Ti Sao ni Jehova Nabiag

Dagiti Tampok iti Libro a Job

AGNANAED idi ni patriarka a Job idiay daga ti Uz, a sakup itan ti Arabia. Adu nga Israelita ti agnanaed idiay Egipto iti dayta a tiempo. Nupay saan nga Israelita, agdaydayaw ni Job ken ni Jehova a Dios. Kastoy ti kuna ti Biblia maipapan kenkuana: “Awan asinoman a kas kenkuana iti daga, maysa a lalaki nga awan pakababalawanna ken nalinteg, agbuteng iti Dios ken sumiasi iti dakes.” (Job 1:8) Kalpasan la ketdi daytoy ti panawen ni Jose nga anak ni Jacob ken kasakbayan ti panawen ni mammadto a Moises​—dua a naisangsangayan met nga adipen ni Jehova.

Ni Moises, a maipagarup a nangisurat iti libro a Job, nalabit nadamagna ti maipapan ken Job kabayatan ti 40 a tawen a panagnaedna idiay Midian, nga asideg iti daga ti Uz. Nalabit nadamag ni Moises ti maipapan kadagiti maudi a tawen ni Job idi adda dagiti Israelita iti asideg ti Uz, idi arinunos ti 40 a tawen a temporario a panagnaedda iti let-ang.a Nagpintas ti pannakaisurat ti kapadasan ni Job ta uray la a dayta a salaysay ket maibilang nga obra maestra iti literatura. Ngem ad-adda ngem iti dayta, sungbatanna dagiti saludsod a kas iti: Apay nga agsagaba dagiti naimbag a tattao? Apay nga ipalpalubos ni Jehova ti kinadakes? Kabaelan aya dagiti imperpekto a tattao ti agtalinaed a natarnaw iti Dios? Kas paset ti naipaltiing a Sao ti Dios, nabiag ken mangpabileg agingga ita ti mensahe iti libro a Job.​—Hebreo 4:12.

‘MAPUKAW KOMA TI ALDAW A PANNAKAYANAKKO’

(Job 1:1–3:26)

Adda idi aldaw iti saklang ti Dios a kinarit ni Satanas ti kinatarnaw ni Job. Inawat ni Jehova ti karit ken pinalubosanna ni Satanas a mangparigat ken Job iti agsasaruno a kalamidad. Ngem ni Job saanna nga ‘inlunod ti Dios.’​—Job 2:9.

Dimteng ti tallo a gagayyem ni Job tapno ‘makipagriknada kenkuana.’ (Job 2:11) Nakikatugawda a di nagun-uni agingga a nagsao met laengen ni Job kalpasan ti nabayag a panagulimekda: “Mapukaw koma ti aldaw a pannakayanakko.” (Job 3:3) Kaykayatna a nagbalin la koman a “kas iti ubbing a saan a nakakita iti lawag,” wenno natay a naipasngay.​—Job 3:11, 16.

Sungbat Kadagiti Nainkasuratan a Saludsod:

1:4​—Rinambakan aya dagiti annak ni Job ti panagkasangayda? Saan. Ti sasao a nausar iti orihinal a lenguahe ket agduma agpaay iti “aldaw” ken “panagkasangay.” Tunggal maysa kadagitoy adda bukodna a kaipapanan. (Genesis 40:20) Iti Job 1:4, nausar ti sao nga “aldaw,” a mangipasimudaag iti tiempo manipud isisingising agingga iti ilelennek ti init. Nabatad a maminsan iti kada tawen, pito nga aldaw nga agtataripnong ti pamilia ti pito a lallaki nga annak ni Job. Bayat nga ar-aramidenda dayta sigun iti batangda, tunggal anak a lalaki ket agpasken iti balayna iti “mismo nga aldawna.”

1:6; 2:1​—Siasino dagiti napalubosan a sumrek iti saklang ni Jehova? Karaman kadagidiay dimmatag iti saklang ni Jehova ket ti bugbugtong nga Anak ti Dios, ti Sao; dagiti matalek nga anghel; ken dagiti nasukir nga anghel nga ‘annak ti Dios,’ agraman ni Satanas a Diablo. (Juan 1:1, 18) Sa la napapanaw ni Satanas ken dagiti demoniona manipud langit di nagbayag kalpasan a naipasdek ti Pagarian ti Dios idi 1914. (Apocalipsis 12:1-12) Babaen ti panangipalubosna a sumrekda iti saklangna, indatag ni Jehova iti imatang ti amin nga espiritu a parsua ti karit ni Satanas ken dagiti isyu a pinataud dayta.

