Dagiti Saludsod Manipud Kadagiti Managbasa

Tinagiragsakmi nga inusig dagiti padto ni Daniel a naisalaysay iti “Pagwanawanan.” Nupay kasta, apay a naiduma dagiti petsa para iti tallo ket kagudua a panawen ti Apocalipsis 11:3 iti libro a “Tampok ti Apocalipsis”?

Wen, iti Pagwanawanan a Nobiembre 1, 1993, adda naaramid a bassit a panagbalbaliw iti petsa ti moderno a kaitungpalan ti Apocalipsis 11:3. Apay?

Intay usigen nga umuna ti Apocalipsis 11:2, nga iti ngudona nadakamat ti “uppat a pulo ket dua a bulan.” Ituloytay iti Apo 11 bersikulo 3: “Tignayekto dagiti dua a saksik nga agipadtoda iti sangaribo dua gasut ket innem a pulo nga aldaw a sikakawesda iti nakersang a lupot.” Kaano a natungpal dayta?

Bueno, nabayagen a nabigbig dagiti Saksi ni Jehova a natungpal daytoy a padto kadagiti napulotan-espiritu a Kristiano kalpasan ti panagpatingga “ti naituding a pampanawen dagiti nasion” (ti Panawen Gentil) idi 1914. (Lucas 21:24; 2 Corinto 1:21, 22) Maipapan itoy, kastoy ti kuna ti Apocalipsis​—Ti Grande a Tampokna Asidegen!a (1988) iti panid 164: “Adda namarkaan a periodo a tallo ket kagudua a tawen idi a dagiti narikut a kapadasan ti ili ti Dios ket maiyatadayda kadagiti pasamak a naipadto ditoy​—nangrugi idi panagbettak ti umuna a gubat sangalubongan idi dandani arinunos ti 1914 agingga iti rugrugi ti 1918.”

Paliiwenyo ta ti naipaay a petsa ket “idi panagbettak ti umuna a gubat sangalubongan idi dandani arinunos ti 1914 [agingga] iti rugrugi ti 1918.” Mayataday daytoy iti petsa a masansan a maidatag, kas iti “Then Is Finished the Mystery of God,” pinanid 261-4, (1969).b

Nupay kasta, impamaysa Ti Pagwanawanan dagiti padto iti Daniel, maysa a libro a namindua a nangdakamat iti maysa a periodo nga umasping iti nadakamat kamaudiananna iti Apocalipsis​—3 1/2 a tawen, wenno 42 a bulan. Espesipiko a kunaen ti Daniel 7:25 a mairurumen dagiti sasanto ti Dios “iti maysa a panawen, ken pampanawen ken guddua ti maysa a panawen,” wenno 3 1/2 a panawen. Iti kamaudiananna, impadto ti Daniel 12:7 ti maipapan iti “maysa a naituding a panawen, naituding a pampanawen ken maysa a kagudua,” wenno 3 1/2 a panawen, nga agngudo iti “pannakaburakburak ti pannakabalin ti nasantuan nga ili.”

Isu nga addaantayo kadagiti padto maipapan iti umasping a periodo idiay Daniel 7:25, Daniel 12:7, ken Apocalipsis 11:2, 3, kasta met idiay Apocalipsis 13:5. Impakita dagiti publikasionmi a natungpal amin dagitoy manipud 1914 agingga iti 1918. Ngem iti panangsalaysay iti tunggal maysa kadagitoy a padto, agduduma bassit dagiti petsa para iti panangrugi ken panagpatingga.

Nupay kasta, insaludsod Ti Pagwanawanan a Nobiembre 1, 1993: “Kasano a natungpal dagitoy nga agpapada a padto?” Wen, “agpapada a padto” dagiti padto maipapan iti 3 1/2 a panawen a nadakamat idiay Daniel 7:25, Daniel 12:7, ken Apocalipsis 11:3. Gapuna, agpapadada no iti panangrugi ken panagpatinggada.

No maipapan iti panagpatingga, impakita ti magasin no kasano a nakagteng iti kangitingitanna ti pannakairurumen dagiti pinulotan ti Dios (Daniel 7:25) idi Hunio 1918 idi a “nakedngan [ni J. F. Rutherford ken dagiti dadduma pay a direktor ti Watch Tower Bible and Tract Society] a mabalud iti napaut maibatay kadagiti ulbod a darum.” Dayta a pasamak ket pudno a maysa a “pannakaburakburak ti pannakabalin ti nasantuan nga ili,” kas nadakamat idiay Daniel 12:7.

No agbilangtayo a paatras manipud Hunio 1918 makagtengtayo iti Disiembre 1914, ti panangrugi ti 3 1/2 a panawen. Iti dayta a panggibus a bulan ti 1914, nasursuro dagiti pinulotán ti Dios ditoy daga ti kasuratan a nakaibatayan ti teksto para iti sumaganad a tawen: “‘Kabaelanyo aya ti uminum iti kopak?’​—Mateo 20:20-23.” Namakdaar ti artikulo a nangipakaammo iti dayta: “Asinot’ makaammo no addanto naisangsangayan a pannubok, kopa ti panagsagaba wenno pannakaibabain, kadagiti nasungdo a pasurot ti Kordero inton 1915!” Kas naipadto iti Daniel 7:25 maipapan iti daytoy a periodo ti 3 1/2 a pnawen, ‘rimsua ken nagtultuloy ti panangirurumen maibusor kadagiti sasanto ti Kangatuan.’ Nagdadangadang dagiti nasion iti Gubat Sangalubongan I, a namagbalin a nalaklaka kadakuada a mangibanag iti di nainkalintegan a panangirurumen. Ti konklusion ket: Natungpal amin dagiti tallo nga agpapada a padto​—Daniel 7:25, 12:7, ken Apocalipsis 11:3​—iti 3 1/2 a tawen, wenno 42 a bulan, manipud Disiembre 1914 agingga iti Hunio 1918.

Daytoy ti makailawlawag iti bassit a panagbalbaliw iti petsa ti kaitungpalan ti Apocalipsis 11:3. Daytoy a panagbalbaliw ket maysa a banag a mabalintay a laglagipen bayat nga adalen ken usarentayo ti libro a Tampok ti Apocalipsis iti masanguanan.

[Footnote]