Kayam ti Mangabak!

1. Asino a talaga dagiti kabusortayo? (Efeso 6:​11, 12)

KAS adipen ni Jehova, saantayo a makiramraman iti gubat. (Isa. 2:4; Juan 18:36) Ngem ibaga ti Biblia a masapul a labanantayo ni Satanas ken dagiti demoniona. (Basaen ti Efeso 6:​11, 12.) Kasanotayo ida a maabak? Masapul nga agtalektayo iti tulong ni Jehova. Ken adda pay. Masapul nga ammotayo dagiti taktika nga us-usaren ni Satanas ken dagiti demoniona kontra kadatayo ken iti naespirituan a pamiliatayo.

2. Ania ti usigentayo iti daytoy nga artikulo?

² Iti napalabas nga artikulo, napagsasaritaantayo no kasano a padpadasen a pakapuyen ni Satanas ti panagtalektayo kada Jehova ken Jesus. Iti daytoy met nga artikulo, usigentayo ti dua pay a taktika nga us-usaren ni Satanas. Umuna, ikagkagumaanna a dadaelen ti panagkaykaysatayo kas agkakabsat. Maikadua, us-usarenna dagiti tattao a mangbusor kadatayo tapno masinga wenno mabutengtayo. Kayatna ngamin nga agsardengtayo a mangaramid iti trabaho nga inted kadatayo ni Jehova.

IKAGKAGUMAAN NI SATANAS A DADAELEN TI PANAGKAYKAYSATAYO

3. Kasano nga ikagkagumaan ni Satanas a dadaelen ti panagkaykaysatayo?

³ Ikagkagumaan ni Satanas a dadaelen ti panagkaykaysatayo kas agkakabsat. Apay? Kayatna ngamin a datayo ti aglalaban imbes nga isuna ti labanantayo. Kasanona nga ar-aramiden dayta? Padpadasennatayo nga impluensiaan a mangtulad kadagiti tattao iti lubongna. Adu kadakuada ti naranggas ken saan a naayat. Kaaduanna nga awan panagtalekda iti maysa ken maysa ken manangkritikarda. Ket kasta ti kayat ni Satanas a pagbalinantayo. Mangnamnama nga agbalin a negatibo ti panangmatmattayo kadagiti kakabsat ken ibilangtayo ida a kalaban.—Roma 16:17.

4. Apay a kinalaban ni Ari Saul ni David? (Kitaen met ti ladawan.)

⁴ Kitaem ti napasamak ken Ari Saul. Idi damo, ay-ayatenna ni David. Kaykayatna pay ngarud ta nakalalaing a makigubat. (1 Sam. 18:5) Ngem idi agangay, ginuranan ti matalek kenkuana a ni David. Apay? Gapu iti imon. Nakitana a mas maragragsakan dagiti tattao ken David ngem kenkuana. Gapu iti dayta, namin-adu a pinadasna a patayen ni David. (1 Sam. 18:​9-11) Ket no kas pagarigan ta napapatay ni David, napagustuan koma ti kayat ni Satanas. Apay? Nadutokan ngamin idin ni David kas sumaruno nga ari ti Israel kas imbilin ni Jehova. (1 Sam. 16:13) Ket no kas pagarigan ta saan a napasamak dayta, nakaragragsak la ketdi ni Satanas. Imadyinem nga uray la arigna aglagtolagto iti ragsak idi mabuybuyana nga iremremedio ni Saul a papatayen ti pinili ni Jehova nga agbalin nga ari.

5. Apay a kayat ti Diablo nga umapal ken agimontayo kadagiti kakabsat? (Santiago 3:​14-16)

⁵ No agkaykaysatayo, bendisionan ken tulongannatayo ni Jehova. (Sal. 133:1) Saan a kayat dayta ni Satanas. Isu nga ania ti ar-aramidenna? Kayatna nga umapal ken agimontayo kadagiti kakabsat, kas iti narikna ni Saul ken David. Ammona ngamin a no aramidentayo dayta, marigatantayo a mangipakita iti ayat. (Mar. 12:​30, 31) No mapasamak dayta, posible a saanen nga awaten ni Jehova ti panagdaydayawtayo. Dayta ti rason a direkta a pinakdaarannatayo ni Santiago a masapul nga agannadtayo ta amangan no agtubo ti imon iti pusotayo.—Basaen ti Santiago 3:​14-16.