1:7; 2:2​—Direkta kadi a nakisarita ni Jehova ken Satanas? Awan unay ti indetalye ti Biblia no kasano a makikomunikar ni Jehova kadagiti espiritu a parsua. Nupay kasta, nasirmata ni mammadto Mikaias ti maysa nga anghel a direkta a makikomkomunikar ken Jehova. (1 Ar-ari 22:14, 19-23) Agparang ngarud a direkta a nakisarita ni Jehova ken Satanas, nga awan ti maysa a mangibabaet.

1:21​—Kasano a makasubli ni Job iti ‘tian ni inana’? Yantangay ni Jehova a Dios pinarsuana ti tao “manipud tapok a naggapu iti daga,” piguratibo a nausar ditoy ti termino nga ‘ina’ a tumuktukoy iti daga.​—Genesis 2:7.

2:9​—Ania ti mabalin a kasasaad ti panunot ti asawa ni Job idi imbagana ken lakayna nga ilunodna ti Dios ken matay? Napukaw met ti asawa ni Job ti isu met laeng a napukaw ni lakayna. Sigurado a nasaem ti riknana idi nakitana a nagsakit iti nakaar-ariek ti dati a nasalun-at a lakayna. Natayan kadagiti dungdungnguenna nga annak. Mabalin a mariribukan unay idi gapu kadagitoy isu a dinan napanunot ti kapatgan nga isu ti relasionda iti Dios.

Dagiti Masursurotayo:

1:8-11; 2:3-5. Kas ipakita ti kapadasan ni Job, malaksid iti umiso nga aramid ken tignay, ti kinatarnaw kalikagumanna ti umiso a motibo iti panagserbi ken Jehova.

1:21, 22. Babaen ti panagtalinaedtayo a nasungdo ken Jehova iti sidong dagiti nasayaat ken dakes a kasasaad, mapaneknekantayo nga ulbod ni Satanas.​—Proverbio 27:11.

2:9, 10. Kas ken Job, rumbeng a kanayon a natibker ti pammatitayo uray no dagiti kapamiliatayo dida ipateg dagiti naespirituan a kalattayo wenno pilitendatayo pay ketdi a mangikompromiso wenno mangtallikud iti pammatitayo.

2:13. Dagiti gagayyem ni Job awan a pulos ti makaliwliwa a maibagada maipapan iti Dios ken kadagiti karina agsipud ta dida minatmatan ti bambanag sigun iti panangmatmat ti Dios.

“SAANKONTO NGA IKKATEN KANIAK TI KINATARNAWKO!”

(Job 4:1–31:40)

Ti kangrunaan nga inyunay-unay ti tallo a gagayyem ni Job iti palawagda ket adda la ketdi nagdakes nga inaramid ni Job isu a linak-amna ti nakaro a pannusa ti Dios. Ni Elifaz ti immun-una a nagsao sa simmaruno ni Bildad iti ad-adda a makapasakit. Nakarkaro met a manglais ti panagsasao ni Zofar.

Saan a maawat ni Job ti palso a panagrasrason dagiti sangailina. Gapu ta dina maawatan no apay nga ipalpalubos ti Dios ti panagsagabana, nalabes ti panangikalinteganna iti bagina. Nupay kasta, ni Job ay-ayatenna ti Dios isu a kastoy ti imbagana: “Agingga a mauyos ti biagko saankonto nga ikkaten kaniak ti kinatarnawko!”​—Job 27:5.

Sungbat Kadagiti Nainkasuratan a Saludsod:

7:1; 14:14​—Ania ti kaipapanan ti ‘inkapilitan a panagtrabaho’? Napalalo ti rigat ni Job ta uray la nga ipagarupna a ti biag ket makabannog nga inkapilitan a panagtrabaho. (Job 10:17, footnote ti New World Translation of the Holy Scriptures​—With References) Yantangay ti tiempo a busbosen ti maysa idiay Sheol​—manipud iti ipapatay ti maysa agingga iti panagungarna​—ket inkapilitan a tiempo, inyarigna ida iti inkapilitan a panagtrabaho.

7:9, 10; 10:21; 16:22​—Dagitoy kadi a sasao ipasimudaagda a saan a mamati ni Job iti panagungar? Salsalaysayen dagitoy ti asideg idin a masakbayan ni Job. Ania ngarud ita ti kayat a sawen ni Job? Ti maysa a posibilidad ket no matay man, awan kadagiti kasadaranna ti makakita kenkuana. Manipud iti panangmatmatda, saanen a makasubli ni Job iti balayna wenno makagun-od pay iti pannakabigbig agingga iti naituding a tiempo ti Dios. Mabalin a kayat met a sawen ni Job nga awan ti makapagsubli manipud iti Sheol a bukbukodna. Iti Job 14:13-15, nabatad a nangnamnama ni Job iti masanguanan a panagungar.

