Dagiti Saludsod Manipud Kadagiti Managbasa

◼ Apay a pagaammo a pinagpeggad ni David ni Ahimelec a nangato a padi, a nangiturong iti pannakapapatay ti padi, kas impudno ni David iti 1 Samuel 22:22?

Kinapudnona, saan nga ipamatmat ti 1 Samuel 22:22 nga ammo nga immuna ni David a ti kursona ket agturong iti ipapatay ni Ahimelec. Kuna ti bersikulo: “Ket ni David kinunana ken ni Abiatar [anak ni Ahimelec]: ‘Naammuak idi nga aldaw, idi a ni Doeg nga Edomita adda idi idiay, a di bumurong nga ibagana [ni Doeg] ken Saul. Siak ti nakaigapuan ti ipapatay dagiti amin a tattao iti balay ni amam [Ahimelec].’”

Ni David, a nagtalaw idi ken ni makapungtot nga Ari Saul ti napan idiay Nob, nga ayan idi ni padi nga Ahimelec. Nalabit gapu iti pannakaseknanna a dinto marikna ti nangato a padi nga obligado a mangipakaammo iti ayan ni David iti ari, saan nga impanayag ni David ti apagpag-isu a rason ti ipapanawna idiay Jerusalem. Ngem ti kaaddana idiay Nob nadlawda. Ti Edomita nga agnagan Doeg ti nakakita ken ni David ket kalpasanna impakaammona dayta a banag ken ni makapungtot a Saul.

Ngem awan aniaman nga adda iti salaysay, a mangpaneknek nga ammo nga immuna ni David ti kaadda ni Doeg. Ni Doeg “ti adda idi idiay iti daydi nga aldaw, a natengngel iti sango ni Jehova.” (1 Samuel 21:7) Mabalin, nakellaat pay ni David, a ti awan prinsipiona a Doeg ti nakakita kenkuana a kadua ni Ahimelec. Ngem oras a naaramidan daytan, nupay kasta, dayta ti naaramidanen. Saanen a mabaliwan ni David dayta; wenno malapdan ti dakes a pagtungpalan nga iyeg ti pungtot ni Saul iti nangato a padi ken kadagiti pinulpullo pay a dadduma a papadi agraman babbai, ub-ubbing, ken an-animal nga adda idiay Nob.​—1 Samuel 22:9-19.

Silalagip iti daytoy, anagenyo manen ti nakaladladingit a sasao ni David ken ni Abiatar, a nalisianna ti pannakapapatay: “Naammuak idi nga aldaw, idi a ni Doeg nga Edomita adda idi idiay . . . ” Maawatantayo ti punto ni David nga, ‘Ammok iti dayta nga aldaw, nga apaman a nakitak ni Doeg napaliiwnak a kaduak ni Ahimelec . . . ’ Ngem naladaw unayen. Di ninamnama nga adda idi sadiay ni Doeg ket nadlawna ti ipapan ni David iti nangato a padi. Gapuna dagus a naipato ni David nga iyam-ammonto ni Doeg dayta a banag ken Saul. Dayta ti gapuna nga iti kamaudiananna, inamin ni David ken ni Abiatar ti rikna ti bassit a panagbasolna, uray no ni David ti nakatulong nga indirekta iti simmaruno a panangpapatay. Ingunamgunamna ken Abiatar ti pannakipagtalinaedna kenkuana, ta nagtalek ni David iti panangiwanwan ken pannalaknib ni Jehova.​—1 Samuel 22:22, 23.

◼ Maiyanatop kadi para iti dua wenno tallo a kakabsat a lallaki a makiraman a mangitaneb ti maysa a tao bayat ti Nakristianuan a bautismo?

Iti gagangay maysa laeng a lalaki a ministro ti kasapulan a mangbautisar ti maysa.

Nupay di imbalabala ti Biblia dagiti pagalagadan a pamay-an maipapan iti bautismo a Kristiano, makaadaltayo manipud rekord ti Biblia. Ti bautismo ni Jesus iti danum ti nangnangruna a makaisuro.

Kuna ti Biblia: “Idi ni Jesus nanipud Galilea agingga iti Jordan napan ken ni Juan [a Mammautisar], tapno pabautisaran kenkuana.” (Mateo 3:13) Nadlawyo a kunana “kenkuana,” saan a kadakuada. Ti salaysay ti Ebanghelio awan ipamatmatna nga asinoman a nakiraman ken Juan iti panangbautisar ken Jesus. Kinapudnona, nalawag nga awan pay ketdi dagiti agpalpaliiw iti dayta a bautismo, ta agmaymaysa idi ni Juan idi damo a nangipabigbig ken Jesus kas “ti Kordero ti Dios a mangikkat ti basol ti lubong.” (Juan 1:29, 33, 34) Ngarud, ti bautismo ni Jesus, ti nangted padron iti naan-anay a pannakaitaneb iti danum, ngem isingasingna met a ti maysa a lalaki nga adipen ti Dios ti rebbeng a mangaramid ti bautismo.

Mabalin nga adda ti maysa wenno ad-adu pay a saksi idi a binautisaran ni Felipe ti eunuko nga Etiope iti “maysa a bagi ti danum,” ngem agmaymaysa ni Felipe a nangaramid iti panangbautisar. (Aramid 8:36-39) Kasta met, saan nga ipamatmat dagiti rekord ti Biblia kadagiti dadduma pay a bautismo nga adda dua wenno tallo a kakabsat a lallaki a nakiraman iti panangibaba iti maysa a tao iti baba ti danum ket kalpasanna irukuasda ti baro a kabsat a lalaki wenno babai iti dayta. Iti adu a kaso, nupay kasta, kaawatan nga adda dagiti managpaliiw, wenno saksi, kadagiti bautismo.

Siempre, kadagiti naglabas a tawtawen addada sumagmamano a naisangsangayan a kasasaad a makasapul iti panangusig no ar-aramiden dagiti dadduma a panangbautisar. Kas pangarigan, no adda laeng ti maymaysa a bagi ti danum a napegges ken mabalin a napeggad a karayan, ti panagraem iti kinatalged mabalin nga irekomendarna a dua a kakabsat a lallaki ti agtunos a mangaramid iti dayta. Wenno ti pisikal a kasasaad ti kandidato, kas ti paralisis wenno ti aglablabes unay a kinadelikado, mabalin a kasapulanna ti nasursurok ngem maysa a kabsat a lalaki a mangaramid ti bautismo. Dagitoy, nupay kasta, ti karkarna a kaso a tamingen a buyogen ti kinasirib. Ti gagangay kadagiti Saksi ni Jehova ket maysa laeng a lalaki ti mangitaneb iti kandidato iti bautismo.