Inlintegna ti Ari

BAYAT a mapmapan ni propeta Natan iti palasio ti gayyemna a ni Ari David, mabalin a pampanunotenna, ‘Apay ngata a naaramidna daytoy a nakadakdakes a banag idinto ta nakasingsingpet a tao?’ Ngamin, kasla kaano laeng idi imbaon ni Jehova ni Natan a mangibaga ken David iti nagsayaat a pribilehiona iti masanguanan: Agtaud ti Mesias iti pamilia ni David! (2 Sam. 7:​4, 12, 13) Ngem ita, nakaaramid ni David kadagiti nadagsen a basol ket kayat ni Jehova nga ilinteg ni Natan ni David.

Inlimed ni David dagiti inaramidna ngem nakita amin dagita ni Jehova. Sigurado nga imbaga ti Dios ken ni Natan ti napasamak. Adda idi maysa a rabii a nagpagnapagna ni David iti tuktok ti palasiona ket nakakita iti maysa a “nakapimpintas” a babai nga agdigdigus. Bat-sheba ti naganna. Pinaayaban ni David iti palasiona. Ammo ni David nga asawa isuna ti matalek a soldadona a ni Urias a maysa a Heteo. Ngem inasawa latta ni David. Idi agangay, imbaga ni Bat-sheba ken David a masikog isuna. Pinadas ni David nga isekreto ti dakes nga inaramidna. Pinaayabanna ni Urias manipud iti paggugubatan ket kinombinsirna nga agawid ta mangnamnama a kaiddaenna ni baketna. (Idilig ti 1 Samuel 21:5.) Ngem napatpateg ken Urias ti responsabilidadna kas soldado. Gapu iti dayta, implano ni David a maipan ni Urias iti delikado a puesto iti paggugubatan tapno dakdakkel ti tsansa a matay ni Urias. Nagballigi dayta a dakes a planona. Idi natayen ni Urias, innala ni David ni Bat-sheba kas asawana.

Kuna ti Biblia: “Kinagura unay ni Jehova ti inaramid ni David.” Imbaon ni Jehova ni propeta Natan tapno ibagana ken ni David a nakadakdakes dagiti inaramidna ken tapno ilintegna. Bayat a mapmapan ni Natan iti ari, posible ngata a nadanagan no ania ti agbalinto a reaksion ni David? Ngamin, no kaya ni David nga ipapatay ni Urias, kayana met nga aramiden dayta ken ni Natan. Ngem kayat ni Natan a danonen ti puso ni David ken tulonganna a mangbigbig no kasano kadakes dagiti inaramidna. Sigurado nga inkarkararagna dayta. Isu a nagpanunot iti maysa nga estoria nga ibagana iti ari.

Inyestoria ni Natan ken ni David ti maipapan iti dua a lallaki iti maysa a siudad. Ti maysa ket nakabakbaknang ken adu ti karnero ken bakana. Ti met maysa ket napanglaw ken maymaysa laeng ti karnerona. Ipatpategna unay dayta, ken inay-aywananna iti balayna nga uray la imbilangna a kasla anakna. Maysa nga aldaw, adda bigla a bimmisita iti nabaknang a lalaki ket kasapulanna ti mangparti iti karnero nga ipasidana. Ngem saan a nangala kadagiti karnerona. ‘Innalana ketdin ti urbon a karnero ti napanglaw,’ pinartina, sa isu ti indasarna iti bisitana! Idi nalpasen ti estoria ni Natan, nakapungtot ni David. Imbagana: “Isapatak iti nagan ti sibibiag a Dios a ni Jehova, rumbeng a mapapatay dayta a tao!” Nakapungtot unay ni David ta “saan man la a naasian” ti nabaknang a lalaki.

