Pammarang Laeng Aya ti Makitkitayo?

NI Heinz, maysa a tin-edyer nga idurduron ti napalalo a gurana, plinanona a patayen ti agsioman kenkuana. Makaparagsak ta, isut’ agkurang tured a mangaramid iti dayta. Sumagmamano a tawen kamaudiananna naikeddengna ti agbekkel ngem saanna met a maituloytuloy nga aramiden dayta. Isut’ nairaman iti panagtakaw ken panaglako ti droga, nga isut’ nakaibaludanna. Sa napaay pay ti panagasawana.

Ita ni Heinz saanen nga adikto iti droga. Nadalus ti panggedannan. Naragsaken ti panagasawana ket simmayaaten ti pannakirelasionna iti agsioman kenkuana. Aniat’ nangbaliw iti dayta? Rinugianna ti makipagadal ti Biblia kadagiti Saksi ni Jehova. Nagin-inut, nangrugi a nagbaliwen ti panangmatmatna iti biag.

Awan duadua, adu kadagidiay makaammo iti daydi dati a Heinz ti nangipato nga awanen panginanamaan ti kasasaadna. Pagyamanan laengen ta kadagiti adu a tattao kas kenkuana, isut’ saan nga insuko ti Dios kas saanen a masubbot. Apay a saan? Ti rason ket: “Ta ti Dios saan a kumita a kas iti ikikita ti tao, ta ti tao kitaenna iti akinruar a panagparang; ngem ni Jehova kitaenna ti puso.”​—1 Samuel 16:7.

Daytat’ maysa a dakkel a pagdumaan ti tao ken ti Dios. Adda pagannayasantayo a mangukom iti pammarang a langa. Ibagbagatay pay a “dagiti umuna nga impresion isudat’ agpaut nga impresion.” Iti sabali a pannao, agannayastayo a mangkategoria kadagiti tattao sigun kadagiti damo a reaksion. Ngem ti Dios, agsipud ta mabasana ti puso, ket nalinteg ken awan panangidumdumana. Isut’ gapuna nga imbaonna ti Anakna, a ni Jesu-Kristo, ditoy daga tapno “isuamin dagiti tattao maisalakanda koma ket dumtengda iti umiso a pannakaammo ti kinapudno.” (1 Timoteo 2:4) Gapu itoy, addaan pribilehio dagiti dedikado a Kristiano kas “katulongan ti Dios” babaen iti siaaktibo a panangikaskasaba ti naimbag a damag ti Pagarian ti Dios iti intero a sangatauan. (1 Corinto 3:9) Kaskasdi adda paginggaan dagiti Kristiano​—saanda a mabasa ti puspuso dagiti tattao. Gapuna masapul saanda koma a manangidumduma ket liklikanda ti panangidadumada babaen kadagiti pammarang a langa.

Pagaammo unay ni Santiago a kabsat ni Jesus iti ina daytoy a peggad iti daydiay immuna a kongregasion Kristiano. Kunana: “Kakabsatko, gaput’ panamatiyo ken Apotayo a Jesu-Kristo, nga agturturayen iti kinadayag, dikay koma napangato. Kas pangarigan, mabalin dua a sangaili ti sumrek iti lugar a pagdaydayawanyo, ti maysa lalaki a napintas ti kawesna a balitok dagiti singsingna, ket daydiay maysa tao laeng a napanglaw a takup-takup ti badbadona. Ket no ikkanyo ti espesial nga atension ti napintas kawesna a tao . . . Dikay aya makita nga adda panangidumdumayo ken mangipatokayo kadagiti ulbod a pangrukodan?” Maibatay iti daytoy, no maminsan sabali met aya ti panangipatpatotayo kadagiti tattao nga um-umay a damdamona idiay Kingdom Hall?​—Santiago 2:1-4, The New English Bible.

