25 DAVID
Situtured nga Inaramidna ti Umiso
IPATPATEG idi ni Saul ni David kas paraawit iti kabalna ken nagbalin a pagtaltalkanna a heneral idi agangay. Ngem ita, aglemlemmengen ni David ken delikadon ti biagna. Inkari idi ti Dios a pagbalinenna nga ari ni David. Ngem kasano ngay ket aglemlemmeng metten iti let-ang tapno maprotektaranna ti bagina ken ti 600 a tattaona?
Nagbalin a dakes nga ari ni Saul. Gapu iti nakaro nga imonna, nakapungtot unay ken saan la a naminsan a pinadasna a patayen ni David. Adda idi tsansa ni David a mangpatay ken Saul ngem saanna nga inaramid dayta. Imbes nga agyaman ni Saul, intultuloyna latta a biroken ni David tapno patayenna. Naglemmeng ni David iti siudad ti Zif. Ngem imbaga dagiti lalaki iti siudad ken Saul nga adda idiay ni David. Maikadua daytoyen a panangtraidorda kenkuana. Idi naammuan daytoy ni Saul, indauluanna ti armadana a mangkamat ken David.
Ania itan ti aramiden ni David? Nangibaon nga umuna iti sumagmamano a lallaki a mangsigurado iti ayan ni Saul. Uray no 3,000 ti soldado ni Saul, saan a nagbuteng ni David. Kinapudnona, iti dayta a tiempo nga insurat daytoy ni David: “Kitaenyo! Ti Dios ti katulongak; ni Jehova ket adda kadagidiay mangsarsaranay kaniak.” (Sal. 54:4; superskripsion) Nagdesision ngarud ni David a mapan iti kampo ni Saul iti rabii. Dinamagna no adda ti mayat a kumuyog kenkuana.
Nagbulontario a kumuyog ni Abisai. Isu ket kaanakan ni David. Natured a mannakigubat ngem awan asina no dadduma. Nagin-inayad da David ken Abisai a simrek iti kampo ni Saul ket nakitada a nakaturog ti amin. Pinaturog amin ida ni Jehova iti nairut tapno saanda a mapuotan da David ken Abisai. Idi kuan, nakitada ni Ari Saul a naimas met ti turogna! Awan ti mangbambantay kenkuana ken nakatugkel iti daga ti pikana iti uluananna.
Ania ngata ti aramiden ni David? Naglakana laeng koman a patayen ni Saul! Daytoy ngatan ti tiempo nga agsardengen ti panangirurumen ni Saul ken mangrugin nga agari ni David? Saan a maawatan ni Abisai no apay a saan pay la a patayen ni David ni Saul. Inyarasaasna: “Insuko itan ti Dios kenka ti kabusormo. Isu a pangngaasim ta palubosannak nga iduyokko kenkuana ti pika a sumalput agingga iti daga uray maminsan laeng, ket diakton piduaen.”
Malaglagip pay laeng ni David ti nariknana iti kasta met laeng idi a situasion. Iti let-ang ti En-gedi, simrek ni Saul iti kueba a paglemlemmenganna. Saan nga ammo ni Saul nga adda sadiay ni David, isu a nalaka laeng koma a patayen ni David ni Saul. Ngem saanna a sinaktan ni Saul. Gineppasna laeng ti gayadan ti badona. Dayta laeng ti inaramid ni David ngem nakaron ti pannakakonsiensiana. Nasuron iti bagina ta saanna a rinespeto ti dinutokan ni Jehova nga ari.
Mabalin a narigatan ni David a mangigawid ken Abisai a mangpatay ken Saul iti dayta a rabii. Ngamin, aglemlemmeng met laeng ni Abisai ken sigurado a kayat ti armada ni David nga agpatinggan ti panangidadanes ni Saul. Ngem saan latta a kayat ni David ti agibales. Inlintegna ni Abisai nga agngarngarieten a mangpatay ken Saul, ken pinalagipanna a masapul nga agan-anus. Impasiguradona ken Abisai: “Ni Jehova a mismo ti mangpapatayto [ken Saul], wenno addanto aldaw a matay, wenno mapan makigubat ket mapapatay.” Imbagana pay: “Gapu iti panagraemko ken ni Jehova, diak maitured a patayen ti dinutokan ni Jehova!”
