Inaramidda ti Pagayatan ni Jehova

Naitan-ok ni Jesus kas Mesias ken Ari!

PINAGSIDDAAWNA ti adu a Judio ti naariwawa a bunggoy a sumsumrek iti Jerusalem idi Nisan 9, 33 K.P. Nupay gagangayen a makita ti panagdudupudop dagiti tattao iti siudad sakbay ti Paskua, naidumduma dagitoy a bisita. Ti kangrunaan a tao kadakuada isu ti lalaki a nakasakay iti urbon ti asno. Dayta a lalaki ket ni Jesu-Kristo, ket inyaplag dagiti tattao ti makinruar a kawesda ken sangsanga ti palma iti sanguananna bayat nga ipukpukkawda: “Mangisalakanka, ikararagmi, iti Anak ni David! Bendito dayta umay iti nagan ni Jehova! Mangisalakanka kenkuana, ikararagmi, iti kangatuan!” Idi nakitada ti bunggoy, natignay ti adu nga addan idiay Jerusalem a tumipon iti prosesion.​—Mateo 21:7-9; Juan 12:12, 13.

Nupay maitantan-ok idi, ammo ni Jesus nga addada suot nga agur-uray kenkuana. Kinapudnona, lima nga aldaw laengen, mapapatayto iti daytoy met laeng a siudad! Wen, ammo ni Jesus a ti Jerusalem ket natangken a teritoria, ket insaganana ti nakadkadlaw nga iseserrekna iti siudad a sipapanunot a mismo iti dayta.

Natungpal ti Nagkauna a Padto

Idi 518 K.K.P., impadto ni Zacarias ti naballigi nga iseserrek ni Jesus iti Jerusalem. Insuratna: “Dumir-ika, O anak a babai ti Jerusalem. Adtoy! ti arim umay kenka. Isu nalinteg, ken addaan panangisalakan; napakumbaba, ket agsakay iti maysa nga asno, iti rabaw met laeng ti maysa nga urbon ti asna. . . . Ket isu sawennanto ti kappia kadagiti nasnasion; ket ti pagturayannanto manipud iti taaw agingga iti taaw, ken manipud iti Karayan agingga kadagiti pungto ti daga.”​—Zacarias 9:9, 10.

Gapuna ti iseserrek ni Jesus iti Jerusalem idi Nisan 9 tinungpalna ti padto iti Biblia. Saan a nairana a pasamak dayta no di ket siaannad a naiplano. Kasakbayanna, kabayatan nga adda iti ruar ti Jerusalem, binilin ni Jesus ti dua kadagiti adalanna: “Inkayo iti purok a matantannawaganyo, ket madagdagus a makasarakkayto iti maysa nga asno a naigalut, ken maysa nga urbon a naikuyog kenkuana; warwaranyo ida ket iyegyo ida kaniak. Ket no adda agsao iti aniaman kadakayo, masapul a kunaenyo, ‘Ti Apo kasapulanna ida.’ Iti kasta dagus nga ipatulodnanto ida.” (Mateo 21:1-3) Ngem apay a kayat ni Jesus ti sumrek iti Jerusalem a nakasakay iti asno, ken aniat’ kaipapanan ti tignay ti bunggoy?

Mensahe Maipanggep iti Kinaari

Masansan a nabilbileg ti ladawan a makita ngem ti mayebkas a sao. Gapuna, addada panawen a pinaidemonstra ni Jehova kadagiti mammadtona ti mensaheda tapno ad-adda mapatalgedan dagiti naimpadtuan a mensaheda. (1 Ar-ari 11:29-32; Jeremias 27:1-6; Ezequiel 4:1-17) Daytoy makita a wagas ti komunikasion nangibati iti manayon a pagpanunotan uray iti katangkenan-panagpuspusona a managpaliiw. Iti umasping a pamay-an, indemonstra ni Jesus ti nabileg a mensahe babaen ti panagsakayna iti maysa nga asno a nagturong iti siudad ti Jerusalem. Kasano?

Idi tiempo ti Biblia ti asno ket nausar maipaay kadagiti natan-ok a panggep. Kas pagarigan, nagsakay ni Solomon iti pannakapulotna kas ari iti “mulo” ni amana, ti mestiso a putot ti maysa a kalakian nga asno.a (1 Ar-ari 1:33-40) Gapuna ti iseserrek ni Jesus iti Jerusalem a sisasakay iti maysa nga asno kaipapananna nga idatdatagna ti bagina kas ari. Dagiti tignay ti bunggoy pinatalgedanda daytoy a mensahe. Ti grupo, a ti kaaduan awan duadua a buklen dagiti taga-Galilea, inyaplagda dagiti kawesda iti sanguanan ni Jesus​—maysa a tignay a mangipalagip iti publiko a pannakaipakaammo ti kinaari ni Jehu. (2 Ar-ari 9:13) Ti panangtukoyda ken Jesus kas “Anak ni David” impaganetgetna ti legal a kalinteganna iti kinaari. (Lucas 1:31-33) Ken ti panagaramatda iti sangsanga ti palma sibabatad nga impakitada ti panagpasakupda iti naarian nga autoridadna.​—Idiligyo ti Apocalipsis 7:9, 10.

Gapuna ti prosesion idiay Jerusalem idi Nisan 9 nangyeg iti nalawag a mensahe a ni Jesus ti Mesias ken Ari a dinutokan ti Dios. Siempre, saan a naragsakan ti amin a nakakita iti pannakaipabigbig ni Jesus iti kastoy a pamay-an. Dagiti Fariseo ti nangnangruna a nagpanunot a naan-anay a di maitutop para ken Jesus a maipaayan iti kasta a natan-ok a pammadayaw. “Mannursuro,” kinunada, di pagduaduaan a makapungpungtotda, “babalawem dagiti adalam.” Insungbat ni Jesus: “Ibagak kadakayo, No dagitoy nagtalinaedda a siuulimek, dagiti batbato agikkisdanto.” (Lucas 19:39, 40) Wen, ti Pagarian ti Dios ti inkaskasaba ni Jesus. Situtured nga inwaragawagna daytoy a mensahe awaten man dagiti tao wenno saan.

Ti Maadaltayo

Kinasapulan ni Jesus ti tured a sumrek iti Jerusalem iti wagas nga impakpakauna ni mammadto Zacarias. Ammona nga iti panangaramidna iti dayta mapagpungtotna dagiti kabusorna. Sakbay ti iyuulina idiay langit, binilin ni Jesus dagiti pasurotna nga ikasabada ti naimbag a damag ti Pagarian ti Dios ken ‘mangaramid kadagiti adalan a tattao iti isuamin a nasnasion.’ (Mateo 24:14; 28:19, 20) Kasapulan met ti tured iti panangaramid iti daytoy a trabaho. Saan nga amin ket maragsakan a dumngeg iti mensahe. Saan nga interesado ti dadduma iti dayta, bayat a busoren dagiti sabsabali. Iningetan ti dadduma a gobierno ti trabaho a panangasaba wenno naan-anay nga impawilda dayta.

Kaskasdi, ammo dagiti Saksi ni Jehova a kasapulan a maikasaba ti naimbag a damag ti naipasdeken a Pagarian ti Dios, dumngeg man dagiti tattao wenno saan. (Ezequiel 2:7) Bayat nga itultuloyda nga aramiden daytoy makaispal-biag a trabaho, agtalgedda iti kari ni Jesus: “Adtoy! addaak kadakayo iti isuamin nga al-aldaw agingga iti panungpalan ti sistema ti bambanag.”​—Mateo 28:20.

[Footnote]