Panangsaluad iti Pakabigbigantayo kas Kristiano

“‘Dakayo dagiti saksik,’ kuna ni Jehova.”​—ISAIAS 43:10.

 1. Kadagiti siasino a makisinninged ni Jehova?

NO ADDAKAYO iti Kingdom Hall, paliiwenyo a naimbag ti aglawlawyo. Siasino dagiti makitayo iti dayta a lugar a pagdayawan? Mabalin a makitayo dagiti napasnek nga agtutubo a siaatentibo nga umim-imdeng iti Nainkasuratan a sirib. (Salmo 148:12, 13) Nalabit a mapaliiwyo met dagiti ulo ti pamilia a mangikagkagumaan a mangay-ayo iti Dios bayat nga agbibiagda iti lubong a mangdaddadael iti biag ti pamilia. Mabalin a makitayo dagiti nataenganen a kakabsat, a sititibker a mangsalsalimetmet iti dedikasionda ken ni Jehova iti laksid dagiti rigat maigapu iti kinalakay wenno kinabaket. (Proverbio 16:31) Nasged ti panagayatda amin ken ni Jehova. Gapuna, pagragsakan ni Jehova ti makisinninged kadakuada. “Awan ti tao a makaumay kaniak,” impatalged ti Anak ti Dios, “malaksid no ti Ama, a nangibaon kaniak, ti mangyasideg kenkuana.”​—Juan 6: ​37, 44, 65.

2, 3. Apay a maysa a karit ti panagtalinaed a sipapanunot iti takdertayo kas Kristiano?

² Saantay kadi a maragsakan a pasetnatayo ti ili nga an-anamongan ken bembendisionan ni Jehova? Kaskasdi, iti daytoy “napeggad a tiempo a narigat a pakilangenan,” maysa a karit ti panagtalinaed a sipapanunot iti takdertayo kas Kristiano. (2 Timoteo 3:1) Nangnangruna a pudno dayta kadagiti agtutubo a napadakkel kadagiti Kristiano a pamilia. “Nupay tumabtabunoak kadagiti Nakristianuan a gimong,” inamin ti maysa nga agtutubo, “awan ti nalawag a naespirituan a kalatko, ken kinapudnona, awan a talaga ti personal a tarigagayko nga agserbi ken ni Jehova.”

³ Nupay pudno a tarigagayan ti dadduma ti agserbi ken ni Jehova, mabalin a masingada kadagiti nakaro a panangpilit dagiti kakadua, kadagiti nailubongan nga impluensia, ken kadagiti pagannayasan nga agbasol. No maipasangotayo iti nakaro nga impluensia, mabalin nga in-inut a kumapuy ti takdertayo kas Kristiano. Kas pagarigan, adu ita ti mangmatmat kadagiti moral a pagalagadan ti Biblia kas kadaanan wenno saan a maibagay iti moderno a lubong. (1 Pedro 4:4) Para kadagiti dadduma, saan a napateg nga idayawda ti Dios iti wagas nga imbilinna. (Juan 4:24) Iti surat ni Pablo kadagiti taga Efeso, kinunana a ti lubong ket addaan iti “espiritu,” wenno agraraira a kababalin. (Efeso 2:2) Dayta nga espiritu ti nakaro a mangim-impluensia kadagiti tattao a tumulad iti panagpampanunot ti kagimongan a di makaam-ammo ken Jehova.

