SEBA

1. Maysa kadagiti innem nga annak ni Cus.​—Ge 10:7, 8; 1Cr 1:9, 10.

2. Maysa a daga iti makindaya nga Africa. Iti Isaias 43:3, ti Seba ket nainaig iti Egipto ken Etiopia (Cus), a maited dayta kas subbot agpaay ken Jacob. Iti umasping a listaan iti Isaias 45:14, “dagiti Sabeo” ti agparang imbes a “Seba,” a mangipasimudaag a naawagan iti Sabeo dagiti umili ti Seba. Ipamatmat dagitoy a bersikulo a ti Seba ket kabeddeng wenno karaman iti Etiopia. Pasingkedan daytoy ni Josephus, nga agkuna a ti “Saba” ket tumukoy iti siudad ti Meroë nga adda iti Nilo ken iti dakkel a benneg (Isla ti Meroë) iti tengnga dagiti karayan Nilo, Asul a Nilo, ken Atbara. (Jewish Antiquities, II, 249 [x, 2]) Ti pannakatukoy dagitoy a Sabeo kas “natatayag a lallaki” (Isa 45:14) ket paneknekan ni Herodotus (III, 20), nga agkuna a dagiti Etiope ti “katatayagan ken kapupudawan kadagiti amin a tattao.”​—Kitaenyo ti CUS Num. 1 ken 2.

Ti Meroë ket nabayagen a napateg a lugar ti komersio. Karaman ti Seba ken Sheba kadagiti adayo a lugar a nadakamat iti Salmo 72 iti pannakadeskribir ti pagturayan ken impluensia daydiay dutokan ni Jehova kas Ari, nga adda sagut nga idatag ti ar-ari dagitoy a lugar.​—Sal 72:10; Joe 3:8.