“Agannadkayo Tapno Awan ti Asinoman a Mangsilo Kadakayo”!

 1. Sigun iti Colosas 2:4, 8, kasano a padpadasen ni Satanas nga impluensiaan ti isiptayo?

KAYAT ni Satanas a maitallikudnatayo ken Jehova. Tapno maaramidna dayta, padpadasenna nga impluensiaan ti isiptayo, nga arigna adipenenna ti panunottayo tapno sumurottayo iti kayatna. Us-usarenna dagiti banag a makaay-ayo kadatayo tapno makombinsir wenno maallilawnatayo a sumurot kenkuana.​—Basaen ti Colosas 2:4, 8.

2-3. (a) Apay a masapul nga ipangagtayo ti pakdaar iti Colosas 2:8? (b) Ania ti usigentayo iti daytoy nga artikulo?

² Talaga kadi a mabalin a maallilawnatayo ni Satanas? Wen! Laglagipentayo a saan nga insurat ni Pablo ti pakdaar iti Colosas 2:8 para kadagiti di manamati. Insuratna dayta para kadagiti Kristiano a dinutokan ti nasantuan nga espiritu. (Col. 1:2, 5) Agpegpeggad idi dagidiay a Kristiano, ket nakarkaro pay kadatayo ita. (1 Cor. 10:12) Apay? Naitapuaken ni Satanas ditoy daga, ket ikagkagumaanna nga allilawen dagiti matalek nga adipen ti Dios. (Apoc. 12:9, 12, 17) Kanayonanna, agbibiagtayon iti tiempo nga ‘ad-adda pay a dumakes’ dagiti tattao a dakes ken impostor.​—2 Tim. 3:1, 13.

³ Iti daytoy nga artikulo, pagsasaritaantayo no kasano nga us-usaren ni Satanas ti “ulbod a panagrasrason” a mangimpluensia iti isiptayo. Ammuentayo ti tallo a “nasikap nga aramid,” wenno “plano,” ni Satanas. (Efe. 6:11; ftn.) Sa iti sumaruno nga artikulo, usigentayo no kasano nga ikkaten iti panunottayo ti aniaman a dakes nga epekto dagiti taktikana. Ngem usigentayo nga umuna ti masursurotayo iti pamay-an ni Satanas a nangyaw-awan kadagiti Israelita idi nakastrekdan iti Naikari a Daga.

4-6. Sigun iti Deuteronomio 11:10-15, ania a pamay-an ti panagtalon ti masapul a masursuro dagiti Israelita idi agnanaeddan iti Naikari a Daga?

⁴ Sisisikap nga inallilaw ni Satanas dagiti Israelita nga agdayaw iti idolo. Kasano? Ginundawayanna ti panagkasapulanda iti taraon. Idi nakastreken dagiti Israelita iti Naikari a Daga, masapul a sursuruenda ti baro a pamay-an ti panagtalon. Idi addada idiay Egipto, aggapu iti Nilo ti padanum dagiti talonda. Ngem awan ti dakkel a karayan idiay Naikari a Daga a pagalaan iti danum, isu a tudo ken linnaaw laeng ti mangsibug kadagiti mulada. (Basaen ti Deuteronomio 11:10-15; Isa. 18:4, 5) Kasapulan ngarud nga agsursuro dagiti Israelita kadagiti baro a pamay-an ti panagtalon. Saan a nalaka dayta ta natayen idiay let-ang ti kaaduan nga addaan kapadasan iti panagtalon.

⁵ Inlawlawag ni Jehova iti ilina a nagbaliwen ti kasasaadda. Sa innayonna daytoy a pakdaar, a kasla awan koneksionna iti agrikultura: “Agannadkayo tapno saan a maallukoy a sumina ti pusoyo ket agdayaw ken agruknoykayo kadagiti sabali a dios.” (Deut. 11:16, 17) Apay nga impakdaar ni Jehova a saanda nga agdayaw kadagiti ulbod a dios idinto ta ti ibagbagana ket ti panagsursuro kadagiti baro a pamay-an ti panagtalon?

