Situtulok nga Ipastoranyo ti Arban ti Dios

“Ipastoranyo ti arban ti Dios nga adda iti aywanyo, saan a mapilpilit, no di ket situtulok.”​—1 PEDRO 5:2.

 1. Apay nga inanamaentayo nga ‘ipastoran [dagiti Kristiano a panglakayen] ti arban ti Dios a situtulok’?

SIAAYAT nga ipaspastoran ni Jehova ti ilina. (Salmo 23:1-4) Situtulok nga inted “ti naimbag a pastor,” ni Jesu-Kristo, ti perpekto a natauan a biagna maipaay kadagiti kimmarnero a tattao. (Juan 10:11-15) Gapuna, indagadag ni apostol Pedro kadagiti Kristiano a panglakayen nga ‘ipastoranda ti arban ti Dios a situtulok.’​—1 Pedro 5:2.

 2. Ania dagiti saludsod a nasken nga usigen maipanggep iti trabaho a panangipastor dagiti Kristiano a panglakayen?

² Ti kinatulok ket maysa a pakailasinan dagiti adipen ti Dios. (Salmo 110:3) Ngem saan laeng a ti kinatulok ti maysa a Kristiano a lalaki ti kasapulan tapno madutokan kas manangaywan, wenno katulongan a pastor. Siasino dagiti maikari nga agbalin a kakasta a pastor? Aniat’ ramanen ti panangipastorda? Kasanot’ kasayaatan a pannakaibanag dayta?

Panangaywan iti Sangakabbalayan

 3. Apay a maikunatayo a ti wagas a panangaywan ti maysa a Kristiano a lalaki iti pamiliana adda pakainaiganna iti no kualipikado met laeng nga agbalin a maysa a pastor iti kongregasion?

³ Sakbay a madutokan ti maysa iti “saad ti manangaywan,” masapul a masabetna dagiti Nainkasuratan a kualipikasion. (1 Timoteo 3:1-7; Tito 1:5-9) Kinuna ni apostol Pablo a ti manangaywan nasken a “maysa a mangituray iti balayna met laeng iti nasayaat a wagas, nga iturayanna dagiti annakna iti amin a kinatakneng.” Adda naimbag a rason para iti daytoy, ta kinuna ni Pablo: “No ti maysa a tao dina ammo ti mangurnos iti balayna met laeng, kasanonto ti panangaywanna iti kongregasion ti Dios?” (1 Timoteo 3:4, 5) Iti panangdutok kadagiti panglakayen kadagiti kongregasion iti isla ti Creta, nabalakadan ni Tito a sumapul iti “siasinoman a tao nga awan pakababalawanna, asawa ti maymaysa a babai, nga adda annakna a manamati, a saan a naidarum gapu iti kinadakes ket saanda a nasukir iti linteg.” (Tito 1:6) Wen, masapul a mausig ti wagas a panangaywan ti maysa a Kristiano a lalaki iti pamiliana iti panangikeddeng no maikari met laeng a mangibaklay iti nadagdagsen a rebbengen a mangipastor iti kongregasion.

 4. Mainayon iti pannakaadda ti regular a panagadal ti Biblia ken panagkararag, kasano a maipakita dagiti Kristiano a nagannak ti panagayatda iti pamiliada?

⁴ Saan laeng a ti panagkararag ken regular a panagadal iti Biblia a kadua ti pamiliada ti aramiden dagiti lallaki a mangaywan iti sangakabbalayanda iti nasayaat a wagas. Madadaanda a kanayon a tumulong kadagiti patpatgenda. Kadagidiay agbalin a nagannak, mangrugi daytoy iti aldaw a pannakaipasngay ti ubing. Ammo dagiti Kristiano a nagannak a no naing-inget ti panangsurotda iti nadiosan a rotina, nasapsapa a masanay ti anakda iti eskediulda para kadagiti Nakristianuan nga aktibidad iti inaldaw a panagbiag. Ti kasayaat ti panangaywan ti Kristiano nga ama kadagitoy a kasasaad iyanninawna dagiti kualipikasionna kas maysa a panglakayen.​—Efeso 5:15, 16; Filipos 3:16.

