PIESTA TI PANAGUNI TI TRUMPETA

Daytoy a piesta ket maangay iti umuna nga aldaw (wenno iti baro a bulan) ti maikapito a bulan, Etanim (Tisri). Dayta idi ti pangrugian ti sekular a tawen dagiti Judio. Napatpateg dayta ngem iti Piesta ti Baro a Bulan a maangay iti 11 a dadduma pay bulan. Mainaig iti Piesta ti Panaguni ti Trumpeta, innayon a kunaen ti bilin a rebbeng a mailasin dayta kas maysa nga aldaw ti nasantuan a kombension, nga awan ti maaramid nga aniaman a kita ti nadagsen a trabaho iti dayta nga aldaw.

Ti nagan daytoy a piesta ket naala iti bilin a: “Rebbeng a maaramid kadakayo ti naan-anay a panaginana, maysa a panglaglagip babaen ti panaguni ti trumpeta.” “Rebbeng nga agbalin kadakayo nga aldaw ti panaguni ti trumpeta.” Iti daytoy nga aldaw, naidatag dagiti sakripisio a buklen ti maysa nga urbon a toro, maysa a kalakian a karnero, ken pito a nasalun-at a kalakian a kordero a maysa ti tawenda, agraman ti daton a bukbukel a nasayaat nga arina a nababasa iti lana, kasta met ti maysa a kalakian nga urbon a kalding kas daton gapu iti basol. Mainayon daytoy iti patinayon nga inaldaw a daton kasta met kadagiti sakripisio a maited laeng iti al-aldaw ti baro a bulan.​—Le 23:24; Nu 29:1-6.

Siempre, nagpateg daytoy a piesta saan laeng a gapu ta ti bulan a pannakaangayna ket panangrugi ti baro a tawen ti panagtalon ken panagtrabaho no di ket gapu met ta ti Aldaw ti Panangabbong naitumpong iti maika-10 nga aldaw daytoy a bulan ket ti Piesta dagiti Abong-abong mangrugi iti maika-15 nga aldaw. Iti daytoy a bulan nga agleppas ti kangrunaan a paset ti panagummong kadagiti apit iti aglabasen a tawen. Dagiti apit a maummong iti daytoy a bulan ramanenna dagiti ubas a maaramid nga arak a mamagrag-o iti puso ti tao, ken dagiti olibo a nagpaay kas taraon ken lana a pagsilaw ken maaramat met mainaig iti adu kadagiti daton a bukbukel. (Sal 104:15) Pudno a daytoy a piesta ti pagilasinan iti panangrugi ti bulan a panagyaman ken Jehova.