SILOAM

[manipud Heb., kaipapananna ti “Naibaon; Naipatulod”].

Ban-aw idiay Jerusalem, a sadiay pinagdiram-os ni Jesu-Kristo ti maysa a bulsek a lalaki tapno makakita. (Jn 9:6, 7, 11) Bassit ti ammo maipapan iti daytoy a ban-aw no iti kaaddana iti daydi a tiempo, nupay iti gagangay nga ayanna, mabalbalin a ti Birket Silwan ti adda iti agdama, iti laeng abagatan a laud ti Siudad ni David. Nalabit daytoy met ti mapattapatta a disso ti “ban-aw” ni Ari Ezekias wenno pagurnongan ti danum a kumamang iti kalasugan nga inaramidna a pagayusan ti dandanum ti Gihon.​—2Ar 20:20; 2Cr 32:30.

Maipapan iti kitikit iti Siloam, kitaenyo ti EZEKIAS; kasta met ti LADAWAN, Tomo 1, p. 960.

Idi kaaldawan ti ministerio ni Jesus ditoy daga, nabatad a ti kaaduan pagaammoda a narpuog ti “torre ti Siloam,” a nangpapatay iti 18 a tattao. Naisingasing a daytoy a torre adda iti Pantok ti Ofel, ngem saan nga ammo ti aktual nga ayanna idiay Jerusalem.​—Lu 13:4.