 5. Kasano a mapadakkel ti maysa a Kristiano nga ama dagiti annakna “iti disiplina ken pammagbaga ni Jehova”?

⁵ Iti panangaywan iti sangakabbalayanna, ipangag ti napasnek a Kristiano nga ama ti balakad ni Pablo: “Dikay ruroden dagiti annakyo, no di ket padakkelenyo ida iti disiplina ken pammagbaga ni Jehova.” (Efeso 6:4) Ti regular a panagadal iti Biblia a kadua ti pamilia, agpadpada ti asawa a babai ken dagiti annak, mangted kadagiti nasayaat a gundaway maipaay iti naayat a panangisuro. Iti kasta, makaawat dagiti annak iti “disiplina,” wenno panangidalan. Ti “pammagbaga” a maangay kadagita a gundaway tulonganna ti tunggal anak a makasursuro iti panangmatmat ni Jehova kadagiti bambanag. (Deuteronomio 4:9; 6:6, 7; Proverbio 3:11; 22:6) Iti daytoy makapabang-ar a naespirituan a panagtitipon, ti maseknan nga ama dumngeg a naimbag no agsasao dagiti annakna. Mangusar kadagiti naayat a saludsod a mangaon kadagiti napudno a balikas manipud kadakuada maipanggep kadagiti pakaseknan ken kaririknada. Saan a pagarupen ti ama nga ammona ti amin a linaon ti naganus a panunotda. Pudno unay, “ti sumungbat a di pay dumngeg nga umuna, kinamaag ken pakaibabainanna,” kuna ti Proverbio 18:13. Itatta, masarakan ti kaaduan a nagannak a naiduma unay dagiti kasasaad a pakaipasanguan dagiti annakda kadagidiay naglabasanda idi agtutuboda pay. Gapuna, ikagumaan ti maysa nga ama nga ammuen ti ramut ken dagiti detalye ti parikut sakbay nga ibagana no kasano a tamingen dayta.​—Idiligyo ti Santiago 1:19.

 6. Apay a rumbeng nga agkonsulta ti maysa a Kristiano nga ama iti Sao ti Dios no tultulonganna ti pamiliana?

⁶ Aniat’ sumaruno no naammuannan dagiti parikut, pakaringgoran, ken karirikna dagiti annakna? Ti ama a nasayaat ti panangaywanna agkonsulta kadagiti Kasuratan, a “naimbag a pakasursuruan, pakababalawan, pakatinggaran, pakadisiplinaan iti kinalinteg.” Isurona dagiti annakna no kasano nga ipakat dagiti naipaltiing a pammagbaga ti Biblia. Iti kastoy a wagas, agbalin dagiti agtutubo a “naan-anay a makabael, makabalan a nalaing iti tunggal aramid a nasayaat.”​—2 Timoteo 3:16, 17; Salmo 78:1-4.

 7. Ania nga ulidan ti ituyang koma dagiti Kristiano nga amma no maipapan iti panagkararag?

⁷ Maipasango dagiti nadiosan nga agtutubo kadagiti narikut a kasasaad mainaig kadagiti kaeskuelaanda a taga-lubong. Gapuna, kasano a maiwaksi dagiti Kristiano nga amma dagiti pakadanagan dagiti annakda? Ti maysa a pamay-an ket babaen ti regular a pannakikararag ken panangikararag kadakuada. No maipasango dagitoy nga agtutubo kadagiti makasuot a situasion, mabalin a tuladenda ti panagtalek dagiti dadakkelda iti Dios. Kinuna ti maysa a 13-años a balasitang, a nainterbio sakbay a nabautisaran kas simbolo ti dedikasionna iti Dios, nga isut’ rinabrabak ken inrurumen dagiti kaeskuelaanna. Idi indepensana ti naibatay-Biblia a pammatina iti kinasagrado ti dara, kinabil ken tinupraan dagiti dadduma nga agtutubo a babbai. (Aramid 15:28, 29) Nagibales kadi? Saan. “Inkarkararagko ken Jehova a tulongannak nga agtalinaed a natanang,” inlawlawagna. “Linagipko met ti imbilin dagiti dadakkelko iti panagadal ti pamiliami a diak makiap-apa.”​—2 Timoteo 2:24.