⁶ Ammo ni Jehova a mabalin a masulisog dagiti Israelita nga agsursuro iti sumagmamano a pamay-an ti panagtalon kadagiti pagano a tattao iti aglawlawda. Siempre, mas eksperiensiado dagita a pagano ngem kadagiti Israelita ken adda dagiti makatulong nga abilidad a masursuro kadakuada ti ili ti Dios, ngem adda peggad. Ti panagpampanunot dagidiay a Canaanita a mannalon ket naimpluensiaan iti panagdaydayawda ken Baal. Mamatida a ni Baal ti makinkukua iti langit ken mangipapaay iti tudo. Saan a kayat ni Jehova a maallilaw ti ilina kadagita nga ulbod a patpatien. Ngem maulit-ulit a pinili dagiti Israelita a pagdayawan ni Baal. (Num. 25:3, 5; Uk. 2:13; 1 Ar. 18:18) Kitaem no kasano a nasiluan ni Satanas dagiti Israelita.

 7. Kasano a nasubok ti pammati dagiti Israelita idi nakastrekdan iti Naikari a Daga?

⁷ Umuna, ginundawayanna ti normal a panagtarigagayda iti tudo tapno masibugan ti daga. Manmano nga agtudo iti Naikari a Daga iti naladaw a paset ti Abril agingga iti Septiembre. Nakadepende ti panagbiag dagiti Israelita ken ti adu a maapitda iti tudo a gagangay a mangrugi iti Oktubre. Naallilaw ni Satanas dagiti Israelita a mamati a tapno rumang-ayda, masapul a tuladenda dagiti kostumbre dagiti pagano a kaarrubada. Patien dagitoy a pagano nga adda dagiti ritual a masapul nga aramidenda tapno mangipaay ti diosda iti tudo. Dagidiay awan ti pammatina ken Jehova namatida a daytoy ti kakaisuna a pamay-an tapno maliklikan ti napaut a tikag, isu nga inaramidda dagiti ritual a pakaidayawan ti ulbod a dios a ni Baal.

 8. Ania ti maikadua a taktika ni Satanas? Ilawlawag.

⁸ Maikadua, ginundawayanna dagiti immoral a tarigagayda. Indaydayaw dagiti pagano a nasion dagiti diosda babaen ti nakaar-ariek nga immoral nga ar-aramid. Karaman iti daytoy nga immoral a kita ti panagdayaw ket dagiti babbai ken lallaki a balangkantis iti templo. Ti homoseksualidad ken dadduma pay a klase ti seksual nga immoralidad ket saan laeng a naipalubos no di ket nagbalinen a normal dayta! (Deut. 23:17, 18; 1 Ar. 14:24) Patien dagiti pagano a dagitoy a ritual ti pakatignayan dagiti diosda a mangpadam-eg iti daga. Adu nga Israelita ti naay-ayo kadagiti immoral a ritual ket pinilida ti nagserbi kadagiti ulbod a dios. Kinapudnona, naadipen ida ni Satanas.

 9. Sigun iti Oseas 2:16, 17, kasano a linibeg ni Satanas ti kinasiasino ni Jehova?

⁹ Maikatlo, linibegna ti kinasiasino ni Jehova. Idi kaaldawan ni propeta Jeremias, imbaga ni Jehova a kayat dagiti ulbod a propeta a malipatan ti ilina ti Naganna “gapu ken Baal.” (Jer. 23:27) Agparang nga insardeng nga usaren ti ili ti Dios ti nagan ni Jehova ken sinuktanda dayta iti Baal, kayatna sawen, “Makinkukua” wenno “Apo.” Gapu iti dayta, narigatan dagiti Israelita a mangilasin iti nagdumaan ni Jehova ken ni Baal, isu a napagtiponda ti panagdayaw ken Jehova ken dagiti ritual iti panagdayaw ken Baal.​—Basaen ti Oseas 2:16, 17 ken footnote.

