JOB

[Puntiria ti Panangbusor].

Maysa a lalaki nga agnanaed idiay daga ti Uz, iti maysa a lugar a paset ita ti Arabia. (Job 1:1) Kinuna ti Dios maipapan ken Job: “Awan asinoman a kas kenkuana iti daga, maysa a lalaki nga awan pakababalawanna ken nalinteg, agbuteng iti Dios ken sumiasi iti dakes.” (Job 1:8) Ipasimudaag daytoy a nagnaed ni Job idiay Uz kadagidi panawen a maad-adipen idiay daga ti Egipto dagiti adayo a kasinsinna, ti 12 a tribu ti Israel. Natay idin ni Jose nga anak ni Jacob (Israel) (1657 K.K.P.) kalpasan ti panangibturna iti adu a di nainkalintegan a panagsagaba ngem nataginayonna ti kinaawan pakababalawanna ken Jehova a Dios. Saan pay idi a timmanor ni Moises kas mammadto ni Jehova tapno idauluanna ti 12 a tribu ti Israel a rummuar manipud panangadipen ti Egipto. Iti tiempo a nagbaetan ti ipapatay ni Jose agingga idi a ni Moises impakitana babaen ti aramidna nga awan pakababalawanna ken nalinteg, awan idi ti asinoman a tao a natarnaw a kas ken Job. Nalabit bayat daytoy a periodo a napasamak ti panagsarita da Jehova ken Satanas maipapan ken Job.​—Job 1:6-12; 2:1-7.

Gagangay a ni Moises ti maikunkuna a nangisurat iti salaysay dagiti kapadasan ni Job. Mabalin a naammuanna ti maipapan ken Job idi binusbosna ti 40 a tawen idiay Midian ken mabalin nga idi a ti Israel ket asidegen iti Uz idi agngudon ti panagdaliasatda iti let-ang nangngeg ni Moises ti nagbanagan ken ipapatay ni Job. No nalpas ni Moises nga insurat ti libro ti Job idi dandanin sumrek ti Israel iti Naikari a Daga idi 1473 K.K.P. (nalabit di nagbayag kalpasan ti ipapatay ni Job), kayat a sawen daytoy a ti panawen a pannakasuot ni Job ket idi agarup 1613 K.K.P., ta nagbiag ni Job iti 140 a tawen kalpasan ti pannakasuotna.​—Job 42:16, 17.

Ni Job ket kabagian ni Abraham, gapu ta agpadada a kaputotan ni Sem. Nupay saan nga Israelita, ni Job ket managdaydayaw ken Jehova. Isu idi “ti kadakkelan kadagiti amin a taga Daya,” addaan iti dakkel a kinabaknang. Ti mangbukel iti pamiliana ket ti asawana, ti pito nga annakna a lallaki, ken ti tallo nga annakna a babbai. (Job 1:1-3) Simamatalek a nagannong a kas padi maipaay iti pamiliana, a nagidatdaton kadagiti sakripisio iti Dios maigapu kadakuada.​—Job 1:4, 5.

Mabigbigbig idi ni Job iti ruangan ti siudad ken pagraraeman pay ketdi dagiti lallakay ken piprinsipe. (Job 29:5-11) Nagtugaw kas ukom a saan a mangidumduma, a mangipakpakat iti kinahustisia kas manangirupir iti kalintegan ti balo a babai, ket kasla maysa nga ama iti ubing nga awan amana, kadagiti naparigatan, ken kadagidiay awanan katulongan. (Job 29:12-17) Nataginayonna ti bagina a nadalus no mainaig iti imoralidad, naagum a materialismo, ken idolatria, ken naparabur kadagiti napanglaw ken marigrigat.​—Job 31:9-28.

Ti Kinatarnaw ni Job. Ti kinatarnaw ni Job iti Dios ket kinuestion ni Satanas. Yantangay adda panagtalek ni Jehova iti dayta a kinatarnaw ken pagaammona a maisublina ti kasasaad ni Job ken gunggonaanna, pinalubosanna ni Satanas a mangaramid iti amin a kabaelanna a mangsubok iti kinatarnaw ni Job, ngem saanna a pinalubosan ni Satanas a patayenna ni Job. Nupay iti nadumaduma a pamay-an, immuna nga inkisap ni Satanas dagiti dinguen ken adipen ni Job sa kalpasanna dagiti annakna (Job 1:13-19), saan a pulos inakusaran ni Job ti Dios iti kinamaag wenno dakes nga aramid. Saanna met a tinallikudan ti Dios, uray idi indagadag ti mismo nga asawana ken ti dadduma a tallikudannan ti Dios. (Job 1:20-22; 2:9, 10) Kinapudno ti sinaona maipapan iti Dios. (Job 42:8) Inawatna ti pannubngar iti ad-adda a panangipangpangrunana a mangideklara iti bagina a nalinteg ken saanna a panangalangon iti Dios (Job 32:2), ken binigbigna dagiti basolna iti Dios.​—Job 42:1-6.

Inayat ni Jehova ni Job. Idi nasuboken ti kinamatalek ni Job, isu ket pinagbalin ti Dios kas padi agpaay iti tallo a kakaduana a nakisupiat kenkuana, ken insubli ti Dios ti sigud a kasasaad ni Job. Naaddaan manen iti nagsayaat a pamilia (nalawag nga iti dati met laeng nga asawana) ket napamindua ti sigud a kinabaknangna idi. Amin a kakabagianna ken dati a katimtimpuyogna ket simmarungkarda kenkuana ken nangtedda iti sagsagut. (Job 42:7-15) Nakitana pay ti annakna ken ti appokona agingga iti maikapat a kaputotan.​—Job 42:16.

Babaen ken mammadto Ezequiel, ti Dios tinukoyna ni Job kas maysa nga ulidan iti kinalinteg. (Eze 14:14, 20) Ti siaanus a panagibturna iti panagsagaba ket naipaay kas pagwadan kadagiti Kristiano, ket natukoy ti naragsak a nagbanaganna kas mangitan-ok iti panagayat ken asi ni Jehova. (San 5:11) Ti salaysay ti kapadasanna a napno iti pannubok ket mangipaay iti dakkel a liwliwa ken bileg kadagiti Kristiano, ket adu a prinsipio iti Biblia ti naitampok ken naiparang iti libro a napanaganan iti naganna.