Siaasi nga Ay-aywananda Dagiti Nanumo a Karnero

KADAGITI amin nga animal a nadekket iti tao, awan ti kas iti naamo a karnero. Addaan ti kaaduan nga animal iti pigsa ken naikasigudan a sirib a kasapulan iti panangsapul ti taraon ken panangliklik kadagiti parsua a mangranggas kadakuada, ngem naiduma ti karnero. Nalaka la a darupen dagiti narungsot nga ayup. Dina masalakniban ti bagina. No awan ti pastor, mabuteng ken awan gaway ti maysa a karnero. No sumina iti arban, nalaka la a maiwawa. Isut’ gapuna a nakadekdekket dagiti naamo a karnero iti pastorda. No awan isuna, agpeggad ti biagda. Gapu kadagitoy a kababalin, usaren ti Biblia dagiti karnero a mangiladawan kadagiti naamo, mairurrurumen, wenno awan gawayna a tattao.

Pudno la unay a maikari ti maysa a pastor nga umawat iti supapak. Saan a nalaka ti panagbiagna. Kakaasi a mapudpudotan, malamlammiisan, ken mapuypuyatan. Masapul a salaknibanna ti arban manipud kadagiti narungsot nga ayup, a masansan a mamagpeggad kenkuana a mismo. Yantangay masapul a saluadan ti maysa a pastor ti intero nga arban, adut’ panawen a busbosenna a mangbiruk kadagiti karnero a naiwawa wenno napukaw. Masapul nga agasanna dagiti masakit ken nadunor. Masapul a sakroyenna dagiti nakapsut wenno napaksuyan a kordero. Kanayon a yalaanna ida iti umdas nga abasto a taraon ken danum. Kadawyan iti maysa a pastor ti umian idiay tay-ak tapno masigurado ti kinatalged ti arban. Gapuna, ti panangaywan kadagiti karnero ket narigat. Sapulenna ti panagserbi ti maysa a lalaki a natured, nagaget, ken managparnuay. Kangrunaan iti amin, masapul nga ipakitana ti napaypayso a panangipateg iti arban a naipaaywan kenkuana.

Panangipastor iti Arban ti Dios

Iti Biblia, nailadawan dagiti tattao ti Dios kas naamo a karnero ket dagiti agay-aywan kadakuada kas papastor. Ni Jehova a mismo ‘ti pastor ken manangaywan ti kararuatayo.’ (1 Pedro 2:25) Inyebkas ni Jesu-Kristo, “ti naimbag a pastor,” ti tarigagayna nga umawat iti naasi a panangaywan dagiti karnero idi a kinunana ken apostol Pedro: ‘Pakanem dagiti korderok, ipaarabmo dagiti nanumo a karnerok, pakanem dagiti nanumo a karnerok.’ (Juan 10:11; 21:15-17) Siiinget a naibilin kadagiti Kristiano a manangaywan nga ‘ipastoranda ti kongregasion ti Dios.’ (Aramid 20:28) Ket kas naespirituan a papastor, masapul nga adda kadakuada dagiti kababalin ti maysa a naimbag a literal a pastor​—tured, kinagaget, kinamanagparnuay, ken, kangrunaanna, naimpusuan a pannakaseknan iti pagimbagan ti arban.

Idi kaaldawan ti mammadto ti Dios a ni Ezequiel, saan a tinungpal ti kaaduan a pastor a nadutokan a mangasikaso kadagiti kasapulan dagiti tattao ni Jehova idiay Israel dagiti rebbengenda. Nagsagaba iti kasta unay ti arban ti Dios. Tinallikudan ti kaaduan ti pudno a panagdaydayaw. (Ezequiel 34:1-10) Itatta, iladladawan dagiti klero ti Kakristianuan ti bagbagida kas papastor ti kunkunada a kongregasion Kristiano, ngem paneknekan ti masakit iti naespirituan a kasasaadna a kapadpada la unay dagiti klero dagiti dakes nga impostor a nangbaybay-a ken nangirurumen kadagiti tattao idi adda ni Jesus ditoy daga. Mayarig dagiti relihiuso a papangulo ti Kakristianuan iti “makitangtangdan a lalaki” nga “awan panangipategna kadagiti karnero.” (Juan 10:12, 13) Saanda a situtulok, makabael, wenno maikari a mangaywan iti arban ti Dios.