Nangted Ulidan ni Jesus

Minatmatan ni Jesus dagiti tattao, saan a kas managbasol nga awanen pannakasubbotda, no di ket kas posible a napasnek a tattao a kayatdat’ agbalbaliw no maikkan kadagiti nasken a tulong ken maiyanatup a pammaregta. Isut’ gapuna nga “intedna ti bagina kas katupag a subbot kadagiti amin a tao.” (1 Timoteo 2:6) Iti panangaskasabana, awan minatmatanna nga addaan naimbag a puso kas di matignay, a di maikari iti atensionna. Ti panangmatmatna kadagiti tattao awan impanayagna a natangsit a panagrikna iti panaginlilinteg.​—Lucas 5:12, 13.

Saan a kas kadagiti Fariseo, nga intay mabasa: “Ket dagiti eskriba ken dagiti Fariseo idi makitada a makipangpangan kadagiti agsingsingir ti buis ken managbasol, kunada kadagiti adalanna: ‘Apay-apay a ti mannursuroyo makipangan ken makiinum kadagiti agsingsingir ti buis ken managbasol?’ Ket idi nangngeg ni Jesus daytoy kunana kadakuada: ‘Dagiti sisasalun-at awan ti pakasapulanda iti mangngagas, no di ket dagiti masaksakit. Saanak nga immay nga agayab kadagiti nalinteg, no di ket kadagiti managbasol.’”​—Marcos 2:16, 17.

Siempre, di kayat a sawen daytoy, a kinonsintir ni Jesus ti kinasuitik ken dakes nga ar-aramid nga ar-aramiden dagitoy a managbasol ken dagiti agsingsingir ti buis. Ngem ammona a mabalin makemmeg dagiti tattao iti di umiso a wagas ti panagbiag, nalabit di inggaggagara wenno gapu kadagiti sirkumstansia a saanda a matngelan. Ngarud pinakitaanna ida ti pannakaawat, “kinaasianna ida, ta kasda la karnero nga awan pastorda.” (Marcos 6:34) Siaayat a nangaramid ti panamaggiddiat iti dakes nga ar-aramidda ken dagiti posible a nasayaat a puspusoda.

Iti panangtaming kadagiti paspasurotna, kimmita met ni Jesus iti labes ti pammarang laeng. Managbasolda a masansan a makaaramid kadagiti biddut, ngem ni Jesus ket saan a maysa a di rasonable a perpeksionista, a masansan pagung-ungtanna ida iti kada bassit a pagkibaltangan. Ammona a nasayaat ti pampanunotenda wenno, kas ti panagkunatay itattan, ti pusoda addat’ umiso a lugar. Ti kasapulanda ket tulong ken pammaregta; iti panangted iti daytoy, nikaanoman saan a naimut ni Jesus. Awan duadua iti dayta, nakitana dagiti tattao kas ti panagkita ti Dios kadakuada. Padpadasentay met laeng aya a tuladen ti nakaskasdaaw nga ulidanna?

Dakayo Kadi “Agipatokayo iti Maysa a Nalinteg a Panangipato”?

Naminsan naipasango ni Jesus iti maysa a bunggoy dagiti aginlilinteg a managtanabutob a makaluksaw gapu ta isut’ nangagas iti Panaginana. Sinursuruanna ida: “Saankayo nga agipato a kas ti langa, no di ket agipatokayo iti maysa a nalinteg a panangipato.” Apay a saanda a nagragsak iti pannakakitada ken Jesus kas maysa a managaramid ti datdatlag a “pinaimbagna nga awan pagkuranganna ti maysa a tao” imbes nga isudat’ “marurod unay” ken isut’ matmatanda kas managsalungasing ti linteg ti Panaginana? Gaput’ panangipatoda manipud iti pammarang, imbutaktakda ti dakes a motiboda. Impanayagda ti panangipatoda nga agpadpada a managinlilinteg ken nakillo.​—Juan 7:23, 24.