 8. Kasano a maaywanan ti maysa a panglakayen nga awan anakna ti sangakabbalayanna iti nasayaat a wagas?

⁸ Ti maysa a panglakayen nga awan anakna mabalin nga asikasuenna met a naimbag dagiti naespirituan ken material a kasapulan dagiti kabbalayna. Karaman iti daytoy ti asawana ken nalabit dagiti agsangsanggir a Kristiano a kakabagian a kabbalayna. (1 Timoteo 5:8) No kasta, ti panangaywan iti nasayaat a wagas ket maysa kadagiti kualipikasion a masapul a masabet ti maysa a lalaki a madutokan a mangibaklay iti annongen kas panglakayen ti kongregasion. Gapuna, kasano koma ti panangmatmat dagiti panglakayen kadagiti pagrebbenganda iti kongregasion?

Mangaywan “a Sireregta”

 9. Ania koma ti kababalin dagiti Kristiano a panglakayen kadagiti pagrebbenganda iti serbisio?

⁹ Idi umuna a siglo iti Kadawyan a Panawentayo, nagserbi ni apostol Pablo kas manangaywan iti sangakabbalayan ti Dios, ti kongregasion Kristiano iti panangidaulo ni Kristo. (Efeso 3:2, 7; 4:15) Gapuna, indagadag ni Pablo kadagiti kapammatianna idiay Roma: “Idinto nga addaantayo kadagiti sagut nga agduduma kas iti di kaikarian a kinamanangaasi a naited kadatayo, no pammadto, agipadtotayo koma kas iti rukod ti pammatitayo; no kinaministro, ipaaytayo dagiti bagbagitayo nga agministro; no manangisuro, mannursuro koma; no mammagbaga, mammagbaga koma; ti mangted, aramidenna koma iti naparabur a nakem; ti manangaywan, mangaywan koma a sireregta; ti mangngaasi, aramidenna koma a sirarag-o.”​—Roma 12:6-8.

10. Iti panangaywan iti arban ti Dios, ania nga ulidan ti intuyang ni Pablo kadagiti panglakayen itatta?

¹⁰ Pinalagipan ni Pablo dagiti taga-Tesalonica: “Kas maysa nga ama kadagiti annakna, binagbagaanmi ti tunggal maysa kadakayo, ken liniwliwadakayo ken nangpampaneknek kadakayo, tapno itultuloyyo koma ti magna a maikari iti Dios a mangayab kadakayo iti pagarian ken dayagna.” (1 Tesalonica 1:1; 2:11, 12) Sidudungngo ken siaayat a naipaay ti pammagbaga, isut’ gapuna a naisurat ni Pablo: “Naemmakami iti tengngayo, kas iti ina nga agtagibi dungdungnguenna dagiti annakna met laeng. Ngarud, gapu iti nadungngo nga ayatmi kadakayo, naragsakankami unay a nangipaay kadakayo, saan laeng a ti naimbag a damag ti Dios, no di pay ket dagiti mismo a kararuami, ta nagbalinkayo a patgenmi unay.” (1 Tesalonica 2:7, 8) Maitunos iti ulidan ni Pablo a kas iti maysa nga ama, napalalo ti pannakaseknan dagiti nasungdo a panglakayen kadagiti amin nga adda iti kongregasion.

