EDREI

1. Maysa a naarian a siudad ni Og nga ari ti Basan. (Jos 12:4; 13:12) Kalpasan a naparmekda ni Sihon nga Amoreo, dagiti puersa ti Israel iti sidong ti panangidaulo ni Moises “simmang-atda,” kayatna a sawen, nagpaamiananda, agingga a nasarangetda ti puersa militar ni Og iti “bakal ti Edrei,” nalawag nga iti makin-abagatan a lindoras ti Basan. Nupay ni Og ti kaudian kadagiti kasla higante a Refaim ken mabalin a nangiparang iti nakaam-amak a buyot, dagiti Israelita (a binalakadan ni Jehova a saanda nga agbuteng) tinalipuposda ni Og, ti annakna, ken ti tattaona, ket tinagikuada ti teritoriana. (Nu 21:33-35; De 3:1-10) Idi agangay, daytoy a siudad naited iti tribu ni Manases kas paset ti tawidna. (Jos 13:31) Kadawyan a maikunkuna a ti Edrei isu ti agdama-aldaw a siudad ti Derʽa nga agarup 50 km (31 mi) iti daya nga abagatan-a-daya ti makin-abagatan nga ungto ti Baybay ti Galilea, iti asideg ti Yarmuk. Karaman kadagiti rebba sadiay isu ti sangkapaset ti pannakakabakabna a siudad iti uneg ti daga, a naikungkong iti bato iti sirok ti agdama a siudad.

2. Maysa a nasarikedkedan a siudad ti Neftali. (Jos 19:32, 35, 37) Nainaig dayta iti agdama a Tell Khureibeh, agarup 7 km (4 mi) iti amianan nga amianan-a-laud ti Hasor.