27 MEFIBOSET
Saan a Nagimula iti Sakit ti Nakem
NI Mefiboset ket apoko ti nabileg nga ari a ni Saul ken anak ti natured ken matalek a lalaki a ni Jonatan. Ngem idi lima ti tawenna, adda dagiti napasamak a trahedia a nangbalbaliw iti biagna. Nasugatan ti apongna a ni Saul iti paggugubatan sa nagpakamatay. Napapatay met ti amana a ni Jonatan iti dayta met laeng a gubat. Idi nadamag dayta ti mangaw-awir ken Mefiboset, binagkatna ti ubing sa intarayna nga impanaw ta mabuteng a baka saktan met dagiti tattao ni Mefiboset. Ngem naibbatanna ti ubing isu a napilay ken marigatanen a magna.
Uray no nagrigat ti nagbalin a biag ni Mefiboset, saan a nagsakit ti nakemna ken kontento kadagiti adda kenkuana. Adda Israelita nga agnagan Makir a nangawis ken Mefiboset nga agyan iti balayna. Idi agangay, nalagip ni Ari David ti inkarina iti ipatpategna a gayyem a ni Jonatan nga aywananna ti asinoman a miembro ti sangakabbalayanna. (1 Sam. 20:14-17) Isu a pinaayaban ti ari ni Mefiboset.
Sigurado a mabutbuteng ni Mefiboset a mapan iti ari. Ngamin, isu ket apoko ti dakes nga ari a ni Saul. Napanunotna ngata a baka ipapatay met isuna ni David? Ngem uray no kasta ti napanunotna, nagtulnog ken napan iti ari. Mabalin a nasdaaw ni Mefiboset ta nasingpet ti pannakisarita kenkuana ni David. Insublina pay kenkuana ti sanikua ni apongna a Saul ken imbagana: “Kanayonkanto a makipangan kaniak iti lamisaanko.” Napalalo ti panagyaman ni Mefiboset. Nariknana a saan a maikari isu a dinamagna iti ari no apay a nagsayaat ti panangtratona iti kas kenkuana a nanumo a tao. Inkomparana pay ketdi ti bagina iti natay nga aso!
Malaksid a pilay manipud kinaubingna, natayan, natraidor, ken nakapasar met ni Mefiboset iti di kinahustisia
Idi agangay, adda manen saan a nasayaat a napasamak iti biag ni Mefiboset. Kayat a patayen ni Absalom ti amana a ni David tapno isu ti agbalin nga ari, isu a masapul a pumanaw ni David iti Jerusalem. Kimmuyog kenkuana ti adipen ni Mefiboset a ni Ziba. Ngem imbatina ti apona a ni Mefiboset. Uray kayat ni Mefiboset ti sumurot, saanna a kaya ta marigatan a magna. Ngem nangaramid latta iti pamay-an tapno maipakitana ti kinamatalekna ken David ken ti panagladingitna iti napasamak. Binaybay-anna nga umatiddog ti barbasna kas iti ar-aramiden idi ti maysa nga agladladingit. Saan a nagballigi ti panagrebelde ni Absalom isu a nagsubli met laeng ni David iti Jerusalem. Ngem nadismaya ni David ken Mefiboset. Apay?
Idi ngamin napan ni Ziba iti ayan ni David tapno mangitulod iti suplay, pinadakesna ni Mefiboset. Imbagana a traidor ni Mefiboset. Nagbati kano idiay Jerusalem gapu ta kayatna nga isu ti agbalin nga ari. Panunotenyo laengen ti narikna ni David. Nabiit pay a trinaidor ti mismo nga anakna ken uray ni Ahitofel a pagtaltalkanna a gayyem ken mamalbalakad. Isu a mabalin a namati ni David a kaya met a traidoren ni Mefiboset. Gapu iti dayta, imbilin ni David a maited ken Ziba dagiti daga a tinawid ni Mefiboset ken Ari Saul.