Kasano a mabalintay ti makaaramid ti isu met laeng a biddut? No saantay a maragsakan no nakasubli iti kongregasion ti adda panagbabawina a tao wenno no ti nailubongan unay a tao naammuanna ti kinapudno ken mangrugin a magunggonaan manipud naespirituan a panangagas. No maminsan mabalin nga ukomentay dagiti tattao gapu kadagiti karkarna a panagbadbadoda wenno iti buokda ket ibagatayon a saandanto a maikari nga agbalin kas maysa kadagiti Saksi. Kaskasdi, nagadu a dati a hippie ken dadduma pay a karkarna ti istilot’ panagbiagda nga idi agangay nagbalinda a Kristiano a Saksi ni Jehova. Kabayatan a dagitat’ madama a mangar-aramid iti panagbalbaliw, ditay kayat a palubosan iti “panangipato iti pammarang” a mangbulsek kadatayo iti naimbag a kasasaad ti pusoda.

Anian a nasaysayaat, ken maitunos iti nasayaat nga ulidan ni Jesus, nga ikararagan ida ken itukon ti praktikal a tulong kadakuada tapno makagtengda iti Nakristianuan a kinanataengan! Ti pannakakita kadakuada iti banag a pakaragsakan ket kasla narigat. Ngem no guyugoyen ni Jehova ida nga umadani kenkuana baeten ken Kristo, asinotay a manglaksid kadakuada gapu iti akikid a pannakaawattayo? (Juan 6:44) Ti panaginlilinteg a panangukom iti maysa, idinto a ditay met ammo ti puso wenno dagiti sirkumstansia, ti mabalin a mangitungpal kadatayo iti nadagsen a pannakaukom.​—Idiligyo ti Mateo 7:1-5.

Imbes a siinget nga ukomen dagita a kabbaro, rebbengna a tulongan, paregtaen, ken bagbagaantay ida babaen kadagiti ulidan. Nupay kasta, bayat ti panangipakpakitat’ kinamanangaasi, siempre ditay met kayat a pagbalinen nga idolo dagiti kabbaro nalabit gapu ta isudat’ nalatak iti lubong. Daytat’ maysa a kita ti panangidumduma. Tanda met dayta ti kina-di-nataengan iti biangtayo. No maipapan iti tao a mismo, ti kadi panangitantan-oktayo makatulong kenkuana nga agpakumbaba? Wenno, imbes ketdi, dayta kadit’ mangpabain kenkuana?​—Levitico 19:15.

Dikay Manginanama ti Dakdakkel Ngem iti Inanamaen ti Dios

Ti panangmatmattayo iti dadduma ket limitado unay no idilig ken Jehova, a makabasa iti puso. (1 Cronicas 28:9) Ti panangapresiar iti daytoy lappedanna ti panagbalintayo a moderno-aldaw, aginlilinteg a Fariseo, nga ipilpilittay kadagiti tattao dagiti kabukbukodantay nga aramid-tao a molde ti kinalinteg tapno bumagayda iti kapanunotantayo no aniat’ umiso. No kitaentay dagiti tattao kas iti panangmatmat ti Dios kadakuada, ditay manginanama ti dakdakkel kadakuada ngem iti inanamaen ti Dios. Ditay “lumbes iti adda a naisurat.” (1 Corinto 4:6) Daytoy ket nangnangruna nga importante nga ipapuso dagiti panglakayen a Kristiano.​—1 Pedro 5:2, 3.

Maiyilustrartay daytoy maipapan iti panagbadbado. Ti pagannurotan ti Biblia​—a pagannurotan ti Dios​—a ta ti panagkawes ti Kristiano ket masapul a nadalimanek ken nadalus, naurnos ken saan a mangipakita ti kinakurang ti “kinaemma ken kinatakneng.” (1 Timoteo 2:9; 3:2) Kaawatan, ngarud, a dagiti panglakayen iti maysa a kongregasion ‘limbesda iti adda a naisurat’ sumagmamano a tawen ti napalabasen babaen iti panangikalikagumda a tunggal agpalawag iti publiko iti kongregasionda ket agusar ti puraw a kamisadentro, uray no dagiti nakusnaw a kolor ket kaaduanna nga akseptado met iti dayta a pagilian. Dagiti sangaili nga agpalawag a dumteng a de kolor ti kamisadentroda ti makalikaguman nga agsukat iti maysa kadagiti sumagmamano a puraw a kamisadentro nga adda idiay Kingdom Hall nga agpaay kadagita a bigla a panagkasapulan. Anian ti kinaannadtay koma a ditay ipappapilit ti personal a pagayatantayo kadagiti dadduma! Ken anian a maiyanatup ti balakad ni Pablo: “Maammuan koma dagiti isuamin a tattao ti kinarasonableyo”!​—Filipos 4:5.

