Dedikado​—Iti Siasino?

“Amin a sinao ni Jehova aramidenminto ket situtulokkamto.” ​—EXODO 24:7.

1, 2. (a) Iti ania a debotado ti dadduma a tattao? (b) Dagiti laeng kadi adda pakainaiganna iti relihion ti pakaiturongan ti dedikasion?

IDI Pebrero 1945, naummong iti maysa nga auditorio dagiti piloto ti Zero-fighter ti Yatabe Flying Corps ti Japan. Naikkan ti tunggal maysa iti papel a pangisuratan no kayatna ti agbalin a kameng ti kamikaze attack force. “Impagarupko a naayabanak a mangisakripisio ti bagik iti kanito ti nailian a krisis,” kuna ti maysa nga opisial nga adda idi sadiay. “Nariknak a masapul a madadaanak a mangipaay iti bagik, indiayak ti bagik para iti mision.” Isut’ nasanay a mangpaandar ken mangpatayab iti Ohka (maysa a suicide rocket plane) ken mangidungpar iti dayta iti barko a pakigubat dagiti kabusor. Nupay kasta, nagpatingga ti gubat sakbay a naaddaan iti gundaway a mangaramid iti dayta ket iti kasta matay maipuon iti ili ken iti emperadorna. Idi naparmek ti Japan iti gubat, narakrak ti pammatina iti emperador.

² Idiay Japan, adu idi ti debotado iti emperador, a patienda a maysa a sibibiag a dios. Iti dadduma a daga, adda dadduma pay a banag a dinaydayaw ken daydayawenda agpapan ita. Riniwriw ti debotado ken Maria, Buddha, wenno iti dadduma pay a didiosen​—a masansan nga irepresentar dagiti idolo. Naawis iti makaguyugoy a bitla, ibukbukbok ti dadduma ti kuarta a nagbannoganda iti bulsa dagiti ebanghelista iti TV kas naimpusuan a panangsuportar a katupag ti debosion. Kalpasan ti gubat, nagsapul dagiti naupay a Hapones iti baro a banag a pangidedikaranda iti biagda. Kadagiti dadduma, trabaho ti nangisaadanda [iti debosion]. Iti Daya man wenno Laud, ti laeng panagurnong iti kinabaknang ti ar-aramiden ti adu. Nakasentro ti biag dagiti agtutubo kadagiti kumakanta, a tultuladenda ti estilo ti panagbiagda. Adu ita ti agdaydayaw iti bagida, a dagiti bukodda a tarigagay ti pangipapaayanda iti debosionda. (Filipos 3:19; 2 Timoteo 3:2) Ngem maikari kadi dagiti kasta a banag wenno tattao a pangipaayan iti amin-kararua a debosion ti maysa a tao?

 3. Kasano a napaneknekan nga awan serserbi ti dadduma a banag a pangipapaayanda iti debosion?

³ No maipasangoda iti kinapudno, masansan a maupay dagiti agrukrukbab kadagiti idolo. Agtungpal ti debosion kadagiti idolo iti pannakapaay no mabigbig dagiti managdaydayaw a dagiti idoloda ket “aramid [laeng] dagiti ima ti naindagaan a tao.” (Salmo 115:4) No maibutaktak dagiti iskandalo a nakairamanan dagiti nalatak nga ebanghelista, maupay dagiti napasnek a tattao. No bumtak ti “labutab” ti ekonomia, mariribukan dagiti trabahador a karaman kadagidiay naikkat. Nangyeg dagiti nabiit pay a recession iti nakaro a saplit kadagiti agdaydayaw iti Mammon (Kinabaknang). Nagbalin a dadagsen dagiti utang a ninamnamada a pagtaudan ti adu a kuarta ket narigaten a mabayadan dagitoy. (Mateo 6:24, footnote) No matay wenno agkupas dagiti pagrukrukbabanda a kumakanta iti rock ken dadduma pay nga artista, marikna dagiti managdaydayawda a nabaybay-andan. Ket dagidiay a ti laeng panangpennek iti tarigagayda ti ar-aramidenda masansan nga agapitda iti napait a bunga.​—Galacia 6:7.

