Ipakitam a Managyamanka—Apay ken Kasano?

1. Ania ti masursurom iti kapadasan ni John? (Kitaen met dagiti ladawan.)

ADDA idi brother nga agtawen iti 95. Johna ti naganna. Nakapuy idin ti salun-atna, isu a masapulen a maaywanan. Kada aldaw, no adda idi mangbisita wenno tumulong kenkuana uray iti babassit lang a pamay-an, kanayon nga ibaga ni John ti “Thank you.” Sa isuratna ti naganda iti bassit a notebook-na. Ket sakbay a maturog, agpatulong iti mangay-aywan kenkuana tapno agparintumeng iti abay ti kamana sa agkararag. Pagyamananna ni Jehova gapu kadagiti tinignayna a tumulong kenkuana iti dayta nga aldaw. Imbaga ti maysa a brother a nangaywan ken John: “Uray no agkakapsut idin ni Angkel John, kanayon latta a naragsak ken saan a pulos a nagrekreklamo.” Ania ti masursurotayo iti kapadasan ni John? No managyamantayo, agbalintayo a naragsak uray no narigat ti kasasaadtayo.

2. Ania a kababalin ti ipakpakita ti adu a tattao ita?

² Makapaladingit ta adu ita ti saan a managyaman. Saantay met ketdin a masdaaw iti dayta ta impakpakauna ti Biblia nga iti maudi nga al-aldaw, adunto ti saan a managyaman. (2 Tim. 3:​1, 2) Mabalin a maliplipatan met laeng ketdi ti dadduma ti agyaman. Ngem pampanunoten ti adu ita a saandan a kasapulan ti agyaman iti kinaimbag a naipakita kadakuada ta maikarida kano met iti dayta. Ngem saan a husto ti kasta a kapanunotan ta agbalbalindan a managimbubukodan.

3. Ania ti pagsasaritaantayo iti daytoy nga artikulo?

³ Saan a kas iti adu a tattao iti lubong ita, masapul a managyamantayo. Kasta ti imparegta ni apostol Pablo: “Ipakitayo a managyamankayo.” (Col. 3:15) Isu a saan laeng koma nga agpatingga iti rikna ti panagyamantayo. Masapul met nga ipakitatayo dayta. Iti daytoy nga artikulo, pagsasaritaantayo dagitoy tallo a saludsod: (1) Apay a masapul a managyamantayo? (2) Kasanotayo nga agbalin a mas managyaman? (3) Kasanotayo a maipakita a managyamantayo?

APAY A MASAPUL A MANAGYAMANTAYO?

4. Apay a pagdaksantayo no saantayo a managyaman?

⁴ Pagdaksantayo no saantayo a managyaman. Apay? Kaaduanna a saan a naragsak dagiti tattao a saan a managyaman. Ibaga ti Biblia: “Dakes ti amin nga aldaw daydiay agrigrigat.” (Prov. 15:15) Agpayso a no adda problematayo, saantayo a naragsak. Siempre, saantayo a makontrol dagiti problema a maipasango kadatayo, ngem makontroltayo ti emosiontayo no maipasangotayo kadagita. Ngem no ti laengen problematayo ti pagpokpokusantayo, baka maibagatayo a “dakes” wenno nagmadi ti amin nga aldawtayo. Ket no kastan ti mapampanunot wenno marikriknatayo, marigatantayon a mangkita kadagiti positibo a mapaspasamak iti biagtayo ket saantayon a naragsak.

5. Apay a naragragsaktayo no managyamantayo?

⁵ Pagsayaatantayo no managyamantayo. Apay? Naragragsaktay ngamin no kua. Kuna ti maudi a paset ti Proverbio 15:15: “Inaldaw nga agpiesta daydiay naragsak ti pusona.” No ‘naragsak ti puso’ ti maysa, kaaduanna nga agpokpokus kadagiti bambanag a positibo wenno kadagiti bambanag a pagyamyamananna. Ket malipatanna no kuan dagiti problemana. Isu a no managyamantayo ken agpokpokustayo iti positibo, naragragsaktayo ta arigna ‘inaldaw nga agpiespiestatayo.’