6. Ania ti masursurom iti ulidan ni Jonatan? (Kitaen met ti ladawan.)

⁶ No talaga nga ay-ayatentayo dagiti kakabsat, saantayo nga apalan ida. Imbes ketdi, agbalintayo a napudno a gayyem kadakuada. Kasta ti inaramid ti anak ni Saul a ni Jonatan. Saanna a tinulad ti amana a nagimon ken David. Imbilangna ni David kas gayyemna. Impasiguradona pay ketdi a tungpalento ni Jehova ti karina kenkuana. Imbagana: “Sika ti agarinto iti Israel.” Talaga a nakapakpakumbaba ni Jonatan. Sinuportaranna ti pagayatan ni Jehova a ni David ti sumaruno nga ari ti Israel.—1 Sam. 23:​16, 17.

7. Ania ti aramidentayo tapno saan a madadael ni Satanas ti panagkaykaysatayo? (Efeso 4:​25-27)

⁷ Adda pay ti us-usaren ni Satanas tapno madadael ti panagkaykaysatayo. Ania dayta? Ti panagdudumatayo. Kas agdaydayaw ken Jehova, agdudumatayo iti naggapuan, opinion, kababalin, puli, wenno kultura. Ita, kayat ni Satanas a patientayo a saantayo a magayyem dagiti kakabsat gapu iti panagdudumatayo. Kayatna nga agririritayo ken guraentayo dagiti kakabsat. Ania ngarud ti aramidentayo tapno saanna a madadael ti panagkaykaysatayo? No adda ti saantayo a nagkinnaawatan iti maysa a kabsat, urnosentayo a dagus. (Basaen ti Efeso 4:​25-27.) Paunegentayo ti ayattayo kadagiti kakabsat. Laglagipentayo a pasettayo amin ti maymaysa a bagi. Kasapulantayo ti maysa ken maysa ken ipatpategnatayo amin ni Jehova. (1 Cor. 12:12) Tandaanantayo a ti talaga a kalabantayo ket ni Satanas ken dagiti demoniona, saan ketdi a dagiti kakabsattayo. Ti agpayso, kakaduatayo ida!—1 Ped. 5:​8, 9.

8. Ania ti masapul nga aramidentayo no adda ti naibaga wenno naaramid ti maysa a kabsat a nakasaktantayo?

⁸ No adda ti naibaga wenno naaramid kenka ti maysa a kabsat a nakasaktam, laglagipem nga imperpektoda met a kas kenka. No kanayonmo ngamin a makadua ti maysa, mas makitam dagiti pagkapuyanna. (Ecl. 7:20) Ket no mapasamak dayta, ania ti aramidem? Surotem ti balakad nga imbaga ni Jehova nga agiinnanustayo. Ken no nasaktannatayo ti maysa, dagus koma a pakawanentayo. (Col. 3:​12-14) No aramidem dayta, makitintinnulongka kada Jehova ken Jesus tapno agtalinaed ti panagkaykaysatayo.—Juan 17:​20, 21.

US-USAREN NI SATANAS TI IBUBUSOR TAPNO UPAYENNATAYO

9. Ania pay ti us-usaren ni Satanas tapno upayennatayo?

⁹ Ti maysa pay nga us-usaren ni Satanas tapno upayennatayo ket ti pannakaidadanes. Impakdaar ni apostol Pablo kadagiti amin a pudno a Kristiano a maipasangodanto iti pannakaidadanes. (2 Tim. 3:12) No maidadanestayo, ammotayo a kinaawan hustisia dayta. No mapasamak dayta, baka ibusentayon ti oras ken pigsatayo a mangilaban iti hustisia wenno agibales. Baka mabaybay-antayon ti adayo a napatpateg—ti panangikasaba iti maipapan iti Pagarian.—Roma 12:​19-21.

