8 JOSE
Saan a Nagpasulisog
MANIPUD pay idi ubing ni Jose, isu ket ay-ayaten unayen ni Jacob nga amana ken ni Jehova a Diosna. Ngem saanna a kayat a sawen a nanam-ay ti biagna. Ngamin, ginurgura dagiti kakabsatna. Gapu ta espesial ti panangtrato kenkuana ni Jacob, nagimon ken nakapungtot dagiti kakabsatna iti ama. Adda tiempo a pinagtagtagainep ni Jehova ni Jose. Kadagita a tagtagainep, impakaammona nga agruknoyto ken Jose dagiti kapamiliana isu nga ad-adda manen a ginura dagiti kakabsatna.
Naminsan, idi 17 wenno 18 ti tawen ni Jose, imbaon ni Jacob nga agdaliasat iti sumagmamano nga aldaw tapno kitaenna ti kasasaad dagiti kakabsatna. Ngem kakaasi ti pinamay-anda ken Jose ken intinnagda pay iti bubon nga awan ti danumna. Nakaul-ulpitda ta dida man la inkankano ti panagpakpakaasina iti tulong. Nupay nagsasaritaandan a patayenda ni Jose, nagdesisionda met laeng nga ilakoda lattan kadagiti lumablabas a komersiante. Idi agangay, dagiti agkakabsat inallilawda ni Jacob tapno panunotenna a ti dungdungnguenna a ni Jose ket pinapatay ti naranggas nga atap nga animal. Ngem ti agpayso, ni Jose ket naipan iti adayo nga abagatan, iti Egipto, ket sadiay a nailako kas adipen ken Potifar nga opisial ti palasio ni Faraon.
Nalaka laeng koma ken Jose ti maawanan iti namnama. Ngem impakitana ti kinatured ken inaramidna ti amin a kabaelanna iti laksid ti narigat a situasion. Isu a mabasatayo: “Adda kenkuana ni Jehova.” Sinigurado ni Jehova nga agballigi ti amin nga aramiden ni Jose. Intalek kenkuana ni Potifar ti intero a sangakabbalayanna.
Ngem adda agur-uray a peggad. “Dimmakkel ni Jose a naguapo ken nabaked,” isu a nagkursonada kenkuana ti asawa ni Potifar. Saanna man la nga inlimed ti marikriknana nga uray la imbagana: “Dennaannak.” Ania ti aramiden ni Jose? Adayo ti ayan ti pamiliana. Isu ket maysa laeng nga adipen, ken mabalin nga aramiden dagiti makinkukua kenkuana ti aniaman a kayatda. Sigurado a kabaelan daytoy a babai a pagbalinen a miserable ti biagna. Nagpasulisog ngata ni Jose? Adda ngata turedna nga agsaan?
Ammo ni Jose a kabaelan ti asawa ti amona a pagbalinen a miserable ti biagna. Kasano ngarud a nalabananna ti sulisog?
Kuna ti Biblia a “nagkedked” ni Jose. Imbagana a saanna a kayat a dadaelen ti panagtalek ni Potifar kenkuana. Ngem napatpateg pay daytoy a rason nga imbagana: “Apay koma nga aramidek daytoy nakaro a kinadakes ket agbasolak iti Dios?” Gapu iti ayat ni Jose iti Amana a ni Jehova, situtured ken determinado a nagsaan. Ngem saan a simmuko ti asawa ni Potifar. “Inaldaw” nga allukoyenna ni Jose. Agingga a maysa nga aldaw, nairana nga awan dagiti adipen iti balay. Ginammatanna ti bado ni Jose sa kinunana: “Dennaannak!” Inwadagna ti asawa ni Potifar sa nagtaray, ngem nabati ti bado ni Jose ta dina inibbatan dayta. Idi kuan, impakitana dayta ken Potifar sa imbagana nga isu ket kayat a ramesen ni Jose. Nakapungtot ni Potifar isu nga impaipisokna ni Jose iti pagbaludan.
