Dagiti Naimpadtuan nga Aldaw iti Daniel Ken ti Pammatitayo

“Naragsak ti aguray ken makagteng iti sangaribo tallo gasut ket tallopulo ket lima nga aldaw!”​—DANIEL 12:12.

 1. Apay nga adu ti saan a makasarak iti napaypayso a ragsak, ket iti ania a nainaig ti pudpudno a ragsak?

KAYAT ti tunggal maysa ti agbalin a naragsak. Nupay kasta, manmano ita ti naragsak. Apay? Ngamin, saan nga umiso ti lugar a pangbirukan ti kaaduan iti ragsak. Sapsapulenda ti ragsak kadagiti bambanag a kas iti edukasion, kinabaknang, karera, wenno pananggun-od iti pannakabalin. Nupay kasta, iti pangrugian ti Sermonna iti Bantay, innaig ni Jesus ti kinaragsak iti panagbalin ti maysa a sipapanunot iti naespirituan a kasapulanna, asi, kinadalus ti puso, ken kadagiti umasping a galad. (Mateo 5:3-10) Napaypayso ken manayon ti ragsak a nasao ni Jesus.

 2. Sigun iti padto, ania ti mangyeg iti ragsak iti panawen ti panungpalan, ket ania dagiti saludsod a rumsua maipanggep itoy?

² Kadagiti napulotan a natda iti panawen ti panungpalan, adda kanayonan a panggapuanda nga agragsak. Iti libro a Daniel, mabasatayo: “Inka, Daniel, ta dagiti sasao mailimedda ken matimbrean agingga iti panawen ti panungpalan. Naragsak ti aguray ken makagteng iti sangaribo tallo gasut ket tallopulo ket lima nga aldaw!” (Daniel 12:9, 12) Ania a panawen ti masaklawan dagitoy 1,335 nga aldaw? Apay a naragsak dagidiay nagbiag iti las-ud dagitoy nga aldaw? Adda kadi pakainaigan daytoy iti pammatitayo itatta? Matulongantayo a mangsungbat kadagitoy a saludsod no taliawentayo ti panawen idi nga insurat ni Daniel dagitoy a sao, di nagbayag kalpasan ti pannakawayawaya ti Israel manipud pannakakayaw idiay Babilonia ken iti maikatlo a tawen a panagturay ni Ciro nga Ari ti Persia.​—Daniel 10:1.

Ti Pannakaisubli Mangyeg iti Ragsak

 3. Ania a tignay ni Ari Ciro ti nangyeg iti dakkel a ragsak kadagiti matalek a Judio idi 537 K.K.P, ngem ania a gundaway ti impaidam ni Ciro kadagiti Judio?

³ Kadagiti Judio, ti pannakawayawayada manipud Babilonia pudno a nangyeg iti ragsak. Kalpasan nga inibturan dagiti Judio ti agarup 70 a tawen a pannakakayaw, inyawis ni Ciro a Dakkel nga agsublida idiay Jerusalem tapno bangonenda manen ti templo ni Jehova. (Esdras 1:1, 2) Nagrubbuat dagidiay nangipangag a buyogen ti dakkel nga inanama, ket dimtengda iti ilida idi 537 K.K.P. Nupay kasta, saan nga inyawis ni Ciro ti panangipasdekda manen iti maysa a pagarian iti babaen ti kaputotan ni Ari David.

 4, 5. (a) Kaano a narpuog ti pagarian ni David? Apay? (b) Ania a pammatalged ti inted ni Jehova a maipasdekto manen ti pagarian ni David?

⁴ Adda kaipapanan dayta. Agarup lima a siglo sakbayna, inkari ni Jehova ken ni David: “Mapatalgedanto ti balaymo ken ti pagariam iti agnanayon iti sanguanam; ti tronom mapasingkedanto nga agnanayon.” (2 Samuel 7:16) Nakalkaldaang ta simmukir ti kaaduan nga ari a kaputotan ni David, ket kasta unay ti kaadu ti dara a sungsungbatan ti nasion ta idi 607 K.K.P., impalubos ni Jehova a marpuog ti pagarian ni David. Malaksid pay iti ababa a panawen a panangsakup dagiti Macabeo, adda ti Jerusalem iti babaen ti ganggannaet a turay nanipud iti daydi a tawen agingga iti maikadua a pannakadadael daytoy idi 70 K.P. Gapuna, idi 537 K.K.P., madama a matungtungpal “dagiti naituding a panawen dagiti nasion,” a bayat dayta awan ti anak ni David a nagturay a kas ari.​—Lucas 21:24.

