SARMING

Napaglalaok a naisangsangayan a darat (silica) nga aglaon iti dadduma pay nga elemento a kas iti boron, phosphorus, ken buli. Sangsangkamaysa a matunaw dagitoy a sangkap iti temperatura nga agarup 1650°C. (3000°F.). No bimmaawen ti kaar-aramid a sarming, saanen a krimmistal no di ket napalanas, nakatangtangken, ken nalaka a mabuong. Ti pudot nga agtaud iti bulkan ket makapataud iti maysa a kita ti sarming a maawagan iti obsidian, ket no makimat ti darat, adda dagiti gundaway nga agtitipon dagitoy sa agbalinda nga atitiddog ken nakukuttong a tubo a sarming a pagaammo kas fulgurite.

Adda nasarakan a sarming a batbatek idiay Egipto a patien dagiti arkeologo a naaramid dagita agarup 4,000 a tawenen ti napalabas, agarup idi tiempo a nayanak ni Abraham. Ni Job, a nagbiag idi maika-17 a siglo sakbay ti Kadawyan a Panawen, dinakamatna ti kinapateg ti sarming agraman ti balitok idi kinunana: “Ti balitok ken sarming saan a maipadis iti [sirib].”​—Job 28:17.

Idi inladawan ni apostol Juan dagiti sirmatana, dinakamatna ti “nalitnaw a sarming” ken ti “aganninaw a sarming” (Apo 21:18, 21); kasta met ti “maysa a simmarming a baybay nga umasping iti kristal.”​—Apo 4:6.