Ita, addan ni Jose iti nakasipsipnget a pagbaludan. Adda idi tiempo a nakadenaan dagiti sakana ken nakawaran iti landok ti tengngedna. (Sal. 105:17, 18) Nalaka la koma a naawanan iti namnama ni Jose. Ngem binaybay-an ngata ni Jehova? Saan! Ken saan a pulos a napukaw ti panagtalek ni Jose iti Diosna. Inaramidna ketdi ti amin a kabaelanna bayat a nakabalud ket binendisionan ni Jehova. Di nagbayag, naikkan ni Jose iti dakkel a responsabilidad sadiay. Ken uray adu a tawen ti limmabas, isu ket nagtultuloy a nagibtur.
Gapu iti pammati ken kinatured ni Jose, nagtultuloy nga inusar ni Jehova. Idi agangay, adda dua a padto nga inted ti Dios ken Faraon babaen ti tagtagainep ken tinulonganna ni Jose a mangilawlawag iti dayta. Imbaga ni Jose iti ari a ti kaipapanan ti tagtagainepna ket pito a tawen nga adu ti apit a sarunuen ti pito a tawen a nakaro a bisin. Nagbilib ni Faraon gapu ta tinulongan ti Dios ni Jose a mangilawlawag iti tagtagainepna isu nga intalekna kenkuana ti panangisagana iti nasion para iti um-umay a nakaro a bisin. Pinagbalinna ni Jose a nabileg nga agturay. Inkabilna iti maikadua a kangatuan a saad. Gapu iti dayta, saan laeng a dagiti Egipcio ti naisalakan ni Jose manipud iti bisin, no di ket uray ti pamiliana. Idi napan dagiti kakabsatna idiay Egipto tapno gumatang iti taraon, dida ammo a ti adingda ti nagruknoyanda. Pimmudno ti tagtagainep nga inted ni Jehova ken Jose idi ubing pay. Ngem impakita met dagiti kakabsatna nga iti panaglabas ti panawen, nagbalbaliwdan. Ti kagurgurada idi a kabsatda ti nangisalakan kadakuada, iti amada, ken iti agbalinto a nasion ti Israel gapu ta impakita ni Jose ti kinatured ken nagtalinaed a nabileg ti pammatina ken Jehova.
Basaem ti salaysay ti Biblia:
Pagsasaritaan:
Kasano nga impakita ni Jose ti kinatured?
Agkalika Pay
1. Ania ti mangsuporta iti kinaumiso ti salaysay maipapan iti biag ni Jose idiay Egipto? (g 11/10 15 ¶2)
2. Kasano nga ammo ni Jose nga ibilang ni Jehova a “nakaro a kinadakes” ti pannakikamalala? (Gen. 39:9; w22.08 26 ¶2)
3. Apay nga impalubos ni Jehova nga agbalin ni Jose a mamangulo a ministro iti Egipto? (w96 5/1 11 ¶4) A
Ladawan A
4. Ania ti mangipakita a saan a pulos kimmapuy ti pammati ni Jose uray agtawenen iti 110? (Gen. 50:25, 26; w07 6/1 28 ¶10-11) B
Ladawan B
Panunotem Dagiti Leksion
Kasanom a matulad ni Jose no saan a nasayaat ti panangtrato kenka ti padam a Kristiano? (Gen. 45:4, 5; 50:19-21)
Uray no nayadayo ni Jose iti pamiliana, matalek latta ken Jehova. Kasano a makatulong kadatayo ti ulidanna . . .
no addatayo iti eskuelaan? C
Ladawan C
no addatayo iti biahe? D
Ladawan D
bayat nga agus-usartayo iti selpon wenno dadduma pay nga electronic device? E
Ladawan E
Kasanom a matulad ti kinatured ni Jose?
Utobem ti Napatpateg a Banag
Ania ti isuro kaniak daytoy a salaysay maipapan ken Jehova?
Kasano a konektado daytoy a salaysay kadagiti panggep ni Jehova?
Ania ti isaludsodko ken Jose inton mapagungar?
Ammuem ti Ad-adu Pay
Nupay saan nga inliklik ni Jehova ni Jose kadagiti pakarigatan, tinulonganna a mangibtur kadagita. Kitaem no kasano a tulongannaka met ni Jehova.
Kasano a matulad dagiti ubbing ni Jose no saan a nasayaat ti panangtrato kadakuada ti dadduma nga ubbing?