7 JACOB
Situtured a Prinotektaranna ti Pamiliana
IDI lakayen ni Jacob, dineskribirna ti biagna kas “ababa” ken “nagrigat.” (Gen. 47:9) Adu ngamin ti pakarigatan a napasaranna! Masapul idi nga agkamang iti Haran nga adayo a lugar gapu ta kayat a papatayen ti kabsatna. Idiay Haran, natnag ti rikna ni Jacob ken Raquel, ngem ni Laban nga ama ni Raquel inallilawna ni Jacob tapno ti inauna nga anakna ti umuna a maasawa ni Jacob. Isu a dua ti nagbalin nga asawa ni Jacob, ket saan nga agkatunosan dagitoy. Adu a tawen a nagtrabaho ni Jacob ken ni Laban ngem maulit-ulit a linoko ni Laban. Nupay kasta, impakita ni Jacob ti naisangsangayan a kinatured, pammati, ken panagibtur.
Maysa nga aldaw, imbaga ni Jehova ken ni Jacob a tiempon tapno panawanna ti Haran ket agsublin idiay Canaan. Ngem napeggad dayta gapu ta naagum ni Laban. Para kenkuana, kukuana ti amin nga adda ken Jacob. Imbaga ni Jacob kada Raquel ken Lea ti inaramid ti amada ken ti imbaga ni Jehova, sa pimmanawda a saan a nagpakpakada ken Laban. Idi naammuan dayta ni Laban, inummongna dagiti tattaona ket kinamatda ni Jacob. Idi nakamakamna ida, pinagsasawanna ni Jacob. Impangta pay ketdi ni Laban: “Kabaelankayo a dangran.” Ngem situtured nga indepensa ni Jacob ti bagina. Imbagana ken Laban a saan a patas ti panangtratona kenkuana ken inallilawna iti adu a tawen. Nupay kasta, kayat latta ni Jacob ti makikappia. Isu a sakbay a nagsinada, nagaramidda iti katulagan ti kappia.
Situtulok a nakikappia ni Jacob kadagiti nauyong a miembro ti pamiliana ken situtured a nakigabbo iti nabileg nga anghel
Ngem saan pay a nalpas ti problema ni Jacob. Masapul a sanguenna ti kasinginna a ni Esau. Adu a tawen sakbayna, kayat a patayen ni Esau ni Jacob. Ngem pinakdaaran ni Rebecca nga inada. Patien ni Esau nga inallilaw ni Jacob ti amada tapno maalana ti bendision a para koma kenkuana. Ngem ita, kayat ni Jacob ti makikappia. Naammuanna a ni Esau ken ti 400 a lallaki a kaduana ket sumabat kenkuana ken iti pamiliana. Ibaga ti Biblia: “Nagbuteng ni Jacob iti kasta unay ken naringgoran.” Gapuna, nangibaon kadagiti adipenna nga umun-una a sumabat ken ni Esau ken impatulodna kadakuada dagiti napapateg a sagut nga itedda kenkuana. Umdas kadi dagitan a mangay-ayo ken Esau? Saan nga ammo ni Jacob ti agbalin a reaksion ti kabsatna. Ngem idi kuan, adda nakaskasdaaw a napasamak.
Sakbay a pumarbangon, adda nakita ni Jacob nga estranghero. Dayta ket maysa nga anghel ni Jehova. Idi kuan, nakigabbo kenkuana ti anghel. Gapu ta marikna ni Jacob nga adda bendision a maawatna iti anghel, situtured a nakigabbo kenkuana iti adu nga oras. Saan a simmuko ni Jacob uray no 97 ti tawenna idin ken adayo a napigpigsa ti anghel. Inaramidna ti amin a kabaelanna ken nagsangit pay ketdi. (Os. 12:4) Ammo ni Jacob a nakapatpateg ti aniaman a bendision nga ited ni Jehova isu a determinado a mangaramid iti amin tapno maalana dayta. Idi lumawagen, nagligasi ti tulang ti padingpading ni Jacob idi sinagid ti anghel. Ngem adda met nagsayaat nga imbaga ti anghel ken Jacob—a mabaliwanen ti naganna iti Israel. Ti kaipapanan dayta a nagan ket: Daydiay nakiranget iti Dios. Maitutop dayta a nagan gapu ta saan a simmuksuko ken impanna ti amin a pigsana tapno maalana ti bendision ni Jehova.