⁵ Nupay kasta, saan a linipatan ni Jehova ti karina ken David. Babaen dagiti nagsasaganad a sirmata ken tagtagainep, impalgakna babaen ken mammadtona a Daniel dagiti detalye dagiti masanguanan a pasamak iti lubong iti las-ud ti adu a siglo manipud iti panawen a panangituray ti Babilonia iti lubong agingga iti panawen nga agturay manen ti ari a nagtaud iti kapuonan ni David iti pagarian ti ili ni Jehova. Dagitoy a padto, a nailanad idiay Daniel kapitulo 2, 7, 8, ken Da 10-12, impanamnamada kadagiti matalek a Judio nga iti kamaudiananna, ti trono ni David pudpudno a “mapasingkedanto nga agnanayon.” Wen, ti pannakaipalgak dayta a kinapudno nangyeg iti ragsak kadagiti Judio a nagsubli iti ilida idi 537 K.K.P.!

 6. Kasanotay nga ammo a natungpal iti kaaldawantayo ti dadduma kadagiti padto ni Daniel?

⁶ Kuna ti kaaduan a komentarista ti Biblia a natungpal ti dandani amin a padto ni Daniel sakbay ti pannakayanak ni Jesu-Kristo. Ngem nalawag a saan a kasta. Idiay Daniel 12:4, kinuna ti anghel ken ni Daniel: “Punitam dagiti sao ket timbream ti libro, agingga iti panawen ti panungpalan. Adunto ti mapan ken agsubli, ket ti pudno a pannakaammo umadunto.” Idinto ta sa laeng maluktan ti libro a Daniel​—a maipalgak a naan-anay ti kaipapananna​—iti panawen ti panungpalan, awan duadua nga iti dayta a panawen a matungpal ti dadduma kadagiti padto daytoy.​—Kitaenyo ti Daniel 2:28; 8:17; 10:14.

 7. (a) Kaano a naggibus dagiti naituding a panawen dagiti nasion, ket ania a napateg a saludsod ti masapul a masungbatan? (b) Siasino dagiti saan a “matalek ken naannad nga adipen”?

⁷ Idi 1914, naggibus dagiti naituding a panawen dagiti nasion, ket nangrugi ti panawen ti panungpalan daytoy a lubong. Naipasdek manen ti Pagarian ni David, saan nga iti naindagaan a Jerusalem, no di ket “kadagiti ulep ti langlangit” a di makita. (Daniel 7:13, 14) Iti daydi a tiempo, gapu iti irarang-ay “dagiti zizania” ti sinsinan a Kinakristiano, saan a nalawag ti kasasaad ti pudno a Kinakristiano​—iti panagkita ti tao. Nupay kasta, masapul a masungbatan ti maysa a napateg a saludsod: “Siasino a talaga ti matalek ken naannad nga adipen?” (Mateo 13:24-30; 24:45) Siasino ti mangibagi ditoy daga iti naipasdek manen a Pagarian ni David? Saan a dagiti nainlasagan a kakabsat ni Daniel, dagiti Judio. Nailaksiddan gapu ta awan pammatida ken naitibkolda iti Mesias. (Roma 9:31-33) Saan a pulos a masarakan ti matalek nga adipen kadagiti organisasion ti Kakristianuan! Paneknekan dagiti dakes nga aramidda a saan nga am-ammo ni Jesus ida. (Mateo 7:21-23) Siasino ngarud daytoy?

 8. Siasino ti napaneknekan a “matalek ken naannad nga adipen” iti panawen ti panungpalan? Kasanotay nga ammo?

⁸ Awan duadua nga isu ti bassit a bunggoy dagiti napulotan a kakabsat ni Jesus nga idi 1914 pagaammo kas dagiti Estudiante ti Biblia ngem nanipud idi 1931 maaw-awagandan kas Saksi ni Jehova. (Isaias 43:10) Isuda laeng ti mangiwarwaragawag ti naipasdek manen a Pagarian iti kapuonan ni David. (Mateo 24:14) Isuda laeng ti nagtalinaed a naisina iti lubong ken mangitantan-ok iti nagan ni Jehova. (Juan 17:6, 14) Ken isuda laeng ti nakatungpalan dagiti padto ti Biblia mainaig iti ili ti Dios iti maudi nga al-aldaw. Karaman kadagitoy a padto dagiti agsasaganad a naimpadtuan a panawen a nailanad iti Daniel kapitulo 12 a pakairamanan ti 1,335 nga aldaw a mangyeg iti ragsak.

