AGUR

Ti anak ni Jaque ken mannurat iti maika-30 a kapitulo ti libro ti Proverbio. (Pr 30:1) Awanen ti nadakamat a kanayonan nga impormasion a mangyam-ammo kenkuana. Nalabit nagbiag iti tiempo bayat ti periodo ti panagturay ni Solomon (1037-998 K.K.P.) agingga iti panagturay ni Ezekias (745-717 K.K.P.).

Imbilang ti dadduma a rabbiniko nga eskolar a ti nagan nga Agur ket mangiladawan laeng, nga agaplikar dayta ken Solomon. Gapuna, ti footnote iti Proverbio 30:1 iti Soncino Books of the Bible nagadaw iti Midrash a kunkunana: “Naawagan iti Agur gapu ta nagurnong (agar) iti pannakaammo ti Torah, ken iti anak ni Jaque gapu ta intuprana dayta (hikki) babaen ti saanna a panangikankano iti pakdaar maibusor iti panagpaadu iti asawa.” (Inurnos ni A. Cohen, London, 1952) Nupay kasta, uray dagiti Judio a komentarista saanda a nagkaykaysa iti daytoy a panangmatmat, ta adu kadakuada ti mamati a ti panagbalbaliw ti estilo, pagsasao, ken linaon ti libro ipasimudaagna a sabali ti nagsurat.