Busorem ni Satanas ket Agtalekka Kada Jehova ken Jesus

1. Ania ti ar-aramiden ni Satanas tapno agsardengtayo nga agserbi ken Jehova?

IDI nagdesisiontayon nga agserbi ken Jehova, nagbalinen ni Satanas ken dagiti demoniona a kabusortayo. Ngem adda ti maysa a banag nga ammo ni Satanas. Ammona a no nasingedtayo ken Jehova ken no agpatulongtayo kenkuana, saannatayo a mapasardeng nga agserbi ken Jehova. Isu nga ar-aramidenna ti amin a kabaelanna tapno tallikudantayo ni Jehova. Ket tapno maaramidna dayta, imulmulana ti panagduadua iti panunottayo a saannatayo nga ay-ayaten ni Jehova ken ti Anakna.—2 Cor. 11:14; Sant. 1:6.

2. Apay a masapul nga agtalektayo kada Jehova ken Jesu-Kristo?

² Imadyinem dagiti soldado nga adda iti paggugubatan. Masapul nga agtalekda iti komanderda tapno mangabakda. Ngamin no saan, mabalin nga agpeggad ti biagda. Kasta met laeng kadatayo. Addatayo iti naespirituan a gubat. Siasino dagiti kabusortayo? Dagiti “dakes nga espiritu a puersa.” (Efe. 6:12) Ammo ni Satanas a Diablo a no kumapuy ti panagtalektayo kada Jehova ken Jesu-Kristo, dakdakkel ti posibilidadna a saantayo nga agtulnog kadakuada. Isu a dayta ti ikagkagumaanna nga aramiden. Iti daytoy nga artikulo, pagsasaritaantayo no kasanona nga inusar dayta a taktikana iti napalabas ken no kasanona nga us-usaren latta dayta agingga ita. Kalpasanna, pagsasaritaantayo no kasanotayo a malabanan dagiti silona. Iti sumaruno nga artikulo, usigentayo ti dua pay nga us-usaren ni Satanas a taktika tapno maabaktayo iti naespirituan a gubat.a

PINADAKES NI SATANAS DA JEHOVA KEN JESUS

3. Kasano a dinadael ni Satanas ti panagtalek ni Eva ken Jehova?

³ Di nagbayag kalpasan a pinarsua ni Jehova da Adan ken Eva, kayat ni Satanas a tallikudandan ni Jehova. Isu nga ania ti inaramidna? Inallilawna ni Eva. Impapatina kenkuana nga adda kano iyim-imut ti Namarsua kadakuada. Sinaludsodna: “Agpayso kadi nga imbaga ti Dios a saanyo a kankanen ti bunga ti tunggal kayo iti hardin?” (Gen. 3:​1-5) Kinombinsir ni Satanas ni Eva a saan kano nga ipapaay ni Jehova ti amin a kasapulanda nga agassawa. Ngem ammotayo a kinaulbod dayta. Ket makapaladingit ta pinati ni Eva ni Satanas, ket idi kuan, uray met ni Adan. Tinallikudandan ni Jehova, Daydiay nangipaay iti amin kadakuada.—Gen. 3:6.

4. Kasano a pinadakes ni Satanas ni Jehova idi kaaldawan ni Job?

⁴ Manipud kada Adan ken Eva, saan a nagsarsardeng ni Satanas a mangpadakes ken Jehova. Kas pagarigan, nangusar ni Satanas iti tallo a lallaki tapno pagduaduaenda ni Job nga ay-ayaten isuna ni Jehova ken ipatpategna ti kinamatalekna. (Job 22:​1-3) Pinarparigat isuna ni Satanas. Impagarupna a no maparigatan ni Job, pabasolenna ni Jehova ken agsardengen nga agserbi kenkuana. Ngem kamali ni Satanas. Ngamin, nagtultuloy latta a matalek ni Job iti gayyemna a ni Jehova.—Job 27:​1, 5.

5. Ania ti inaramid ni Satanas tapno saan a suroten dagiti tattao ni Jesus? (Mateo 11:19)

⁵ Idi immay ni Jesus ditoy daga, pinadas ni Satanas a lapdan dagiti tattao a sumurot ken Jesus. Tapno maaramidna dayta, inusarna dagiti lider ti relihion ken ti dadduma pay nga agiwaras kadagiti kinaulbod maipapan ken Jesus. Ket adu ti namati kadagita. Isu nga inakusaranda isuna kas maysa a kriminal ken pinapatayda.—Basaen ti Mateo 11:19; 27:​27-31; Mar. 14:​55, 56; Juan 8:​41-45.