Ti 1,260 nga Aldaw

 9, 10. Ania dagiti pasamak a naaramid iti uneg ti “maysa a panawen, ken pampanawen ken guddua ti maysa a panawen” ti Daniel 7:25, ket aniada pay a kasuratan ti nangdakamat iti isu met laeng a panawen?

⁹ Idiay Daniel 12:7, mabasatayo ti maipapan iti umuna a naimpadtuan a panawen: “Maipaayto iti maysa a naituding a panawen, naituding a pampanawen ken maysa a kagudua. Ket inton agpatinggan ti pannakaburakburak ti pannakabalin ti nasantuan nga ili, malpasto aminen dagitoy a bambanag.”a Daytoy a panawen ket nadakamat idiay Apocalipsis 11:3-6, nga agkuna a dagiti saksi ti Dios mangasabada a nakakawes iti nakersang a lupot iti tallo ket kagudua a tawen ket kalpasanna mapapatayda. Maminsan pay, idiay Daniel 7:25, mabasatayo: “Isu agbalikasto kadagiti sasao a maibusor iti Kangatuan, ket riribukennanto dagiti sasanto ti Kangatuan. Ket panunotennanto a balbaliwan dagiti panawen ken linteg, ket maiyawatdanto iti imana iti uneg ti maysa a panawen, ken pampanawen ken guddua ti maysa a panawen.”

¹⁰ Iti daytoy naud-udi a padto, ti “isu” tuktukoyenna ti maikalima a pannakabalin ti lubong manipud Babilonia. Isu dayta ti “maysa a bassit a sara,” a bayat ti panagturayna awaten ti Anak ti tao ti “panagturay ken dayag ken pagarian.” (Daniel 7:8, 14) Daytoy simboliko a sara, nga idi damo itakderanna ti imperio ti Britania, isu ti nagsugpon nga Anglo-Americano a pannakabalin ti lubong a timmaud bayat ti umuna a gubat sangalubongan, nga ipanguluan ita ti Estados Unidos. Iti tallo ket kagudua a panawen, wenno tawen, riniribuk daytoy a pannakabalin dagiti sasanto ket pinadasna a balbaliwan dagiti panawen ken linteg. Kamaudiananna, nayawat dagiti sasanto iti imana.​—Kitaenyo met ti Apocalipsis 13:5, 7.

11, 12. Ania dagiti pasamak a nangiturong iti panangrugi ti 1,260 a naimpadtuan nga aldaw?

¹¹ Kasano a natungpal dagitoy nga agpapada a padto? Iti sumagmamano a tawen sakbay ti Gubat Sangalubongan I, impakdaar dagiti napulotan a kakabsat ni Jesus iti publiko nga aggibus dagiti naituding a panawen dagiti nasion iti 1914. Idi bimtak ti gubat, nalawag a saan a naikaskaso ti pakdaar. Inusar ni Satanas ti “atap nga animal[na],” ti sangalubongan a napolitikaan nga organisasion nga impanguluan ti Imperio ti Britania, iti panangikagumaanna a “balbaliwan dagiti panawen ken linteg,” tapno maitantan ti panawen a panagturay ti Pagarian ti Dios. (Apocalipsis 13:1, 2) Napaay ni Satanas. Naipasdek ti Pagarian ti Dios idiay langit, a saan a madanon ti tao.​—Apocalipsis 12:1-3.

¹² Kadagiti Estudiante ti Biblia, ti gubat kaipapananna ti panawen ti suot. Sipud pay idi Enero 1914 nga impabpabuyada ti Photo-Drama of Creation, maysa a Biblikal a presentasion a nangiturong iti atension kadagiti padto ni Daniel. Iti kalgaw dayta a tawen iti Makin-amianan a Hemispero, bimtak ti gubat. Iti Oktubre, naggibus dagiti naituding a panawen. Iti ngudo dayta a tawen, sinegseggaan dagiti napulotan a natda ti pannakaidadanes, kas makita iti kinapudno a ti teksto ti tawen a napili para iti 1915 isu ti saludsod ni Jesus kadagiti adalanna, “Kabaelanyo aya ti uminum iti kopak?” a naibatay iti Mateo 20:22, iti King James Version.

13. Kasano a nangasaba dagiti Estudiante ti Biblia a nakakawes iti nakersang a lupot bayat ti 1,260 nga aldaw, ket ania ti napasamak iti ngudo dayta a panawen?

