Umadanika iti Dios

“O Jehova, . . . Ammonak”

“TI KAKARUAN a parikut ti maysa a tao ket no awan ti ammona a maseknan ken makaawat kenkuana.”a Nariknam met kadin nga awan ti maseknan wenno makaawat iti mapaspasaram a parikut? No kasta, mabalin a makaliwliwa kenka daytoy: Maseknan unay ni Jehova kadagiti adipenna ta ammona amin a mapaspasamak iti inaldaw a panagbiagda. Daytoy ti ipasigurado kadatayo ti sasao ni David iti Salmo 139.

Mamati ni David a maseknan kenkuana ti Dios, kas ipasimudaag ti nagsayaat sasao nga inyebkasna: “O Jehova, sinukimatnak, ket ammonak.” (Bersikulo 1) Ti Hebreo a berbo a naipatarus a ‘sukimaten’ ket mabalin a tumukoy iti panagkali iti napateg a bato (Job 28:3), panangsukimat iti maysa a lugar (Uk-ukom 18:2), wenno panangusig kadagiti ebidensia iti legal a kaso (Deuteronomio 13:14). Wen, talaga nga am-ammonatayo ni Jehova a kas man la nausignan ti amin nga aspeto ti kaaddatayo. Ipamatmat dagitoy a sasao ni David nga interesado ti Dios iti tunggal adipenna. Usigenna ida ket am-ammona ida kas indibidual.

Nagsayaat ti panangiladawan ni David iti naan-anay a panangsukimat ti Dios, ket kinunana: “Sika naammuam ti panagtugawko ken itatakderko. Naimutektekam ti panunotko manipud adayo.” (Bersikulo 2) Adda ni Jehova iti “adayo,” idiay langit a taengna. Ngem ammona no agtugawtayo, nalabit no malpas ti maysa nga atiddog nga aldaw, kasta met no bumangontayo iti agsapa a mangaramid kadagiti inaldaw nga aktibidadtayo. Ammona met ti pampanunoten, tarigagay, ken panagemtayo. Ipapan kadi ni David a maab-abuso iti kasta a pannakasukimatna? Saan, ta maragsakan ketdi a masukimat. (Bersikulo 23, 24) Apay?

Ammo ni David a naimbag ti panggep ni Jehova iti panangsukimatna kadagiti adipenna. Impamatmat ni David daytoy idi insuratna: “Ti panagbaniagak ken panagunnatko rinukodmo, ket naammuam unay uray pay ti amin a daldalanko.” (Bersikulo 3) Inaldaw a makita ni Jehova ti ‘amin a daldalantayo’​—dagiti biddut ken dagiti naimbag a naaramidantayo. Ti laeng kadi dakes ti kitkitaenna wenno iti pay naimbag? Ti Hebreo a sao a naipatarus a “rukoden” mabalin a kaipapananna ti “yakayaken,” wenno “taepan,” no kasano a ti mannalon ikkatenna dagiti taep tapno maurnongna dagiti napateg a binukel. Ti sasao a “maammuan unay” a nagtaud iti Hebreo a sao mabalin a kaipapananna ti “ipateg.” Bayat nga inaldaw nga us-usigen ni Jehova ti sasawen ken ibagbaga dagiti agdaydayaw kenkuana, ilalaenna dagiti naimbag a naaramidanda. Apay? Apresiarenna ngamin dagiti panagreggetda a mangay-ayo kenkuana.

Isuro kadatayo ti Salmo 139 a dungdungnguen ni Jehova dagiti adipenna. Sukimaten ken aywananna ida bayat ti inaldaw a panagbiagda. Ngarud, ammona dagiti problemada, ket maawatanna ti pakasikoran ken pakadanaganda. Matignayka kadi a mangidayaw iti kasta a maseknan a Dios? No kasta, masiguradom daytoy: dinto pulos lipaten ni Jehova ‘ti aramidmo ken ti ayat nga impakitam maipaay iti naganna.’​—Hebreo 6:10.

Singasing a Basaen iti Biblia iti Setiembre:

◼ Salmo 119-150

[Footnote]