Nagsayaat ti ilustrasion a napanunot ni Natan. Pastor met idi ni David ken kagurgurana ti kinaawan hustisia. Isu a situtured nga imprangka ni Natan ken ni David: “Sika dayta a tao!” Nakigtot la ketdi ni David. Indetalye ni Natan ti amin a nakita ni Jehova a nagdakes nga inaramid ni David. Kalpasanna, imbaga ni Natan ti impakpakauna ni Jehova a mapasamakto iti pamilia ni David. Adu a problema ken riribuk ti mapasaranda iti adu a tawen. Ania ti aramiden ni David?

Kinuna ti ari: “Nakabasolak ken Jehova.” Naladingitan unay ni David ken talaga nga agbabbabawi. Sigurado a naragsakan ni Natan a mangibaga ken David a kaasian isuna ni Jehova. Imbaga ni Natan: “Pakawanen ni Jehova ti basolmo. Saanka a matay.” Nupay kasta, inapit latta ni David dagiti dakes nga epekto ti pannakikamalalana ken Bat-sheba. Natay ti ubing a bunga ti panagbasolda. Ken iti adu a tawen, napasaran ti pamilia ni David ti kinaranggas, panangtraidor, ken dadduma pay a problema.

Iti laksid amin dagita, nagtalinaed a matalek ni David. Inwanwan ti Dios a mangisurat kadagiti makatukay a salmo maipapan iti panagbabawi ken panangpakawan ti Dios. (Salmo 32 ken 51) Naisublina ti nadekket a relasionna ken Jehova, ken intultuloyna a sinurot dagiti balakad ni Natan bayat a sibibiag. Natay ni David kas matalek nga adipen ni Jehova. (1 Ar. 9:4) Sigurado a naragsakan ni Natan gapu ta nakaurnong iti tured a mangbalakad iti nakabasol nga ari.

Basaem ti salaysay ti Biblia:

• 2 Samuel 11:1–12:18

Pagsasaritaan:

Kasano nga impakita ni Natan ti kinatured?

Agkalika Pay

1. 1. Nupay mannurat iti Biblia ni Natan, awan ti ammotayo maipapan iti pamiliana wenno iti personal a biagna. Ania ti ipakita dayta maipapan kenkuana? (w12 2/15 25 ¶2-3)

   Ti sungbatmo

2. 2. Maysa a Heteo ni Urias. Apay ngarud a nagbalin a soldado ni David? (w24.04 31)

   Ti sungbatmo

3. 3. Impadto ni Natan a makapasar ti sangakabbalayan ni David iti adu a problema ken riribuk. Kasano a natungpal dayta a padto? (it “David” ¶29)

   Ti sungbatmo

4. 4. Kasano nga impakita ni Natan ti kinatured kadagiti maudi a tawtawen ti panagturay ni David? (w12 2/15 25 ¶1) A

   Ti sungbatmo

   

Panunotem Dagiti Leksion

• Ania ti masursurotayo iti inaramid ni Natan maipapan iti panangtulong iti maysa a gayyem a nakaaramid iti nadagsen a basol?

  Ti sungbatmo

• Kasanotayo a matulad ti inaramid ni Natan no kayattayo a danonen ti puso ti maysa a tao? B

  Ti sungbatmo

  

• Ania ti dadduma pay a pamay-an a matuladmo ti kinatured ni Natan?

  Ti sungbatmo

Utobem ti Napatpateg a Banag

• Ania ti isuro kaniak daytoy a salaysay maipapan ken Jehova?

  Ti sungbatmo

• Kasano a konektado daytoy a salaysay kadagiti panggep ni Jehova?

  Ti sungbatmo

• Ania ti isaludsodko ken Natan inton mapagungar?

  Ti sungbatmo

Ammuem ti Ad-adu Pay

Kasano a nasaktan ni David, dagiti gagayyemna, ti pamiliana, ken ni Jehova a Dios gapu kadagiti inaramidna?

Laglagipenyo No Kasano nga Agtignay ti Ayat—Saanna a Sapulen ti Bukodna a Pagimbagan (1:14)

Ammuem no apay a nakaep-epektibo ti balakad ni Natan.

“Sipapakumbaba nga Awaten ti Disiplina” (“Aktibidad Para iti Panagadal iti Biblia” a serye iti website)