¹³ Gapuna, sipud idi Disiembre 1914, ‘nangasaba a nakakawes iti nakersang a lupot’ daytoy a bassit a bunggoy dagiti saksi, a sipapakumbaba a nagibturda bayat ti panangiwaragawagda kadagiti panangukom ni Jehova. Idi 1916, natay ni C. T. Russell, ti immuna a presidente ti Watch Tower Bible and Tract Society, a nakakellaatan ti adu. Bayat ti panagsaknap ti gubat, naipasangoda iti nakaro nga ibubusor. Naibalud dagiti dadduma. Tinutuok dagiti sadista nga agtuturay da Frank Platt idiay Inglaterra ken ni Robert Clegg idiay Canada. Kamaudiananna, idi Hunio 21, 1918, nakedngan a mabalud iti napaut maibatay kadagiti ulbod a darum ni J. F. Rutherford, ti baro a presidente, agraman dagiti direktor ti Watch Tower Bible and Tract Society. Iti kasta, iti ngudo ti naimpadtuan a panawen, pinasardeng a naan-anay ti “bassit a sara” ti organisado a publiko a panangasaba.​—Daniel 7:8, King James Version.

14. Kasano a nagbalbaliw dagiti bambanag para kadagiti napulotan a natda idi 1919 ken kalpasanna?

¹⁴ Naipadto iti libro nga Apocalipsis ti simmaruno a napasamak. Kalpasan ti apagbiit a pannakaisardeng ti trabaho​—naipadto kas tallo ket kagudua nga aldaw a pannakaiwalang dagiti bangkayda iti kalsada​—nagbiag dagiti napulotan a natda ket aktiboda manen. (Apocalipsis 11:11-13) Idi Marso 26, 1919, nawayawayaan ti presidente ken dagiti direktor ti Watch Tower Bible and Tract Society, ket idi agangay naan-anay a naabsueltoda manipud kadagiti ulbod a darum. Apaman a naluk-atanda, inrusat manen dagiti napulotan a natda ti trabahoda. Iti kasta, kas kaitungpalan ti umuna nga ay ti Apocalipsis, rimmuarda iti mangliwengliweng a kinainaktibo kas naespirituan a dudon a napakuyogan iti napuskol nga asuk, a mangipakpakdaar iti nasipnget a masakbayan ti ulbod a relihion. (Apocalipsis 9:1-11) Bayat ti simmaruno a sumagmamano a tawen, nataripatoda iti naespirituan ket nakasaganada iti adda nga agur-uray kadakuada. Idi 1921 impablaakda ti baro a libro a The Harp of God, a nairanta a tumulong kadagiti kabbaro ken kadagiti ubbing a makasursuro kadagiti pamunganayan a kinapudno iti Biblia. (Apocalipsis 12:6, 14) Napasamak amin dagitoy bayat ti sabali pay a napateg a panawen.

Ti 1,290 nga Aldaw

15. Kasano a mabalintay a kuentaen ti panangrugi ti 1,290 nga aldaw? Kaano a naggibus daytoy a panawen?

¹⁵ Kinuna ti anghel ken ni Daniel: “Manipud iti panawen a pannakaikkat ti di agsarday a daton [“agtultuloy a daton,” footnote] ken ti makarimon a banag a mamagwalangwalang maisaadto, addanto sangaribo dua gasut ket siam a pulo nga aldaw.” (Daniel 12:11) Iti sidong ti Linteg Mosaiko, mapuoran ti “di agsarday a daton” iti templo idiay Jerusalem. Saan a mangidatag dagiti Kristiano kadagiti daton a mapuoran, ngem mangidatagda iti naespirituan a di agsarday a daton. Tinukoy ni Pablo daytoy idi a kinunana: “Ipaaytayo a kanayon iti Dios ti daton ti panagdaydayaw, kayatna a sawen, ti agaon iti bibig a mangipaduyakyak iti naganna.” (Hebreo 13:15; idiligyo ti Oseas 14:2.) Naikkat daytoy di agsarday a daton idi Hunio 1918. Ngarud, ania ti “makarimon a banag”​—ti maikadua a paset a nasken a takuaten? Isu ti Liga de Naciones, nga intandudo dagiti naballigi a pannakabalin iti panaggibus ti Gubat Sangalubongan I.b Makarimon dayta agsipud ta dagiti papangulo ti Kakristianuan insaadda dayta a kas sandi ti Pagarian ti Dios, a pinagparangda a ti Liga ti kakaisuna a pangnamnamaan ti tao iti talna. Naigakat ti Liga idi Enero 1919. No agbilangtayo iti 1,290 nga aldaw (tallo a tawen, pito a bulan) manipud iti dayta a tiempo, makagtengtayo iti Setiembre 1922.

