Inaramidda ti Pagayatan ni Jehova

Panangsapul iti Agbalin nga Asawa ni Isaac

NABANNOG unay ti nataenganen a lalaki a nakatugaw iti ngarab ti bubon. Isu ken dagiti pasurotna agraman ti sangapulo a kamelioda dinaliasatda manipud iti lugar ti Beer-seba agingga iti umamianan a Mesopotamia​—nasurok a 800 a kilometro ti kaadayona.a Ita ta nakagtengdan iti destinasionda, nagsardeng biit daytoy nabannog a managdaliasat tapno panunotenna ti narikut a misionna. Asino daytoy a tao, ken apay nga inaramidna daytoy narigat a panagdaliasat?

Ti lalaki ket adipen ni Abraham, “ti panglakayen ti balayna.” (Genesis 24:2) Nupay saan a nainaganan iti salaysay, agparang a daytoy ket ni Eliezer, a tinukoy iti naminsan ni Abraham kas ‘maysa a nayanak iti balayna’ a dinakamatna a nailinia nga ‘agtawid kenkuana.’ (Genesis 15:2, 3) Siempre, dayta ket idi awan pay anak da Abraham ken Sara. Ita ti anakda a ni Isaac, ket agtawenen iti 40, ken nupay saanen a ni Eliezer ti kangrunaan nga agtawid ken Abraham, isu ket adipenna pay laeng. Gapuna nagtulnog idi adda narikut a kiddaw ni Abraham. Ania dayta?

Narikut a Mision

Idi kaaldawan ni Abraham ti panagasawa apektaranna saan laeng a ti pamilia no di pay ket ti intero a tribu, wenno komunidad dagiti patriarka. Gapuna nakayugalian idi dagiti nagannak ti agpili iti agbalin nga asawa dagiti annakda. Nupay kasta, iti panagsapul iti agbalin nga asawa ti anakna a ni Isaac, adda parikut a naipasango ken ni Abraham. Saan nga umiso ti makiasawa kadagiti Cananeo iti dayta a lugar gapu iti di nadiosan a danada. (Deuteronomio 18:9-12) Ken nupay nakayugalian ti maysa a lalaki a mangasawa iti katribuanna, ginasut a kilometro ti pagnanaedan dagiti kabagian ni Abraham iti umamianan a Mesopotamia. Saanna met ngarud a basta paakaren ni Isaac sadiay, ta inkari ni Jehova ken Abraham: “Iti putotmo itedkonto daytoy a daga,” ti daga ti Canaan. (Genesis 24:7) Gapuna, kinuna ni Abraham ken Eliezer: “Mapankanto iti dagak, ken kadagiti kakabagiak, ket mangalaka idiay iti asawa nga agpaay iti anakko nga Isaac.”​—Genesis 24:4.

Idi nga agngudo ti nawatiwat a panagdaliasat, naginana ni Eliezer iti ngarab ti bubon bayat a pinampanunotna ti misionna. Napanunotna a dandanin dumteng dagiti babbai tapno agsakdo iti bubon iti danum nga usarenda iti rabii. Gapuna kiniddawna ken Jehova: “Ti balasang a pagkunaak, ‘Dawatek nga ibabam kadi ta karambam, tapno uminumak,’ ket isu kunananto, ‘Uminumka, ken kasta met painumekto dagita kameliom,’ ipaaymo kadi a daytoy ti insaganam iti adipenmo nga Isaac; ket iti kastoy maammuakto nga inaramidmo ti kaasi ken apok.”​—Genesis 24:14.

Bayat nga agkarkararag pay laeng, immasideg ti napintas nga agkabannuag pay a balasang nga agnagan Rebecca. “Dawatek kenka, painumennak kadi iti bassit a danum iti karambam,” kinuna kenkuana ni Eliezer. Inaramid dayta ni Rebecca, sa kalpasanna kinunana: “Kasta met mangalaakto ti maipaay kadagiti kameliom, inggana iti dida malpas nga uminum.” Saan idi nga ang-angaw daytoy a tukon, tangay kabaelan nga inumen ti mawaw a kamelio ti aginggat’ 95 a litro ti danum iti sangapulo laeng a minuto! Mawaw man wenno saan dagiti kamelio ni Eliezer, sigurado nga ammo ni Rebecca a ti intukonna a serbisio ket makapabannog. Kinapudnona, “nagdaras, ket imbuyatna ti danum ti karambana iti pagipainuman ket nagsubli manen iti bubon a sumakdo, ket nangala iti agpaay kadagiti amin a kameliona.”​—Genesis 24:15-20.

Iti pannakariknana iti panangiwanwan ni Jehova, inikkan ni Eliezer ni Rebecca iti singsing iti agong a balitok ken dua a pulseras a balitok, nga aggatad iti $1,400 ita. Idi imbaga ni Rebecca kenkuana nga isu ket apoko ni Nacor, a kabsat ni Abraham, nagkararag ni Eliezer iti Dios tapno agyaman. “Ni Jehova inturongnak iti dalan agingga iti balay dagiti kakabsat ti apok,” kinunana. (Genesis 24:22-27) Naiyeg ni Eliezer iti pamilia ni Rebecca. Idi agangay, nagbalin ni Rebecca nga asawa ni Isaac, ken naaddaan iti pribilehio nga agbalin nga inapo ti Mesias, ni Jesus.

Dagiti Maadaltayo

Binendisionan ni Jehova ti nabuyogan iti kararag a panagregget ni Eliezer a mangbirok iti managbuteng iti Dios nga agbalin nga asawa ni Isaac. Nupay kasta, laglagipenyo a ti panagasawa ni Isaac ket direkta a nainaig iti panggep ti Dios a mangpataud iti bin-i babaen ken Abraham. Gapuna dinatay koma pagpanunoten daytoy a salaysay nga amin nga agkarkararag maipaay iti panangsapul iti agbalin nga asawa ket simimilagro a maikkanto. Kaskasdi, no tungpalentayo dagiti prinsipio ni Jehova, pabilgennatayo nga agibtur kadagiti karit a dumteng iti aniaman a kasasaad iti biag​—ti panagasawa wenno panagtalinaed nga awan asawana.​—1 Corinto 7:8, 9, 28; idiligyo ti Filipos 4:11-13.

Dakkel a panangikagumaan ti inaramid ni Eliezer tapno maitungpal ti bambanag sigun iti wagas ni Jehova. Mabalin a masarakantay met a saan a kanayon a nalaka ti tumunos kadagiti pagalagadan ni Jehova. Kas pagarigan, mabalin a narigat ti agsapul iti panggedan a di makalapped iti teokratiko nga aramid, asawa a managbuteng iti Dios, kakadua a makaparegta, paglinglingayan a saan a dakes. (Mateo 6:33; 1 Corinto 7:39; 15:33; Efeso 4:17-19) Nupay kasta, matulongan ni Jehova dagidiay agkedked a mangikompromiso kadagiti prinsipio iti Biblia. Ikari ti Biblia: “Agtalekka ken ni Jehova iti amin a pusom, ket dika agtalged iti pannakaawatmo met laeng. Kadagiti amin a dalanmo isu ti bigbigem, ket isu iturongnanto dagiti desdesmo.”​—Proverbio 3:5, 6.

[Footnote]