10. Ania ti inaramid ni Isaac idi nakapasar iti kinaawan hustisia?

¹⁰ Usigentayo ti ulidan ni Isaac nga anak ni Abraham. Nakabakbaknang ni Isaac. Ket gapu iti dayta, inapalan dagiti Filisteo a kaarrubana. Ginaburanda dagiti bubon a kinali dagiti adipen ni Abraham. (Gen. 26:​12-18) Gapu ta kasapulan unay ni Isaac ti danum para iti pamiliana ken para kadagiti tarakenda, pinilina ti umadayo ken agkali iti sabali a bubon. Ngem imbaga dagiti Filisteo a kukuada kano manen dagidiay a bubon. Talaga a makapaupay dayta a kinaawan hustisia. Ngem ania ti inaramid ni Isaac? Pinilina ti kappia. Immakar manen isuna ta saanna a kayat a makiriri dagiti pastorna kadagiti Filisteo. Isu a binendisionan ni Jehova. (Gen. 26:​19-25) No maipasangotayo iti kinaawan hustisia, kasanotayo a matulad ti kinaalumamay ken kinaanus ni Isaac?

11. Ania ti inaramid ni Jesus idi saan a nasayaat ti panangtrato kenkuana dagiti tattao?

¹¹ Idi adda ditoy daga ni Jesus, adu ti saan a nasayaat a nakaipasanguanna. Kas pagarigan, imbaga ti dadduma a kakabagianna a nadadaelen ti panunotna. (Mar. 3:21) Kanayon met a kinueskuestionaran dagiti lider ti relihion ti panangaskasabana. (Luc. 11:​15, 16) Daytoy pay. Trinaidor isuna ti maysa kadagiti kasingedan kenkuana. (Mat. 26:​14-16) Nakarkaro pay, nakitinnulong dagiti panguluen a papadi kadagiti agtuturay tapno mapapatayda isuna. (Mar. 15:​1, 13-15) Ngem ania ti inaramid ni Jesus? Saanna nga impalubos a ti ibubusor ti mangpabannayat iti panagserbina ken Jehova ken saan met a pulos a nagibales. Idi naareston ni Jesus, pinadas ni apostol Pedro a tulongan isuna. Isu a piningasna ti lapayag ti adipen ti nangato a padi. Ngem saan a kayat ni Jesus dayta. Ania ti inaramidna? Pinaimbagna ti lapayag ti lalaki. (Luc. 22:​50, 51) Iti amin a napasaran ni Jesus, saanna a pulos a pinadas ti agibales. Imbes ketdi, inaramidna ti kapatgan iti amin—ti pagayatan ni Jehova.

12. Sigun iti Mateo 5:​43, 44, kasanotayo a tratuen dagiti bumusbusor wenno mangidaddadanes kadatayo?

¹² Kas ken Jesus, maipaspasangotayo met kadagiti situasion a mabalin a mangupay kadatayo. Padpadasen ni Satanas a pasardengen ti panangasabatayo. Us-usarenna ti dadduma wenno dagiti saan a Saksi a kapamiliatayo tapno busoren ken idadanesdatayo. Ngem kas iti imbaga ni Jesus, masapul nga ayatentayo uray dagidiay mangidaddadanes kadatayo. (Basaen ti Mateo 5:​43, 44.) Kayatna a sawen dayta a saantayo a pulos a guraen dagiti mangidaddadanes kadatayo. Imbes ketdi, ikagumaantayo nga ipakita ti kinaimbag, kinaanus, ken respeto iti amin, uray kadagidiay bumusbusor kadatayo wenno iti trabahotayo, kas iti imbilin ni Jesus.—1 Cor. 13:4.

13. Apay a masapul a respetuentayo ti gobierno uray no busorendatayo? (Kitaen met ti ladawan.)

¹³ Masapul met a respetuentayo ti gobierno uray no mangipatpatungpalda kadagiti linteg a mangparigat iti biagtayo wenno mangpasardeng iti panagdaydayaw ken panangasabatayo. Apay? Dayta ngamin ti imbilin ni Jehova nga aramidentayo. (Roma 13:​1, 2) Posible a saan met ketdi a ni Satanas ti direkta a makinggapuanan iti amin a di nainkalintegan a desision nga ar-aramiden ti gobierno. Kayatna a guraentayo dagiti gobierno agingga a makaibagatayo kadagiti negatibo maipapan kadakuada wenno labanantayon ida. No mapasamak dayta, sigurado la ketdi a maragsakan isuna ta naikompromisotayon ti neutral a takdertayo. Kasta ngamin ti ar-aramiden dagiti tattao iti lubong. No adda ti saanda a kayat a desision, agprotestadan. Ngem saantayo a kasta a Kristiano. (Prov. 24:​21, 22, ftn.; Ecl. 8:​2, 3) Laglagipentayo a no adda ti aramidentayo a mangikompromiso iti neutral a takdertayo, ni Satanas ti maparparagsaktayon.—Juan 15:19.