16. Iti ngudo ti 1,290 nga aldaw, kasano a naipakita a nakasaganan dagiti napulotan a natda nga agtignay?

¹⁶ Ania ti napasamak iti daydi a tiempo? Bueno, napabaron ti pigsa dagiti Estudiante ti Biblia, nawayawayaandan manipud Babilonia a Dakkel, ken nakasaganadan nga agtignay. (Apocalipsis 18:4) Iti maysa a kumbension a naangay idi Setiembre 1922 idiay Cedar Point, Ohio, E.U.A., situtured a rinugianda nga inwaragawag dagiti panangukom ti Dios iti Kakristianuan. (Apocalipsis 8:7-12) Talaga a nangrugin a mangparigat ti silud dagiti dudon! Saan la a dayta, no di ket nangrugi metten ti maikadua nga ay ti Apocalipsis. Maysa a dakkel a buyot dagiti Kristiano​—nga idi damo buklen dagiti napulotan a natda ket idi kamaudiananna kinaduaan ti dakkel a bunggoy​—ti rimmaut iti intero a daga. (Apocalipsis 7:9; 9:13-19) Wen, ti panaggibus ti 1,290 nga aldaw nangyeg rag-o iti ili ti Dios.c Ngem adu pay ti agur-uray.

Ti 1,335 nga Aldaw

17. Kaano a nangrugi ken naggibus ti 1,335 nga aldaw?

¹⁷ Kuna ti Daniel 12:12: “Naragsak ti aguray ken makagteng iti sangaribo tallo gasut ket tallopulo ket lima nga aldaw!” Dagitoy a 1,335 nga Aldaw, wenno tallo a tawen, walo ket kagudua a bulan, nalawag a nangrugida iti panagngudo ti immun-una a panawen. No agbilangtayo manipud Setiembre 1922, makagtengtayo iti naladaw a primavera (iti Makin-amianan a Hemispero) ti 1926. Ania ti napasamak iti las-ud dagidiay a 1,335 nga aldaw?

18. Ania ti mangipakita nga idi 1922 adda pay laeng dagiti panagbalbaliw a maaramid?

¹⁸ Iti laksid dagiti napateg a pasamak idi 1922, nalawag nga adda pay laeng dagiti mailiw iti napalabas. Us-usarenda pay laeng a kas kangrunaan a material iti panagadal ti Studies in the Scriptures, nga insurat ni C. T. Russell. Mainayon pay, inlawlawag ti nasaknap pannakaiwarasna a bokleta a Millions Now Living Will Never Die nga iti 1925, mangrugin a matungpal dagiti panggep ti Dios maipapan iti panangisublina iti Paraiso ditoy daga ken ti panagungar dagiti matalek idi ugma. Kasla asideg idin nga agpatingga ti panagibtur dagiti napulotan. Nupay kasta, saan a natignay dagiti dadduma a kakadua dagiti Estudiante ti Biblia a mangiranud iti naimbag a damag kadagiti sabsabali.

19, 20. (a) Kasano a nagbalbaliw dagiti adu a banag para iti ili ti Dios bayat ti 1,335 nga aldaw? (b) Ania dagiti pasamak a nangtanda iti panaggibus ti 1,335 nga aldaw, ket ania ti impasimudaagda maipapan iti ili ni Jehova?

¹⁹ Bayat ti panaglabas ti 1,335 nga aldaw, nagbaliw amin dagitoy. Tapno mapapigsa dagiti kakabsat, naorganisar dagiti regular nga inggrupo a panagadal iti The Watch Tower. Naipaganetget ti panagserbi iti tay-ak. Nangrugi idi Mayo 1923, naawis ti tunggal maysa a makiraman iti serbisio iti tay-ak iti umuna a Martes ti kada bulan, ket nangilasinda iti panawen a panaggigimong ti kongregasion iti lawlawasna tapno maparegtada iti daytoy a trabaho. Idi Agosto 1923, iti maysa nga asamblea idiay Los Angeles, California, E.U.A., nailawlawag a matungpal sakbay ti Milenio a Panagturay ti pangngarig ni Jesus maipapan kadagiti karnero ken kalding. (Mateo 25:31-40) Idi 1924, nainagurasionan ti estasion ti radio a WBBR, a nausar a mangipatangatang iti naimbag a damag. Iti artikulo a “Pannakaipasngay ti Nasion” iti Marso 1, 1925, a ruar ti The Watch Tower, adda namalbaliwan ti pannakailawlawag ti Apocalipsis kapitulo 12. Kamaudiananna, naawatan a naimbag dagiti matalek a Kristiano ti kaipapanan dagiti nariribuk a pasamak idi 1914-19.