 4. Aniat’ mangtigtignay kadagiti tattao a mangidedikar iti biagda kadagiti awan serserbina a banag?

⁴ Aniat’ mangtigtignay kadagiti tattao a mangidedikar iti bagida iti kasta a kinaubbaw? Kangrunaanna, isu ti espiritu ti lubong nga adda iti babaen ni Satanas a Diablo. (Efeso 2:2, 3) Makita iti nadumaduma a pamay-an ti impluensia daytoy nga espiritu. Mabalin a ti tradision ti pamilia nga inyallawat dagiti inapona ti mangiturturong iti maysa a tao. Mabalin a napigsa ti impluensia ti edukasion ken pannakapadakkel iti panagpampanunot. Ti kasasaad iti pagtrabahuan mabalin nga iduronna “dagiti mannakigubat ti korporasion” iti nalabes a panagtrabaho a mabalin a mamagpeggad iti biag. Iparparegta ti materialistiko a kababalin ti lubong ti panagtarigagay iti ad-adu pay. Adut’ rimmuker ti pusona, a tigtignayenna ida a mangpennek kadagiti bukodda nga inaagum a tarigagay. Dida man la usigen no maikari met laeng dagitoy a ganuat iti kasta a debosion.

Maysa a Dedikado a Nasion

 5. Ania a dedikasion ken Jehova ti naaramid nasurok a 3,500 a tawenen ti napalabas?

⁵ Nasurok a 3,500 a tawenen ti napalabas, nakasarak ti maysa a nasion dagiti tattao iti ad-adda a maikari a pangipaayan iti debosion. Indedikarda ti bagida iti soberano a Dios, ni Jehova. Kas maysa a grupo, inyebkas ti nasion ti Israel ti dedikasionna iti Dios iti let-ang ti Sinai.

 6. Aniat’ kaipapanan ti nagan ti Dios kadagiti Israelita?

⁶ Aniat’ nangtignay kadagiti Israelita a mangaramid iti daytoy? Idi naadipenda idiay Egipto, dinutokan ni Jehova ni Moises a mangwayawaya kadakuada. Sinaludsod ni Moises no kasanot’ panangipabigbigna iti Dios a nangibaon kenkuana, ket impalgak ti Dios ti bagina kas “agbalinakto sigun iti pagbalinakto.” Binilinna ni Moises nga ibagana kadagiti annak ti Israel: “Ni agbalinakto ti nangibaon kaniak kadakayo.” (Exodo 3:13, 14) Impasimudaag dagitoy a sasao a pagbalinen ni Jehova ti bagina iti aniaman a kayatna a pagbalinan tapno maibanag dagiti panggepna. Ipalgaknanto ti bagina kas ti Manangtungpal kadagiti kari iti pamay-an a pulos a di naammuan ti amma dagiti Israelita.​—Exodo 6:2, 3.

7, 8. Aniat’ pammaneknek dagiti Israelita a ni Jehova ket maysa a Dios a maikari iti debosionda?

⁷ Naimatangan dagiti Israelita ti pannakadidigra ti daga ti Egipto ken dagiti tattaona babaen ti Sangapulo a Saplit. (Salmo 78:44-51) Kalpasanna, nalabit nasurok a tallo a milionda amin, a pakairamanan dagiti babbai ken ubbing, nagrubbuatda ket pimmanawda iti daga ti Gosen iti agpatnag, a maysa a nakaskasdaaw a gapuanan a mismo. (Exodo 12:37, 38) Sa, idiay Nalabaga a Baybay, impalgak ni Jehova ti bagina kas “maingel a mannakigubat” idi insalakanna ti ilina manipud kadagiti buyot ni Faraon babaen ti panangbingayna iti baybay tapno makalasat dagiti Israelita ket kalpasanna pinagsublina dayta a nanglemmes kadagiti kumamkamat nga Egipcio. Gapuna, “nakita met ti Israel ti naindaklan nga ima a pinagtignay ni Jehova maibusor kadagiti Egipcio; ket dagiti tattao nagbutengda ken Jehova ket namatida ken Jehova.”​—Exodo 14:31; 15:3; Salmo 136:10-15.