Idi naammuan ni Mefiboset ti panangpadakes kenkuana ni Ziba, napan iti ari tapno ibagana no ania a talaga ti napasamak. Dinamag ni David no apay a nagbati ni Mefiboset idiay Jerusalem. Imbaga ni Mefiboset ken David a saan a nakasurot gapu ta “pilay.” Imbagana met nga inggagara ni Ziba nga ibati isuna. Mabalin a nadlaw ni David nga agladladingit ni Mefiboset gapu ta dina pinutdan ti barbasna. Saan ngata nga ipakita dayta nga agladladingit ni Mefiboset gapu iti napasamak iti ari ken awan a talaga ti planona a mangtraidor kenkuana? Aniaman ti rason, masuron latta ni David iti napasamak ken saannan a kayat a mangngeg ti aniaman nga ibaga pay ni Mefiboset. Ken nupay binaliwanna ti umuna nga imbilinna, imbagana a pagbingayan da Mefiboset ken Ziba ti daga ni Saul.
Nagsakit kadi ti nakem ni Mefiboset gapu ta masapul nga ibingayanna ti adipenna a nangtraidor kenkuana? Saan. (Deut. 19:18, 19) Uray no saan a patas ti pannakatratona, saan a nagimula iti sakit ti nakem ken saanna a pinanunot a kakaasi isuna. Nakaturtured ketdi ta nagpokus iti napatpateg a banag—ti panangpakawan iti dadduma ken ti panangtaginayon iti talna.
Siaalumamay nga imbaga ni Mefiboset ken David: ‘Kukua latta aminen ni Ziba, apo ari, uray ta nakasublikayon a sitatalged iti palasioyo.’ Napatpateg iti daytoy napakumbaba a lalaki ti pagimbagan ti ari a pinili ni Jehova. Saanna nga impalubos nga agsakit ti nakemna gapu laeng iti pammadakes kenkuana wenno ti pannakapukaw ti sanikuana. Intultuloyna ketdi ti naragsak ken matalek a panagserbina iti Dios. Agpayso a saan a pulos a napadas ni Mefiboset ti makigubat, ngem impakitana a naturtured isuna ngem iti adu a mannakigubat!
Basaem ti salaysay ti Biblia:
Pagsasaritaan:
Kasano nga impakita ni Mefiboset ti kinatured?
Agkalika Pay
1. Sakbay a naipan ni Mefiboset ken David, nagyan iti “balay ni Makir.” Ania pay ti mangipakita a matalek ken managpadagus a lalaki ni Makir? (2 Sam. 9:3, 4; it “Maquir” Num. 2)
2. Apay nga inkompara ni Mefiboset ti bagina iti “natay nga aso”? (2 Sam. 9:8; it “Aso” ¶5) A
PhotoStock-Israel/Photodisc via Getty Images
Ladawan A: Maibilang a narugit dagiti aso iti nagkauna nga Israel
3. Apay nga imposible a tarigagayan ni Mefiboset ti agbalin nga ari? (w02 2/15 14 ¶11, ftn.) B
Ladawan B: Ania ti posible nga insuro ni Jonatan iti anakna maipapan iti pinili ni Jehova nga agbalin nga ari?
4. Kasano a binendisionan ni Jehova ni Mefiboset kalpasan dagiti pasamak a nadakamat iti daytoy a salaysay? (it “Mefiboset” Num. 2 ¶3)
Panunotem Dagiti Leksion
Adu dagiti makapaspasar iti depresion wenno dadduma pay a pakarigatan a mabalin a saan a naan-anay a maawatan dagiti kakabsat. Ania dagiti makaliwliwa a masursuroda ken Mefiboset?
Kalpasan a nangngeg ni David ti maysa laeng a dasig, dagus nga intedna ken Ziba ti sanikua ni Mefiboset. Ania ti pagdaksanna no dagus nga agdesisiontayo uray no saantayo nga ammo ti amin? C
Ladawan C
Kasanom a matulad ti kinatured ni Mefiboset?
Utobem ti Napatpateg a Banag
Ania ti isuro kaniak daytoy a salaysay maipapan ken Jehova?
Kasano a konektado daytoy a salaysay kadagiti panggep ni Jehova?
Ania ti isaludsodko ken Mefiboset inton mapagungar?
Ammuem ti Ad-adu Pay
Kitaentayo no kasanotayo a matulad ni Mefiboset no panagriknatayo ket saan a patas ti pannakatratotayo.
No Kasanoda a Nagmula ken Nagapit iti Kappia—Ni Mefiboset (3:25)
No marikna ti maysa nga ubing a maipuerpuera, kasano nga usaren dagiti nagannak ti salaysay maipapan ken ni Mefiboset tapno matulonganda isuna?