11. Kasano a maipakita dagiti nadutokan a panglakayen ti gagar?

¹¹ Masapul a mapakuyogan iti kinadungngo agraman kinagagar ti naayat a panangaywan dagiti matalek a Kristiano a papastortayo. Dakkel ti ipalnaad ti kababalinda. Balakadan ni Pedro dagiti panglakayen nga ipastoranda ti arban ti Dios a “saan a mapilpilit” wenno “gapu iti panagayat iti inaagum a gunggona.” (1 Pedro 5:2) Iti daytoy a punto, kastoy ti kinuna ni eskolar a William Barclay kas panamagannad: “Adda wagas a panangawat iti saad ken panagserbi a kas ket tay narigat wenno di makaay-ayo nga annongen dayta, a kas ket tay makapabannog, a kas ket tay makapadagsen, makaparurod. Mabalin a tungpalen ti maysa a tao ti maipaaramid kenkuana, ngem saan a naragsak ti panangaramidna, iti kasta awan mamaay ti aramidna. . . . Ngem imbaga [ni Pedro] a maragsakan koma ti tunggal Kristiano nga agserbi iti amin a kabaelanna, nupay mabigbigna a di maikari a mangaramid iti dayta.”

Dagiti Natulok a Papastor

12. Kasano a maiparangarang dagiti Kristiano a panglakayen ti kinatulok?

¹² “Ipastoranyo ti arban ti Dios nga adda iti aywanyo . . . [a] situtulok,” inggunamgunam ni Pedro. Ti maysa a Kristiano a manangaywan situtulok nga aywananna dagiti karnero, a sibubulos ti nakemna, iti panangidalan ti Naimbag a Pastor, ni Jesu-Kristo. Ti situtulok a panagserbi kaipapananna met a ti Kristiano a pastor agpasakop iti autoridad ni Jehova, ‘ti pastor ken manangaywan kadagiti kararuayo.’ (1 Pedro 2:25) Situtulok a raemen ti Kristiano a katulongan a pastor ti teokratiko nga urnos. Aramidenna dayta no iwardasna dagidiay makasapul iti balakad ti Sao ti Dios, ti Biblia. Nupay adu a naibatay-Biblia a balakad ti masursuro ti maysa a panglakayen manipud iti kapadasanna, di kayat a sawen daytoy a maaddaan a dagus iti Nainkasuratan a solusion iti tunggal parikut. Uray no ammona ti sungbat iti maysa a saludsod, nainsiriban no agkonsultada a dua iti agim-imtuod iti Watch Tower Publications Index wenno kadagiti umasping nga indise. Iti kasta makaisuro iti dua a wagas: Ipakpakitana no kasanot’ mangbiruk iti makatulong nga impormasion ken sipapakumbaba nga iparparangarangna ti panagraem ken Jehova babaen ti panangiturong ti atension iti impablaak ti organisasion ti Dios.

13. Aniada nga addang ti makatulong kadagiti panglakayen a mangipaay iti nasayaat a balakad?

¹³ Aniat’ aramiden ti maysa a panglakayen no awan naipablaak kadagiti literatura ti Sosiedad maipapan iti espesipiko a problema a tamtamingenna? Awan duadua, ikararagna ti kinasirib ken agsukisok iti sumagmamano a prinsipio ti Biblia nga agaplikar iti dayta a banag. Nasayaat met no isingasingna iti agpatpatulong nga usigenna ti ulidan ni Jesus. Mabalin nga isaludsod ti panglakayen: “No adda ni Jesus, ti Naindaklan a Mannursuro, iti kasasaadmo, aniat’ pagarupem nga aramidenna?” (1 Corinto 2:16) Makatulong ti kasta a panagrasrason iti agim-imtuod a mangaramid iti nainsiriban a pangngeddeng. Ngem anian a kinamaag no personal a kapanunotan laeng, a kas man la maysa dayta a Nainkasuratan a balakad, ti ipaay ti maysa a panglakayen! Imbes ketdi, mabalin a pagsasaritaan dagiti panglakayen dagiti narikut a problema. Mabalin met a pagsasaritaanda dagiti napateg a bambanag iti miting ti bagi dagiti panglakayen. (Proverbio 11:14) Dagiti magtenganda a desision tulonganna ida amin nga agsao a sangsangkatunos.​—1 Corinto 1:10.

Nasken ti Kinaemma

14, 15. Aniat’ maikalikagum kadagiti panglakayen no ilinlintegda ti maysa a Kristiano a ‘masukalan iti uray ania a panangsalungasing sakbay nga ammona’?