Agpilaypilay a nagsubli ni Jacob iti pamiliana. Iti adayo, nakitana a sumungsungad ni Esau ken ti 400 a lallaki a kaduana. Immun-una ni Jacob nga is-isuna tapno sabatenna ida. Ket bayat nga umas-asideg ken Esau, namimpito a nagruknoy ni Jacob. Nagtaray ni Esau a simmabat kenkuana. Ngem awan ti iggemna nga espada. Imbes ketdi, inarakupna ni Jacob! Nagsangitda a dua. Gapu ta nagpakumbaba ni Jacob ken nangted iti adu a sagut, saanen a nakaunget ni Esau. Mabalin a naapresiarna met ti kinatured ni Jacob. Nakabirok ni Jacob iti pamay-an tapno agkappiada nga agkabsat.
Nagpilaypilay ni Jacob iti nabatbati a paset ti biagna gapu ta saanen nga immimbag ti nagligasi a padingpadingna. Ken adu pay ti pakarigatan a nakaipasanguanna. Ngem sigurado a dina pulos nagbabawyan ti desisionna nga agtulnog ken Jehova wenno makigabbo iti anghel. Kalpasan ti adu a tawen, natungpal ti nagsayaat a kari ni Jehova kenkuana—nagbalin a dakkel a nasion ti Israel. (Gen. 28:14) Kanayonanna, ni Jehova ket masansan a maaw-awagan kas “ti Dios ni Jacob.” (Ex. 3:6) Inusar a mismo ni Jesu-Kristo dagita a sasao, sa innayonna a ni Jehova “ket Dios, saan a dagiti natay, no di ket dagiti sibibiag, ta sibibiagda amin kenkuana.” (Luc. 20:37, 38) Nagsayaat ti masakbayan nga agur-uray ken Jacob. Iti baro a lubong, saanto a marukod ti kaatiddog ti biagna, ken nakaragragsakto!
Basaem ti salaysay ti Biblia:
Pagsasaritaan:
Kasano nga impakita ni Jacob ti kinatured?
Agkalika Pay
1. Apay nga inted ni Jehova ken Jacob ti kalintegan kas inauna imbes a ken ni Esau? (w03 10/15 29 ¶1)
2. Ania a tagtagainep ti inted ni Jehova ken Jacob, ken ania ti impasigurado dayta kenkuana? (w03 10/15 28 ¶3-4) A
Ladawan A
3. Apay a sigurado ni Jacob nga adda bendision a maawatna manipud iti anghel? (w03 10/15 31 ¶1) B
Ladawan B
4. Ania dagiti inaramid ni Jacob tapno saan a maimpluensiaan ti pamiliana kadagiti Canaanita? (w95 9/15 21 ¶4, ftn.)
Panunotem Dagiti Leksion
Narikna ni Jacob a responsabilidadna nga aywanan ti amin a karnero ni Laban. (Gen. 31:38-40) Kasano a maipakita dagiti Kristiano a papastor ita a maseknanda unay kadagiti karnero ni Jehova—dagiti kakabsatda? C
Ladawan C
Idi nagbuteng ni Jacob, nagkararag ken Jehova. (Gen. 32:6-12) Ania ti masursurom ken Jacob maipapan kadagiti mabalinmo nga ikararag ken Jehova?
Kasanom a matulad ti kinatured ni Jacob?
Utobem ti Napatpateg a Banag
Ania ti isuro kaniak daytoy a salaysay maipapan ken Jehova?
Kasano a konektado daytoy a salaysay kadagiti panggep ni Jehova?
Ania ti isaludsodko ken Jacob inton mapagungar?
Ammuem ti Ad-adu Pay
Kasano a matuladtayo ni Jacob no mabigbigtayo a napasaktantayo ti maysa a kabsat?
Usarem daytoy nailadawan nga estoria ti Biblia a mangisuro iti pamiliam maipapan ken Jacob.