10:10​—Kasano a ni Jehova ‘imbukbokna ni Job kas iti gatas ken kas iti keso tapno pagbalayenna’? Maysa daytoy a daniw a mangiladawan iti pannakabukel ni Job iti aanakan ni nanangna.

19:20​—Ania ti kayat a sawen ni Job iti sasao a “Makatalawak a kas iti kudil ti ngipenko”? Babaen ti panagkunana a nakatalaw iti kudil ti agparang nga awan kudilna, nalabit ibagbaga ni Job a nakatalaw nga awan a pulos ti naitugotna.

Dagiti Masursurotayo:

4:7, 8; 8:5, 6; 11:13-15. Rumbeng a ditay agdarasudos a mangipagarup a ti tao nga agrigrigat ap-apitenna ti immulana ken awanan iti anamong ti Dios.

4:18, 19; 22:2, 3. Rumbeng a ti balakadtayo naibasar iti Sao ti Dios, saan nga iti bukodtayo nga opinion.​—2 Timoteo 3:16.

10:1. Nariro ni Job gapu iti napalalo a ladingitna, isu a dina inusig ti dadduma a pay a mabalin a makagapu iti panagsagabana. Rumbeng a saan nga agsakit ti nakemtayo no agsagsagabatayo, nangruna no nalawag ti pannakaawattayo kadagiti bambanag.

14:7, 13-15; 19:25; 33:24. Kabayatan ti aniaman a pannubok a mabalin nga ipagteng ni Satanas kadatayo, ti namnama a panagungar mapabilegnatayo.

16:5; 19:2. Ti sasaotayo ket rumbeng a mangparegta ken mangpabileg iti dadduma, saan a makapasuron kadakuada.​—Proverbio 18:21.

22:5-7. Awan serserbina ken makadangran ti balakad a naibasar kadagiti pammabasol nga awanan kadagiti natibker nga ebidensia.

27:2; 30:20, 21. Ti panangtaginayon iti kinatarnaw saanna a kalikaguman nga agbalintayo a perpeksionista. Nagkamali ni Job iti panangbabalawna iti Dios.

27:5. Ni laeng Job ti makaikeddeng no saan nga agtalinaed a natarnaw agsipud ta ti kinatarnaw ket agpannuray iti panagayat ti maysa a tao iti Dios. Rumbeng ngarud a patanorentayo ti nasged a panagayattayo ken Jehova.

28:1-28. Ammo ti tao ti ayan dagiti gameng ti daga. Bayat a birbirokenna dagitoy, ti kinalaingna ti makagapu a makadanon kadagiti desdes iti uneg ti daga a saan a makita ti tumatayab a makakita iti biktimana iti adayo a disso. Nupay kasta, ti nadiosan a sirib ket agtaud iti panagbuteng ken Jehova.

29:12-15. Rumbeng a situtulok nga ipakitatayo ti naayat a kinamanangngaasi kadagiti agkasapulan.

31:1, 9-28. Nangipakita kadatayo ni Job iti ulidan ta liniklikanna ti panagalembong, pannakikamalala, kinaawan hustisia ken di naasi a panangtrato iti sabsabali, materialismo, ken idolatria.

“AGBABAWIAK ITI TAPOK KEN DAPDAPO”

(Job 32:1–42:17)

Adda idi agtutubo nga agpalpaliiw nga agnagan iti Eliu a siaanus a nagimdeng iti debate. Ita, situtured a nagsao ket kinorehirna ni Job ken ti tallo a mangikuskuspil kenkuana.

Apaman a nalpas a nagsao ni Eliu, simmungbat ni Jehova manipud iti maysa nga allawig. Awan ti inlawlawagna maipapan iti panagsagaba ni Job. Ngem babaen iti agsasaruno a saludsod ti Mannakabalin-amin, impakaammona ken Job ti nakaskasdaaw a pannakabalin ken naindaklan a siribna. Inamin ni Job ti panagsaona nga awanan pannakaawat sana kinuna: “Mangaramidak iti panangibabawi, ket agbabawiak iti tapok ken dapdapo.” (Job 42:6) Idi nagpatingga ti pakasuotan ni Job, nagunggonaan ti kinatarnawna.