⁸ A kas man la di pay umdas ti pammaneknek iti kaipapanan ti nagan ti Dios, nagtanabutob dagiti Israelita maibusor ken Jehova ken iti pannakabagina a ni Moises gapu iti kinakurang ti taraon ken danum. Nangibaon ni Jehova kadagiti tukling, nangpatudo iti mana, ken pinagpussuakna ti danum iti maysa a bato idiay Meriba. (Exodo 16:2-5, 12-15, 31; 17:2-7) Inispal met ni Jehova dagiti Israelita manipud iti iraraut dagiti Amalekita. (Exodo 17:8-13) Pulos a di mailibak dagiti Israelita ti kinuna kamaudiananna ni Jehova ken ni Moises: “Jehova, Jehova, Dios a naasi ken managparabur, nainayad nga agpungtot, ken aglaplapusanan iti naayat a kinamanangaasi ken kinapudno, manalimetmet iti naayat a kinamanangaasi a maipaay kadagiti rinibribu, mamakawan iti biddut ken salungasing ken basol.” (Exodo 34:6, 7) Pudno la unay, pinaneknekan ni Jehova ti bagina a maikari a pangipaayanda iti debosion.

 9. Apay nga inikkan ni Jehova dagiti Israelita iti gundaway a mangyebkas iti dedikasionda nga agserbi kenkuana, ket kasanot’ isusungbatda?

⁹ Nupay adda kalintegan ni Jehova a mangtagikua kadagiti Israelita gapu ta sinubbotna ida idiay Egipto, kas naanus ken naasi a Dios, inikkanna ida iti gundaway a mangyebkas a situtulok iti tarigagayda nga agserbi kenkuana. (Deuteronomio 7:7, 8; 30:15-20) Impasdekna met dagiti kondision iti pannakitulagna kadagiti Israelita. (Exodo 19:3-8; 20:1–23:33) Idi imbaga ni Moises dagitoy a kondision, kinuna dagiti Israelita: “Amin a sinao ni Jehova aramidenminto ket situtulokkamto.” (Exodo 24:3-7) Iti bukodda a nakem, nagbalinda a maysa a nasion a dedikado ken ni Soberano nga Apo Jehova.

Ti Panangipateg Mangiturong iti Dedikasion

10. Iti ania a rumbeng a maibatay ti dedikasiontayo ken Jehova?

¹⁰ Kanayon a maikari ni Jehova, ti Namarsua, iti amin-kararua a debosiontayo. (Malakias 3:6; Mateo 22:37; Apocalipsis 4:11) Nupay kasta, saan koma a maibatay ti dedikasiontayo iti kinalaka a mamatpati, apagkanito nga emosion, wenno panangpilit dagiti sabsabali​—uray dagiti nagannak. Masapul a maibatay dayta iti umiso a pannakaammo iti kinapudno maipapan ken Jehova ken iti panangipateg iti naaramidan ni Jehova maipaay kadatayo. (Roma 10:2; Colosas 1:9, 10; 1 Timoteo 2:4) No kasano nga inikkan ni Jehova dagiti Israelita iti gundaway a situtulok a mangyebkas iti dedikasionda, kasta met nga ikkannatay iti gundaway a situtulok a mangidedikar iti bagitayo ken ipaduyakyak dayta a dedikasion iti publiko.​—1 Pedro 3:21.

11. Aniat’ impalgak ti panagadaltayo iti Biblia maipapan ken Jehova?

¹¹ Babaen ti panagadal iti Biblia, maam-ammotayo ti Dios kas maysa a persona. Tulongannatay ti Saona a mangilasin kadagiti kababalinna a nayanninaw iti sangaparsuaan. (Salmo 19:1-4) Makitatayo manipud iti Saona nga isu ket saan a maysa a misterioso a Trinidad a di maawatan. Saan a maabak kadagiti gubat ket ngarud, di kasapulan nga isukona ti kina-Diosna. (Exodo 15:11; 1 Corinto 8:5, 6; Apocalipsis 11:17, 18) Gapu ta tinungpalna dagiti karina, maipalagip kadatayo ti kaipapanan ti napintas a naganna a Jehova. Isu ti Naindaklan a Managpanggep. (Genesis 2:4; footnote; Salmo 83:18; Isaias 46:9-11) Babaen ti panagadal iti Biblia, silalawag a maawatantayo no kasanot’ kinamatalek ken kinamapagtalkanna.​—Deuteronomio 7:9; Salmo 19:7, 9; 111:7.