Dagiti Pastor a Pudpudno a Mangipateg

Intuyang ni Jesus ti perpekto nga ulidan agpaay kadagiti amin a mangaywan iti arban ni Jehova. Iti amin a banag, isut’ naayat, naasi, mannakipagrikna, ken mannakitulong kadagiti adalanna. Iti kabukbukodanna a nakem, binirukna dagidiay agkasapulan. Nupay kupado ken masansan a nabannog, madadaan a kanayon ni Jesus a dumngeg kadagiti parikutda ken mangparegta kadakuada. Ti sitatallugod a panangipaayna iti kararuana maipuon kadakuada ti kaindaklanan nga ebkas ti ayat.​—Juan 15:13.

Itatta, pagrebbengan dagiti amin a nadutokan a panglakayen ti kongregasion, kasta met dagiti ministerial nga adipen, nga aywanan ti arban. Gapuna, uray pay adda gundawayda a rumang-ay iti material iti sabali a pagilian, saan latta nga umadayo ti kaaduan kadagitoy a responsable a lallaki tapno saan a mabaybay-an dagiti kongregasion a makasapul iti tulong ken panangaywan. Gapu ta agbibiagtayo iti “napeggad a panawen a narigat a pakilangenan,” kasapulan ti arban ti pammaregta ken panangidalan. (2 Timoteo 3:1-5) Pudno nga agpeggad dagiti dadduma a mabiktima ni Satanas, a “kasla leon a ngumerngernger, nga agsapsapul iti alun-onenna.” (1 Pedro 5:8) Kadagitoy a panawen, nangnangruna a rebbeng dagiti Kristiano a papastor a ‘bagbagaan dagiti naringgor, liwliwaen dagiti malmalday a kararua, saranayen dagiti nakapuy.’ (1 Tesalonica 5:14) Nasken ti panagridam tapno malapdan ti isisina iti arban dagiti saan a natibker.​—1 Timoteo 4:1.

Kasano a maammuan ti pastor no kasapulan ti maysa a karnero ti tulong? Ti dadduma kadagiti nabatad a pagilasinan isu dagitoy: di itatabuno kadagiti Nakristianuan a panaggigimong, iregular a pannakipaset iti ministerio iti tay-ak, ken panangliklik iti nasinged a pannakikadua kadagiti sabsabali. Mabalin met a masirok dagiti pagkapuyan babaen ti panangpaliiw a naimbag iti kababalin dagiti karnero ken ti panagpapatangda. Mabalin nga adda pagannayasanda a mangbabalaw kadagiti sabsabali, a nalabit mangipasimudaag nga agipempempenda iti sakit ti nakem. Mabalin a dagiti materialistiko a gagaw-aten imbes a dagiti naespirituan a kalat ti kangrunaan a pagsasaritaanda. Ti kinaawan gagar, kinanegatibo, ken kinaawan rag-o nalabit kaipapananna a kimmapuy ti pammatida. Ti naladingit a langada mabalin nga ipamatmatna a parparigaten ida dagiti bumusbusor a kakabagian wenno gagayyem a taga-lubong. Iti pannakadlawna kadagitoy a pagilasinan, maikeddeng ti pastor no ania a kita ti tulong ti kasapulan.

Iti isasarungkarda iti maysa a kapammatian tapno tulonganda, masapul a sipapanunot dagiti Kristiano a papastor iti kangrunaan a panggepda. Dayta ket saan laeng a maysa a sosial nga ibibisita, a buklen ti panagpapatang maipapan kadagiti awan kaes-eskanna a banag. Ti panggep ni apostol Pablo iti isasarungkarna kadagiti kakabsatna isu ti ‘panangipaay kadakuada iti naespirituan a sagut tapno mapatibkerda ken tapno adda koma panagsisinnukat iti pammaregta.’ (Roma 1:11, 12) Tapno maaramidan daytoy, kasapulan ti nasakbay a panagsagana.