 4. Kasano nga impaganetget ni Jesus ti kinapateg ti panangsaluadtayo iti nalawag a pakabigbigantayo kas Kristiano?

⁴ Nupay kasta, kas dedikado nga ad-adipen ni Jehova, ammotayo a nakalkaldaang para iti asinoman kadatayo​—​ubbing man wenno nataengan​—​no mapukaw ti pakabigbigantayo kas Kristiano. Ti umiso a panangmatmat iti Kinakristiano ket maibatay laeng kadagiti pagalagadan ni Jehova ken no ania ti namnamaenna kadatayo yantangay naparsuatayo iti ladawanna. (Genesis 1:26; Mikias 6:8) Ti nalawag a pakabigbigantayo kas Kristiano ket inyarig ti Biblia iti makinruar a kawes, a maisuot tapno makita ti amin. No maipapan iti kaaldawantayo, namakdaar ni Jesus: “Adtoy! Umayak a kas maysa a mannanakaw. Naragsak daydiay agtalinaed a siririing ket aywananna dagiti makinruar a kawesna, tapno saan koma a magna a lamolamo ket dagiti tattao makitada ti ibainna.”a (Apocalipsis 16:15) Ditay kayat nga uksoben dagiti Nakristianuan a galadtayo ken dagiti pagalagadantayo iti moral ket palubosan a sukogennatayo ti lubong ni Satanas. No mapasamak dayta, mapukawtayo dagitoy a ‘makinruar a kawes.’ Nakalkaldaang ken nakababain ti kasta a kasasaad.

5, 6. Apay a napateg ti naespirituan a kinatalged?

⁵ Dakkel ti epektona iti wagas ti panagbiag ti maysa a tao no sipapanunot nga isu ket maysa a Kristiano. Kasano? No saan a nalawag ti panangmatmatna iti takderna kas maysa nga agdaydayaw ken ni Jehova, mabalin nga agalla-alla, nga awan ti masinunuo a turongen wenno kalatna. Maulit-ulit a namakdaar ti Biblia maipapan iti kasta a panagalla-alla. “Ti agduadua,” imballaag ni adalan a Santiago, ket “umasping iti dalluyon ti baybay nga iduron ti angin ket maipalpallayog. Iti kinapudnona, saan koma a pagarupen dayta a tao nga umawatto iti aniaman manipud ken Jehova; isu ket di makapangngeddeng a tao, di agtaltalinaed kadagiti amin a dalanna.”​—Santiago 1:6-8; Efeso 4:14; Hebreo 13:9.

⁶ Kasanotay a masaluadan ti Kinakristianotayo? Kasanotay a maparayray ti apresasiontayo iti naindaklan a pribilehiotayo kas agdaydayaw iti Kangatuan? Usigenyo dagiti sumagmamano a pamay-an.

Pasingkedanyo a Kristianokayo

 7. Apay a makagunggona nga ipakaasi ken Jehova a sukimatennatayo?

⁷ Itultuloyyo a palagdaen ti relasionyo ken Jehova. Ti personal a relasionna iti Dios ti kapatgan nga ik-ikutan ti maysa a Kristiano. (Salmo 25:14; Proverbio 3:32) No mangrugi a pagduaduaantayo ti Kinakristianotayo, nasken a sukimatentayo a naimbag ti kalidad ken kalagda dayta a relasion. Mayanatup nga impakaasi ti salmista: “Sukimatennak, O Jehova, ket subokennak; pasudiem dagiti bekkelko ken ti pusok.” (Salmo 26:2) Apay a napateg ti kasta a pannakasukimat? Gapu ta ditay kabaelan a sukimaten dagiti kaunggan a motibo ken pagannayasantayo. Ni Jehova laeng ti makabael a mangsukisok iti makin-uneg a kinataotayo​—​dagiti motibo, pampanunot, ken emosiontayo.​—Jeremias 17:9, 10.

 8. (a) Kasano a makagunggona kadatayo ti pannubok ni Jehova? (b) Ania ti nakatulong kadakayo a rumang-ay kas Kristiano?

⁸ No kiddawentayo ken ni Jehova a sukimatennatayo, aw-awisentayo a subokennatayo. Mabalin nga ipalubosna a mapasamak dagiti situasion a mangipalgak iti pudpudno a motibo ken kasasaad ti pusotayo. (Hebreo 4:12, 13; Santiago 1:22-25) Masapul a sanguentayo dagita a pannubok ta dayta ti gundawaytayo a mangipakita no kasano ti kinasungdotayo ken Jehova. Dayta ti mangipalgak no ‘naan-anay ken nasalun-attayo met laeng iti amin a bambanag, a saan nga agkurang iti aniaman.’ (Santiago 1:2-4) Bayat a masubsuboktayo, agmataengantayo iti naespirituan.​—Efeso 4:22-24.

