NAPAIT A NATNATENG

[Heb., mero·rimʹ].

Naibilin kadagiti Israelita a manganda iti tinuno a kordero ken di nalebaduraan a tinapay agraman ti napait a natnateng wenno yerba iti rabii ti Paskua (Ex 12:8), ket nagtultuloy a daytoy ti nasurot nga urnos iti amin a simmaruno a rambak ti Paskua. (Nu 9:11) Saan nga espesipiko a nadakamat ti klase (wenno, nadumaduma a klase) dagita a napait a natnateng. Nairanta a mangan dagiti Israelita iti napait a natnateng tapno maipalagip kadakuada ti napait a kapadasanda bayat ti pannakaadipenda idiay Egipto.

Daytoy met laeng a Hebreo a termino (mero·rimʹ) ti agparang iti Un-unnoy 3:15 ken kadawyan a naipatarus a “kinapait,” wenno “napait a bambanag,” nupay “napait a yerba (wenno natnateng)” ti isingasing ti sumagmamano kas mayanatup a patarus tapno maitutop iti pannakadakamat ti ajenjo iti isu met laeng a bersikulo.