10. Ania dagiti taktika nga us-usaren ni Satanas ita?

¹⁰ Dagita met laeng a taktika ti us-usaren ni Satanas ita. Tapno maadipenna dagiti tattao, gunggundawayanna dagiti normal a tarigagayda, itantandudona ti seksual nga immoralidad, ken liblibegenna ti kinasiasino ni Jehova. Usigentayo nga umuna ti maudi a taktikana.

11. Kasano a linibeg ni Satanas ti kinasiasino ni Jehova?

¹¹ Liblibegen ni Satanas ti kinasiasino ni Jehova. Kalpasan ti ipapatay dagiti apostol ni Jesus, inwaras dagiti agkunkuna a Kristiano dagiti ulbod a sursuro. (Ara. 20:29, 30; 2 Tes. 2:3) Linibeg dagitoy nga apostata ti kinasiasino ti maymaysa a pudno a Dios. Kas pagarigan, insardengda nga usaren ti nagan ti Dios iti Bibliada ken sinuktanda dayta kadagiti titulo a kas iti “Apo.” Idi inaramidda dayta, narigaten a mailasin dagiti agbasbasa iti Biblia ti nagdumaan ni Jehova ken ti dadduma nga “apo” a nadakamat iti Kasuratan. (1 Cor. 8:5) Agpada nga inusarda ti termino nga “Apo” para ken Jehova ken ni Jesus, isu a narigat a matarusan a ni Jehova ken ti Anakna ket agduma a persona ken agduma ti saadda. (Juan 17:3) Gapu iti daytoy a pannakatikaw, nabukel ti doktrina a Trinidad​—a saan nga isursuro ti Sao ti Dios. Kas resultana, patien ti adu a misterioso ti Dios ken imposible a maam-ammotayo. Anian a kinaulbod!​—Ara. 17:27.

12. Ania ti itantandudo ti ulbod a relihion, ken ania dagiti resultana kas nailawlawag iti Roma 1:28-31?

¹² Gunggundawayan ni Satanas dagiti immoral a tarigagay. Iti nagkauna nga Israel, inusar ni Satanas ti ulbod a relihion a mangitandudo iti immoralidad. Kasta met laeng ti ar-aramidenna ita. Ipalpalubos ti ulbod a relihion ti immoral nga aramid ken pagparparangenda pay ketdi a normal dayta. Isu nga adu nga agkunkuna nga agserserbi iti Dios ti saanen a mangsursurot kadagiti nalawag a moral a pagalagadanna. Inladawan ni apostol Pablo dagiti resulta dayta iti suratna kadagiti taga-Roma. (Basaen ti Roma 1:28-31.) Karaman kadagiti “banag a di maitutop” ti amin a klase ti seksual nga immoralidad, kas iti homoseksualidad. (Roma 1:24-27, 32; Apoc. 2:20) Nakapatpateg ngarud a surotentayo ti nalawag a sursuro ti Biblia!

13. Ania ti sabali pay a taktika ni Satanas?

¹³ Gunggundawayan ni Satanas dagiti normal a tarigagay. Normal laeng a kayattayo a sursuruen dagiti paglaingan a makatulong tapno maipaaytayo ti kasapulantayo ken ti pamiliatayo. (1 Tim. 5:8) Kaaduanna a masursurotayo dagita iti panageskuela wenno iti panagadal a naimbag. Ngem masapul nga agannadtayo. Iti adu a pagilian, saan laeng a dagiti praktikal a paglaingan ti maisursuro iti eskuelaan no di pay ket ti pilosopia ti tao. Kas pagarigan, maiparparegta kadagiti estudiante a pagduaduaanda ti kaadda ti Dios ken saanda a raemen ti Biblia. Maibagbaga kadakuada a patien ti amin a nalaing a tattao a nangrugi ti biag babaen ti ebolusion. (Roma 1:21-23) Dagiti kasta a sursuro ket maikontra iti sirib ti Dios.​—1 Cor. 1:19-21; 3:18-20.