Dagiti Nasayaat a Bunga No Kumita iti Labes ti Pammarang Laeng

Ti panangapresiar a ditay mabasa ti puspuso dagiti tattao ket makatulong iti intay panagtaginayon iti nasayaat a pannakirelasion kadagidiay addat’ aglawlaw kadatayo, agpadpada iti uneg ken ruar ti kongregasion Kristiano. Tulongannatayo nga agpanunot a positibo maipapan kadagiti dadduma, a di pagduaduaan dagiti motiboda, “ta nakunengtayo met idi naminsan, nasukir, naallilaw, a nagtulnogtayo kadagiti nadumaduma a kinagaramugam ken ragragsak.” (Tito 3:3) Iti pannakabigbig iti daytoy, situtuloktayo a mangasaba iti tunggal maysa, uray kadagidiay, iti pammarang, kasla saanda a maikari. Tutal, ti desision nga umawat wenno manglaksid ti kinapudno ket aggapu kadakuada. Ti responsabilidad a mangikasaba iti dayta iti tunggal maysa ket biangtayo.

Adu a Saksi ni Jehova, kas ken Heinz, ti maragsakan a maabrasa iti uneg ti kongregasion Kristiano babaen kadagiti kakabsat a lallaki ken babbai a kimmita iti labes ti pammarang laeng ket saanda a nangukom sigun kadagiti umuna a kapaliiwanda.

Alaenyo a pangarigan ni Frank, a nagparang maysa nga aldaw ti Domingo idiay Kingdom Hall dagiti Saksi ni Jehova iti umabagatan nga Alemania. Aniat’ nakita dagidiay timmabuno? Maysa a nakadugdogyot nga agtutubo a lalaki a barbasan ken ti buokna aginggat’ abaga, a nagrugit ti badona, a nalatak kas masansan nga adda kadagiti lokal a bar ken nakaro a mannigarilio​—maysa a tao nga inabandonarna ti nobiana ken singin nga annakna. Nupay kasta, isut’ naabrasa a sibabara iti gimong. Isut’ nagsiddaaw unay ket nagsubli iti sumaganad a lawas. Ania itan ti nakitada? Maysa a nakadaldalimaneken a lalaki a nagdalusen ti kawesna. Iti maikatlo a lawas nakakitadan ti agtutubo a lalaki a saanen nga agsigsigarilio, nga itan isut’ kinuyogen ti nobiana ken ti dua nga annakda. Iti maikapat a Domingo, nakakitadan ti agtutubo a lalaki ken agtutubo a babai a kaal-alana ti lisensia ti panagasawa tapno malegal ti relasionda. Iti maikalima a Domingo, nakakitadan ti agtutubo a lalaki a nangwaswasen ti amin a singgalutna iti ulbod a relihion. Itatta, agangay uppat a tawen kamaudiananna, nakitadan, kas kinuna ti maysa kadagiti Saksi ni Jehova, “ti maysa a pamilia a mangmangteden ti nagsayaat nga impresion a mamagpanunot kadakayo a kabsattay idan iti adun a tawtawen.”

Ti kualidad ti maysa a libro ket saan a nesesita a makita iti pannakaaramidna wenno ti kualidad ti balay nesesita a makita iti pammarangna. Kasta met, ti pudno a kualidad ti maysa a tao saan a nesesita a makita iti pammarang a langana. Dagiti Kristiano a padpadasenda a kitaen dagiti tattao kas iti panagkita ti Dios saanda a mangipato kadagiti umuna nga impresion. Ti Dios asikasuenna ti “tao a makin-uneg a puso,” ket gapu iti dayta agyamyamantayo.​—1 Pedro 3:3, 4.