Umuna, amirisenyo ti indibidual, ken ikagumaanyo nga ammuen ti kasasaadna iti naespirituan. No nasiertoyon, panunotenyo no ania a kita ti panangidalan, pammaregta, wenno balakad ti kasayaatan kenkuana. Ti Sao ti Dios, ti Biblia, ti rumbeng a kangrunaan a gubuayan ti impormasion agsipud ta “nabileg” dayta. (Hebreo 4:12) Mabalinyo ti agkonsulta kadagiti artikulo iti magasin a Pagwanawanan ken Agriingkayo! a mangsaguday kadagiti espesipiko a kasapulan ti karnero a naipasango kadagiti naisalumina a parikut. Masarakan dagiti makaparagsak ken makapabang-ar a kapadasan iti Yearbook of Jehovah’s Witnesses. Ti panggep isu ti panangipaay iti naespirituan a banag a ‘pakapabilgan ti tao [a sarsarungkaranyo].’​—Roma 15:2.

Makapabileg a Panagipastor

Ammo ti maysa a pastor nga isu ti pangnamnamaan dagiti karnero iti pannalaknib ken panangaywan. Ti kadawyan a peggad isu ti pannakaiwawa, sakit, pannakapaksuy, pannakadunor, ken dagiti narungsot nga ayup. Umasping iti dayta, masapul a mailasin ken tamingen ti naespirituan a pastor ti kakasta a peggad a mangpeligro iti pagimbagan ti arban. Ti sumaganad isu dagiti sumagmamano a kadawyan a parikut ken singasing no aniat’ mabalin nga ibaga tapno makaipaay iti impormasion a makapabileg iti naespirituan.

(1) Kas kadagiti saan a naannad a karnero, dagiti dadduma a Kristiano mayadayoda iti arban ti Dios agsipud ta magargarida kadagiti kasla awan pagdaksanna ken makaay-ayo a pakaallukoyan. Mabalin a maibaligawgawda ken mayaw-awanda pay ketdi gapu iti panangragpatda kadagiti kalat a mainaig iti materialismo, panagaliwaksay, wenno panaglinglingay. (Hebreo 2:1) Mabalin nga ipalagip iti kakasta a tattao ti kinaganat ti panawen, ti pannakasapul iti panagtalinaed a nadekket iti organisasion ni Jehova, ken ti kinapateg ti panangiyun-una iti intereses ti Pagarian iti biag. (Mateo 6:25-33; Lucas 21:34-36; 1 Timoteo 6:8-10) Masarakan ti makatulong a balakad iti artikulo a “Taginayonenyo ti Kinatimbengyo​—Kasano?” iti Ti Pagwanawanan a Nobiembre 15, 1984, pinanid 8-11.

(2) Masapul nga agasan ti maysa a pastor ti masakit a karnero. Umasping iti dayta, masapul a tulongan dagiti naespirituan a papastor dagiti Kristiano a masakit iti naespirituan gapu kadagiti parikutda iti biag. (Santiago 5:14, 15) Mabalin nga awan trabahoda, adda nakaro a parikutda iti salun-at, wenno adda problemada iti uneg ti pamilia. Mabalin nga awan ganas ti kakasta a tattao iti naespirituan a taraon wenno iti pannakilangen kadagiti tattao ti Dios. Inton agangay, isinsinadan ti bagida ken maupaydan. Masapul a maipanamnama kadakuada a maseknan ni Jehova kadakuada ken saranayenna ida kadagiti panawen ti pakasuotan. (Salmo 55:22; Mateo 18:12-14; 2 Corinto 4:16-18; 1 Pedro 1:6, 7; 5:6, 7) Mabalin a makatulong met ti panangrepaso iti artikulo a “Matmatanyo ti Masanguanan Kas Maysa a Kristiano,” a masarakan iti Ti Pagwanawanan a Disiembre 1, 1980, pinanid 8-12.

