Situtulok ni Rebecca a Mangay-ayo ken Jehova

ITI adu a lugar iti kaaldawantayo, gagangayen ti nagan a Rebecca. Adda kadi am-ammom a kasta ti naganna?​—a Ni Rebecca ket maysa a nagpateg a tao a nadakamat iti libro a kalalatakan iti lubong, ti Biblia. Ania ti ammom maipapan kenkuana?​— Rumbeng a tarigagayantayo a maammuan ti maipapan ken Rebecca agsipud ta ti ulidanna makatulong kadatayo nga agserbi ken Jehova.

Ni Rebecca ti maikadua a babai a nainaganan iti Biblia a nagbalin a pudno a managdaydayaw ken Jehova. Ammoyo kadi ti immuna a babai a kas kenkuana?​—Isu ni Sara, ti asawa ni Abraham. Idi baketen ni Sara, impasngayna ni Isaac​—ti bugbugtong nga anakna. Kitaem ita no apay a situtulok ni Rebecca a mangay-ayo ken Jehova ken no kasano a naam-ammona ni Isaac.

Nasurok nga 60 a tawen ti napalabasen sipud idi imbaon ti Dios ni Abraham ken Sara a pumanaw iti Haran ket mapanda iti daga ti Canaan. Idi lakayen ni Abraham ken baketen ni Sara, inkari ti Dios kadakuada a maaddaanda iti anak a mapanaganan iti Isaac. Kas iti mabalin a mapanunotmo, ni Isaac ket inay-ayat unay dagiti nagannakna. Idi natay ni Sara idi agtawen iti 127, maysan a baro ti anakna a ni Isaac ket maladingitan unay iti ipupusay ni nanangna. Saan a kayat ni Abraham a mangasawa ni Isaac iti babai a Canaanita agsipud ta dagitoy a tattao saanda nga agdaydayaw ken Jehova. Gapuna, imbaonna ti adipenna, a nalabit ni Eliezer, a mangpili iti asawa para ken Isaac manipud kadagiti kabagian ni Abraham idiay Haran, a 800 a kilometro ti kaadayona!​—Genesis 12:4, 5; 15:2; 17:17, 19; 23:1.

Idi agangay ni Eliezer, agraman dagiti sangapulo a kamelio a nagkarga kadagiti abasto ken regalo nga agpaay iti nobia, dimtengda idiay Haran a kaduana dagiti adipen ni Abraham. Simmardengda iti asideg ti bubon ta ammo ni Eliezer nga iti malem painumen dagiti tattao dagiti tarakenda nga ayup ken agsakdoda para iti pamiliada. Ket nagkararag ni Eliezer a daydiay pilienna nga agbalin nga asawa ni Isaac sungbatanna ti kiddawna nga uminum a kunkunana: “Uminumka, ken painumekto met dagiti kameliom.”

Kasta a talaga ti napasamak! “Ti nalibnos” nga agtutubo a ni Rebecca dimteng iti bubon. Immannugot iti kiddaw ni Eliezer nga uminum, a kunkunana: “Painumekto met dagiti kameliom.” Bayat a nagdardaras ni Rebecca “a maulit-ulit iti bubon tapno sumakdo iti danum,” minatmatan ni Eliezer a ‘masmasdaaw.’ Panunotenyo! Tapno mapainum dagiti sangapulo a mawaw a kamelio, masapul nga agsakdo ni Rebecca iti 1,000 a litro a danum!

Nangted ni Eliezer ken Rebecca kadagiti nagpipintas a sagut, ket naammuanna nga isu ti anak a babai ni Betuel, maysa a kabagian ni Abraham. Inawis ni Rebecca da Eliezer ken dagiti gagayyemna ‘a mangbusbos iti rabii’ iti pagtaengan ti pamiliana. Kalpasanna, immuna a nagawid tapno ipadamagna iti pamiliana ti maipapan kadagiti bisita a naggapu iti Canaan nga imbaon ni Abraham a sumarungkar kadakuada.

Idi makita ni Laban a kabsat ni Rebecca dagiti agkakangina a banag a naisagut iti kabsatna ken naammuanna no siasino ni Eliezer, inawisna a sumrek. Ngem kinuna ni Eliezer: “Saanakto a mangan agingga a naisaokon ti maipapan kadagiti rantak.” Isu nga inlawlawagna no apay nga imbaon ni Abraham. Naragsakan ni Betuel ken ti asawana, uray met ni Laban, ket immanamongda iti panagkallaysa.

Kalpasan ti pannangan, naturog sadiay da Eliezer ken dagiti kakaduana. Kabigatanna, kinuna ni Eliezer: “Ibaondak ken apok.” Ngem kayat ti ina ni Rebecca ken ti kabsatna a lalaki a makipagyanda pay iti “uray sangapulo nga aldaw.” Idi inimtuodda ni Rebecca no mapan kumuyog a dagus, kinunana, “Situtulokak a mapan.” Madagdagus a kimmuyog ken Eliezer. Idi dimtengdan idiay Canaan, nagbalin nga asawa ni Isaac ni Rebecca.​—Genesis 24:1-58, 67.

Pagarupmo, nalaka ngata para ken Rebecca a panawan ti pamilia ken gagayyemna ket mapan iti adayo a lugar, a pagaammona a mabalin a didanto pulos agkikitan?​— Saan la ketdi. Nupay kasta, nabendisionan ni Rebecca gapu ta situtulok nga inaramidna ti pakaay-aywan ni Jehova. Nagbalin pay ni Rebecca a paset ti kaputotan a pagtaudan ti Manangisalakantayo a ni Jesu-Kristo. Kas ken Rebecca, bendisionannatayo met ni Jehova no situtuloktayo a mangaramid iti pakaay-aywanna.​—Roma 9:7-10.