6-7. Ania dagiti inaramid ni Satanas tapno mapasardengna dagiti adalan ni Jesus a mangasaba?

⁶ Kalpasan ti ipapatay ni Jesus, pinadas ni Satanas nga upayen dagiti pasurot ni Jesus tapno agsardengdan a mangasaba maipapan kenkuana. Ania dagiti inaramidna? Umuna, nangimula iti panagduadua iti panunot dagiti tattao a saan kano a pinagungar ti Dios ni Jesus. Adda dagiti inusarna nga agiwaras iti kinaulbod a tinakaw kano dagiti adalan ni Jesus ti bangkayna. (Mat. 28:​11-15) Kalpasanna, inusar met ni Satanas dagiti lider ti relihion ken dagiti agtuturay a mangidadanes kadagiti pasurot ni Jesus. Kayat ni Satanas a butbutngen ida tapno mapanunotda a nakadagdagsen unay ti trabaho nga inted kadakuada ni Jesus.—Ara. 7:57–8:1; 12:​1-3; 28:22.

⁷ Makapaladingit ta dadduma kadagiti immuna a Kristiano ti nagsardeng a mangasaba. Ngem kaaduanna ti nagtalinaed a matalek ken determinado nga agtultuloy a mangasaba. Nabigbigda ngamin a ti talaga a kabusorda ket ni Satanas ken dagiti demoniona. (Ara. 4:​18-20; 1 Ped. 5:8) Kasanotayo met ngay ita? Ania dagiti ar-aramiden ni Satanas tapno padasennatayo a pasardengen nga agserbi ken Jehova?

ITULTULOY A PADPADAKSEN NI SATANAS DA JEHOVA KEN JESUS

8. Kasano nga us-usaren ni Satanas ti ulbod a relihion a mangiwaras iti kinaulbod maipapan kada Jehova ken Jesus?

⁸ Maysa kadagiti kangrunaan nga us-usaren ni Satanas a taktikana ita ket ti pananglilibegna iti kinapudno maipapan kada Jehova ken Jesus. Kasano? Kas “ama ti kinaulbod,” us-usarenna ti ulbod a relihion a mangpadakes kada Jehova ken Jesus. (Juan 8:44) Kas pagarigan, bulbulsekenna ti panunot dagiti tattao tapno saanda a maammuan ti agpaypayso maipapan kada Jehova ken iti Anakna. (2 Cor. 4:​3, 4) Kaaduanna nga us-usarenna ti dadduma a lider ti relihion a mangisuro a ni Jesus ken ti Amana ket maymaysa. Gapu iti dayta, adu a tao ti saan man la a makaam-ammo a ti nagan ti Dios ket Jehova. Isu a ti daydayawenda ita ket ni Jesus. Ngem saan a kayat da Jehova ken Jesus ti kasta a panagdaydayaw. (Mat. 4:10; Juan 4:23) Gapu ta nabulsek ti pampanunot dagiti tattao, patpatienda ti maisursuro kadakuada. Dayta ti rason a no mapantayo mangasaba, saandatayo a denggen ken busbusorendatayo pay ketdi no dadduma.

9. Kasano nga us-usaren ni Satanas ti ulbod a relihion tapno saan a maam-ammo dagiti tattao ni Jehova? (Jeremias 23:​26, 27)

⁹ Siempre, tapno magayyemmo ti maysa, ti umuna a damagem kenkuana ket ti naganna. Iti umasping a pamay-an, tapno magayyem dagiti tattao ni Jehova, masapul a maam-ammoda nga umuna ti naganna. Ngem saan a kayat dayta ni Satanas. Isu a nabayagen nga us-usarenna ti ulbod a relihion a mangilemmeng iti nagan ti Dios. (Basaen ti Jeremias 23:​26, 27.) Ibaga ti Biblia a ti nagan ti Dios ket natibker ken mangsalaknib a torre. Ngem ania ti inaramid ti kabusor? Siniguradona a maikkat ti nagan ti Dios iti adu a patarus ti Biblia. (Prov. 18:10) Us-usaren met ni Satanas ti ulbod a relihion a mangisuro kadagiti tattao a ti Dios ti adda iti likudan ti panagrigrigatda. Gapu iti dayta, marigatan uray dagiti nasingpet a tattao nga umasideg ken Jehova ken mangibilang kenkuana kas gayyemda. (Sant. 4:8) Ngem aguray. Ti agpayso, pakpakapuyen met ni Satanas uray ti pammati dagiti agserserbi ken Jehova.