(3) Masapul a siputan ti pastor ti karnero a napaksuyan. Simamatalek a nakapagibtur dagiti dadduma iti panagserbida ken Jehova iti adu a tawen. Adu a pannubok ken pakasuotan ti naglasatanda. Ita kasla maumadan nga agaramid iti naimbag ken nalabit pagduaduaanda payen ti pannakasapul iti napinget a panangasaba. Nasken a parayrayen ti espirituda, a pabaruen ti panangapresiarda iti rag-o ken bendision nga agtaud iti naimpusuan a panagserbi iti Dios kas panangtulad ken Jesu-Kristo. (Galacia 6:9, 10; Hebreo 12:1-3) Nalabit matulongan ida a makabigbig nga apresiaren ni Jehova ti nasungdo a panagserbida ken mapabilegda maipaay kadagiti masanguanan nga aktibidad iti pakaidayawanna. (Isaias 40:29, 30; Hebreo 6:10-12) Mabalin a makatulong ti panangisarsarita kadagiti punto iti artikulo a “Dikay Mabannog iti Panagaramid ti Naimbag,” nga agparang iti Ti Pagwanawanan a Hulio 15, 1988, pinanid 9-14.

(4) Kas kadagiti karnero a nadunor, mabalin a nasair dagiti dadduma a Kristiano iti ipagarupda a makapasakit a kababalin. Ngem no pakawanentayo dagiti sabsabali, pakawanennatayo met ti nailangitan nga Amatayo. (Colosas 3:12-14; 1 Pedro 4:8) Dagiti dadduma a kakabsat a lallaki wenno babbai mabalin a nabalakadan wenno nadisiplinada nga iti panagkunada ket di nainkalintegan. Nupay kasta, magunggonaantay amin iti naespirituan a balakad ken disiplina, ket makaliwliwa a maammuan a disiplinaen ni Jehova dagidiay ay-ayatenna. (Hebreo 12:4-11) Gapu ta saanda a naikkan kadagiti pribilehio iti serbisio a pagarupenda a pakaikarianda, impalubos dagiti dadduma ti sakit ti nakem a mangparnuay iti giwang iti nagbaetanda ken ti kongregasion. Ngem no umadayotayo iti organisasion ni Jehova, awanen ti mabalintay pay a papanan a pakaisalakanan ken pakagun-odan iti napaypayso a rag-o. (Idiligyo ti Juan 6:66-69.) Masarakan ti makatulong nga impormasion iti daytoy a banag iti artikulo a “Panangsalimetmet iti Nakristianuan a Panagkaykaysatayo,” iti Ti Pagwanawanan nga Agosto 15, 1988, pinanid 28-30.

(5) Masapul a masalakniban dagiti karnero manipud kadagiti narungsot nga ayup. Umarngi iti dayta, dagiti dadduma mabalin a busoren ken butbutngen dagiti di manamati a kakabagian wenno katrabahuan. Mabalin a masuot ti kinatarnawda no maipasidongda kadagiti panangriribuk a mangpakapsut iti panagserbida iti Dios wenno mangpasardeng iti pannakipasetda iti Nakristianuan a ministerio. Nupay kasta, mapapigsa ti nakemda no matulongan ida a makabigbig a mainanama ti ibubusor ket kinapudnona maysa dayta a pakakitaan a datayo ti pudpudno nga adalan ni Jesu-Kristo. (Mateo 5:11, 12; 10:32-39; 24:9; 2 Timoteo 3:12) Mabalin a makatulong ti panangiyunay-unay a no agtalinaedda a matalek, dinto baybay-an ida ni Jehova ken supapakannanto ti panagibturda. (2 Corinto 4:7-9; Santiago 1:2-4, 12; 1 Pedro 5:8-10) Mangipaay iti kanayonan a pammaregta ti artikulo a napauluan “Panagibtur a Siraragsak Nupay Maidaddadanes,” iti Ti Pagwanawanan nga Oktubre 15, 1982, pinanid 19-26.