12. (a) Aniat’ pakaawisantayo ken Jehova? (b) Kasano a dagiti pudno a kapadasan a nailanad iti Biblia tignayenna ti maysa nga agtarigagay nga agserbi ken Jehova? (c) Kasanot’ panagriknayo iti panagserbi ken Jehova?

¹² Ti nangnangruna a pakaawisantayo ken Jehova isu ti naayat a personalidadna. Ipakita ti Biblia no kasanot’ kinamanagayat, kinamanangpakawan, ken kinamanangaasina iti pannakilangenna kadagiti tattao. Panunotenyo no kasanot’ panangparang-ayna ken Job idi a simamatalek a sinalimetmetan ni Job ti kinatarnawna. Itampok ti kapadasan ni Job a “ni Jehova nadungngo unay iti panagayat ken naasi.” (Santiago 5:11; Job 42:12-17) Panunotenyo no kasanot’ pannakilangen ni Jehova ken David idi nagbasol iti pannakikamalala ken pammapatay. Wen, madadaan ni Jehova a mamakawan uray kadagiti nadagsen a basol no umadani kenkuana ti nakabasol buyogen ti “nadudog ken sibababawi a puso.” (Salmo 51:3-11, 17) Panunotenyo ti pannakilangen ni Jehova ken Saulo a taga-Tarso, nga idi damo ket maysa a napeklan a manangidadanes iti ili ti Dios. Itampok dagitoy a pagarigan ti kinamanangaasi ti Dios ken ti naparabur a kinamasindadaanna a mangusar kadagiti agbabbabawi. (1 Corinto 15:9; 1 Timoteo 1:15, 16) Narikna ni Pablo a mabalinna nga ipusta ti mismo a biagna iti panagserbi iti daytoy naayat a Dios. (Roma 14:8) Kasta met kadi ti panagriknayo?

13. Ania a naindaklan nga ebkas ti ayat iti biang ni Jehova ti manggutugot kadagiti nasingpet panagpuspusona a mangidedikar iti bagida kenkuana?

¹³ Insalakan ni Jehova dagiti Israelita manipud iti pannakaadipen idiay Egipto, ket nangisagana met iti pamay-an tapno maisalakantayo manipud iti pannakaadipen iti basol ken ipapatay​—ti daton a subbot ni Jesu-Kristo. (Juan 3:16) Kuna ni Pablo: “Ti Dios irekomendana ti bukodna nga ayat kadatayo iti banag a, bayat a managbasoltayo pay laeng idi, ni Kristo natay a maipaay kadatayo.” (Roma 5:8) Gutugoten daytoy naayat nga urnos dagiti nalinteg panagpuspusona a tattao a mangidedikar iti bagida ken Jehova babaen ken Jesu-Kristo. “Ta ti ayat nga adda ken Kristo pilitennakami, agsipud ta isu daytoy ti impatomi, a ti maysa a tao natay maipaay iti isuamin; no kasta, ngarud, natay ti isuamin; ket isu natay maipaay iti isuamin tapno dagidiay nga agbiag saanda koman nga agbiag nga agpaay iti bagbagida, no di ket agpaay kenkuana a natay maipaay kadakuada ken napagungar.”​—2 Corinto 5:14, 15; Roma 8:35-39.

14. Umdas kadin ti pannakaammo laeng iti pannakilangen ni Jehova a mangtignay kadatayo a mangidedikar iti biagtayo kenkuana? Ilawlawagyo.

