KINNERET

1. Maysa a nasarikedkedan a siudad ti Neftali. (Jos 19:32, 35) Iti agdama, maikunkuna nga isu ti Khirbet el-ʽOreimeh (Tel Kinnerot), nagsaad iti maysa a munturod nasurok a 3 km (2 mi) iti abagatan a laud ti Capernaum, a tumannawag iti amianan a laud a paset ti Baybay ti Galilea. Agparang ti Kinneret kadagiti pader ti templo ti Karnak idiay Thebes, Egipto, iti listaan dagiti siudad dagiti Canaanita a pinarmek ni Thutmose III (a nagturay idi maika-16 a siglo K.K.P. sigun kadagiti historiador).

2. Maysa a distrito wenno rehion ti Israel a rinaut ni Ari Ben-hadad I ti Siria gapu iti panangsugsog ni Ari Asa ti Juda. (a. 962 K.K.P.) (1Ar 15:20; idiligyo ti 2Cr 16:4.) Ti sasao nga “intero a Kinneret” ket gagangay a maibilbilang a tumukoy iti nadam-eg a Tanap ti Genesaret.

3. Ti nagkauna a nagan ti Baybay ti Galilea. (Nu 34:11) Yantangay ti sumagmamano inaigda ti Kinneret iti Hebreo a sao maipaay iti arpa (kin·nohrʹ), isingasingda a nayawag daytoy iti danaw gapu iti sinan-arpa a porma dayta. Idi adda ni Jesus ditoy daga, naus-usar ti awag a Baybay ti Galilea, Baybay ti Tiberias, ken ti Genesaret (nalabit ti Griego a porma ti nagan).​—Lu 5:1; Jn 6:1.

Malaksid ti pannakairamanna kadagiti beddeng ti Naikari a Daga (Nu 34:11), daytoy a danaw ti nagpaay kas makinlaud a beddeng ti pagarian dagiti Amoreo nga iturturayan ni Og; kalpasan ti iraraut dagiti Israelita, nadakamat dayta kas makinlaud a beddeng ti tribu ni Gad. (De 3:16, 17; Jos 13:24-27) Ti sasao a “desierto a tantanap [Heb., ʽara·vahʹ] iti abagatan ti Kinneret” (Jos 11:2) nabatad a tumukoy iti benneg ti Ginget Jordan iti abagatan ti Baybay ti Galilea, a pagaammo kas ti Ghor.​—Kitaenyo ti GALILEA, BAYBAY TI.