Dakayo a Papastor​—Tungpalenyo ti Rebbengenyo

Adu ti kasapulan ti arban ti Dios, ket narigat a trabaho ti umiso a panangaywan. Masapul ngarud a mannakipagrikna, pudpudno a maseknan, ken mannakitulong dagiti Kristiano a papastor. Nasken ti kinaanus ken pannakaawat. Idinto ta kasapulan dagiti dadduma ti balakad ken pammagbaga, makatulong unay kadagiti sabsabali ti pammaregta. Mabalin nga umdas ti sumagmamano a personal nga isasarungkar iti dadduma a kasasaad, idinto ta mabalin a kasapulan dagiti sabsabali ti regular a panagadal iti Biblia. Iti aniaman a kasasaad, ti kangrunaan a panggep isu ti panangipaay iti makapabileg iti naespirituan a panangidalan wenno naayat a balakad a mangtignay iti maysa a mangirugi kadagiti nasayaat nga ugali iti panagadal, agbalin wenno agtalinaed a regular iti itatabuno kadagiti gimong ti kongregasion, ken siraragsak a makipaset iti Nakristianuan a ministerio. Dagitoy ti kangrunaan a wagas a panangsaranay kadagiti kapammatian ken panangtulong kadakuada a mangilukat iti dalan maipaay iti nawaya a panagayus ti nasantuan nga espiritu ni Jehova.

Dakkel ti maitultulong dagiti papastor a mangipapaay iti kasta a kita ti pannaranay iti arban ti Dios. (Kitaenyo ti Agriingkayo! nga Agosto 8, 1986, pinanid 23-7.) Apresiaren unay ti arban ti ar-aramiden dagiti naespirituan a papastor. Idi nakaawat iti kasta a tulong, kinuna ti maysa nga ulo ti pamilia: ‘Kalpasan ti 22 a tawen a kaaddami iti kinapudno, naallukoykami iti lubong babaen ti materialismo. Masansan a tarigagayanmi ti makigimong, ngem kanayon nga adda makalapped kadakami. Pudno a saankami a para iti sistema ni Satanas, isu a naan-anay a naipuera, naisinakami. Daytoy ti nangupay ken namagladingit kadakami. Kinasapulanmi ti pammaregta. Idi binisitanakami ti maysa a panglakayen, siraragsak nga immannugotkami a maaddaan iti panagadal iti Biblia iti pagtaenganmi. Ita nakasublikamin amin iti natalged nga organisasion ni Jehova. Diak mayebkas ti ragsakko!’

Makaparagsak unay no maisubli iti naespirituan ken agbalin manen nga aktibo dagiti nagtawataw wenno naupay a kakabsattayo a lallaki ken babbai. (Lucas 15:4-7) Matungpal ti panggep ni Jehova iti ilina no nagkaykaysada “a kasla maysa nga arban iti pagaponan.” (Mikias 2:12) Iti daytoy a natalged a lugar, ‘makasarakda ti inana a maipaay kadagiti kararuada’ iti tulong ti Naimbag a Pastor, ni Jesu-Kristo. (Mateo 11:28-30) Umaw-awat ti nagkaykaysa a sangalubongan nga arban iti panangidalan, liwliwa, ken pannalaknib agraman iti nawadwad a naespirituan a taraon.

Itatta, babaen daytoy a trabaho a panangipastor, siaayat a tungtungpalen ni Jehova ti inkarina idi ugma: “Sapulekto dagiti karnerok ken aywanakto ida. . . . Luk-atakto ida kadagiti amin a disso a nakaiwarasanda . . . Pakanekto ida iti nasayaat a pagpaaraban . . . Sapulekto daydiay napukaw, . . . ket bedbedakto daydiay nabungtol ket papigsaekto daydiay masakit.” (Ezequiel 34:11-16) Anian a makaliwliwa a maammuan a ni Jehova ti Pastortayo!​—Salmo 23:1-4.

Gapu kadagiti probision a naggapu iti Dios iti panangipastor iti arbanna, kas ad-adipen ni Jehova mabalintay ti makiraman iti karirikna ni David, a kunkunana: “Sitatalnaak nga agpadpada iti panagiddakto ken iti pannaturogko, ta sika, O Jehova, siksika laeng ti mangisaad kaniak iti kinatalged.” (Salmo 4:8) Wen, natalged dagiti tattao ni Jehova iti naayat a panangaywanna ken agyamanda ta siaasi nga ay-aywanan dagiti Kristiano a panglakayen dagiti nanumo a karnero.

[Picture Credit Line iti panid 20, 21]

Potter’s Complete Bible Encyclopedia