14. Ania ti iparparegta ti pilosopia ti tao?

¹⁴ Ti pilosopia ti tao ket maikontra kadagiti nalinteg a pagalagadan ni Jehova. Itantandudona “dagiti aramid ti lasag” imbes a ti bunga ti espiritu ti Dios. (Gal. 5:19-23) Isursurona ti kinapannakkel, ket nagresulta dayta iti ‘panangayat dagiti tattao iti bagbagida.’ (2 Tim. 3:2-4) Dagitoy a kualidad ket kasungani ti kinaemma ken kinapakumbaba a maiparparegta kadagiti adipen ti Dios. (2 Sam. 22:28) Dadduma a Kristiano a nageskuela iti unibersidad ti nangtulad iti panagpampanunot ti lubong imbes a ti panagpampanunot ti Dios. Usigentayo ti maysa a pagarigan no ania ti posible a mapasamak.

15-16. Ania ti maadalmo iti kapadasan ti maysa a sister?

¹⁵ Kuna ti maysa a sister a nasuroken a 15 a tawen iti amin-tiempo a serbisio: “Kas bautisado a Saksi, nabasbasa ken nangnangngegkon dagiti peggad ti panageskuela iti unibersidad, ngem saanko nga impangpangag dagita. Impagarupko a saan a para kaniak dagita a balakad.” Ania ti resultana? Inaminna: “Adu nga oras ken pigsa ti inusarko nga agadal nga uray la bassiten ti panawenko nga agkararag ken Jehova. Awan payen ti gagarko a makisarita maipapan iti Biblia ken agsagana a naimbag para kadagiti gimong gapu ta nabambannogak. Imbag laengen ta nabigbigko a ti sobra a panagpokusko iti nangato nga edukasion daddadaelenna ti relasionko ken Jehova, isu a simmardengak nga ageskuela.”

¹⁶ Ania ti epekto ti nangato nga edukasion iti panagpampanunot daytoy a sister? Kinunana: “Mabainak a mangamin a gapu iti pinilik nga edukasion, nagbalinak a manangkritikar, aglalo kadagiti kakabsat, nalabes ti ekspektarek kadakuada, ken isinsinak ti bagik kadakuada. Nabayagko a nabalbaliwan dagita. Gapu iti daytoy a kapadasan, nakitak a nakapegpeggad ti saan a panangikankano kadagiti pakdaar nga ipapaay ti nailangitan nga Amatayo babaen ti organisasionna. Mas am-ammonak ni Jehova ngem iti pannakaam-ammok iti bagik. No la koma dimngegak idi!”

17. (a) Ania koma ti determinasiontayo? (b) Ania ti usigentayo iti sumaruno nga artikulo?

¹⁷ Determinadoka koma a saan nga agpaadipen iti “pilosopia ken ulbod a panagrasrason” ti lubong ni Satanas. Dika agpaallilaw kadagiti taktika ni Satanas. (1 Cor. 3:18; 2 Cor. 2:11) Saanmo nga ipalubos nga agbalin a nalibeg kenka ti kinasiasino ni Jehova. Surotem dagiti nangato a moral a pagalagadan ni Jehova. Dimo koma ipalubos nga allilawennaka ni Satanas nga agsukir iti balakad ni Jehova. Ngem kasanon no madlawmo a naimpluensiaankan iti panagpampanunot daytoy a lubong? Ipakita ti sumaruno nga artikulo no kasano a matulongannatayo ti Sao ti Dios a mangibalintuag uray kadagiti panagpampanunot ken kababalin a “natibker ti pannakapaderna.”—2 Cor. 10:4, 5.