 9. Apay a napateg a datayo a mismo ti mangpaneknek iti bagitayo a pudno dagiti isursuro ti Biblia?

⁹ Paneknekanyo iti bagiyo a pudno dagiti isursuro ti Biblia. Mabalin a kumapuy ti pannakariknatayo nga ad-adipennatayo ni Jehova no saan a solido a naibatay dayta iti pannakaammo iti Kasuratan. (Filipos 1:9, 10) Tunggal Kristiano​—ubing wenno nataengan​—masapul a paneknekanna iti bagina a talaga a pudno dagiti patpatienna kas naibatay iti Biblia. Indagadag ni Pablo kadagiti kapammatianna: “Siguraduenyo dagiti amin a banag; kumpetkayo a siiirut iti nasayaat.” (1 Tesalonica 5:21) No kadagiti agtutubo a Kristiano a kameng dagiti pamilia nga agdaydayaw iti Dios, saanda koma a basta sumurot lattan iti pammati dagiti dadakkelda. Imparegta a mismo ni David iti anakna a ni Solomon nga ‘ammuenna ti Dios ni amana ket agserbi kenkuana buyogen ti naan-anay a puso.’ (1 Cronicas 28:9) Saan a mabalin a basta agbuya lattan ni agtutubo a Solomon bayat a patanoren ni amana ti pammatina ken ni Jehova. Isu a mismo ti masapul a mangam-ammo ken Jehova, ket kasta ti inaramidna. Inyararawna iti Dios: “Itdem kaniak ita ti sirib ken pannakaammo tapno makaruarak iti sanguanan daytoy nga ili ken tapno makastrekak.”​—2 Cronicas 1:10.

10. Apay a saan a dakes ti mangyimtuod iti napasnek a salsaludsod buyogen ti umiso a motibo?

¹⁰ Ti natibker a pammati ket naibatay iti pannakaammo. “Ti pammati sumaruno iti banag a nangngeg,” kinuna ni Pablo. (Roma 10:17) Ania ti kayatna a sawen? Kayatna a sawen a no gumun-odtayo iti pannakaammo iti Sao ti Dios, mapabilegtayo ti pammati ken panagtalektayo ken ni Jehova, kadagiti karina, ken iti organisasionna. Dagiti napasnek a salsaludsod maipapan iti Biblia makaipaayda kadagiti mangpatalged a sungbat. Kanayonanna, iti Roma 12:2, mabasatayo ti balakad ni Pablo: ‘Paneknekanyo iti bagbagiyo ti naimbag ken makaay-ayo ken naan-anay a pagayatan ti Dios.’ Kasanotay a maaramid dayta? Babaen ti pananggun-od “iti umiso a pannakaammo iti kinapudno.” (Tito 1:1) Ti espiritu ni Jehova matulongannatayo a mangtarus uray kadagiti narigat a topiko. (1 Corinto 2:11, 12) Masapul nga ikararagtayo ti tulong ni Jehova no marigatantayo a mangtarus iti maysa a banag. (Salmo 119:10, 11, 27) Kayat ni Jehova a maawatan, mamati, ken agtulnogtayo iti Saona. Apresiarenna dagiti napasnek a saludsod a nabuyogan iti umiso a motibo.

Determinadokayo Koma a Mangay-ayo iti Dios

11. (a) Ania a natural a tarigagay ti mabalin a mangsilo kadatayo? (b) Kasanotay a maaddaan iti tured a mangsaranget iti impluensia dagiti kakadua?

