatentayo ni Jehova a Dios iti amin a pusotayo. Ay-ayatem kadi ni Jehova?—

Kasanotayo a maipakita nga ay-ayatentayo ni Jehova?— Umuna, masapul a maam-ammotayo a naimbag kas maysa a Gayyem. Maysa pay, nasken nga ibagatayo kadagiti sabsabali ti naganna. Mabalintayo nga ipakita a mismo iti Biblia a Jehova ti naganna. Ibagatayo met dagiti nakaskasdaaw a pinarsua ni Jehova ken dagiti naimbag a banag nga inaramidna. Daytoy ti mangparagsak unay ken Jehova gapu ta kayatna a maammuan dagiti tattao ti maipapan kenkuana. Mabalintayo ti makiraman a mangaramid iti dayta, di ngamin?—

Saan nga amin ket kayatda a denggen ti ibagatayo maipapan ken Jehova. Adu ti saan a dimngeg ken Jesus, ti Naindaklan a Mannursuro, idi ipakpakaammona dayta. Ngem saan a simmardeng ni Jesus nga agsao maipapan ken Jehova.

Tuladentayo koma ngarud ni Jesus. Itultuloytayo nga isarita ni Jehova. No aramidentayo dayta, maragsakan ni Jehova a Dios kadatayo gapu ta ipakpakitatayo ti panagayat iti naganna.