Sungbat Kadagiti Nainkasuratan a Saludsod:

32:1-3​—Kaano a simmangpet ni Eliu? Yantangay nangngeg ni Eliu ti amin a saritaanda, nagtugaw la ketdi iti asideg tapno mangngegna dayta sakbay pay a nagsao ni Job a namagpatingga iti pito nga aldaw a panagulimek ti tallo a gagayyemna.​—Job 3:1, 2.

34:7​—Kasano a mayarig ni Job iti lalaki “a manginum iti pananguyaw kas iti danum”? Gapu iti nakalkaldaang a kasasaadna, natural laeng nga impagarup ni Job nga isu ti um-umsien ti tallo a gagayyemna, nupay ti kinaagpaysuanna, agsasaoda a maibusor iti Dios. (Job 42:7) No kasta, aw-awatenna ti pananguyaw a kas iti tao a maragragsakan nga uminum iti danum.

Dagiti Masursurotayo:

32:8, 9. Saan nga edad ti pangrukodan iti kinasirib. Tapno agbalin a masirib ti maysa a tao, masapul a maawatanna ti Sao ti Dios ken agpaiwanwan iti espiritu ti Dios.

34:36. Ti kinatarnaw ket mapaneknekan babaen ti panagbalintayo a ‘nasubok agingga iti pagpatinggaan’ iti nadumaduma a pamay-an.

35:2. Dimngeg a naimbag ni Eliu ken dinakamatna ti pudno nga isyu sakbay a nagsao. (Job 10:7; 16:7; 34:5) Sakbay a mamalakad dagiti Kristiano a panglakayen, masapul a dumngegda a naimbag, ammuenda dagiti agpayso a kasasaad, ken anagenda a naimbag dagiti maitutop nga isyu.​—Proverbio 18:13.

37:14; 38:1–39:30. Ti panangutob kadagiti nakaskasdaaw nga aramid ni Jehova​—a mangipasimudaag iti pannakabalin ken siribna​—pagpakumbabaen ken tulongannatayo a mangamiris a napatpateg ti pannakaalangon ti kinasoberanona ngem iti aniaman kadagiti bukodtayo a pagimbagan.​—Mateo 6:9, 10.

40:1-4. No agannayastayo nga agreklamo maibusor iti Mannakabalin-amin, rumbeng nga ‘apputentayo ti ngiwattayo.’

40:15–41:34. Anian ti kinapigsa ti Behemot (ti hipopotamo) ken Leviatan (ti buaya)! Tapno makapagibturtayo iti panagserbitayo iti Dios, kasapulantayo met ti bileg, nga ipapaay ti Namarsua kadagitoy napigsa nga animal.​—Filipos 4:13.

42:1-6. Ti panagimdeng iti sao ni Jehova ken pannakaipalagip ti parangarang ti pannakabalinna ti nakatulong ken Job tapno ‘makitana ti Dios,’ wenno maawatanna ti kinapudno maipapan iti Namarsua. (Job 19:26) Daytoy ti nangbalbaliw iti panunotna. No umawattayo iti pannakaatur manipud iti Biblia, sigagagartayo koma a mangbigbig kadagiti kamalitayo tapno makapagbalbaliwtayo.

Tuladentayo “ti Panagibtur ni Job”

Ti libro a Job nalawag nga ipakitana a saan a ti Dios ti makinggapuanan iti panagsagaba ti tao no di ket ni Satanas. Ti panangipalubos ti Dios iti kinadakes ditoy daga ti mangted kadatayo iti gundaway a mangted iti personal a sungbat maipapan iti panangmatmattayo iti isyu ti kinasoberano ni Jehova ken ti kinatarnawtayo.

Kas ken Job, masubok ti amin nga agay-ayat ken Jehova. Ti pakasaritaan ni Job ti mangted iti panagtalek a makapagibturtayo. Ipalagipna kadatayo a saan nga agnanayon dagiti parikuttayo. “Nangngegyo ti panagibtur ni Job ket nakitayo ti nagbanagan nga impaay ni Jehova,” kuna ti Santiago 5:11. Ginunggonaan ni Jehova ni Job gapu iti kinatarnawna. (Job 42:10-17) Anian a nadayag a namnama ti agur-uray kadatayo​—biag nga agnanayon iti Paraiso a daga! Kas ken Job, ikagumaantayo koma ti agtalinaed a natarnaw.​—Hebreo 11:6.

[Footnote]

[Dagiti Ladawan iti panid 16]

Ania ti maadaltayo iti “panagibtur ni Job”?