¹¹ Ikagumaanyo nga ay-aywen ti Dios, saan a ti tao. Natural laeng no makitimpuyogtayo iti maysa a grupo kas paset ti panangparayray iti personalidadtayo. Kasapulantay amin ti maaddaan kadagiti gagayyem, ket naragsaktayo no awatendatayo. Kabayatan ti kinaagtutubo​—ken uray inton nataenganen​—nabileg ti impluensia dagiti kakadua, a mangpataud iti dakkel a tarigagay a tumulad wenno mangay-ayo iti sabsabali. Ngem saan a kanayon a ti pagimbagantayo ti pampanunoten dagiti gagayyem ken kakaduatayo. No dadduma, kayatda laeng nga adda kaduada nga agaramid iti di umiso. (Proverbio 1:11-19) No agpaimpluensia ti maysa a Kristiano iti dakes a kakadua, masansan nga ilimedna ti kinasiasinona. (Salmo 26:4) “Saanyo a tultuladen dagiti ugali iti daytoy a lubong,” impakdaar ni apostol Pablo. (Roma 12:2, Ti Baro a Naimbag a Damag Biblia) Ipaay ni Jehova ti makin-uneg a kired a kasapulantayo a mangdaer iti aniaman a mangimpluensia kadatayo a tumulad iti daytoy a lubong.​—Hebreo 13:6.

12. Ania a prinsipio ken ulidan ti mangpabileg kadatayo nga agtalinaed a natibker iti pammati no nairaman ti panagtalektayo iti Dios?

¹² No adda makinruar nga impluensia a mamagpeggad iti takdertayo kas Kristiano, nasayaat a laglagipen a napatpateg nga amang ti kinasungdotayo iti Dios ngem iti ibaga dagiti tattao wenno iti ar-aramiden ti kaaduan. Natalged a prinsipio ti ibaga ti Exodo 23:2: “Dika sumurot iti bunggoy maipaay kadagiti dakes a panggep.” Idi a ti kaaduan nga Israelita pinagduaduaanda ti abilidad ni Jehova a mangtungpal kadagiti karina, saan a pulos a timmulad kadakuada ni Caleb. Ammona a mapagtalkan dagiti kari ti Dios, ket sibabaknang a nagunggonaan iti dayta a takderna. (Numeros 13:30; Josue 14:6-11) Sidadaankay met kadi a saan nga agpaimpluensia kadagiti kapanunotan ti kaaduan tapno masaluadanyo ti relasionyo iti Dios?

13. Apay a nainsiriban nga ipakaammotayo a Kristianotayo?

¹³ Ipakaammoyo a maysakayo a Kristiano. No maipapan iti panangsalaknib iti pakabigbigantayo kas Kristiano, agaplikar ti pagsasao a ti opensa ti kasayaatan a depensa. Idi a dagiti matalek nga Israelita naipasangoda iti ibubusor gapu iti panagreggetda a mangaramid iti pagayatan ni Jehova idi kaaldawan ni Ezra, kinunada: “Dakami ti ad-adipen ti Dios ti langlangit ken ti daga.” (Esdras 5:11) No agpaapektartayo kadagiti reaksion ken kritisismo dagiti bumusbusor, mabalin a ditay makapagtignay gapu iti buteng. Kumapuy ti determinasiontayo no kanayon a kayattayo a maay-ayo ti isuamin. Gapuna, dikay agbuteng. Kanayon a pagimbaganyo no nalawag nga iyam-ammoyo ti bagiyo kas maysa a Saksi ni Jehova. Iti nadayaw ngem natibker a pamay-an, mabalinyo nga ilawlawag dagiti prinsipio, patpatien, ken takderyo kas maysa a Kristiano. Ipakaammoyo kadagiti sabsabali a determinadokayo a mangsalimetmet kadagiti nangato a pagalagadan ni Jehova mainaig iti moral. Ilawlawagyo a saanyo a mabalin nga ikompromiso ti kinatarnawyo kas Kristiano. Ipakitayo a pagragsakanyo dagiti moral a pagalagadanyo. (Salmo 64:10) Mangpabileg ken mangsaluad kadakayo ti panagbalinyo a naiduma kas natibker a Kristiano, ken mabalin a matignay pay ketdi dagiti dadduma nga agimtuod maipapan ken ni Jehova ken kadagiti adipenna.