¹⁴ Kasapulan nga iparangarang ti maysa a Kristiano a panglakayen ti kinaemma no isursurona dagiti sabsabali, aglalo no balbalakadanna ida. “Kakabsat,” ibalakad ni Pablo, “no ti maysa a tao masukalan iti uray ania a panangsalungasing sakbay nga ammona, dakayo nga addaan naespirituan a kualipikasion ikagumaanyo a palintegen ti kasta a tao iti espiritu ti kinaemma.” (Galacia 6:1) Makapainteres ta ti Griego a sao ditoy a naipatarus a “palintegen” ket maysa a medikal a termino a nausar a mangdeskribir iti panangisimpa iti tulang tapno malapdan ti tungpal-biag a pannakabaldado. Sigun ken leksikograpo a W. E. Vine, tumukoy daytoy iti pannakaisubli “ti maysa a tao a nakabasol, nga arignat’ nablo a kameng ti naespirituan a bagi, babaen dagidiay naespirituan.” Naipatarus met daytoy iti, “isubli iti umiso a posision; ikabil iti umiso a pannakailinia.”

¹⁵ Saan a nalaka nga ilinteg ti panagpampanunot ti maysa a tao, ket mabalin a narigat unay nga isimpa ti pampanunot ti tao nga agbasbasol. Ngem mabalin a siyayaman nga awatenna ti tulong a naipaay iti espiritu ti kinaemma. Gapuna, ipangag koma dagiti Kristiano a panglakayen ti balakad ni Pablo: “Agkaweskayo iti maysa a puso a naasi, kinaimbag ti nakem, kinapakumbaba, kinaemma, ken nabayag a panagitured.” (Colosas 3:12) Aniat’ aramiden dagiti panglakayen no saan a nasayaat ti kababalin ti maysa a tao a masapul a mailinteg? Nasken a “surotenda . . . ti kinaemma.”​—1 Timoteo 6:11.

Panangipastor a Buyogen ti Panagannad

16, 17. Ania dagiti peggad a pagannadan koma dagiti panglakayen no balbalakadanda dagiti sabsabali?

¹⁶ Adda pay maadaltayo iti balakad ni Pablo idiay Galacia 6:1. Indagadagna kadagiti kualipikado iti naespirituan a lallaki: “Ikagumaanyo a palintegen ti [tao nga agbasbasol] iti espiritu ti kinaemma, a kitaem ti bagim, di la ket ta masulisogka met.” Dakes ti pagbanaganna no saan a maipangag dayta a balakad! Gapu iti naipadamag a pannakikamalala ti maysa a klero nga Anglicano iti dua a parokiano, kinuna ti The Times iti Londres a maysa daytoy a “kadawyan a pasamak: maysa a kas ama wenno kabsat a mammagbaga a natnag iti basol gapu iti panagtalek kenkuana daydiay tao a balbalakadanna.” Kalpasanna, dinakamat ti kolumnista ti nasao a damag ti imbaga ni Dr. Peter Rutter a “ti panaggiginnundaway dagiti pasiente ken dagiti lallaki a mammagbagada​—dagiti doktor, abogado, padi ken amo​—ket saanen a maikankano, nagbalinen a makadadael ken nakababain a saplit iti kagimongantayo a napanuynoy iti sekso.”

¹⁷ Ditay koma ipagarup a natalged ti ili ni Jehova kadagita a sulisog. Natnag iti imoralidad ti maysa a mararaem a panglakayen nga adu a tawenen a matalek nga agserserbi gapu iti panangbisbisitana iti maysa a kasado a kabsat a babai no agmaymaysa, kas paset ti panangipastorna. Nupay nagbabawi, napukaw daytoy a kabsat ti amin a pribilehiona iti serbisio. (1 Corinto 10:12) Kasano ngarud, a makaaramid dagiti nadutokan a panglakayen kadagiti panangipastor nga isasarungkar iti wagas a saanda a matnag iti sulisog? Kasanoda a makaiyurnos iti maysa a lugar a medio pribado, a sadiay mabalinda ti agkararag, ken agkonsulta iti Sao ti Dios ken kadagiti Nakristianuan a publikasion?