¹⁴ Kaskasdi, saan nga umdas ti pannakaammo iti personalidad ni Jehova ken iti pannakilangenna iti sangatauan. Nasken a sukayentayo ti personal a panangipateg ken Jehova. Kasano a maaramid dayta? Babaen ti panangyaplikar iti Sao ti Dios iti biagtayo ken pannakakitatayo a mismo a dagiti prinsipio a masarakan iti dayta ket pudno a makagunggona. (Isaias 48:17) Masapul a mariknatayo ti panangaon ni Jehova kadatayo iti lubnak daytoy dakes a lubong nga iturturayan ni Satanas. (Idiligyo ti 1 Corinto 6:11.) Iti panangikagumaantayo nga agaramid iti umiso, masursurotayo ti agtalek ken Jehova, ken mapasarantay a mismo a ni Jehova isu ti sibibiag a Dios, ti “Dumngeg iti kararag.” (Salmo 62:8; 65:2) Iti saan a mabayag, mariknatayo a nakasingsingedtayon kenkuana ken mabalintay a yesngaw kenkuana ti adda iti kaunggantayo. Rumayray ti nasged a panagayattayo ken Jehova. Awan duadua nga iturongnatay daytoy a mangidedikar iti biagtayo kenkuana.

15. Aniat’ nanggutugot iti maysa a lalaki, a sigud a dedikado iti trabaho, nga agserbi ken Jehova?

¹⁵ Adu ti nakaammon iti daytoy naayat a Dios, ni Jehova, ken nangidedikar iti biagda tapno agserbi kenkuana. Alaentay a pagarigan ti maysa nga electrician nga addaan idi iti narang-ay a negosio. Adda idi dagiti tiempo nga irugina ti agtrabaho iti bigat nga aglaylayon agingga iti rabii, ket sa la agawid iti alas singko ti sumaruno a bigat. Kalpasan a makainana iti agarup maysa nga oras, mapan manen agtrabaho. “Dedikadoak idi iti trabahok,” malagipna. Idi rinugian ti asawana ti agadal iti Biblia, nakipagadal met. Kunana: “Agur-uray laeng a pagserbian dagiti amin a didiosen a naammuak agingga iti daydi a tiempo, nga awan a pulos ti maitultulongda kadakami. Ngem iti bukodna a nakem, imbaon ni Jehova ti bugbugtong nga Anakna ditoy daga, ket maysa daytoy a dakkel a personal a panagsakripisio.” (1 Juan 4:10, 19) Kalpasan ti sangapulo a bulan, dedikadon daytoy a lalaki ken Jehova. Kalpasan dayta, impamaysana ti agserbi iti sibibiag a Dios. Simrek iti amin-tiempo a ministerio ken napan nagserbi iti lugar a dakdakkel ti pakasapulan. Kas kadagiti apostol, ‘pinanawanna amin a banag ket simmurot ken Jesus.’ (Mateo 19:27) Kalpasan ti dua a bulan, naayabanda nga agassawa nga agserbi iti sanga ti Watch Tower Bible and Tract Society iti pagilian a nagnaedanda, tapno makatulong iti elektrikal a trabaho. Nasurok a 20 a tawenen nga agtartrabaho iti sanga [nga opisina], nga ar-aramidenna ti trabaho a pagay-ayatna​—saan a maipaay iti bagina no di ket maipaay ken Jehova.

Ipaduyakyakyo ti Dedikasionyo iti Publiko

16. Ania dagiti addang nga aramiden ti maysa iti panagdedikar ken Jehova?

¹⁶ Kalpasan ti panagadalda iti Biblia iti sumagmamano a tiempo, masursuro agpadpada dagiti agtutubo ken nataengan nga ipateg ni Jehova ken ti naaramidanna maipaay kadakuada. Rumbeng a daytoy ti mangtignay kadakuada a mangidedikar ti bagida iti Dios. Mabalin a maysaka kadagitoy. Kasanom a maidedikar ti bagim ken Jehova? Kalpasan ti pananggun-odmo iti umiso a pannakaammo manipud iti Biblia, rumbeng nga agtignayka a mayannurot iti dayta a pannakaammo ken watwatem ti pammati ken Jehova ken ni Jesu-Kristo. (Juan 17:3) Agbabawika ken tallikudam ti aniaman a dakes nga aramidmo iti napalabas. (Aramid 3:19) Kalpasanna, agdedikarka, a yebkasmo dayta iti napasnek a kararag ken Jehova. Awan duadua a mangibati daytoy a kararag iti manayon nga impresion iti panunotmo, ta isu dayta ti pangrugian ti baro a pannakirelasion ken Jehova.