14. Ania ti masapul a laglagipentayo maipapan kadagidiay bumusbusor kadatayo?

¹⁴ Adda dagiti dati a bumusbusor iti kinapudno a nagbalinen a naregta a Saksi. (1 Tim. 1:​12, 13) Isu a ‘no uyawen ken idadanesdatayo dagiti tattao ken no padpadaksendatayo,’ laglagipentayo a mabalin nga agbalbaliwdanto. (Mat. 5:11) Ikararagtayo a palubosandatayo dagiti autoridad a mangitultuloy iti panagdaydayawtayo. (1 Tim. 2:​1, 2) Ikararagantayo met dagiti bumusbusor a kapamilia, katrabahuan, ken kaeskuelaantayo. Agpatulongtayo ken Jehova tapno madanontayo ti pusoda ken agbalintayo a naanus. Adda maysa a babai nga adu a tawen a binusbusorna ti asawana. Ngem ita, maysan a Saksi. Imbagana: “Tapno matulongan ti maysa nga agbalbaliw, nakapatpateg ti kinaanus. Masapul a bennatem a bennaten ti anusmo.”

15. Apay a ditay koma padpadasen nga ilinteg ti amin a kinaawan hustisia a makitkita wenno mapaspasarantayo ita?

¹⁵ No padasentayo nga ilinteg ti amin a kinaawan hustisia a makitkita wenno mapaspasarantayo ita, sigurado la ketdi a maibus ti oras ken pigsatayo. (Ecl. 1:15) Ngem laglagipentayo nga ammo ni Jehova ti mapaspasarantayo. (Sal. 37:18) Isu nga iti masanguanan, babaen ti Pagarianna, ikkatennanto ti amin a kinadakes nga inaramid ni Satanas ken dagiti demoniona. (1 Juan 3:8; Apoc. 21:5) Ngem bayat nga ur-urayentayo dayta, masapul nga itultuloytayo ti agbalin a naanus ken ipakita ti ayat kadagiti tattao. Ania ngarud ti pagpokusantayo ita? Usarentayo ti oras ken pigsatayo a mangtulong iti adu a tattao tapno agbalinda a gayyem ni Jehova.

KAYATAYO TI MANGABAK!

16. Ania ti makatulong kadatayo tapno maabaktayo ni Satanas ken dagiti demoniona? (Kitaen met dagiti ladawan.)

¹⁶ Ipaspasigurado ti Biblia kadatayo a kayatayo nga abaken ni Satanas ken dagiti demoniona. (Sant. 4:7; 1 Juan 5:​4, 5) Ngem ania ti makatulong? Ibaga ti Biblia a ti pammatitayo. (Efe. 6:16) Isu nga itultuloymo a pabilgen ti pammatim kada Jehova ken Jesus. Dayta met ti tumulong kenka tapno maitultuloymo a maipakita ti ayat kadagiti kakabsat ken agtultuloy ti panagkaykaysatayo.

17. Ania ti determinasionmo?

¹⁷ Sapay koma ta saantayo a pulos a tumulok iti aniaman a taktika nga usaren ni Satanas a mangdadael iti panagkaykaysatayo ken mangupay kadatayo a mangasaba. Ikarkari da Jehova ken Jesus nga agingga a saantayo ida a pampanawan, itultuloydatayo a tulongan. Laglagipentayo met a kaduatayo dagiti kakabsat a manglaban iti kangrunaan a kabusortayo a ni Satanas. Kadagiti met bumusbusor kadatayo, laglagipentayo ti imbalakad ni Jesus nga agbalintayo a naimbag kadakuada. (Luc. 6:​27, 28) Isu a dika sumuksuko a manglaban ken Satanas ken dagiti demoniona. Kayam ti mangabak! Sigurado dayta.