10. Apay a posible a ti maysa a Kristiano guraenna ni Jehova?

¹⁰ No adda problematayo, kayat ni Satanas a patientayo a saannatayo nga ay-ayaten ni Jehova. Mangnamnama met a guraentayo ni Jehova no kasla saan nga agpatpatingga ti problematayo. (Prov. 19:3) No mangrugin a guraen ti maysa ni Jehova, baka mapanunotna: ‘No saanak met la a tulongan ni Jehova, apay pay koma nga aramidek ti pagayatanna?’ Ngem no kastan ti panagpampanunot ti maysa, asino ngatan ti maparparagsakna? Ni Satanas, saanen a ni Jehova.

11. Kasano a mangimulmula ni Satanas iti panagduadua iti panunottayo maipapan kadagiti pagalagadan ni Jehova? (Kitaen met ti ladawan.)

¹¹ Maysa kadagiti us-usaren ni Satanas a mangimula iti panagduadua iti panunottayo maipapan kadagiti pagalagadan ni Jehova ket ti social media. Kas pagarigan, adu a tattao iti social media ti mangibagbaga a daanen ti Biblia. Isu a panagkunada ket nasaysayaat laengen nga isuda ti agdesision no ania ti naimbag ken dakes. Ket gapu ta ni Satanas “ti agturay iti lubong,” komkombinsirenna dagiti tattao a ti naimbag ket dakes. Dayta ti paglainganna!—Juan 14:30; Isa. 5:20; 1 Tim. 4:​1, 2.

12. Apay a masapul a liklikantayo dagiti kinaulbod ni Satanas?

¹² No dumngegtayo kadagiti kinaulbod ni Satanas, mabalin a mayadayotayo ken Jehova. Imbaga ti agtutubo a sister a panaganantayo iti Shannon: “Saanko a dagus a nadlaw a madaddadael gayamen ti panangmatmatko iti naimbag ken dakes gapu kadagiti maisursuro kaniak idiay eskuelaan ken kadagiti makadkaduak. Nadlawko a no ad-adu nga oras nga ag-social media-ak, ad-adda met a kayatko a tuladen ti panagpampanunot dagiti tattao iti social media. Gapu iti dayta, in-inut a nayadayoak ken Jehova, iti pamiliak, ken kadagiti kakabsat.” Ngem imbag laengen ta nagbalbaliw ni Shannon. Nagpokus manen iti relasionna ken Jehova. Ania ti nakatulong kenkuana?

13. Ania ti masursurom iti kapadasan ni Shannon?

¹³ Naamiris ni Shannon a masapul nga agregget isuna tapno maitultuloyna ti nasayaat a relasionna kada Jehova ken Jesus. Imbagana: “Nagkararagak ken inkagumaak ti nagtignay maitunos kadagiti kararagko. Nag-research-ak kadagiti publikasiontayo. Nagdakkel ti naitulong kaniak ti video a Young People Ask—How Can I Make Real Friends?b Iti dayta a video, adda agtutubo a sister a naipasango iti adu a problema a kas met laeng iti mapadpadasak. Nagustuak ti inaramidna ta immasideg ken dimmawat iti tulong kadagiti nagannakna. Isu a dayta met ti inaramidko. Tinulongandak da Mama ken Papa, dagiti panglakayen, ken dagiti nataengan iti naespirituan a sister iti kongregasionmi tapno mayadayoak kadagiti saan a nasayaat a kakadua. Adda ti nasursurok iti kapadasak. Saan gayam nga umanay ti basta pannakigimong ken panagtulnog kadagiti nagannakko tapno maibagak nga agserserbiak ken Jehova. Masapul met a palagdaek ti relasionko kenkuana ken agbalinak a kombinsido a dagiti naammuak iti Biblia ket kinapudno.”

