Inaramidda ti Pagayatan ni Jehova

Pagwadan iti Panagsakripisio ken Kinasungdo

PARA iti agkabannuag a mannalon a managan Eliseo, ti maysa kadagiti aldaw a panagaradona nagbalin a kapatgan nga aldaw iti biagna. Bayat nga agtartrabaho iti talon, di ninamnama ni Eliseo ti isasarungkar kenkuana ni Elias, ti kangrunaan a propeta iti Israel. ‘Ania ngata ti masapulna kaniak?’ nalabit nakuna ni Eliseo iti unegna. Nabiitna la a naammuan ti sungbat. Impuruak ni Elias ti opisial a kawesna ken ni Eliseo, a mangipasimudaag a ni Eliseo ti mangsukat kenkuana. Saan a linaglag-an ni Eliseo daytoy a pannakaayabna. Pinanawanna a dagus ti talonna tapno agserbi a katulongan ni Elias.​—1 Ar-ari 19:19-21.

Innem a tawen kalpasanna, panawenen tapno pumanaw ni Elias. Ti salaysay maipapan iti ipapanawna ket naawagan kas “maysa kadagiti naisangsangayan unay a sarita” iti Hebreo a Kasuratan.

Saganaan ni Elias ti Ipapanawna

Kayat idi ni Elias a sarungkaran iti maudi a gundaway ti Bethel, Jerico, ken ti Jordan. Adu a milia ti pinagnada, a limmasatda kadagiti kabambantayan. Iti dalan, sangkadagdag ni Elias ni Eliseo nga agbatin. Ngem impilit ni Eliseo a kumuyog iti apona, a dina pampanawan.​—2 Ar-ari 2:1, 2, 4, 6.

Idi addada idiay Bethel ken Jerico, immasideg ken Eliseo “dagiti annak dagiti mammadto.”a “Ammom a ni Jehova ikkatennanto iti daytoy nga aldaw ni apom ita ulom?” sinaludsodda kenkuana. “Wen, ammok,” insungbatna. “Agtalnakayo.”​—2 Ar-ari 2:3, 5.

Kalpasanna, nagturong da Elias ken Eliseo idiay Karayan Jordan. Idi addadan idiay Jordan, adda milagro nga inaramid ni Elias bayat nga agbuybuya iti pangadaywen ti agarup 50 nga annak dagiti mammadto. “Ni Elias innalana di kagayna, ken kinupinna, ket inablatanna dagiti danum, ket nagbingayda ditoy ken idiay, iti kasta nga isuda a dua nagballasiwda iti namaga a daga.”​—2 Ar-ari 2:8.

Idi nakaballasiwdan, kinuna ni Elias ken Eliseo: “Dawatem no ania ti aramidekto a maipaay kenka, iti sakbay a maikkatak kenka.” Nagkiddaw ni Eliseo iti “mamindua a kapaset” ti espiritu ni Elias​—kayatna a sawen, ti mamindua a kapaset ti kadawyan nga agpaay iti inauna nga anak. Wen, rinaem ni Eliseo ni Elias kas iti panagraem ti inauna nga anak iti amana. Maysa pay, nadutokan a mangsukat ken Elias kas mammadto ni Jehova iti Israel. Saan ngarud nga inaagum wenno di maiparbeng ti dawatna. Nupay kasta, tangay ammona a ni laeng Jehova ti makaipaay iti daytoy a dawat, sieemma a kinuna ni Elias: “Nagdawatka iti narigat a banag.” Sana innayon: “No masiputannak intono maikkatak kenka, maaddanto ti kasta kenka: ngem no saan, saanto a kasta.”​—2 Ar-ari 2:9, 10; Deuteronomio 21:17.

Di pagduaduaan nga ad-adda a determinado ni Eliseo nga agtalinaed iti apona. Pagammuan, nagparang ti “maysa a lugan nga apuy agraman kabkabayo nga apuy.” Iti imatang a mismo ni masmasdaaw nga Eliseo, naipangato ni Elias babaen ti maysa nga alawig​—a simimilagro a nayakar iti sabali a lugar.b Pinidut ni Eliseo ti opisial a kawes ni Elias ket nagna a nagsubli iti igid ti Karayan Jordan. Inablatanna dagiti danum, ket kinunana: “Sadino ti yan ni Jehova, a Dios ni Elias?” Nagbingay ti danum, a nalawag a mangpaneknek nga adda ken Eliseo ti pannarabay ti Dios kas kasukat ni Elias.​—2 Ar-ari 2:11-14.

Ti Maadaltayo

Idi naayaban maipaay iti naisangsangayan a serbisio a kadua ni Elias, pinanawan a dagus ni Eliseo ti talonna tapno agserbi iti kangrunaan a mammadto iti Israel. Agparang a nanumo ti dadduma kadagiti annongenna, ta nagdinamag idi agangay kas daydiay “nangibukbok iti danum kadagiti ima ni Elias.”c (2 Ar-ari 3:11) Nupay kasta, imbilang ni Eliseo ti trabahona kas maysa a pribilehio, ket sisusungdo a nagtalinaed ken Elias.

Adu kadagiti adipen ti Dios ita ti mangipakpakita iti umasping nga espiritu ti panagsakripisio. Dagiti dadduma pinanawanda dagiti “talonda,” dagiti pagsapulanda, tapno ikasabada ti naimbag a damag kadagiti adayo a teritoria wenno tapno agserbi kas kameng ti pamilia a Bethel. Napan dagiti dadduma kadagiti sabali a pagilian tapno agtrabaho kadagiti proyekto a panagbangon ti Sosiedad. Adu ti nangawat kadagiti makuna a nanumo a trabaho. Nupay kasta, awan ti agserserbi ken Jehova a mangar-aramid iti awan mamaayna a serbisio. Apresiaren ni Jehova amin dagidiay madadaan nga agserbi kenkuana, ket bendisionanna ti panagsakripisioda.​—Marcos 10:29, 30.

Pulos a di pinanawan ni Eliseo ni Elias. Nagkedked a mangpanaw iti lakayen a mammadto uray no naikkan iti gundaway. Di pagduaduaan a ti nasinged a panagkaduada ken Elias ti namagbalin a makaay-ayo iti kasta a nasungdo nga ayat. Iti kaaldawantayo, ikagkagumaan dagiti adipen ti Dios a patibkeren ti relasionda iti Dios ken agbalin a nasingsinged kadagiti kapammatianda. Mabendisionan ti nadekket a panagkaykaysa, ta kuna ti Biblia maipapan ken Jehova: “Nasungdoka iti tao a nasungdo.”​—2 Samuel 22:26, NW.

[Dagiti Footnote]