17. (a) Apay nga irepaso ti papanglakayen dagiti naisagana a saludsod kadagiti nabiit pay a nagdedikar? (b) Ania a napateg nga addang ti rumbeng nga aramiden ti maysa di agbayag kalpasan ti panagdedikarna, ket agpaay iti ania a panggep?

¹⁷ No kasano nga inlawlawag ni Moises kadagiti Israelita dagiti kondision ti iseserrek iti naitulag a pannakirelasion ken Jehova, tulongan dagiti panglakayen iti kongregasion dagiti Saksi ni Jehova dagidiay nabiit pay a nagdedikar tapno mausig no ania a talaga ti nairaman. Usarenda dagiti naisagana a saludsod tapno masierto no maawatan met laeng a naan-anay ti tunggal maysa dagiti kangrunaan a sursuro ti Biblia ken no ammona met laeng no aniat’ nairaman iti panagbalin a Saksi ni Jehova. Kalpasanna, maikanatad la unay ti maysa a seremonia a pangipaduyakyakan ti dedikasion iti publiko. Kadawyanna, ti maysa a tao a nabiit pay a nagdedikar ket magagaran a mangipakaammo kadagiti sabsabali a simreken iti daytoy naparaburan a pannakirelasion ken Jehova. (Idiligyo ti Jeremias 9:24.) Siuumiso a maaramid daytoy babaen ti pannakabautisar iti danum kas simbolo ti dedikasion. Ti pannakaitanebna iti danum ken ti irurukuasna iti dayta isimbolona ti pannakatayna iti napalabas a managimbubukod a panagbiagna ken pannakapagungarna iti baro a wagas ti panagbiag, nga isu ti panangaramid iti pagayatan ti Dios. Saan dayta a maysa a sakramento, wenno maysa a ritual a kas iti seremonia ti Shinto a misogi a pakadalusan kano ti maysa a tao babaen ti danum.a Ngem ketdi, ti bautismo isu ti publiko a panangipaduyakyak iti dedikasion a naaramiden iti kararag.

18. Apay a makapagtalektayo a saan nga ubbaw ti dedikasiontayo?

¹⁸ Maysa a di malipatan a kapadasan daytoy a napasnek nga okasion, a mangipalagip iti baro nga adipen ti Dios iti manayon a relasionna itan ken Jehova. Saan a kas iti dedikasion nga inaramid ti kamikaze a piloto iti pagilian ken iti emperadorna, saan nga ubbaw daytoy a dedikasion ken Jehova, ta isu ti agnanayon a mannakabalin-amin a Dios a mangibanag iti amin nga inkeddengna nga aramiden. Isu laeng ti maikari iti amin-kararua a debosiontayo.​—Isaias 55:9-11.

19. Aniat’ masalaysay iti sumaganad nga artikulo?

¹⁹ Nupay kasta, adu pay ti nairaman iti dedikasion. Kas pagarigan, kasano nga apektaran ti dedikasion ti inaldaw-aldaw a panagbiagtayo? Masalaysay daytoy iti sumaganad nga artikulo.

[Footnote]

Malagipyo Kadi?

◻ Apay nga agtungpal iti pannakaupay ti dedikasion a makita iti lubong?

◻ Aniat’ nangtignay kadagiti Israelita a mangidedikar iti bagida ken Jehova?

◻ Aniat’ mangtignay kadatayo a mangidedikar iti bagitayo ken Jehova ita?

◻ Kasanot’ panagdedikartayo iti Dios?

◻ Aniat’ kaipapanan ti bautismo iti danum?

[Ladawan iti panid 10]

Nagdedikar ti Israel ken ni Jehova idiay Sinai