KOMBINSIDOKA KOMA A GAYYEMMO DA JEHOVA KEN JESUS

14. Ania ti aramidentayo tapno saan a mapakapuy ni Satanas ti pammatitayo? (Kitaen met ti ladawan.)

¹⁴ Tapno maitultuloytayo ti nasayaat a relasiontayo ken Jehova, masapul a pilientayo a naimbag dagiti pakikadkaduaantayo. (Sant. 4:4) Masapul met nga agannadtayo ta baka patientayon ti amin a mabasbasa wenno mangmangngegtayo nga ibagbaga dagiti tattao iti lubong. Baka ngamin saan met nga agpaypayso dagita wenno nabaliwan pay ketdi. No ditay agannad, baka mangrugin a patientayo dagita a kinaulbod. Ngem no adalentayo a naimbag ti Biblia, basaentayo dagiti publikasiontayo, ken no regular a makigimongtayo, saantayo a nalaka a mamatpati kadagiti kinaulbod ni Satanas. No ad-adu ti ammotayo maipapan iti kinapudno, nalaklakatayto a mailasin ti kinaulbod ken saanto a mapakapuy ni Satanas ti pammatitayo.—Prov. 13:20; Ara. 17:11.

15. Ania ti aramidentayo tapno kombinsidotayo nga ay-ayatendatayo da Jehova ken Jesus?

¹⁵ No adalentayo a naimbag ti Biblia, makombinsirtayo nga ay-ayatendatayo da Jehova ken Jesus. (Prov. 22:19) No utobentayo met dagiti karakter iti Biblia a tinulongan ken inaywanan da Jehova ken Jesus, maibilangtayto met ida kas mapangnamnamaan a gagayyem. Adu met ti mabasatayo iti Biblia a mangipakita nga ay-ayatendatayo da Jehova ken Jesus. Kas pagarigan, imbaga ni Jehova a dakdakkel ti panagayatna kadagiti adipenna ngem iti panagayat ti agpaspasuso nga ina iti anakna. (Isa. 49:15) Ibilbilangna met a “maipatpateg a sanikua” dagiti mangay-ayat iti naganna. (Mal. 3:​16, 17, ftn.) Ni ngay met Jesus? Iti Biblia, imbagana nga ay-ayatennatayo nga uray la insakripisiona ti biagna para kadatayo.—Juan 15:​12, 13.

16. Ania ti maitulongna no lagipentayo dagiti kapadasantayo ken no denggentayo dagiti kapadasan ti dadduma? (Salmo 118:​5, 6)

¹⁶ Nagsayaat no lagipentayo no kasanodatayo a tinulongan da Jehova ken Jesus. Apay? Makatulong dayta tapno kombinsidotayo nga ay-ayatendatayo. Mabalintayo a lagipen dagiti kararagtayo a sinungbatan ni Jehova. Mabalintayo pay a sublian dagiti tiempo a kasla maib-ibusen ti pigsatayo ngem pinabilegnatayo. Ngem adda pay ti mabalintayo nga aramiden. Mabalintayo a saludsoden dagiti kakabsat no kasanoda a narikna ti tulong ni Jehova. (Prov. 22:17) Iti kasta, tumibker ti panagtalektayo a kanayon nga adda da Jehova ken Jesus iti abaytayo ken sisasaganada a tumulong kadatayo aniaman a problema ti pakaipasanguantayo.—Basaen ti Salmo 118:​5, 6.

17. Sigun iti Juan 10:​29, ania ti inkari ni Jesus kadagidiay mangtaginayon iti relasionda kenkuana ken iti Amana?

¹⁷ Kayattayo amin a mataginayon ti nadekket a relasiontayo kada Jehova ken Jesus. Ngem agingga nga adda pay laeng ni Satanas ken dagiti demoniona, kasapulantayo a labanan dagiti ar-aramidenda a mangpakapuy iti panagtalektayo kada Jehova ken Jesus. (Apoc. 20:​1-3, 10) Ngem kasanotayo a maaramid dayta? Masapul nga itultuloytayo ti nadekket a pannakigayyemtayo ken Jehova. Masapul met nga agtalinaedtayo a kombinsido nga ay-ayaten ken ipatpategdatayo da Jehova ken Jesus. No aramidentayo dagita, awanto ti ‘makaagaw kadatayo iti ima ti Ama’ kas ti inkari ni Jesus.—Basaen ti Juan 10:29; Sant. 4:7.

18. Ania ti pagsasaritaantayo iti sumaruno nga artikulo?

¹⁸ Iti sumaruno nga artikulo, adalentayo ti dua pay a taktika nga us-usaren ni Satanas tapno maabaktayo iti naespirituan a gubat. Umuna, padpadasenna a dadaelen ti panagkaykaysa ti kongregasion. Maikadua, im-impluensiaanna dagiti tattao a mangidadanes kadatayo. Kasanotayo a mangabak kadagitoy a taktikana? Kitaentayto.