²⁰ Naggibus ti tawen 1925, ngem di pay dimteng ti panungpalan! Sipud pay idi 1870’s nga agserserbi dagiti Estudiante ti Biblia a sipapanunot iti petsa​—immuna 1914, kalpasanna 1925. Ita, nabigbigda a masapul nga agserbida agingga a tarigagayan ni Jehova. Iti Enero 1, 1926, a ruar ti The Watch Tower, intampok a nangnangruna ti naisangsangayan nga artikulo nga “Asinot’ Mangidayaw ken Jehova?” ti kinapateg ti nagan ti Dios. Ket kamaudiananna, idi Mayo 1926 iti maysa a kumbension idiay Londres, Inglaterra, naanamongan ti maysa a resolusion a napauluan “Maysa a Pammaneknek Kadagiti Agtuturay ti Lubong.” Sibabatad nga inwaragawag daytoy ti kinapudno maipapan iti Pagarian ti Dios ken ti umas-asidegen a pannakadadael ti lubong ni Satanas. Kagiddan dayta, nairuar ti nadagsen-mensahena a libro a Deliverance, nga isu ti immuna iti maysa a serye a kasukat ti Studies in the Scriptures. Sikikita itan ti ili ti Dios iti masanguanan, saan nga iti napalabas. Naggibusen ti 1,335 nga aldaw.

21. Ania ti kaipapanan ti panagibtur iti las-ud ti 1,335-aldaw a panawen para iti ili ti Dios iti daydi a tiempo, ket ania ti kaipapanan kadatayo ti kaitungpalan ti padto maipapan itoy a panawen?

²¹ Adda dagidiay nagkedked a makidanggay kadagitoy a panagbalbaliw, ngem dagidiay nagibtur pudpudno a naragsakda. Mainayon pay, bayat a taliawentayo ti kaitungpalan dagitoy a naimpadtuan a panawen, naragsaktayo met agsipud ta mapatibker ti panagtalektayo a ti bassit a bunggoy dagiti napulotan a Kristiano a limmasat kadagidiay a panawen pudno nga isuda ti mangbukel iti matalek ken naannad nga adipen. Iti panaglabas dagiti tawen sipud idi, dakkel ti rimmang-ayan ti organisasion ni Jehova, ngem adda pay laeng ti matalek ken naannad nga adipen iti tengnga daytoy, a mangiturturong iti dayta. Gapuna, anian a makaparagsak a maammuan nga adu pay a kinaragsak ti agur-uray kadagiti napulotan ken iti sabsabali a karnero! Makitatayto daytoy iti intay panangusig kadagiti dadduma pay a padto ni Daniel.

[Dagiti Footnote]

Mailawlawagyo Kadi?

◻ Kasanotay nga ammo a natungpal iti panawentayo ti dadduma a padto iti Daniel?

◻ Apay a makapagtalektayo a dagiti napulotan a natda isuda “ti matalek ken naannad nga adipen”?

◻ Kaano a nangrugi ken naggibus ti 1,260 nga aldaw?

◻ Ania a pannakabang-ar ken pannakaisubli ti inyeg ti 1,290 nga aldaw kadagiti napulotan a natda?

◻ Apay a naragsak dagidiay nagibtur agingga iti panaggibus ti 1,335 nga aldaw?

[Kahon iti panid 11]

DAGITI NAIMPADTUAN A PANAWEN ITI DANIEL

1,260 nga aldaw:

Disiembre 1914 agingga iti Hunio 1918

1,290 nga aldaw:

Enero 1919 agingga iti Setiembre 1922

1,335 nga aldaw:

Setiembre 1922 agingga iti Mayo 1926

[Ladawan iti panid 8]

Sipud idi 1919 nalawag a dagiti napulotan a natda ti mangbukel iti “matalek ken naannad nga adipen”

[Ladawan iti panid 10]

Ti hedkuarter ti Liga de Naciones idiay Geneva, Switzerland

[Credit Line]

UN photo