18. (a) Kasano a makatulong kadagiti panglakayen a lumiklik kadagiti mangikompromiso a situasion ti panangiyaplikar iti prinsipio ti kinaulo? (b) Aniada nga urnos ti mabalin nga aramiden iti panangaramid iti panangipastor nga isasarungkar iti maysa a kabsat a babai?

¹⁸ Rumbeng a panunoten dagiti panglakayen ti prinsipio ti kinaulo. (1 Corinto 11:3) No agpatulong ti maysa nga agtutubo, ikagumaanyo nga iraman dagiti dadakkelna iti panagsasarita no kasapulan. No agkiddaw ti kasado a kabsat a babai iti naespirituan a tulong, maipamuspusanyo kadi ti kaadda ni lakayna kabayatan iti isasarungkaryo? No ngay imposible daytoy wenno saan a manamati ni lakayna a naulpit kenkuana no dadduma? No kasta, mangaramidkayo kadagiti urnos a kas met laeng no sumarungkarkayo iti kabsat a balasang. Nainsiriban no dua a kakabsat a lallaki a kualipikado iti naespirituan ti bumisita iti kabsat a babai. No saan a maaramidan daytoy, mabalin a mangpilikayo iti maitutop a panawen a pannakisarita kenkuana ti dua a kakabsat a lallaki idiay Kingdom Hall, no mabalbalin, iti maysa a siled a sadiay makapagsasaritada nga awan sabali a makangngeg. Gapu ta adda dagiti dadduma a kakabsat a lallaki ken babbai idiay Kingdom Hall, nupay saanda a makita ken mangngeg ti panagsasarita, mabalin a maliklikan ti aniaman a pakaitibkolan.​—Filipos 1:9, 10.

19. Ania dagiti nasayaat a resulta nga iyeg ti situtulok a panangipastor kadagiti karnero ti Dios, ket siasino ti pagyamanantayo gapu kadagiti natulok a papastor?

¹⁹ Ti situtulok a panangipastor kadagiti karnero ti Dios ket mangyeg kadagiti nasayaat a resulta​—maysa a natibker iti naespirituan, nasayaat-pannakaidalanna nga arban. Kas ken apostol Pablo, maseknan unay dagiti agdama-aldaw a Kristiano a panglakayen kadagiti kapammatianda. (2 Corinto 11:28) Nangnangruna a nadagsen ti rebbengen a mangipastor kadagiti tattao ti Dios kadagitoy napeggad a panawen. Gapuna, pudno nga agyamantayo iti nasayaat a trabaho nga ar-aramiden dagiti kakabsattayo nga agserserbi kas panglakayen. (1 Timoteo 5:17) Gapu iti panangparaburna kadatayo kadagiti “sagsagut kadagiti tattao” a situtulok a mangipaspastor, idaydayawtayo ti Manangted iti “tunggal nasayaat ken naan-anay a sagut,” ti naayat a nailangitan a Pastortayo, ni Jehova.​—Efeso 4:8; Santiago 1:17.

Kasanoyo a Sungbatan?

◻ Kasano a maaywanan ti maysa a lalaki ti sangakabbalayanna iti nasayaat a wagas?

◻ Ania dagiti galad a nasken nga ipakita dagiti Kristiano a panglakayen iti panangaywanda?

◻ Kasano a maipakita dagiti panglakayen ti kinapakumbaba ken kinaemma iti panangipaay ti balakad?

◻ Aniat’ makatulong tapno agbalin nga epektibo ti naespirituan a panangilinteg?

◻ Kasano a maliklikan dagiti panglakayen dagiti mangikompromiso a situasion no ipaspastoranda ti arban?

[Ladawan iti panid 18]

Nasken nga aywanan ti Kristiano a panglakayen ti sangakabbalayanna iti nasayaat a wagas

[Ladawan iti panid 21]

Ti Nakristianuan a panangipastor maaramid koma a buyogen ti kinaemma ken kinatakneng