6. No kanayon a pagyamanantayo ni Jehova, apay a makatulong dayta tapno saantayo a “madanagan”? (Filipos 4:​6, 7)

⁶ Basaen ti Filipos 4:​6, 7. No kanayon a pagyamanantayo ni Jehova kadagiti kararagtayo, makatulong dayta tapno saantayo a “madanagan.” Apay? Ngamin, imbes a sangkapanunottayo dagiti posible a mapasamak wenno dagiti mabalin nga awan kadatayo iti sumaruno nga aldaw, mas agpokustayon no kasanonatayo a tinulongan ni Jehova. Ket no laglagipentayo no kasanonatayon a tinulongan ni Jehova, mas makapagtalektayo nga itultuloynatayo nga aywanan. Isu a saantayon a madanagan. (Mat. 6:​25-34) Kasta met, no mangngeg ni Jehova dagiti naimpusuan a kararagtayo, a no dadduma ket adda pay nayonna a sasaibbek, ipaay ni Jehova kadatayo “ti talna ti Dios,” ti talna a mangpakalma iti isip ken pusotayo tapno saantay unayen a madanagan.

7. Apay a mas sumingedtayo ken Jehova no managyamantayo? (Santiago 1:17)

⁷ No managyamantayo, mas sumingedtayo ken Jehova. Amin a nasayaat a banag nga adda kadatayo ket naggapu ken Jehova. (Basaen ti Santiago 1:17.) Nakaad-adu ti inregalona kadatayo, a pakairamanan ti subbot ken ti namnama a biag nga agnanayon. Apay nga intedna dagita? Saan a gapu ta obligado a mangaramid iti dayta, no di ket ay-ayatennatayo ngamin. (Roma 3:24; Efe. 2:8) Isu a no agyamantayo ken Jehova gapu ta ay-ayatennatayo ken gapu iti amin a nagsasayaat nga intedna kadatayo, mas sumingedtayo kenkuana. Kasta met, ad-adda pay nga ibilangtayo isuna kas ti nadungngo nga Amatayo ken ti kasayaatan a Gayyemtayo.

KASANOTAYO NGA AGBALIN A MAS MANAGYAMAN?

8. Apay a nasayaat a panunotentayo no kasanonatayo a tinulongan ni Jehova iti napalabas? (2 Corinto 4:7)

⁸ Panunotem no kasanonaka a tinulongan ni Jehova iti napalabas. Kas pagarigan, adda kadin narigat a situasion a nakaipasanguam? Mabalin a natayanka iti ipatpateg iti biag, nagsakitka, wenno naidadaneska gapu iti pammatim. Baka naisaludsodmo, ‘Kasanok a nakaya daydiay?’ Ammom a saan a gapu iti bukodmo a pigsa wenno bileg. Imbes ketdi, ammom a ni Jehova ti timmulong kenka ta inikkannaka iti bileg a nalablabes ngem iti gagangay. (Basaen ti 2 Corinto 4:7; kitaen ti study note a “the power beyond what is normal.”) Isu a no panunotem no kasanonaka a tinulongan ni Jehova iti napalabas, mas matignayka nga agyaman kenkuana gapu iti amin nga inaramidna para kenka.—Sal. 103:2.

9-10. Ania dagiti bendision nga ipapaay ni Jehova kenka iti kada aldaw? (Kitaen met ti ladawan.)

⁹ Panunotem dagiti bendision nga adda kenka. Ibagbaga ti Biblia: “Agyamankayo gapu iti amin a banag.” (1 Tes. 5:18) Kasanom a maaramid dayta? Kada aldaw, bilangem dagiti bendisionmo. Mabalinmo nga aramiden dayta iti aniaman nga oras. Baka kayatmo iti agsapa tapno naragsak a rugiam ti aldawmo ken inspiradoka iti agmalmalem. Mabalin met nga iti rabii tapno dagiti positibo a bambanag ti mabati iti panunotmo. (Sal. 92:​1, 2) Ken kas iti inaramid ni John a nadakamaten, mabalinmo nga ilista dagita. Ania ngarud dagiti mabalinmo nga isurat?

¹⁰ Mabalinmo a panunoten nga umuna dagiti pagyamyamanam ken Jehova iti kada aldaw. (Sal. 40:5) Karaman dita dagiti naespirituan a bendision a maaw-awatmo, kas koma iti tunggal kararagmo a sinungbatan ni Jehova, ti tunggal teksto a nabasam a nangliwliwa kenka, ken ti tunggal artikulo, video, wenno broadcasting a nangparegta kenka, nga uray la naibagam, ‘Daytoy ti eksakto a kasapulak ita!’ (Sal. 65:2; Mat. 24:45; Roma 15:4) Mabalinmo met nga iraman dagiti pisikal a bendision a maaw-awatmo, kas iti nagpintas nga ilelennek ti init, ti naimas a makan, wenno ti nairut nga arakup ti maysa a gayyemmo. Ket agyamyamantayo ken Jehova ta inikkannatayo iti “biag ken anges” tapno maenjoytayo amin dagita. (Ara. 17:25) Adda pay kadi dagiti mapanunotmo a bendision ni Jehova a mabalinmo nga iraman iti listaam ita nga aldaw?—Efe. 5:20.