14. Rumbeng kadi a maupaytayo no maipasangotayo iti panangumsi wenno ibubusor? Ilawlawagyo.

¹⁴ Wen, mabalin nga adda dagiti mangumsi wenno mangbusor kadatayo. (Judas 18) Dikay koma maupay no saanda nga ipangag ti panangikagumaanyo a mangilawlawag kadagiti pagalagadan a sursurotenyo. (Ezequiel 3:7, 8) Uray an-annuenyo, diyo pulos makombinsir ti tattao a dida kayat ti makombinsir. Laglagipenyo ni Faraon. Awan ti saplit wenno milagro​—uray pay ti pannakapapatay ti mismo nga inauna nga anakna​—a nangkombinsir ken ni Faraon a ni Moises ket agsasao kas pannakangiwat ni Jehova. Gapuna, diyo ipalubos a pakapuyennakayo ti panagbuteng iti tao. Makatulong ti panagtalek ken pammati iti Dios tapno madaerantayo ti buteng.​—Proverbio 3:5, 6; 29:25.

Agsursurokayo iti Napalabas, Agsaganakayo Para iti Masanguanan

15, 16. (a) Ania ti naespirituan a tawidtayo? (b) Kasano a makagunggona kadatayo ti panangutob iti naespirituan a tawidtayo babaen ti panangusartayo iti Sao ti Dios?

¹⁵ Tagipatgenyo ti naespirituan a tawidyo. Babaen ti panangusarda iti Sao ti Dios, makagunggona kadagiti Kristiano no utobenda ti nabaknang a naespirituan a tawidda. Dayta a tawid ramanenna ti kinapudno iti Sao ni Jehova, ti namnama a biag nga agnanayon, ken ti dayaw a mangibagi iti Dios kas manangiwaragawag iti naimbag a damag. Makitayo kadi ti lugaryo kas maysa kadagiti Saksina, kas kameng ti naparaburan a grupo ti tattao a nakaitalkan ti mangsalbar iti biag a trabaho a panangikasaba iti Pagarian? Laglagipenyo, ni Jehova a mismo ti nangpasingked: “Dakayo dagiti saksik.”​—Isaias 43:10.

¹⁶ Mabalinyo nga imtuoden iti bagiyo dagiti saludsod a kas iti: ‘Kasano kapateg kaniak ti naespirituan a tawidko? Naan-anay kadi ti panangipategko iti dayta ket iyun-unak iti biagko ti panangaramid iti pagayatan ti Dios? Nalagda kadi ti apresasionko iti dayta tapno mabaelak a sarangten ti aniaman a pannulisog a mabalin a pakaigapuan ti pannakapukawko iti dayta a tawid?’ Ti naespirituan a tawidtayo ket mangted met kadatayo iti di magaraw a naespirituan a kinatalged a matagiragsak laeng iti uneg ti organisasion ni Jehova. (Salmo 91:1, 2) Ti panangrepaso kadagiti naisangsangayan a pasamak iti moderno-aldaw a pakasaritaan ti organisasion ni Jehova ket mangpatalged kadatayo nga awan ti tao wenno aniaman a banag a mabalin a mangikisap iti ili ni Jehova ditoy daga.​—Isaias 54:17; Jeremias 1:19.

17. Ania pay ti kasapulan malaksid iti panagpannuraytayo iti naespirituan a tawidtayo?

¹⁷ Siempre, saantay laeng nga agpannuray iti naespirituan a tawidtayo. Masapul a patanoren ti tunggal maysa kadatayo ti nasinged a relasionna iti Dios. Kalpasan a pinabileg ni Pablo ti pammati dagiti Kristiano idiay Filipos, nagsurat kadakuada: “Iti kasta, dungdungnguek, iti wagas a kankanayon a panagtulnogyo, saan laeng a kabayatan ti kaaddak, no di ket ad-adda pay a sisasagana ita kabayatan ti kaawanko, itultuloyyo nga itrabaho ti bukodyo a pannakaisalakan buyogen ti buteng ken panagpigerger.” (Filipos 2:12) Saan nga agpannuray iti sabali a tao ti pannakaisalakantayo.