Idi sinugsogan ni Abisai a patayen ni David ti nabileg a kalabanna, ania ti inaramidna?
Ammo ni David nga ilintegto ni Jehova ti kinadakes ni Saul iti umiso a tiempo. Iti salmo a nadakamat itay, insuratna maipapan ken Jehova: “Supapakannanto ti kinadakes dagiti kabusorko.” (Sal. 54:5) Pimmanaw da David ken Abisai iti kampo ni Saul sa napanda iti tuktok ti bantay nga adda laeng iti asideg. Pinukkawan ni David ni Saul ken dagiti soldadona. Inungtanna dagiti soldado ni Saul ta saanda a binantayan ti arida. Imbagana pay ken Saul nga isardengnan a kamaten ta saan met a kalaban ken kasla ‘maysa la a timel’ a saan a rumbeng a pagbutngan. Nabainan ni Saul ket imbagana: “Nagtignayak a simamaag ken nakaaramidak iti nakaro a kamali.”
Nagbalbaliw kadi ni Saul? Saan. Ken mabalin nga ammo ni David a saan a talaga nga agbalbaliw ni Saul. Ngem pulos a saanna a nagbabawyan ti kinaturedna a nangaramid iti umiso. Idi agangay, binendisionan ni Jehova daytoy a natured ken matalek nga adipenna iti pamay-an a saan a ninamnama ni David.
Basaem ti salaysay ti Biblia:
Pagsasaritaan:
Kasano nga impakita ni David ti kinatured idi ilemlemmenganna ni Saul?
Agkalika Pay
1. Nupay adda tendensia ni Abisai nga agbalin a nadarasudos ken awanan asi, kasano a situtured nga indepensana ti ili ni Jehova ken sinuportaranna ni David? (it “Abisai” ¶3-5)
2. Apay nga inkompara ni David ti bagina iti maysa nga “atap a billit iti kabambantayan”? (1 Sam. 26:20; it “Tukling” ¶4) A
Ekaterina Kolomeets/stock.adobe.com
Ladawan A
3. Apay a kasapulan idi ni David ti aganus? (w17.08 6 ¶14-15)
4. Kasano a nagtultuloy nga impakita ni David ti kinaemma uray limmabasen ti adu a tawtawen? (w21.09 10 ¶8) B
Ladawan B
Panunotem Dagiti Leksion
Uray namin-adu a nagkamali ni Saul, rinespeto latta ni David ti autoridadna. Kasano a matuladtayo ni David no maipapan iti panangmatmattayo kadagiti . . .
nagannaktayo? C
Ladawan C
autoridad ti gobierno? D
Ladawan D
panglakayen iti kongregasion? E
Ladawan E
Inkabilangan ni David no ania ti makaay-ayo ken Jehova isu a situtured a naaramidna ti umiso. Ania dagiti situasion a kasapulantayo ti kinatured tapno maaramidtayo ti umiso?
Kasanom pay a matulad ti kinatured ni David iti daytoy a salaysay?
Utobem ti Napatpateg a Banag
Ania ti isuro kaniak daytoy a salaysay maipapan ken Jehova?
Kasano a konektado daytoy a salaysay kadagiti panggep ni Jehova?
Inton panagungar, ania ti isaludsodko ken David maipapan iti daytoy a paset ti biagna?
Ammuem ti Ad-adu Pay
Buyaem ti video maipapan iti daytoy a salaysay.
Laglagipenyo no Kasano nga Agtignay ti Ayat—Anusanna ti Amin a Banag (1:29)
Ania ti masursuro dagiti ubbing ken Saul, a napakumbaba ken naemma idi damo ngem nagbalin a natangsit?