11-12. Apay nga agyamyamantayo ta addaantayo kadagiti naaayat a kakabsat?

¹¹ Panunotem met dagiti bendision a maaw-awatmo gapu ta kaduam nga agserserbi ken Jehova dagiti naaayat a kakabsat. (Sal. 133:1; Prov. 18:24) Adda kadi malagipmo a brother wenno sister a nangparegta wenno nangtulong kenka? (Prov. 12:25; 16:24) Mabalinmo a pagyamanan uray dagiti simple laeng a kinaimbag nga ar-aramiden kenka dagiti kakabsat. Kitaentayo ti kapadasan ti maysa a sister. Idi nabiit pay a natay ti balasangna, marigatan nga agkanta kadagiti gimong. Imbagana: “Iti maysa a gimong, diak malapdan nga agarubos dagiti luak. Idi nakitanak ti maysa a sister a nakatugaw iti batog ti tugawmi, inasitgannak ken kinallabaynak. Kinaduaannak nga agkanta agingga a nalpas. Iti daydiay a kanito, nariknak ti aglaplapusanan nga ayat dagiti kakabsat.” Makitatayo nga uray ti simple laeng nga arakup ket dakkelen a pagyamyamanan ti maysa nga agladladingit nga ina.

¹² No laglagipem no kasanonaka a tinulongan ni Jehova iti napalabas ken no panunotem dagiti bendision a maaw-awatmo ita, mas matignayka nga agyaman kenkuana. Ngem kas naammuantayon, saan la koma nga agpatingga dayta iti rikna. Masapul nga ipakitatayo dayta. Kasano?

KASANOTAYO A MAIPAKITA A MANAGYAMANTAYO?

13. Kasanotayo a maipakita a managyamantayo?

¹³ Kasanotayo a maipakita a managyamantayo? Makatulong no usigentayo ti konteksto ti pannakatema a teksto daytoy nga artikulo. Kalpasan a pinaregtanatayo ni apostol Pablo nga ipakitatayo a managyamantayo, imbagana: “Aniaman nga aramidenyo iti sao wenno aramid, aramidenyo ti amin iti nagan ni Apo Jesus, ket baeten kenkuana, agyamankayo iti Dios nga Ama.” (Col. 3:​15, 17) Isu nga ipakitatayo a managyamantayo iti sao ken aramid. Ibagbaga ditoy ni Pablo nga aramidentayo dayta ken Jehova. Ngem maragsakan met ti Dios no ipakitatayo a managyamantayo iti sabsabali. Kitaentayo itan no kasanotayo a maipakita a managyamantayo iti sao ken aramid.

14. Kasanotayo a maipakita a managyamantayo iti sao? (Kitaen met dagiti ladawan.)

¹⁴ Ipakitam a managyamanka iti sao. Iyugalim nga ibaga ti “Pagyamanan” wenno “Thank you” uray kadagiti simple laeng nga imbaga wenno inaramid kenka ti dadduma, kas koma no inlukatandaka iti ridaw, inapresiardaka, wenno pinaregtadaka. No dadduma, baka kayatmo met nga isurat, i-text, wenno i-chat ti panagyamanmo. Kas pagarigan, mabalinmo a suratan ti maysa a panglakayen tapno agyamanka iti panang-shepherding-na kenka ken iti pamiliam. (1 Tes. 5:​12, 13) Mabalinmo met a pagyamanan ti asawa dagiti panglakayen ta isaksakripisioda ti oras a makaduada koma ti asawada tapno matulongan ken maparegta dagitoy a nadungngo a papastor dagiti kakabsat.