18. Kasano a dagiti Nakristianuan nga aktibidad parayrayenda ti pannakariknatayo a Kristianotayo?

¹⁸ Agbalinkayo nga okupado kadagiti Nakristianuan nga aktibidad. Nakuna a “dakkel ti impluensia ti trabaho iti kinataotayo.” Naibilin kadagiti Kristiano ita nga aramidenda ti napateg a trabaho a panangikasaba iti naimbag a damag maipapan iti naipasdeken a Pagarian ti Dios. Kinuna ni Pablo: “Iti kinapudnona, yantangay maysaak nga apostol iti nasnasion, padayagek ti ministeriok.” (Roma 11:13) Naidumatayo iti lubong gapu iti trabahotayo a panangasaba, ket ad-adda nga agminar a Kristianotayo no makiramantayo iti dayta. No okupadotayo iti dadduma pay a teokratiko nga aktibidad, kas kadagiti Nakristianuan a gimong, programa a panagibangon kadagiti lugar a pagdayawan, panangtulong kadagiti agkasapulan, ken dadduma pay, ad-adda a mariknatayo a Kristianotayo.​—Galacia 6:9, 10; Hebreo 10:23, 24.

Nalawag a Takder, Makita a Bendision

19, 20. (a) Aniada a gunggona ti personal a tinagiragsakmo kas maysa a Kristiano? (b) Ania ti pakaibatayan ti pudpudno a kinasiasinotayo?

¹⁹ Utobenyo apagbiit ti adu a gunggona ken pagsayaatan a tagtagiragsakentayo gapu ta pudnotayo a Kristiano. Maysa a pribilehio ti personal a panangbigbig kadatayo ni Jehova. Kinuna ni mammadto a Malakias: “Nagsao iti maysa ken maysa dagidiay agbuteng ken Jehova, tunggal maysa iti kaduana, ket ni Jehova nangipangpangag ken immim-imdeng. Ket maysa a libro a pakalaglagipan nangrugi a masuratan iti sanguananna maipaay kadagidiay agbuteng ken Jehova ken maipaay kadagidiay mangpampanunot iti naganna.” (Malakias 3:16) Ibilangnatayo ti Dios kas gagayyemna. (Santiago 2:23) Naragragsak ti biagtayo no addaan dayta iti nalawag a direksion, nauneg a kaipapanan, ken makagunggona ken nabunga a kalat. Adda pay namnamatayo nga agbiag nga agnanayon.​—Salmo 37:9.

²⁰ Laglagipenyo a ti pudno a kinasiasino ken pategyo kas indibidual ket agpannuray iti panangmatmat ti Dios kadakayo, saan nga iti panangmatmat dagiti tattao kadakayo. Mabalin a matmatandatayo dagiti tattao sigun kadagiti depektibo a pagannurotan ti tao. Ngem ti panagayat ken personal nga interes ti Dios ti pakaibatayan ti pudpudno a pategtayo​—gapu ta kukuanatayo. (Mateo 10:29-31) Iti sabali a bangir, ti panagayattayo iti Dios ti kangrunaan a mangpasingked iti kinasiasinotayo ken mangipaay iti kasayaatan a direksion ti biagtayo. “No ti asinoman ayatenna ti Dios, am-ammona daytoy a tao.”​—1 Corinto 8:3.

[Footnote]

Malagipyo Kadi?

• Apay a napateg a saluadantayo ti pakabigbigantayo kas Kristiano?

• Kasanotay a mapasingkedan ti Kinakristianotayo?

• No maipasangotayo iti saludsod no siasino ti ay-aywentayo, ania a bambanag ti makatulong kadatayo a mangaramid iti umiso a desision?

• Kasano a ti panagbalintayo a sipapanunot iti kinasiasinotayo apektaranna ti masanguanantayo kas Kristiano?

[Dagiti Ladawan iti panid 21]

Ad-adda nga agminar ti Kinakristianotayo no okupadotayo kadagiti Nakristianuan nga aktibidad