15. Kasanotayo a maipakita a managyamantayo ken Jehova iti sao?

¹⁵ Kasanotayo a maipakita a managyamantayo ken Jehova iti sao? Babaen kadagiti naimpusuan a kararagtayo. Ngem laglagipentayo nga adda ti agduduma a kita ti kararag. (Efe. 6:18) Baka masansan a ti kararagtayo ket panagkiddaw wenno panagpakpakaasi pay ketdi. Mabalin nga ikarkararagtayo ken Jehova a tulongannatayo nga agibtur, ikkannatayo iti sirib tapno makaaramidtayo iti nasayaat a desision, wenno tapno pakawanenna dagiti nagkamaliantayo. Ngem saan la koma a dagita ti linaon ti kararagtayo. Ngamin, nakaad-adu dagiti bendision ni Jehova, ket no utobentayo dagita, matignaytayo nga agyaman kenkuana. (Sal. 95:2) Isu a tapno mausigmo dagiti linaon ti kararagmo, mabalinmo nga isaludsod dagitoy, ‘Ti kadi mangmangngeg ni Jehova kadagiti kararagko ket puro laengen dawat? Wenno agyamyamanak met kenkuana kadagiti bendision a maaw-awatko?’

16. Apay a masapul nga ipakitatayo a managyamantayo iti aramid?

¹⁶ Ipakitam a managyamanka iti aramid. No adda inaramid ti maysa kenka a permi a naap-apresiarmo, mangbirokka iti pamay-an tapno maipakitam nga agyamyamanka. No ipakitam dayta iti aramid, saan laeng nga iti sao, mariknam ti nagpaiduma a kinaragsak ti panangted. (Ara. 20:35) Maipariknam met iti dadduma nga ipatpategmo ken ay-ayatem ida. No aramidem dayta, mas ipateg ken ayatendaka met.

17-18. Kasanotayo a maipakita a managyamantayo ken Jehova iti aramid? (Roma 12:1)

¹⁷ Maipakitatayo iti aramidtayo nga agyamyamantayo unay ken Jehova. Siempre, nakaad-adu dagiti ar-aramiden ni Apo Jehova para kadatayo. Isu a kayattayo met nga adda maaramidantayo para kenkuana. Ngem ania ti maitedtayo ken Jehova? ‘Itedtayo ti bagitayo a kas sibibiag a daton.’ (Basaen ti Roma 12:1.) Kaipapanan dayta nga itultuloytayo nga usaren ti amin nga adda kadatayo. Usarentayo ti intero a biagtayo kas sibibiag a daton tapno maparagsaktayo isuna. Karaman dita ti pampanunot, puso, ken ti pigsatayo. Ania dagiti mabalintayo nga aramiden tapno maparagsaktayo ni Jehova?

¹⁸ Gapu ta agyamyamantayo ken Jehova, indedikartayo ti biagtayo kenkuana ken nagpabautisartayo. Ket itultuloytayo nga ipapaay ti amin nga adda kadatayo—ti orastayo, ti pigsatayo, ken ti amin a material a sanikuatayo—tapno makapagserbitayo kenkuana. Kas pagarigan, ikagkagumaantayo a basaen ken utoben ti Biblia iti tunggal aldaw. Ipakpakaammotayo met ti naimbag a damag iti dadduma. Kanayontayo a makigimong ken agkomento. Ken saan la a dayta. Agdondonartayo met tapno masuportarantayo ti organisasion ni Jehova ken ti trabaho a panangasaba. (Sal. 1:​2, 3; 2 Cor. 8:4; Heb. 10:​24, 25; 13:15) No aramidentayo ti amin a kabaelantayo nga agserbi ken Jehova, ipakpakitatayo a talaga nga agyamyamantayo kenkuana.—Col. 3:​23, 24.

19. Apay a determinadoka a mangipakita a managyamanka?

¹⁹ Uray no agbibiagtayo iti lubong a saan a managyaman dagiti tattao, adda nga adda rasontayo nga agbalin a managyaman. Ammotayo a no managyamantayo, agbalintayo a naragragsak, saantay met unay no kua nga agdanag, ken kangrunaan iti amin, agbalintayo a nadekdekket ken Jehova. Ken no panunotentayo ti amin a bendision a maaw-awattayo manipud idi agingga ita, mas matignaytayo nga agyaman. Isu a determinadotayo koma nga agtultuloy a mangipakita iti sao ken aramid a managyamantayo, kangrunaanna ken Jehova. No aramidentayo dayta, ik-ikkantayo ti manangapresiar a Diostayo iti rason a mangbendision kadatayo iti ad-adu pay ngem iti mapanunottayo, ita ken iti agnanayon.—Sal. 106:1; Heb. 11:6.